Ruuka 23 - Iimuuma Iinyaaya

Yeesu kaasitaakibhwa ku-Piraato

¹ Mmbe, abhakuru bhayo mbayambaara bhoone kutyo, mbasira Yeesu ku-mutungi wa Ekiruumi unu ꞉aariga ˆnaatogwa Piraato.

² Mbaamba okumusitaakya, mbaaikaga ati, “Omuunu unu, kyamunyoora ˆnaayabhya ekyaro kyeswe, kwa okubha kaagaanya abhaanu ati bhasige okutobha riigooti ku-Kayijaari. Na kaaika ati omwene niwe Kiriisitu, omukama.”

³ Niwe, Piraato ˆnaabhuusha Yeesu ati, “Angu, ni awe omukama wa Abhayawudi?” Yeesu woone ˆnaamusubhya ati, “Ni awe owaaika.”

⁴ Piraato ˆnaabhwira abhashengesi abhakuru, na abhaanu bhoone kutyo bhanu ꞉bhaariga bhasangire ayo ati, “Nitakurora kikayo kyonekyone ku-muunu unu.”

⁵ Abhaanu bhayo, mbakomeeresha mbaaika ati, “Kaasooyeresha abhaanu ˆnaabheeyigisha ameeyigisho gaaye, mu-kyaro kyone kutyo ekya Ebhuyawudi, ꞉aambiiye Gariraaya na woori ari anu.”

⁶ Bhunu Piraato ꞉oonguuywe amangʼana gayo, ˆnaabhuusha raabhe Yeesu ni Mugariraaya.

⁷ ꞉Eejire aamenya ati Yeesu ni Munyagariraaya owa mu-bhutungi bhwa Yerode Antipa, ˆnaabhabhwira bhamusire ku-Yerode kwa okubha ku-nsiku giyo, Yerode ꞉aariga ari Yerusareemu ayo.

Yeesu kaabhuusibhwa na Yerode

⁸ Bhunu Yerode ꞉aarorere Yeesu, ˆnaajomerwa muno kwa okubha ꞉aariga oonguuywe amangʼana gaaye. Nsiku nyafu ꞉aariga eendere okumurora, kwa okubha ꞉aariga oonguuywe amangʼana gaaye, amwi na gayo ꞉eendaga okurora kutyo Yeesu kaakora ebhigwa.

⁹ Yerode ˆnaabhuusha Yeesu amangʼana maafu. Nawe Yeesu ataamusubhiishe engʼana ryoneryone.

¹⁰ Abhashengesi abhakuru na abheeyigisha bha ebhiraagiro bhya Musa, mbayambaara mbasoosha amasitaakyo geebhwe kwa managa goone kutyo.

¹¹ Yerode woone na abhasirikare bhaaye mbaamba okumujabhura, mbamusangʼaya, mbamufwafya gingibho egya ekikama. Mbamusubhya kweki ku-Piraato.

¹² Orusuku ruyoruyo Yerode na Piraato mbagwatana obhusaani, kwa okubha ku-bhwambiro ꞉bhaariga bhari bhasoko.

Piraato keekirisha ati Yeesu eetwe

¹³ Piraato woone ˆnaakumanya amwi abhashengesi abhakuru, na abhatungi bha Abhayawudi, na abhaanu bha mu-musi,

¹⁴ ˆnaabhabhwira ati, “Mwandeetera omuunu unu mwaika ati, kaayabhya abhaanu. Woori mwitegeereshe naamubhuusisha mu-meeso geemwe, nitaamunyoora na kikayo kyonekyone okuriingʼaana na amasitaakyo geemwe ku-mwene.

¹⁵ Yerode woone, akyari kumurora-ko kikayo. Kyakora aamusubhya kw-iswe. Gari abhweru ati omuunu unu atakorere kyonekyone kinu kiisire ndamuro ya orufu!

¹⁶ Mmbe woori, enimutarika ekibhooko era nimutaatire.” [

¹⁷ Mu-nsikukuru gyone kutyo egya Ipaasaka, Piraato ꞉aariga ˆneegurira omubhoywa wumwi.]

¹⁸ Abhaanu bhayo mbamwayira amwi bhoone kutyo, mbaaikaga ati, “Kisoosishe-wo unu! Ukiigurire Bharabha!”

¹⁹ Bharabha uyo, ꞉aariga abhoyerwe mu-jeera kwa okubha ꞉aareetere obhusoko mu-bhaanu bha mu-musi, na ꞉aariga ari mwiti.

²⁰ Mmbe Piraato ꞉aariga ˆneenda okutaatira Yeesu, ˆnaaika nabho kweki.

²¹ Nawe, mbaamura obhuraka mbaaika ati, “Musunge ku-musarabha! Musunge ku-musarabha!”

²² ˆNaabhabhwira kweki orwa akasatu ˆnaabhabhuusha ati, “Ku-nsongaki? Unu akorere kikayoki? Anye nitaamurora-ko engʼana rinu riisire eetwe! Mmbe woori naakamara okumutarika ebhibhooko, enimutaatira.”

²³ Nawe, abhaanu bhayo mbamwayira iiguru mbeendaga asungwe ku-musarabha. Obhuraka bhwebhwe mbuyiga.

²⁴ Piraato ˆnaaramura ati bhakore kutyo abheenda.

²⁵ ˆNeegurira Bharabha unu ꞉bhaariga mbeenda, ꞉aariga abhoyerwe kwa okubha ꞉aareetere obhusoko mu-bhaanu na obhwiti bhwa abhaanu. ˆNaabhayaana Yeesu, bhamukorere kutyo ꞉bheendaga.

Yeesu kaasungwa ku-musarabha

²⁶ Bhunu abhasirikare ꞉bhaariga mbasira Yeesu okumwita, mbanyookana na omuunu wumwi, riisiina ryaye Simooni, owa mu-musi gwa Kureene. Simooni uyo, ꞉aariga aasookere mw-isambu. Kimwi mbamugwata, mbamwitwikya omusarabha gwa Yeesu. ˆNaagugega ˆnaaseetaga Yeesu iinyuma, agwitwikire.

²⁷ Riisangi rya abhaanu ndimuseeta, agati weebhwe, ꞉bhaariga bhariwo abhagasi bhanu ꞉bhaariga mbamuririra.

²⁸ Yeesu ˆnaaringira iinyuma, ˆnaabhabhwira ati, “Emwe abhayara bha Yerusareemu, musige kundirira anye! Tari, mwiririre emitima gyemwe, muririre na abhaana bheemwe!

²⁹ Kwa okubha mumenye kujomu ati, ginsiku egiija ginu abhaanu bharyaikaga ati, ‘Nyakara abhagasi abhagumba, bhanu amabheere geebhwe gataneeniishe abhaana.’

³⁰ Niwe bharyamba okubhwira ebhiima ati ‘Mukigwire!’ na ebhisuumwa ati ‘Mukisiikire!’

³¹ Kwa okubha bhaakakora amangʼana ganu kw-iti riibhisi, eyibha kutiki kw-iti eryumu?”

³² Bhunu abhasirikare ꞉bhaasirire Yeesu, orusuku ruyo ꞉bhaasirirwe bhakayi abhandi bhabhiri bhoone bhagende okwitirwa amwi na Yeesu.

³³ Bhunu ꞉bhaayikire anu kaabhirikirwa ati Ekiyanga, mbasunga Yeesu ku-musarabha, mbasunga na abhakayi bharya ku-misarabha, owumwi orubhaara rwaye orwa ebhuryo, na owundi orubhaara rwa ebhumosi.

³⁴ Yeesu ˆnaaika ati, “Ee Raata! Nuubhaabhire! Kwa okubha bhatakumenya ganu abhakora.” Abhasirikare bhayo mbatuura ayo gingibho gya Yeesu mbabhuma inkuura bhagigabhane.

³⁵ Abhaanu ꞉bhaariga bhariwo bhayambaayega ayo mbaringiriraga. Abhakuru bha Abhayawudi, mbaamba okujabhura Yeesu mbaaikaga ati, “꞉Aariga ˆneerusha abhandi! Woori, raabhe niwe Kiriisitu unu asorerwe na Nyamuwanga ˆneeyerushe omwene!”

³⁶ Abhasirikare bharya bhoone mbamusangʼaya, mbamufugera-ko, bhamuyaane iidivaayi induru.

³⁷ Enu mbaaika ati, “Raabhe ni awe omukama wa Abhayawudi, ambe nwiyerushe omwene!”

³⁸ Iiguru ku-musarabha gwa Yeesu, ꞉bhaariga bhatuuye-ko akabhaawu kakaamirwe-ko amakaamo, ati, unu niwe omukama wa abhayawudi.

³⁹ Owumwi wa abhakayi bhanu ꞉bhaariga bhasungirwe, ꞉aafumire Yeesu ˆnaaikaga ati, “Toga ni awe Kiriisitu? Ambe! Nwiyerushe omwene! Ukyerushe kyone!”

⁴⁰ Nawe, oweejaabho ˆnaamuyiinya ˆnaaika ati, “Angu utakuubhaya Nyamuwanga? Indamuro inu bhakiramuriiye, niyo iyoiyo inu omuunu unu aramuriiywe.

⁴¹ Nawe eswe, bhakiramuriiye okuseetana na ebhikorwa bhyeswe. Nawe unu, kitariwo kikayo kinu akorere.”

⁴² Kimwi, ˆnaaika ati, “Ee Yeesu! Bhunu uriingira mu-bhukama bhwawo, uuyiite noone!”

⁴³ Yeesu ˆnaamusubhya ati, “Enikubhwira ekimari ati, reero inu owubha amwi na anye mu-rwire.”

Okufwa kwa Yeesu

⁴⁴ Bhunu ꞉yaayikire mu-mwisi mw-isuubha rya mu-ruwotoosi, ekyaro kyone kutyo nkibha kisuute okuyikira anu ginsa ꞉gyayikire kenda,

⁴⁵ riisuubha ꞉ryariga risimiriiye. Mw-iyekaru ꞉rwariga rurimo orugito rwa ingibho, ndutamuka ayoayo mabhaara gabhiri.

⁴⁶ Yeesu ˆnaamura obhuraka ˆnaarira ati, “Ee Raata! Enituura omwoyo gwani mu-mabhoko gaawo.”

⁴⁷ Na bhunu ꞉aamarire okwaika gayo, kimwi ˆnaafwa. Omukuru wa abhasirikare bhunu ꞉aarorere amangʼana gayo, ˆnaagungya Nyamuwanga, ˆnaaikaga ati, “Ku-kimari, omuunu unu aanaabheeye murengeresi mu-meeso ga Nyamuwanga!”

⁴⁸ Abhaanu bhoone kutyo, bhanu ꞉bhaarorere amangʼana gayo, mbasubha eweebhwe, enu bhasurumbaaye muno.

⁴⁹ Abhaanu bhoone kutyo bhanu ꞉bhaariga bhamenyeene na Yeesu na abhagasi bharya ꞉bhaaseetanaga nawe okusooka Gariraaya, ꞉bhaariga bhayambaariiye areera-wo, mbaringiraga ganu agakoreka.

Okubhiikwa kwa Yeesu

⁵⁰ ˆNaaja-wo omuunu wumwi, riisiina ryaye ˆnaatogwa Yuusufu. Yuusufu uyo, ꞉aariga ari wumwi wa abhakuru mw-ibharaja rya Abhayawudi, ari muunu wa mutima mujomu na ari murengeresi mu-meeso ga Nyamuwanga.

⁵¹ Yuusufu ꞉aariga ari mwibhurwa wa mu-musi gwa Arimataaya Ebhuyawudi eyo. ꞉Aariga ˆnaarindirira obhukama bhwa Nyamuwanga, na ꞉aariga ateekirishaanyiishe na abheejaabho ku-kiina kyebhwe, na ateekirishaanyiishe na kinu ꞉bhaakoreeye Yeesu.

⁵² Yuusufu uyo ˆnaagenda ku-Piraato ˆnaagenda ku-Piraato, ˆnaasabha ayaanwe omufu Yeesu agende okumubhiika.

⁵³ Piraato ˆneekirisha, Yuusufu ˆnaagenda okumwisha okusooka ku-musarabha. ˆNaamufwafya okwamba insanda injomu. Kimwi, ˆnaamumaamya mu-mbiiyira inu ꞉yaariga iroosiibhwe mw-igina iri nsenga. Mu-mbiiyira muyo, ꞉bhaariga bhakyari okubhiika-mo omuunu woonewoone.

⁵⁴ Orusuku ruyo, ꞉rwariga ruri orusuku rwa okwirooseresha, na Insabhaato ꞉yaariga iri ayeeyi okwingira.

⁵⁵ Abhagasi bhanu ꞉bhaariga bhari amwi na Yeesu okusooka Gariraaya, mbaseeta Yuusufu. Mbarora imbiiyira, na kutyo omufu Yeesu amaamiibhwe-mo.

⁵⁶ Kimwi mbasubha iika, mbaroosha amafuta na ebhirange ebhijomu ebhya okuyaka omufu Yeesu. Na orusuku rwa Insabhaato mbamuunya rwa kutyo ebhiraagiro ebhyaika.