Tiito 1 - Iimuuma Iinyaaya

Obhukeesha

¹ Iinyarubha inu eniyikaama anye Pawuro, omujuuma wa Nyamuwanga, na omutumwa wa Yeesu Kiriisitu. Nitumirwe ku-nsonga ya okweresha abhaanu bhanu bhasorerwe na Nyamuwanga, insonga bheekirishe na okumenya ekimari kya ameeyigisho ga Yeesu Kiriisitu. Na ekimari kiyo kibhatangashe okukora ganu Nyamuwanga keenda,

² na okubhayaana obhwisige bhwa obhurame bhunu bhutakuweera. Nyamuwanga ꞉aaragire obhurame bhuyo, akyari okubhumba na kyaro, na omwene atakwaikaga rurimi.

³ Woori, ni kabhaga kanu Nyamuwanga aramuuye okweresha abhweru Iingʼana yaaye Injomu. Nyamuwanga Omwerusi weeswe aragiriiye ati aanaane emirimu gya okuraasha amangʼana gayo.

⁴ Enikukaamira awe Tiito, omwana waani owa ekimari ku-bhwikirisha bhunu kigwateene amwi. Iinema na omurembe okusooka ku-Raata Nyamuwanga na ku-Kiriisitu Yeesu Omwerusi weeswe, gibhe amwi na awe.

Tiito kaabhwirwa okuroosha amangʼana mw-ikanisa

⁵ Yego Tiito, kinu ꞉kyakorere nikakusiga Kurete ayo, ni okuroosha amangʼana agandi ganu ꞉gaasigaaye gakyari kujoma, iri amwi na okusora abhakaruka bha riikanisa ku-misi gyone, rwa kutyo ꞉naakuragiriiye.

⁶ Omukaruka wa riikanisa, keendwa abhe muunu unu atakwaikwa kubhiibhi kw-ingʼana ryoneryone. Abhe na omugasi wumwi era, abhaana bhaaye bhabhe mbeekirisha Yeesu, bhaasiga okubha bhakana amwi ati bhatari bhoongwani.

⁷ Omwangarisi wa riikanisa ayaaywe emirimu gya Nyamuwanga, kyakora omwangarisi wa riikanisa unu, keendwa abhe muunu unu atakutetwa masoro. Aasiga okubha muunu atakuungwa ga abhandi, aasiga okubha na esungu, aasiga okubha mukorwa, aasiga okubha muyombi, kweki aasiga kubha na iinambá mbiibhi ya okunyoora giiyera.

⁸ Tari abhe muyaani, abhe muunu unu kaajomererwa amajomu, abhe ˆneeyiinya, eemire omutima, abhe mutaakatiifu, na abhe muunu unu eetungire.

⁹ Abhe ˆnaagwata kujomu iingʼana ya ekimari iiguru ya Yeesu Kiriisitu, rwa kutyo ꞉eeyigisiibhwe. Abhe kutyo insonga agonye na okusimbiisha abhaanu okuturira ku-meeyigisho ga ekimari, na okuyiga bhanu abharema ameeyigisho gayo.

¹⁰ Enikubhwira kutyo, kwa okubha Kurete eyo, bhariwo abhaanu bhaafu bhanu bhatari bhoongwani ku-meeyigisho ga ekimari, abhaaika amangʼana ganu gatari na bhwera, ni bhangʼeeni, abhaafu ni bhanu bhakyomiiye ku-ntungwa gya Ekiyawudi. Abhaanu bhayo bhagaanyiibhwe okwiyigisha,

¹¹ kwa okubha abhabhusha abhaanu bhaafu mu-misi gyebhwe eyo. Abheeyigisha amangʼana ganu gateesire, insonga bhabhajimye bhabhagege-ko giiyera.

¹² Kara ꞉aariga ariwo omuragi wumwi, Mukurete, ꞉aaikire ati, “Abhakurete ni bhabheeyi nsiku gyone, bhari rwa gintyanyi gya iibhara, ni bhawubhaaru, kweki ni mbarenga!”

¹³ Amangʼana gayo ni ga kimari. Okubha kutyo, abhaanu bhayo nuubhagonyega ururire, insonga bhakomeere mu-bhwikirisha.

¹⁴ Bhasige okwitegeeresha kweki amagano ga Ekiyawudi ganu gatari na bhwera, na amaragiriro ga abhaanu bhanu bhasigire ekimari.

¹⁵ Mmbe mumenye ati, ku-bhaanu abha emitima emijomu mu-meeso ga Nyamuwanga, ebhiinu bhyone kutyo bhyeesiibhwe. Ku-bhanaabhi, na ku-bhanu bhatakwikirisha, ebhiinu bhyone kutyo ni bhinaabhi, kwa okubha obhwiganiirisha bhwebhwe na obhukene bhwebhwe, bhwamarire okubhura.

¹⁶ Abhaaika abheene ati bhamenyere Nyamuwanga, nawe ebhikorwa bhyebhwe ebhyeresha ati abhamurema. Abhaanu bhayo mbanyanku muno, ni bhajeemi, bhatari na engʼana ryoneryone ejomu.