Yowana 1 - Iimuuma Iinyaaya

Omwana wa Nyamuwanga ꞉aariga ariwo bhusimukwa

¹ Bhusimukwa ꞉ryariga ririwo Riingʼana, Riingʼana uyo, ꞉aariga ari ku-Nyamuwanga. Na Riingʼana ꞉aariga ari Nyamuwanga.

² Bhusimukwa, Riingʼana uyo ꞉aariga ari ku-Nyamuwanga.

³ Ebhiinu bhyone kutyo ꞉bhyabhumbirwe okuturira Riingʼana uyo. Kitariwo kiinu na kimwi kinu ꞉kyabhumbirwe, kitabhumbirwe nawe.

⁴ Mw-ingʼana muyo nimwo ꞉bhwariga bhuri obhurame bhwone kutyo, na obhurame bhuyo nibhwo obhureeta obhweru mu-bhaanu.

⁵ Obhweru bhuyo obhumirika mu-kisuute, na ekisuute kitakutura okubhuyiga.

⁶ ꞉Eejire omuunu wumwi unu ꞉aariga atumirwe na Nyamuwanga. Omuunu uyo ꞉aariga ˆnaatogwa Yowana.

⁷ Yowana ꞉aariga eejire okubhwira abhaanu iiguru ya obhweru bhuyo, insonga abhaanu bhoone kutyo bhabhwikirishe okuturira ku-mangʼana gaaye.

⁸ Yowana omwene ꞉aariga atari obhweru bhuyo, tari ꞉eejire okubhwira abhaanu amangʼana iiguru ya obhweru bhuyo.

⁹ ꞉Bhwariga bhuriwo obhweru obhwenebhwene, unu kaamirikira abhaanu bhoone kutyo, ꞉aariga ˆnaaja ku-kyaro.

¹⁰ ꞉Aariga ariwo mu-kyaro, okuturira omwene uyo, ekyaro ꞉kyabhumbirwe. Nawe, abhaanu bha mu-kyaro ꞉bhataamumenyere.

¹¹ ꞉Eejire ku-bhaanu bhaaye, nawe abhaanu bhaaye ꞉bhataamuramiiye.

¹² Tari, abhaanu bhoone kutyo bhanu ꞉bhaamuramiiye, ꞉aabhayaaye obhuturo bhwa okubha bhaana bha Nyamuwanga. Bhayo ni bhanu bheekirisiishe riisiina ryaye.

¹³ Bhayo bhatari abhaana bha Nyamuwanga kwa okubha ati ꞉bheebhuuywe na amaanyinga, amwi ati kutyo omubhiri ogwenda, amwi ati obhukene bhwa muunu, tari okwibhurwa kwebhwe kusookere ku-Nyamuwanga.

¹⁴ Mmbe, Riingʼana uyo ˆnaabha muunu, ˆneekara kw-iswe. Na eswe kyone nkirora obhugungyo bhwaye, obhugungyo bhwa Omwana omumwemwe, unu kaasooka ku-Raata Nyamuwanga. Eejuuye giinema na ekimari.

¹⁵ Yowana ꞉aabhwiriiye abhaanu, aamuuye obhuraka ˆnaaikaga ati, “Unu niwe unu ꞉naariga nimbabhwira ati, ‘Omuunu unu kaaja iinyuma waani, abheeye imbere ku-anye, kwa okubha ꞉aariga ariwo anye nikyari okwibhurwa.’ ”

¹⁶ Ni kuriingʼaana na obhuswereene bhwaye, Nyamuwanga akiyaaye eswe kyone kutyo iinema yaaye, na kaagenderera okukyongesisha giinema ku-nema yaaye.

¹⁷ Kara, Nyamuwanga ꞉aasoosiishe ebhiraagiro bhyaye okuturira ku-Musa. Woori, areetere iinema yaaye na ekimari okuturira ku-Yeesu Kiriisitu.

¹⁸ Atariwo muunu woonewoone unu ararorere Nyamuwanga. Tari Nyamuwanga Omwana, omwene era niwe ari ayeeyi na Raata Nyamuwanga, na niwe atuuye abhweru Nyamuwanga.

Amangʼana ganu Yowana ꞉aabhwiriiye abhaanu

¹⁹ Rusuku rumwi, abhatangasha bha Bhayawudi ꞉bhaatumire abhashengesi na Abharaawi okusooka Yerusareemu, bhagende ku-Yowana. Bhunu ꞉bhaamuyikire-ko mbamubhuusha ati, “Awe ni niga?”

²⁰ ꞉Ataabhabhisire, ˆnaabhabhwira ekimari ati, “Anye nitari Kiriisitu.”

²¹ Mbamubhuusha kweki ati, “Woori awe ni niga? Angu, awe ni omuragi Eriya?” Yowana ˆnaabhasubhya ati, “Wuri, anye nitari Eriya.” Abheene mbamubhuusha kweki ati, “Angu, ni awe omuragi unu ekirindirira okusooka ku-Nyamuwanga?” Yowana ˆnaabhasubhya ati, “Wuri, nitari anye.”

²² Mbamubhuusha kweki ati, “Ambe woori awe ni niga? Nuukibhwire insonga kigende kibhwire bhanu bhaakituma. Awe omwene owiiyaaikira kutiki?”

²³ Yowana ˆnaabhasubhya okuriingʼaana na amangʼana ganu omuragi Isaaya ꞉aaikire ati, “Ni anye ‘Obhuraka bhwa omuunu unu kaamura mw-ibhara ati, Mwimye anu Raatabhugenyi kaaja okutura!’  ”

²⁴ Abhaanu bhanu ꞉bhaariga bhatumirwe ku-Yowana, ꞉bhaariga bhasookere na ku-Bhafarisaayo.

²⁵ Abhaanu bhayo mbamubhuusha ati, “Raabhe awe utari Kiriisitu, na utari muragi Eriya, na omuragi unu ekirindirira okusooka kwa Nyamuwanga, ndora owubhatiisha abhaanu?”

²⁶ Yowana ˆnaabhasubhya ati, “Anye enibhatiisha abhaanu mu-manji, nawe agati weemwe ariwo muunu unu emwe mutakumenya.

²⁷ Uyo niwe unu kaaja iinyuma waani. Anye niteesire na kwinama okumusurumurira gingoye gya ebhikwirya bhyaye.”

²⁸ Amangʼana gayo goone kutyo ꞉gaakorekere mw-igunguri rya Bhetaaniya, ebhuwuruka esuubha obhwa oruuji rwa Yorodaani, anu Yowana ꞉aariga ˆnaabhatiisisha abhaanu.

Yeesu ni Ngʼondi ya Nyamuwanga

²⁹ Mwejo, Yowana ˆnaarora Yeesu ˆnaamuuja-ko. ˆNaabhwira abhaanu bhanu ꞉bhaariga bhari ayo ati, “Murore, uyo niwe Iingʼondi ya Nyamuwanga, unu kaagega ebhikayo bhya abhaanu bhoone kutyo abha ekyaro kinu!

³⁰ Unu niwe unu ꞉naariga nimbabhwira ati, ‘Omuunu unu kaaja iinyuma waani, abheeye imbere ku-anye, kwa okubha ꞉aariga ariwo anye nikyari okwibhurwa.’

³¹ Anye noone ꞉naariga nitakumumenya, nawe ꞉neejire okubhatiisha abhaanu na amanji insonga atuurwe abhweru ku-bhaanu bha Ijirayeeri.”

³² Niwe Yowana ˆnaabhabhwira ganu ꞉aariga arorere, ˆnaaikaga ati, “Naarora Mwoyo Omutaakatiifu ˆnaamwikira okusooka mu-rwire ˆnaasusaga rwa inguuti ˆnaamwikara-ko.

³³ Anye naanitakumumenya, nawe Nyamuwanga unu ꞉aantumire okubhatiisha ꞉aariga ambwiriiye ati, ‘Omuunu unu uraarore Mwoyo waani ˆnaamwikira, kimwi ˆnaamwikara-ko, uyo niwe aribhatiisha abhaanu na Mwoyo Omutaakatiifu.’ ”

³⁴ Yowana ˆnaagenderera okwaika ati, “Anye omwene naarora iingʼana iyo, na enibhabhwira ati, unu ni Mwana wa Nyamuwanga.”

Abheeyigira abha okwamba abha Yeesu

³⁵ Katondo yeende-ko, Yowana ꞉aariga ayambaaye amwi na bheeyigira bhabhiri, mu-bheeyigira bhaaye.

³⁶ Niwe ˆnaarora Yeesu ˆnaaribhataga, ˆnaabhwira abheeyigira bhaaye ati, “Muringire, uyo niwe Iingʼondi wa Nyamuwanga!”

³⁷ Bhunu abheeyigira bhayo ꞉bhoonguuywe amangʼana gayo, mbaseeta Yeesu.

³⁸ Yeesu ˆneekebhuukira, ˆnaarora abheeyigira bhayo mbamuseeta. ˆNaabhabhuusha ati, “Angu, omwagaraki?” Abheene mbamusubhya ati, “Ee Raabhi, wiikaaye aaki?” Insonga ya riingʼana “Raabhi” ni “Mwiyigisha.”

³⁹ Yeesu ˆnaaika ati, “Ambe muuje, omuuja okurora-wo.” Niwe mbamuseeta, mbagenda anu ꞉aariga eekaaye, mbarora-wo. Anu ꞉bhaayikire ayo, ꞉yaariga iri keegoro mu-nsa ekumi, orusuku ruyo mbamaama ayo.

⁴⁰ Owumwi wa abheeyigira abhabhiri bhanu ꞉bhoonguuywe amangʼana ga Yowana mbaseeta Yeesu, ꞉aariga ˆnaatogwa Ndereya, omumura waabho Simooni Peetero.

⁴¹ Ndereya ˆnaagenda okwagara Simooni, omumura waabho. Bhunu ꞉aamunyoorere, ˆnaamubhwira ati, “Kyarora Masiya!” Masiya, insonga yeende-ko ni “Kiriisitu.”

⁴² Niwe Ndereya ˆnaasira Simooni ku-Yeesu. Yeesu ˆnaaringira Simooni, ˆnaamubhwira ati, “Awe ni Simooni, omwana wa Yowana. Nawe okwambira woori, riisiina ryawo eriija okubha Keefa.” Riisiina riyo mu-Kiyunaani ni Peetero, insonga yeende-ko, ni “Etare.”

Yeesu kaasora abheeyigira abhandi bhabhiri

⁴³ Katondo yeende-ko, Yeesu ˆnaaramura ati agende Gariraaya. Gariraaya eyo ˆnaarora-yo Firipo, ˆnaamubhwira ati, “Nuuje, unseete.”

⁴⁴ Firipo ꞉aariga ari muunu wa mu-musi gwa Bheetisayida, mu-musi guyo, nimwo Ndereya, na Peetero bhoone ꞉bhaariga bheekaaye.

⁴⁵ Mmbe, Firipo ˆnaarora Naataniyeri, ˆnaamubhwira ati, “Kyarora omuunu unu Musa ꞉aakaamire amangʼana gaaye mu-kitabho kya Ebhiraagiro, unu abharagi bhoone ꞉bhaakaamire amangʼana gaaye. Riisiina ryaye ni Yeesu omumura wa Yuusufu, asookereeye Naajareeti.”

⁴⁶ Nawe Naataniyeri ˆnaabhuusha Firipo ati, “Ekiinu ekijomu ekitura okusooka Naajareeti?” Firipo ˆnaamusubhya ati, “Nuuje, urore.”

⁴⁷ Bhunu Yeesu ꞉aarorere Naataniyeri ˆnaamuuja-ko, ˆnaaika ati, “Rora omuunu uyo, ni Muijirayeeri omwenemwene, atakubhisa kiinu mu-mutima gwaye.”

⁴⁸ Naataniyeri ˆnaabhuusha Yeesu ati, “Waammenya kutiki?” Yeesu ˆnaamusubhya ati, “Firipo akyari okukubhirikira, anye naanamarire okukurora wiikaayega ansi mw-itiini.”

⁴⁹ Naataniyeri ˆnaamusubhya ati, “Mwiyigisha, awe uri Mwana wa Nyamuwanga! Ni awe Omukama wa Ijirayeeri!”

⁵⁰ Yeesu ˆnaamubhuusha ati, “Angu, owiikirisha kwa okubha naakubhwira ati naakurora wiikaaye ansi mw-itiini? Owuuja okurora amangʼana agandi amanene okukira ganu!”

⁵¹ Yeesu ˆnaagenderera okwaika ati, “Kimari enibhabhwira ati, omuuja okurora orwire rwigukire, bhaamaraayika bha Nyamuwanga mbariinya na okwika ku-Mwana wa Adaamu.”