Yakobho 2 - Iimuuma Iinyaaya

Mwasiga okubha bhasoroori

¹ Bhakiriisitu bheejaasu, mwikirisiishe Raatabhugenyi weeswe Yeesu Kiriisitu, uyo niwe omwene bhugungyo. Mmbe, mu-bhwikirisha bhuyo, mwasiga okusoroora abhaanu.

² Kyaike ati omuunu unu afwaye gingibho ginjomu na impete ya iijaabhu, eengira mu-misa yeemwe. Omutobhu woone ˆneengira, unu afwayega magibho matamuke.

³ Raabhe omuramira kujomu unu afwaye gingibho ginjomu, mumuyaana ekibharo, mumubhwira ati, “Awe iikara anu, niwe ajomu.” Nawe omutobhu weeki, mumubhwira ati, “Awe genda uyambaare arya,” amwi ati, “Iikara ansi anu.”

⁴ Mmbe, raabhe omukora kutyo, mutakurora ati omusoroora abhaanu? Mutakurora ati muri bharamusi bhanu omuramura kubhiibhi?

⁵ Abhakiriisitu bheejaasu abheende, munyiitegeereshe kujomu. Angu Nyamuwanga atasorere abhatobhu bha ku-kyaro kunu bhabhe bhaniibhi bha obhwikirisha, na bhabhe bhagabhi bha obhukama bhunu ꞉aaragire bhanu bhamwendere?

⁶ Nawe, emwe mujeerere muno abhatobhu! Angu murabhiiywe ati abhaniibhi bhayo nibho abhabheewonera, mbabhasira mu-mabharaja?

⁷ Abhaniibhi bhayo tari nibho abhajabhura riisiina riijomu erya Yeesu Kiriisitu rinu muyaaywe?

⁸ Mu-Makaamo Amataakatiifu, ekiraagiro kya Omukama weeswe Nyamuwanga ekyaika ati, “Wende omwikashaanya waawo, rwa kutyo owiiyenda omwene.” Raabhe omukora kutyo, omukora kujomu.

⁹ Nawe, mukasoroora abhaanu omukora ebhikayo, na ekiraagiro ekibharamurira ati muri bhakayi.

¹⁰ Omuunu akakora kutyo ebhiraagiro bhyone kutyo ebhyenda akore, kimwi ˆnaataamibhwa ku-kiraagiro ekimwi, kaabharwa ati ataamiibhwe ku-bhyone kutyo.

¹¹ Kwa okubha Nyamuwanga ꞉aaikire ati, “Waasiga okutaara ameega,” na niwe uyouyo ꞉aaikire kweki ati, “Waasiga okwita omuunu.” Raabhé kutyo utakutaara ameega, nawe ukeeta omuunu, owubharwa ati waataamibhwa okukora ganu ebhiraagiro bhyone kutyo ebhyenda.

¹² Mmbe, goone kutyo ganu omwaika na okukora, mukore okuriingʼaana na ekiraagiro kinu ekireeta obhwiyagaaro, muyiite ati ekiraagiro kiyo, nikyo Nyamuwanga aribharamuririra.

¹³ Nyamuwanga atarifwira ekigongo, unu atari na kigongo. Nawe raabhe omuunu ꞉aafwiriiye abhandi ekigongo, Nyamuwanga woone arimufwira ekigongo ku-rusuku rwa indamuro.

Obhwikirisha bhunu bhutari na bhikorwa bhijomu bhutari kiinu

¹⁴ Bhakiriisitu bheejaasu, ari na bhweraki omuunu unu kaaika ati ari na obhwikirisha enu ataabha na bhikorwa bhijomu? Angu obhwikirisha bhuyo obhutura okumwerusha?

¹⁵ Raabhe Omukiriisitu weejaanyu, abhe murume amwi ati mugasi, atari na ngibho, atari na ebhyokurya,

¹⁶ owumwi weemwe ˆnaamubhwira ati, “Genda na omurembe, Nyamuwanga akubhishe, na akuyaane ebhyokurya bhyafu wiigute,” nawe atamusakiiye okuriingʼaana na obhukene bhwaye, kaabha amusakiiyeki?

¹⁷ Nikwo kutyo, mukabha na obhwikirisha, mutaabha na bhikorwa, obhwikirisha bhuyo obhubha bhufuuye obhwene.

¹⁸ Omuunu owundi kaatura okwaika ati, “Awe uri na obhwikirisha, nawe anye niri na ebhikorwa ebhijomu.” Mmbe, anye enimubhwira ati, “Nuunyeereshe obhwikirisha bhwawo, bhunu bhutari na bhikorwa. Anye noone nikwereshe obhwikirisha bhwani okuturira ku-bhikorwa bhyani ebhijomu.”

¹⁹ Awe owiikirisha ati Nyamuwanga ariwo wumwi era. Owukora kujomu okwikirisha kutyo! Na ebhiwi bhyone, ebhiikirisha enu mbiyarara bhyubhayire!

²⁰ Omutengʼo awe! Ukyari era kumenya ati obhwikirisha bhunu bhutari na bhikorwa, bhutakusakira kyonekyone?

²¹ Kisake okuringira jaaji Bhurayimu. Bhunu ꞉aasoosiishe omwana waaye Isaaka ˆnaamutuura kw-ishengero, abhe ekimweso, ayo niwe Nyamuwanga ꞉aamubharire ati ni murengeresi mu-meeso gaaye okuturira ku-bhikorwa bhyaye.

²² Utakurora kutyo obhwikirisha bhwa Bhurayimu ꞉bhwariga mbwikirishaanya na ebhikorwa bhyaye, na obhwikirisha bhwaye, mbukuumishwa okuturira ebhikorwa bhyaye?

²³ Gayo ꞉gaakuumisiishe ganu ꞉gaariga gakaamirwe mu-Makaamo Amataakatiifu ati, “Bhurayimu ꞉eekirisiishe Nyamuwanga, niwe Nyamuwanga ˆnaamubhara ati ni murengeresi mu-meeso gaaye,” ˆnaabhirikirwa ati musaani wa Nyamuwanga.

²⁴ Mmbe woori, mwarora kutyo omuunu kaabharwa ati ni murengeresi ku-Nyamuwanga, itari ku-bhwikirisha bhwaye era, tari na ku-bhikorwa ebhijomu bhinu kaakora.

²⁵ Ni kutyokutyo na Rayabhu omugasi omusimbe wurya woone, ꞉aabharirwe ati ni murengeresi ku-Nyamuwanga okuturira ku-bhikorwa bhyaye, bhunu ꞉aaramiiye abhabhuusirisha bhanu ꞉bhaatumirwe. ˆNaamara ˆnaabhasakira okubhawurusha mu-musi, abhatusiishe ku-njira eyindi.

²⁶ Rwa kutyo omuunu akabhurwa-mo omwoyo kaabha mufuuye, nikwo kutyo na obhwikirisha bhwone bhukabhurwa-mo ebhikorwa ebhijomu, obhubha bhufuuye.