Yakobho 3 - Iimuuma Iinyaaya

Mwiyangarire ku-ganu omuroma

¹ Bhakiriisitu bheejaasu, mwasiga okubha bheeyigisha bhaafu bha Amangʼana ga Nyamuwanga agati weemwe, kwa okubha mumenyere ati Nyamuwanga kaaja okukiramurira eswe abheeyigisha okukira abhandi.

² Ni kimari ati, abhaanu bhoone kutyo abhayabha ku-mangʼana maafumaafu. Omuunu unu atakuyabha ku-ganu kaaroma, omuunu uyo ni murengeresi, kaatura okuyinga na omubhiri gwaye gwone kutyo.

³ Eswe abhaanu ekituura ebhyuma bhitooto era mu-minwa gya giifwaraasi, insonga gikore kutyo eswe ekyenda, na kigitangashe okuja woonewoone enu ekyenda.

⁴ Ukaringira iimeeri yoone, raabhé kutyo ni nene muno, na eyikuurwa na muyaga mwafu, nawe eyitangasibhwa na rusukaani rutooto era, okugenda woonewoone anu nyewoja keenda igende.

⁵ Nikwo kutyo na orurimi rwone, ni kigwatanya kitooto era ku-mubhiri, nawe orukora omuunu eyeeme muno. Ringira na kutyo omuriro omutooto era, oguweeresha oruwuusi!

⁶ Na orurimi rwone ruri rwa omuriro, rwijuuye obhubhiibhi bhwone kutyo. Orurimi ni kigwatanya kimwi era ku-bhigwatanya bhyeswe ebhya omubhiri, nawe orusweranya obhubhiibhi ku-mubhiri gwone kutyo, oruweeresha obhurame bhwa omubhiri rwa omuriro gunu gutakusimá.

⁷ Abhaanu abhatura okutuga gintyanyi gyonegyone, giinyonyi, ebhisoro, na ebhibhumbwa bhyone kutyo ebhya mu-nyanja.

⁸ Nawe atariwo muunu unu kaatura okuyinga orurimi. Ni rubhiibhi, rutakusimbiira amwi, rukomeeye okutungwa, orwita rwa obhusungu bhwa ekisoro.

⁹ Orurimi ruyo, nirwo ekikumangisha Raata Nyamuwanga weeswe. Na ruyoruyo nirwo ekiyiimira abhaanu bhanu ꞉bhaabhumbirwe na Nyamuwanga abharengekanyiishe na omwene.

¹⁰ Mu-munwa ogumwi guyoguyo nimwo agasooka amangʼana ga okukumangya, na amangʼana ga okwiyiima. Bhakiriisitu bheejaasu, gayo gatakwendwa gabhe kutyo kw-imwe.

¹¹ Kitariwo ekijegeje kinu ekigesha amanji amajomu na amanji ga omuunyu!

¹² Bhakiriisitu bheejaasu, angu riiti rya riitiini eritura okutwasha amatwasho ga emijeyituuni? Amwi ati riiti rya emijabhiibhu ritwashe amatwasho ga riitiini? Mmbe, na ekijegeje kya amanji ga omuunyu kitakutura okugesha amanji amajomu.

Obhwenge bhwa ekimari obhusooka ku-Nyamuwanga

¹³ Agati weemwe ni wuuya kaaika ati ari na obhwenge na ni mumenyi wa mangʼana? Mmbe ˆnaabhwereshe okuturira ku-ntungwa gyaye ginjomu, ˆnaakoraga na ebhikorwa ebhijomu, okuturira ku-bhufura bhunu obhureetwa na obhwenge bhuyo.

¹⁴ Nawe, raabhe mukabha na orwango, okubhiiyirirwana na okwiyenda abheene, mwasiga okwikumangya ati muri na obhwenge, omwijimya era.

¹⁵ Obhwenge mbaga iyo, bhutakusooka ku-Nyamuwanga, tari ni bhwa ku-kyaro kunu, ni bhubhiibhi obhusooka ku-Sitaani.

¹⁶ Woonewoone anu orwango ruri, na okwiyenda abheene, bhutariwo bhuungwani, tari ayo niwe amabhiibhi agandi goone kutyo gari.

¹⁷ Nawe, obhwenge bhunu obhusooka ku-Nyamuwanga, okwamba ni bhweru na bhwendere omurembe, bhuri na obhufura, na obhwitegeeresha abhaanu abhandi. Bhwijuuye ekigongo na ebhikorwa ebhijomu, bhutari na bhusoroori amwi ati kwaika ganu utakukora.

¹⁸ Abhaanu bha omurembe, bhakayamba imbibho ya omurembe, niwe abhaaja okugesa ebhikorwa ebhirengeresi ku-Nyamuwanga.