Yakobho 5 - Iimuuma Iinyaaya

Abhaniibhi abhakana bhasige obhukana

¹ Ambe woori emwe abhaniibhi, munyiitegeereshe kujomu! Mwamure obhuraka murire mutogoonyaga, kwa okubha iinyanko iinene eyibhaaja-ko.

² Obhuniibhi bhwemwe bhubhorere, na gingibho gyemwe giriiwe na amasiribhi.

³ Ebhiinu bhya giijaabhu na giiyera gyemwe, gikerebheeye, na obhukerebheeye bhuyo nibhwo obhuuja okweresha abhweru kutyo emwe omukora amangʼana amabhiibhi okuturira ku-bhuniibhi bhwemwe. Ku-nsiku gya obhuteero ginu, mwibhikiiye obhuniibhi bhwemwe bhwone kutyo. Nawe obhukerebheeye bhuyo bhurirya emibhiri gyemwe rwa kutyo omuriro ogwokya ebhiinu mbiwa-wo.

⁴ Mwitegeereshe muungwe, abhaanu bhanu ꞉bhaabhakoreeye emirimu mu-masambu geemwe murema okubhariya kutyo abhabharirira. Na bhanu ꞉bhaabhageseeye bhoone abhabharirira na ekiriro kyebhwe kiyikire ku-Nyamuwanga, Raatabhugenyi wa Obhuturo bhwone kutyo.

⁵ Mwikaaye ku-kyaro kunu, na okuturira ku-bhuniibhi bhwemwe omukora amajomerwa ga mu-kyaro, mwiyamiishe, woori omugenda okuramurirwa, muri rwa intyanyi inu ireebhere kujomu, na woori iri ayeeyi okwitwa.

⁶ Muramuriiye abhaanu abharengeresi mubheeta, enu bhatayajeene na emwe.

Musimbiire okuyikira anu Raatabhugenyi Yeesu arisubha

⁷ Mmbe woori, Bhakiriisitu bheejaasu, mugenderere okusimbiira okuyikira anu Raatabhugenyi arisubha. Mwiyigire ku-murimi, kutyo kaarindirira ebhirimwa bhyaye mw-isambu, kaarindirira okuyikira ku-kabhaga ka okugesa ebhirimwa ebhijomu. Kaarindirira ebhirimwa bhyaye bhigwirwe ingubha ya okwamba na eya akabhiri niwe agese.

⁸ Nikwo kutyo eyeendwa emwe mwone musimbiire, na mukomeere mu-mitima gyemwe, kwa okubha Raatabhugenyi ari ayeeyi okusubha.

⁹ Bhakiriisitu bheejaasu, mwasiga okwiririijirana insonga mwasiga okuramurirwa. Mwitegeereshe! Omuramusi ari ayeeyi okusubha.

¹⁰ Bhakiriisitu bheejaasu, mwiyigire obhusimbiiru bhwa ebhinyansho ku-bharagi bhanu ꞉bhaariga mbaaika amangʼana ganu Raatabhugenyi Nyamuwanga ꞉aabhatumire.

¹¹ Nyakara bhanu abhasimbiira mu-bhinyansho na woori. Mwoonguuywe amangʼana ga Ayubhu kutyo ꞉aasimbiirire, na mumenyere kutyo Raatabhugenyi ꞉aamukoreeye amajomu ku-bhuteero. Gayo goone kutyo ni kwa okubha ekigongo ku-Raatabhugenyi Nyamuwanga ni bhyafu.

¹² Okukira gayo goone kutyo, Bhakiriisitu bheejaasu, mwasiga okurayirira ku-rwire, ekyaro amwi ati kurayira ku-kiinu kyonekyone. Tari ekimari kyemwe kibhe “kimari,” na rinu ritari kimari mwaike ati, “itari kimari.” Mutakorere kutyo omuuja okuramurirwa.

Musabhe Nyamuwanga muri na obhwikirisha mu-mitima

¹³ Muri na omuunu agati weemwe unu ari mu-bhinyansho agati? Naasabhe ku-Nyamuwanga. Ariwo woonewoone unu omutima gwaye gusaasamukire? Embe ameembo ga okukumangya Nyamuwanga.

¹⁴ Muri na omurwaye agati weemwe? Naabhirikire abhakaruka bha riikanisa, bhaaje bhamusabhire ku-Nyamuwanga, bhamuyake na amafuta kw-isiina rya Raatabhugenyi Yeesu.

¹⁵ Na bhakamusabhira bhari na obhwikirisha mu-mitima gyebhwe, Raatabhugenyi Yeesu kaamwimusha aworere. Raabhé akabha akorere ebhikayo, kaabhirwa.

¹⁶ Mmbe, mwigambane ebhikayo bhyemwe emwe abheene na abheene, na musabhirane ku-Nyamuwanga, muwosibhwe amarwara geemwe. Obhusaasaami bhwa omuunu omurengeresi ku-Nyamuwanga bhuri na amanaga ga okukora amangʼana gabhe.

¹⁷ Omuragi Eriya, ꞉aariga ari muunu rwa eswe. Omwene ꞉aasabhire Nyamuwanga oomiiye-ko, ati ingubha isige okuragasha ku-kyaro. Ingubha niisiga okugwa ebhaga rya myaka esatu na meesi gasansabha.

¹⁸ Niwe kweki, ˆnaasabha Nyamuwanga ati ingubha igwe ku-kyaro. Ingubha niigwa abhaanu mbanyoora ebhyokurya.

¹⁹ Bhakiriisitu bheejaasu, owumwi weemwe akayabha ˆnaasiga ekimari kya Nyamuwanga, owundi naamusubhye kweki ku-njira ya ekimari,

²⁰ mumenye ati, omuunu akaagaanya omuunu omukayi asige ebhikayo bhyaye, kaabha amwerusiishe okusooka mu-rufu, na omukayi uyo kaabhirwa ebhikayo bhyaye raabhé bhikabha bhyafu.