Yakobho 1 - Iimuuma Iinyaaya

¹ Iinyarubha inu eniyikaama anye Yakobho, omujuuma wa Nyamuwanga na owa Raatabhugenyi Yeesu Kiriisitu. Enibhakaamira emwe amayito ekumi na gabhiri, bhanu mwikaaye mu-bhyaro ebhindi eyo. Enibhakeesha!

Mujomerwega mukasakibhwa

² Bhakiriisitu bheejaasu, mujomerwe mw-ibhaga rinu omunyoora amasakyo ga mbaga nyafunyafu,

³ kwa okubha mumenyere ati okusakibhwa kwa obhwikirisha bhwemwe, nikwo okubhoongesha obhuturo bhwa okusimbiira.

⁴ Mugenderere okusimbiira okuyikira ku-bhuteero, insonga mubhe mukora ganu Nyamuwanga keenda goone kutyo, na mubhe bhaanu bhanu mutakusuuyirwa kiinu kyonekyone.

⁵ Raabhe omuunu woonewoone agati weemwe akasuuyirwa obhwenge, asabhe ku-Nyamuwanga, kaayaanwa. Nyamuwanga ni muyaani, kaayaana woonewoone unu kaamusabha, atakumwima.

⁶ Nawe omuunu unu kaasabha abhe na obhwikirisha, asige okwitimaata, kwa okubha omuunu akeetimaata kaarengekanywa na riibhooka, rinu eryeswa na omuyaga enu na enu mu-nyanja.

⁷ Omuunu rwa uyo aasiga kutoga ati, arinyoora kiinu kyonekyone okusooka ku-Raatabhugenyi,

⁸ kwa okubha ni muunu unu ari na meeganiirisho gabhiri, ni mwitimaati ku-mangʼana gaaye goone kutyo.

⁹ Omukiriisitu weejaanyu omutobhu ˆnaajomerwe, kwa okubha Nyamuwanga kaaja okumutuura iiguru.

¹⁰ Nawe Omukiriisitu omuniibhi woone ajomerwe, Nyamuwanga aakamwisha emwaro. Rwa kutyo amawuuwa agawa ku-bhiti, nikwo kutyo woone kaaja okuwa-wo.

¹¹ Riisuubha eriwuruka omuumwi ngubhara, indengaasi yaagwo niyuumya ebhiimesha mbiragasha amawuuwa. Amawuuwa gakaragara ebhiti mbisigara bhitakyari bhijomu kweki. Nikwo kutyo na omuniibhi woone, kaafwira mu-mirimu gyaye gya okwagara obhuniibhi.

¹² Nyakara omuunu unu kaasimbiira akabha mu-masakyo, kwa okubha akayiga amasakyo, Raatabhugenyi Nyamuwanga kaaja okumuyaana orusuurya rwa obhurame bhunu bhutakuweera, runu ꞉aaragire okuyaana abhaanu bhoone kutyo bhanu bhamwendere.

¹³ Omuunu akasakwa okukora ebhikayo, aasiga kwaika ati, “Enisakwa na Nyamuwanga,” kwa okubha Nyamuwanga atakusakya muunu woonewoone, na omwene woone atakusakibhwa okukora amabhiibhi.

¹⁴ Nawe abhaanu okusakibhwa, abhafutwa abheene mbajimibhwaga na amajomerwa geebhwe amabhiibhi.

¹⁵ Amajomerwa gayo gakakomeera ageebhura ebhikayo, na ebhikayo bhikakomeera ebhiibhura orufu.

¹⁶ Bhakiriisitu bheejaasu abheende, mwasiga okujimibhwa.

¹⁷ Emisanga, na ebhiinu ebhijomu bhinu ekiyaanwa, ebhisooka ku-Nyamuwanga mu-rwire, omwene niwe Omubhumbi wa riisuubha, okwesi na ginjota. Omwene atakuyindukayinduka rwa riirengeesi kutyo eringʼaanyangʼaanya.

¹⁸ Omwene ꞉eendere okukikora eswe kibhe bhaana bhaaye, okuturira kw-ingʼana ryaye erya ekimari. ꞉Aakorere kutyo, insonga kibhe bhigeswa bhya okwamba mu-bhiinu bhyone kutyo bhinu ꞉aabhumbire.

Okukora kutyo Riingʼana rya Nyamuwanga eryenda

¹⁹ Abhakiriisitu bheejaasu abheende, munyiitegeereshe kujomu! Mubhe bhangu okwitegeeresha, nawe mwasiga kubha bhangu bha okwaika amwi ati okubhiiyirwa.

²⁰ Enibhabhwira kutyo kwa okubha omuunu akabhiiyirwa, atakutura okubha murengeresha ku-ganu Nyamuwanga keenda.

²¹ Mmbe woori, mwikenge amangʼana amabhiibhi, na ebhikorwa ebhibhiibhi bhyone kutyo. Tari, mugwatire Riingʼana rya Nyamuwanga rinu ayambire mu-mitima gyemwe, mufuraaye, kwa okubha riyo niryo eritura okubheerusha.

²² Nawe emwe mubhe mukora kutyo Nyamuwanga keenda, mwasiga okubha bhaanu bha kwitegeeresha Amangʼana gaaye era. Mukabha bha kwitegeeresha mangʼana era enu mutaakora kutyo keenda, omubha mwijimya emwe abheene.

²³ Enibhabhwira kutyo kwa okubha omuunu woonewoone unu keetegeeresha riingʼana era, nawe atakukora kutyo eryenda akore, uyo ari rwa omuunu unu keeringira mw-irore.

²⁴ Akamara okwiringira, ˆnaasooka kw-irore, kabhaga kafuyi era, ˆnaarabhirwa kutyo ari.

²⁵ Ebhiraagiro bhya Nyamuwanga nibhyo ebhiyaana abhaanu obhwiyagaaro na bhitasuuyiiwe. Omuunu unu kaabhiringira bhyone kutyo eetegeeresiishe kujomu, ˆnaasiga okurabhirwa okukora ganu ꞉oonguuywe, uyo niwe arinyoora giinonkwe ku-gayo kaakora.

²⁶ Raabhe omuunu akeerora ati ari na iidiini, enu ataatura okuyinga rurimi rwaye okwaika amabhiibhi, keejimya omwene. Na iidiini yaaye ni ya bhusa.

²⁷ Iidiini inu eyijomisha Raata Nyamuwanga weeswe na inu itari na katogosi mu-meeso gaaye, ni okusakira abhataka na abhakimari bha ekigasi ku-nyanko yeebhwe, na okwiyangarira waasiga okukora ebhikayo uri ku-kyaro kunu.