Yowana 10 - Iimuuma Iinyaaya

Ekirengekanyo kya omureefi owa omutima omujomu

¹ Yeesu ˆnaagenderera okwaika ati, “Enibhabhwira ekimari ati, omuunu woonewoone unu atakwingirira mu-muryango akeenda okwingira mw-ibhago rya giingʼondi, tari kaarwanya okwingirira ayandi, uyo ni mwifi na muunu unu kaateesha abhaanu ebhiinu bhyebhwe. Omuryango gwa okwingirira mw-ibhago rya giingʼondi.

² Nawe unu keengirira mu-muryango gwa riibhago, uyo ni omureefi wa giingʼondi.

³ Omwigusi wa omuryango keegurira uyo, na giingʼondi egyungwa riisi ryaye. Omureefi uyo amenyere amasiina ga giingʼondi, kaagibhirikira ˆnaagiwurusha anja.

⁴ Akawurusha anja giingʼondi gyaye gyone kutyo, kaagitangatira, na giingʼondi gyone ngimuseeta, kwa okubha gimenyere riisi ryaye.

⁵ Giingʼondi gitakutura okuseeta omureefi omugenyi, tari gikamuungwa egibhirima, kwa okubha gitakumenya esi ryaye.”

⁶ Yeesu ꞉aabhwiriiye Abhafarisaayo ekirengekanyo kiyo, nawe abheene ꞉bhataasombookeeywe amangʼana ganu ꞉aariga ˆnaabhabhwira.

⁷ Mmbe, Yeesu ˆnaabhabhwira kweki ati, “Enibhabhwira ekimari ati, ni anye omuryango gunu giingʼondi egiturira okwingira mw-ibhago.

⁸ Bhanu ꞉bhaantangatiiye bhoone kutyo ni bheefi, na bhaanu bhanu abhateesha abhaanu ebhiinu bhyebhwe, nawe giingʼondi ꞉gitaabheetegeeresiishe.

⁹ Ni anye omuryango. Woonewoone unu keengira mw-ibhago okuturira ku-anye aryerusibhwa, ariingira na okuwuruka, na arinyoora obhunyansi obhujomu.

¹⁰ Omwifi kaaja insonga eebhe giingʼondi, eete, na okunyamura. Nawe anye niijire insonga abhaanu bhabhe na obhurame, na bhabhe nabhwo bhwafu.

¹¹ “Ni anye omureefi owa omutima omujomu. Omureefi owa omutima omujomu keesoosha obhurame bhwaye ku-nsonga ya giingʼondi gyaye.

¹² Omuunu unu keesiga okuriywa, unu giingʼondi gitari gyaye, uyo atari mureefi. Akarora insunji niija, kaasiga ayo giingʼondi ˆnaabhirima, insunji niigwata giingʼondi, egindi ngibhirima enu na enu.

¹³ Omuunu uyo kaabhirima, kwa okubha ni muunu unu keesiga okuriywa, na ku-mwene giingʼondi kitari kiinu, kwa okubha gitari gyaye.

¹⁴ “Ni anye omureefi owa omutima omujomu. Nimenyere giingʼondi gyani, na gyone gimmenyere,

¹⁵ rwa kutyo Raata aammenyere, na rwa kutyo anye noone nimumenyere. Anye noone enisoosha obhurame bhwani ku-nsonga ya giingʼondi gyani.

¹⁶ Niri na giingʼondi egindi ginu gitari gya mw-ibhago rinu, giyo gyone eyeendwa nigireete anu nigireebhe. Giingʼondi giyo gyone, girimenya riisi ryani. Ikamara okubha kutyo, eribha-wo eyijo rimwi, na mureefi wumwi.

¹⁷ “Raata anyendere, kwa okubha enisoosha obhurame bhwani, insonga nibhugege kweki.

¹⁸ Atariwo omuunu unu kaatura okunsoosisha-mo obhurame bhwani, tari ni anye omwene enibhusoosha-mo. Anye niri na obhuturo bhwa okubhusoosha-mo, na niri na obhuturo bhwa okubhusubhya-mo kweki. Ni Raata omwene niwe ꞉aandagiriiye okukora kutyo.”

¹⁹ Bhunu ꞉bhoonguuywe amangʼana gayo, Abhayawudi mbaawukana kweki abheene na abheene.

²⁰ Abhayawudi abhaafu mbaaika ati, “Unu ari na ekiwi! Na ni musasi! Kubhaki omumwitegeeresha?”

²¹ Nawe abhandi mbaaika ati, “Amangʼana gayo gatari ga muunu unu ari na ekiwi. Angu, ekiwi ekitura okukora omuwofu arore?”

Abhaanu abhaafu abharema Yeesu

²² Mu-nsiku giyo, Yerusareemu eyo ꞉yaariga iriyo insikukuru ya Abhayawudi eya okuyiita kutyo riiyekaru rya Nyamuwanga ꞉ryeesiibhwe. Akabhaga kayo, ꞉kaariga kari ka mbewo.

²³ Yeesu ꞉aariga ˆnaaribhata mw-ibhanja rya riiyekaru, mw-Igaragaanja rya Seremaani.

²⁴ Abhayawudi abhandi mbamwiyinda, mbamubhuusha ati, “Owuuja okukinyansha okukwiganiirisha okuyikira rusukuki? Raabhe ni awe Kiriisitu, nuukibhwire abhweru.”

²⁵ Nawe Yeesu ˆnaabhasubhya ati, “Anye naamarire okubhabhwira kutyo, nawe emwe mutakwikirisha. Ebhiruguusho bhinu enikora ku-bhuturo bhwa Raata, nibhyo ebhyaika ati anye ni niga.

²⁶ Nawe emwe mutakwikirisha kwa okubha emwe mutarimo mu-ngʼondi gyani.

²⁷ Giingʼondi gyani egyungwa riisi ryani. Anye nigimenyere, egyene gyone eginseeta.

²⁸ Anye enigiyaana obhurame bhunu bhutakuweera, na gitakutura okubhura. Na atariwo omuunu unu kaatura okugisaakura mu-mabhoko gaani.

²⁹ Raata unu ꞉aaginaaye, ni mukuru okukira bhoone kutyo. Na atariwo omuunu unu kaatura okugisaakura mu-mabhoko gaaye.

³⁰ Anye na Raata kiri kiinu kimwi.”

³¹ Ayo niwe Abhayawudi mbabhooja amagina kweki, insonga bhamubhume nago, bhamukomere.

³² Nawe Yeesu ˆnaabhabhwira ati, “Naabheeresiishe ebhiruguusho bhyafu bhinene bhinu ebhisooka ku-Raata. Ni kiruguushoki ku-bhiyo kinu ekikora mwende okumbuma na amagina?”

³³ Abhayawudi mbamusubhya ati, “Kitakukubhuma na amagina ku-nsonga ya okukora amangʼana amajomu ganu owukora, tari kwa okubha owujabhura Nyamuwanga. Na owiikora ati awe uri Nyamuwanga, enu awe uri muunu era, rwa abhaanu abhandi!”

³⁴ Yeesu ˆnaabhabhuusha ati, “Angu, itakaamirwe mu-Makaamo geemwe aga ebhiraagiro ati Nyamuwanga ꞉aaikire ati, ‘Emwe ni bhaanyamuwanga’?

³⁵ Ikaamirwe mu-Makaamo Amataakatiifu ati, abhaanu bhanu bharamiiye amangʼana ga Nyamuwanga, Nyamuwanga omwene ꞉aabhaaikire ati ni bhaanyamuwanga. Na eswe kimenyere ati, ganu gakaamirwe mu-Makaamo Amataakatiifu ni kimari.

³⁶ Raata niwe ꞉aansorere, ˆnaantuma mu-kyaro anu. Woori kubhaki omwaika ati, enijabhura Nyamuwanga nikaaika ati, ‘Anye niri Mwana wa Nyamuwanga’?

³⁷ Raabhe nitakukora emirimu gya Raata, ambe musige okunyiikirisha.

³⁸ Nawe raabhe enikora emirimu gya Raata, raabhé kutyo mutakunyiikirisha anye, mwikirishe emirimu giyo. Ayo niwe omuuja okumenya ati, Raata ari mu-mutima gwani, anye noone niri mu-mutima gwa Raata.”

³⁹ Bhunu Abhayawudi ꞉bhoonguuywe amangʼana gayo, mbeenda okumugwata kweki, nawe Yeesu ˆnaatereesuka mu-mabhoko geebhwe.

⁴⁰ Mmbe, Yeesu ˆnaagenda kweki ngʼambu ya oruuji rwa Yorodaani, ˆnaayika anu Yowana ꞉aariga ˆnaabhatiisisha abhaanu, ˆneekara eyo.

⁴¹ Abhaanu bhaafu mbamuuja-ko, mbaaika ati, “Ni kimari Yowana ꞉ataakorere ekimenyegesho kyonekyone, nawe amangʼana goone kutyo ganu ꞉aariga ˆnaaikira Yeesu, ꞉gaariga gari ga kimari.”

⁴² Abhaanu bhaafu bhanu ꞉bhaariga bhari ayo, mbeekirisha Yeesu.