Tiito 2 - Iimuuma Iinyaaya

Ameeyigisho ga ekimari

¹ Woori awe Tiito, nwiyigishega abhaanu okuriingʼaana na ameeyigisho ga ekimari.

² Bhwira bhanu bhaakarukire, bhabhe mbeeyiinya, bhabhe bheetongeeye, bhabhe bhaanu bhanu bheetungire, bhabhe mbeekirisha ekimari, bhabhe bheendi bha abhaanu, bhature na okurindirira amangʼana.

³ Kutyokutyo abhagasi bhanu bhaakurire bhoone, ubhabhwire ati bhabhe na gintungwa ginu egigungya Nyamuwanga. Bhaasiga okubha bhagombi bha abhaanu, bhaasiga okubha bhakorwa, tari bheesire okwiyigisha amajomu,

⁴ insonga abhagasi bhanu bhakyari, bhabheeyigire-ko okwenda abharume bhwebhwe na abhaana bheebhwe.

⁵ Kweki, abhagasi bhanu bhakyari, bhabhe mbeeyiinya, bheerere emitima, bhabhe bhakosi bhajomu abha emirimu mu-nyumba gyebhwe, bhabhe abhaanu bharengeresi, na bhabhe mboongwa abharume bheebhwe. Ubhabhwire kutyo, insonga bhaasiga okukora Riingʼana rya Nyamuwanga ndijabhurwa.

⁶ Na abhamura bhoone, ubhakomeereshe bheeyiinyega.

⁷ Awe woone, mu-mangʼana goone kutyo, ubhe ekirengekanyo kya okwiyigirira-ko okukora amajomu. Na mu-meeyigisho gaawo, weereshe obhwima na ekimari wiitegeeresiishe.

⁸ Ameeyigisho gaawo gabhe ga kimari na ganu gatakwaikwa kubhiibhi na abhaanu. Raabhe omuunu keenda okugarema, eesware omwene, kwa okubha atakutura okubha na engʼana rya okukyaika kubhiibhi.

⁹ Abhagaya bhoone, ubhabhwire bhoongwe bheesebhugenyi bheebhwe, bhabhajomishe ku-mangʼana goone, bhaasiga okubhambashaanya nabho.

¹⁰ Bhaasiga okubheebhira, tari bheereshe bheesebhugenyi ati bheetongeeye, insonga obhujomu bhwa emirimu gyebhwe gyone, bhukore abhandi bhafutwe na okwikirisha ameeyigisho ga Nyamuwanga Omwerusi weeswe.

¹¹ Wiiyigishega gayo, kwa okubha iinema ya Nyamuwanga inu eyeerusha abhaanu bhoone yaatuuywe ku-bhweru.

¹² Iinema iyo, eyikiiyigisha okurema obhubhiibhi na ganu agakifuta ku-kyaro kunu. Eyeenda, mu-kabhaga kanu kiri mu-kyaro anu, kiiyiinye, kibhe bharengeresi, na bhaanu bhanu abhakora ganu Nyamuwanga keenda mu-bhurame bhweswe.

¹³ Kirame kutyo, mu-kabhaga kanu ekiisiga orusuku rurya, runu Yeesu Kiriisitu arisubha ari mu-bhugungyo bhwaye. Yeesu uyo, niwe Nyamuwanga Omwenemwene, na niwe Omwerusi weeswe.

¹⁴ ꞉Eesoosiishe omwene ku-nsonga yeeswe, insonga akituurye okusooka mu-bhubhiibhi bhwone kutyo. ꞉Eendere okukyesha, insonga kibhe abhaanu bhaaye bha ekimari, bhanu bheesoosiishe okukora amajomu.

¹⁵ Mmbe woori, wiiyigishega amangʼana gayo goone kutyo. Wiikirisiibhwe okusimbiisha na okugonya abhaanu na obhuturo bhwone kutyo. Na omuunu woonewoone aasiga kukujeera.