Tiito 3 - Iimuuma Iinyaaya

Okukora amajomu

¹ Uyiityega Abhakiriisitu ati bheetuurega emwaro ku-bhatungi, na bhoongwega abha obhuturo. Na bhabhe bheetuuye-wo okukora amajomu goonegoone.

² Ubhabhwire bhaasiga okufuma muunu woonewoone, bhaasiga okubha bhayombi, bhabhe bhafura, na bheetuurega emwaro ku-bhaanu bhoone kutyo.

³ Na eswe abheene kyone, kara kikyari kwikirisha Yeesu, ꞉kyariga kiri bhasiru, kiri bhajeemi ku-Nyamuwanga, ꞉kyariga kijimiibhwe, enu kiri bhagaya bha amangʼana mbaga nyafu, kinambaariiye okukora amabhiibhi ga mbaga nyafu aga ku-kyaro kunu. Mu-bhurame bhweswe ꞉kyariga nkikoraga amabhiibhi na orwiso rwone rukiriko. Abhaanu ꞉bhaariga mbakibhiiyirirwa, eswe kyone nkibhabhiiyirirwaga.

⁴ Nawe obhujomu bhwa omutima gwa Nyamuwanga Omwerusi weeswe, na obhwendi bhwaye ku-bhaanu, anu ꞉bhwatuuywe ku-bhweru, ꞉aakyerusiishe.

⁵ Itari ati eswe ꞉kyakorere mangʼana majomu aga obhurengeresi ku-Nyamuwanga, tari ni kigongo kyaye era. ꞉Aakyesiishe obhubhiibhi bhweswe bhunu ꞉aakiibhuuye orwa akabhiri, ˆnaakiroosha bhuyaaya okuturira ku-Mwoyo Omutaakatiifu.

⁶ ꞉Aakiitiriiye Mwoyo Omutaakatiifu uyo, okuturira ku-Yeesu Kiriisitu Omwerusi weeswe.

⁷ ꞉Aakorere kutyo, insonga Nyamuwanga akamara okukibharira obhurengeresi okuturira ku-nema yaaye, akikore bhagabhi bha obhurame bhunu bhutakuweera, rwa kutyo kyone ekiisiga.

⁸ Amangʼana gayo ni ga kimari. Eneenda ukomeereshe amangʼana gayo ku-bhaanu, insonga bhanu bheekirisiishe Nyamuwanga bhoone kutyo, bhaasiga okurabhirwa okukomeera okukora amajomu. Amangʼana gayo ni majomu muno, kweki gari na omuyeero ku-bhaanu bhoone kutyo.

⁹ Amwi na gayo, iikenga na giimamba gya ekitengʼo, okutonderana amasiina ga obhwibhurwa bhwa abhaanu bha kara, giinyombo na amabhambashaanyo iiguru ya ebhiraagiro bhya Musa. Amangʼana gayo goone kutyo gatari na omuyeero gwonegwone.

¹⁰ Omuunu unu kaasokanya abhaanu, ukamara okumugonya orwa okwamba na orwa akabhiri, ˆnaarema okukuungwa, usigane nawe kimwi.

¹¹ Umenye ati omuunu rwa uyo aasigire ekimari, ni muunu unu kaakora ebhikayo, eeramuriiye omwene.

Amangʼana ga okuragana

¹² Niramuuye okugenda okwikara mu-musi gwa Nikapori erya, mu-kabhaga ka imbewo. Nawe eniija okutuma Aritema, amwi Tukiko ku-awe eyo. Owumwi weebhwe akayika eyo, awe wanguye okuuja Nikapori eyo kirorane.

¹³ Wiikomeeshe okusakira Jeena, omumenyi wa ebhiraagiro wurya, na Apooro. Ubhayaane ebhiinu ebhya okubhasakira mu-njira, bhaasiga okusuuwirwa kiinu.

¹⁴ Wiiyigishe na Abhakiriisitu bheejaasu bhoone, bhakomeere okukora amajomu, insonga bhature okusakira abha obhukene obhunene. Bhaakakora kutyo, bhurame bhwebhwe bhutakutura okubha bhwa bhusa.

¹⁵ Abhakiriisitu bhoone kutyo bhanu kiri nabho enu, abhakukeesha. Woori awe woone, nuukeeshe abheendwa bheeswe, Abhakiriisitu bheenda eyo bhoone kutyo. Iinema ya Nyamuwanga ibhe amwi na emwe mwone kutyo.