Ruuka 8 - Iimuuma Iinyaaya

Abhagasi bhanu ꞉bhaasakiraga Yeesu

¹ Gayo ꞉geejire gaawa, Yeesu ꞉aariga ˆneeyindayinda mu-misi na mu-magunguri ˆnaaraashaga Amangʼana Amajomu aga obhukama bhwa Nyamuwanga. ꞉Eeyindaga ari amwi na abheeyigira bhaaye ekumi na bhabhiri.

² ꞉Bhaariga bhariwo na abhagasi abhandi bhanu ꞉bhaamuseetaga. Abhagasi bhayo, abhandi ꞉bhaariga bhawungirwe ebhiwi, abhandi ꞉bhaariga bhari na amarwara. Yeesu ꞉aariga abhawosiishe amarwara geebhwe, abhasoosiishe-ko na ebhiwi. Owumwi weebhwe ꞉aariga ari Maryamu Magidarena. Maryamu uyo Yeesu ꞉aariga amusoosiishe-ko bhiwi mungati.

³ ꞉Aariga ariwo Jowana, omugasi wa Kuja. Kuja uyo, niwe ꞉aariga ayambaariiye ebhiinu bhya omukama Yerode Antipa. ꞉Aariga ariwo na Suujana, na abhagasi abhandi bhaafu. Abhagasi bhayo, ꞉bhaariga mbasoosha ebhiinu bhyebhwe, okusakira Yeesu na abheeyigira bhaaye.

Ekirengekanyo ekya omubhibhi wa gimbibho

⁴ Orusuku rumwi, abhaanu bha mu-misi myafu, ꞉bhaariga bheejire ku-Yeesu, mbamusangira bhaanu bhaafu muno. Yeesu ˆnaamba okubhabhwira ekirengekanyo kinu, ˆnaaika ati,

⁵ “꞉Aariga ariwo omubhibhi wumwi, ˆnaagenda okubhibha gimbibho gyaye mw-isambu. Bhunu ꞉aariga ˆnaabhibha gimbibho giyo, egindi ꞉gyaguuye ku-njira, ngitajwa, giinyonyi ngiija ngigirya.

⁶ Egindi, ꞉gyaguuye kw-itare anu atari na mayaru maafu. ꞉Gyeejire okumera, ngibhurwa amanji, ngyuma.

⁷ Egindi, ꞉gyaguuye mu-mawa. Bhunu amawa ꞉gaamerere, ngagiyiganya.

⁸ Egindi ꞉gyaguuye ku-mayaru amajomu, ngimera kujomu, masina goone kutyo ngatwasha matwasho eganaegana.” Bhunu Yeesu ꞉aamarire okwaika amangʼana gayo, ˆnaamura obhuraka ˆnaaika ati, “Omuunu unu ari na amatwi aga okuungwira, noongwe kujomu!”

Yeesu kaasomboora ekirengekanyo kya omubhibhi

⁹ Abheeyigira bha Yeesu mbamubhuusha ati, “Ekirengekanyo kinu ekyaikiraki?”

¹⁰ ˆNaabhasubhya ati, “Nyamuwanga abhayaaye emwe okumenya gimbisike gya obhukama bhwaye, tari abhandi enibhabhwirira mu-bhirengekanyo insonga amangʼana gabhe rwa kutyo omuragi Isaaya ꞉aakaamire ati, ‘Raabhé bharaaringire bhaasiga okurora. Raabhé bharoongwe, bhaasiga okusombookerwa.’

¹¹ “Inu niyo insonga ya ekirengekanyo kinu, Riingʼana rya Nyamuwanga niryo imbibho.

¹² Gimbibho ginu ꞉gyaguuye ku-njira, egirengekanyibhwa na abhaanu bhanu abhoongwa Riingʼana rya Nyamuwanga. Bhakamara okuungwa, ayoayo, Sitaani ˆnaaja ˆnaarisoosha mu-mitima gyebhwe, bhaasiga okuriikirisha kimwi mbeerusibhwa.

¹³ Na gimbibho ginu ꞉gyaguuye kw-itare anu atari na mayaru maafu, egirengekanyibhwa na abhaanu abhandi bhanu abhoongwa Riingʼana rya Nyamuwanga, mbariramira bhajomeeywe, nawe kwa okubha bhatari na misi, abhariikirisha kabhaga kafuyi. Na akabhaga ka Sitaani okubhasakya kakayika, mbaritaatira.

¹⁴ Na gimbibho ginu ꞉gyaguuye mu-mawa, egirengekanyibhwa na abhaanu abhandi abhoongwa Riingʼana rya Nyamuwanga. Nawe mmara, mbayiganywa na obhuubha, iinambá ya obhuniibhi, na okurya obhurame, mu-bhurame bhwebhwe. Gayo agakora bhasige okukura.

¹⁵ Na gimbibho ginu ꞉gyaguuye ku-mayaru amajomu, egirengekanyibhwa na abhaanu bhanu abhoongwa Riingʼana rya Nyamuwanga. Bhaakamara okuryungwa, abharigwatirira na mutima mujomu, mbagenderera okuriiganiirisha, na ku-kabhaga koone kutyo abhakora bhikorwa ebhijomu.”

Goone kutyo garibha ku-bhweru

¹⁶ “Omuunu atakukongeesha intara, ˆnaayifundikira mw-idebhe, na atakutura okuyituura mw-ifuufu. Nawe, kaayituura iiguru ku-kisiri, insonga abhaanu bhaakeengira, bharore obhweru.

¹⁷ Nikwo kutyo na ameeyibhise goone kutyo garituurwa ku-bhweru, gimbisike gyone kutyo giribha ku-bhweru.

¹⁸ “Mmbe, mwitegeereshe mwikomeeresiishe kujomu ganu omuungwa! Kwa okubha, omuunu akabha ari na ekiinu, niwe aryongesibhwa. Nawe, omuunu akabha atari na kiinu, na ekitooto kinu ekitogwa ati ari nakyo, ariteesibhwa.”

Nyiramwene Yeesu na bhaawaamuwaabho

¹⁹ Niwe, bhaawaamuwaabho Yeesu na nyiramwene mbayika ayo mbaagaraga Yeesu. Nawe ꞉bhataaturire kumufugera-ko, kwa okubha abhaanu ꞉bhaariga bhayigeene.

²⁰ Abhaanu abhandi mbabhwira Yeesu ati, “Nyakumwana na bhaawaamuwaanyu bhayambaaye anja, abheenda okurorana na awe.”

²¹ Yeesu ˆnaabhasubhya ati, “Abhaanu bhanu abheetegeeresha Riingʼana rya Nyamuwanga na okuryungwa, bhayo nibho bhaamaayi na abhamura bhaasu.”

Yeesu kaasiiga omuyaga na amabhooka bhitemekere

²² Orusuku rumwi, Yeesu ˆnaariinya mu-bhwato, ari amwi na abheeyigira bhaaye. ˆNaabhabhwira ati, “Kyambuke kije ngʼambu.” Mmbe, mbeemuka.

²³ Bhunu ꞉bhaariga mbagenda, Yeesu ˆnaawongera ntiro. Bhakyari ebhusibha, omuyaga ngutiimuka mwafu muno. Obhwato mbwamba okwijura amanji, kimwi mbabha mu-ngʼanga agati.

²⁴ Abheeyigira mbamuuja-ko, mbamuramusha, mbamubhwiraga ati, “Raatabhugenyi! Raatabhugenyi! Kyaweerera!” Yeesu ˆnaaramuka. ˆNaasiiga omuyaga guyo na amabhooka ati bhitemekere. Kimwi omuyaga ngutemekera, ndibha etore.

²⁵ Yeesu ˆnaabhuusha abheeyigira bhaaye ati, “Obhwikirisha bhwemwe bhuri aaki?” Abheeyigira bhayo mboobhaya muno. Mbaruguura, mbabhuushaanyaga ati, “Kana unu nniga! Ndora kaasiiga omuyaga na amabhooka mbimuungwa?”

Yeesu kaawosha Omugeraasi wa ebhiwi

²⁶ Yeesu na abheeyigira bhaaye, mbayika ngʼambu ya mwaro gwa Gariraaya. Ekyaro kya ngʼambu iyo ꞉kyariga kiri kyaro kya Abhageraasi.

²⁷ Bhunu Yeesu ꞉eekire okusooka mu-bhwato ꞉aanyookeene na muunu wumwi owa mu-musi guyo. Omuunu uyo ꞉aariga awungirwe ebhiwi. Kabhaga kareera ꞉aayengaga kinaabhi na ꞉ateekaraga iika, tari weeki ꞉aariga eekaaye mu-nsenga ginu ꞉bhaabhiikaga-mo abhafuuye.

²⁸ Bhunu omuunu uyo ꞉aarorere Yeesu ˆnaamwaya, ˆnaagwa bhwifumbike bhumbere bhwa Yeesu, ˆnaamura obhuraka ˆnaaika ati, “Awe Yeesu, Omwana wa Nyamuwanga Unu ari iiguru wa bhyone kutyo, owukyagara-koki? Ndora waaja okuunyansha! Enikwisaasaama unsige!”

²⁹ Ekiwi kiyo ꞉kyaaikire kutyo kwa okubha Yeesu ꞉aariga akisiigire ati kisooke mu-muunu uyo. Na ekiwi kiyo ꞉kyariga nkimuwunga kiyana. Abhaanu ꞉bhaasakyaga okumwangarira, mbamubhoyaga na eminyororo na gimpingu. Nawe, ꞉aariga ˆnaabhibhutura. Ekiwi kiyo ꞉kyariga nkimukora ˆnaaremera iibhara.

³⁰ Yeesu ˆnaabhuusha ati, “Riisiina ryawo nniga?” Woone ˆnaamusubhya ati, “Riisiina ryani, ni Ruyijo.” ꞉Aaikire kutyo, kwa okubha ꞉aariga awungirwe na bhiwi bhyafu.

³¹ Ebhiwi bhiyo mbiisaasaama Yeesu ati aasiga okubhisiiga okugenda mw-itoko rinu riri nyombe.

³² Ayeeyi na ayo, ꞉kyariga kiriwo ekisuumwa, na ku-mbarika ya ekisuumwa kiyo, ꞉ryariga ririwo eyijo enene erya gingurubhe ngireebhaga. Mmbe, ebhiwi bhiyo mbiisaasaama Yeesu ati, abhibhwire bhigende bhiingire mu-ngurubhe giyo. Yeesu ˆnaabhiikirisisha.

³³ Ebhiwi mbisooka mu-muunu uyo, mbigenda mbiingira mu-ngurubhe giyo. Gingurubhe gyone kutyo ngyoromoka okusooka ayo gibhirimire ngigwirira mu-manji, ngifwira muyo.

³⁴ Abhareefi bha gingurubhe giyo, ꞉bheejire bhaarora iingʼana iyo ꞉bhaabhirimire mbasweranya amangʼana gayo ku-bhaanu, mu-musi agati na mu-magunguri.

³⁵ Kimwi abhaanu mbeemuka mbagenda okurora amangʼana gayo kutyo gari, mbayika ku-Yeesu. Anu ꞉bhaamuyikire-ko, mbarora omuunu unu ꞉aariga asoosiibhwe-ko ebhiwi eekaaye asijeene na Yeesu, afwaye gingibho, ari muworu aswereene obhwenge. Abhaanu bhayo mboobhaya.

³⁶ Abhaanu bhanu ꞉bhaarorere ˆnaawosibhwa, mbatondera abhandi kutyo ebhiwi ꞉bhyamusookere-ko ˆnaawora.

³⁷ Abhaanu bhoone kutyo abha ku-kyaro kya Abhageraasi bhanu ꞉bhaariga bhari ayeeyi, mboobhaya. Mbasabha Yeesu ati asooke mu-kyaro kyebhwe. Yeesu woone ˆnaariinya mu-bhwato mbeemuka.

³⁸ Omuunu unu ꞉aariga asoosiibhwe-ko ebhiwi ˆneesaasaama Yeesu ati agende nawe. Nawe Yeesu ˆnaarema, ˆnaamubhwira ati,

³⁹ “Nuugende ewaanyu, ubhwire abhaanu ganu Nyamuwanga aakukorera.” Niwe, omuunu uyo ˆnaasooka ayo, ˆnaagenda ˆnaaraasisha abhaanu bha mbaara gyone kutyo mu-musi muyo, ganu Yeesu ꞉aariga amukoreeye.

Yeesu kaawosha omugasi, na okusuura omuyara

⁴⁰ Bhunu Yeesu ꞉aasubhire Gariraaya ꞉aaramiiywe na bhaanu bhaafu, kwa okubha abhaanu bhayo ꞉bhaariga bhamurindiriiye.

⁴¹ Bhakyari ayo, ˆnaaja omuunu wumwi, riisiina ryaye ˆnaatogwa Yayiro, ꞉aariga ari mutangasha wa riisunagoogi. Yayiro, ˆneefukama bhumbere bhwa Yeesu, ˆnaamwisaasaama agende nawe iika waaye,

⁴² kwa okubha omuyara waaye wumwi era wa myaka ekumi na ebhiri, ꞉aariga ari murwaye asingire. Bhunu Yeesu ꞉aariga ˆnaagenda ewa Yayiro, riisangi rya abhaanu, ꞉ryamuseetaga rimuyiganyiishe muno.

⁴³ Agati wa abhaanu bhayo, ꞉aariga ariwo omugasi wumwi. Omugasi uyo ꞉aariga arwaye obhureegu gyaturire myaka ekumi na ebhiri. [꞉Aariga aamarire ebhiinu bhyaye bhyone kutyo ˆnaagaraga obhuragusi,] nawe ꞉ataanyoorere muunu woonewoone wa okumuwosha.

⁴⁴ Mmbe, omugasi uyo ˆnaagenda iinyuma wa Yeesu, ˆnaakuunʼya ku-bhisumi bhya emwaro ebhya ingibho ya Yeesu. Ayoayo obhureegu bhwaye mbutemekera, ˆnaawora.

⁴⁵ Yeesu ˆnaabhuusha ati, “Niga unu aankuunʼya-ko?” Abhaanu bhoone kutyo, mbaaika ati bhatamukuunʼya-ko. Peetero woone ˆnaabhwira Yeesu ati, “Ee Raatabhugenyi, abhaanu ni bhaafu bhakusingiiye abhakuyiganya!”

⁴⁶ Nawe, Yeesu ˆnaaika ati, “Nimenyere ati ariwo omuunu unu aankuunʼya-ko, kwa okubha neeyungwa obhuturo bhwani obhwa okuwosha bhwakora emirimu.”

⁴⁷ Omugasi uyo, bhunu ꞉aarorere ati atakutura okwiyibhisa kweki, ˆnaaja ku-Yeesu enu ˆnaayararaga. ˆNeefukamira Yeesu, ˆnaamubhwirira mu-meeso ga abhaanu bhoone kutyo, insonga inu yaakora ˆnaamukuunʼya-ko, na kutyo aawosibhwa ayoayo.

⁴⁸ Yeesu ˆnaamubhwira ati, “Muyara waani, obhwikirisha bhwawo bhwakuwosha, nuugende na omurembe!”

⁴⁹ Bhunu Yeesu ꞉aariga akyaika gayo, omuunu okusooka ewa omutangasha wa riisunagoogi ˆnaaja. Omuunu uyo, ˆnaabhwira omutangasha uyo ati, “Omuyara waawo, aafuuye, siga era okunyansha Omwiyigisha.”

⁵⁰ Bhunu Yeesu ꞉oonguuywe amangʼana gayo, ˆnaabhwira Yayiro ati, “Siga okuubhaya! Nuubhe na obhwikirisha era, omuyara waawo kaawora.”

⁵¹ Bhunu Yeesu ꞉aayikire ewa Yayiro, ˆnaagaanya abhaanu abhandi okwingira nawe mu-nyumba, tari ˆnaabhwira Peetero, Yowana, Yakobho, esemwene omuyara uyo, na nyiramwene bheengire nawe.

⁵² ꞉Bhaariga bhariwo bhaanu bhaafu mbariraga na okutogoonya ku-nsonga ya omuyara uyo. Yeesu ˆnaabhabhwira ati, “Musige okurira! Akyari kufwa unu, tari awongeeye era!”

⁵³ Abhaanu bhayo mbaamba okumuseka, kwa okubha ꞉bhaariga bhamenyere ati aafuuye.

⁵⁴ Yeesu ˆnaagwata okubhoko kwa omuyara uyo, ˆnaamura obhuraka ˆnaamubhwira ati, “Omwana waani awe, ramuka!”

⁵⁵ Kimwi, omuyara uyo, omwoyo ngusubha-mo, ˆnaayambaara. Yeesu ˆnaabhabhwira ati, bhamuyaane ebhyokurya.

⁵⁶ Bhunu abheebhusi bhaaye ꞉bhaarorere gayo, mbaruguura muno. Nawe Yeesu ˆnaabhagaanya ati, bhaasiga okubhwira omuunu woonewoone kutyo aasuura omuyara weebhwe.