Ruuka 22 - Iimuuma Iinyaaya

Yuuda Esikariyooti keekirisha okurya Yeesu injeejemo

¹ Insikukuru ya emikaate ginu gitatunduuye ꞉yaariga irebhereeye okuyika. Insikukuru iyo ꞉yaariga niitogwa Ipaasaka.

² Abhashengesi abhakuru na abheeyigisha bha ebhiraagiro bhya Musa, ꞉bhaariga mbaagara injira ya okwita Yeesu. Nawe, ꞉bhoobhayaga abhaanu.

³ Mmbe, Yuuda unu ꞉aatogwaga Esikariyooti, owumwi wa abheeyigira ekumi na bhabhiri abha Yeesu, ˆneengirwa Sitaani mu-mwoyo gwaye.

⁴ Kimwi ˆnaagenda ku-bhashengesi abhakuru na ku-bhakuru bha abhariisi bha iinyumba ya Nyamuwanga. ˆNaaika nabho kutyo araagure Yeesu kwebhwe.

⁵ Amangʼana gayo, ngabhajomisha muno, mbeekirishaanya nawe okumuyaana giiyera.

⁶ Yuuda ˆneekirisha, ˆnaamba okwagara omwanya omujomu gwa okubheeresha Yeesu, abhaanu bhaasiga okumenya.

Riigari rya Raatabhugenyi

⁷ Mmbe, insikukuru ya emikaate ginu gitatunduuye niiyika. Ruyo nirwo orusuku runu iingʼondi ya Ipaasaka ꞉yeetwaga.

⁸ Niwe, Yeesu ˆnaatuma Peetero na Yowana, ˆnaabhabhwira ati, “Mugende, kinyoore mwakikoreeye ebhyokurya bhya Ipaasaka, insonga kiije kirye amwi.”

⁹ Mbamubhuusha ati, “Oweenda kikorere aaki?”

¹⁰ ˆNaabhabhwira ati, Mwitegeereshe! Mukagenda mu-musi agati, omuuja okunyookana na murume wumwi, eetwikire ekituumo kya amanji. Mumuseete okuyikira mu-nyumba inu areengire, mwone mwingire.

¹¹ Mubhwire omwene nyumba ati, Omwiyigisha kaabhuusha ati, “Ekyumba kya abhagenyi kiri aaki? Eneenda okuriira-mo ebhyokurya bhya Ipaasaka amwi na abheeyigira bhaani.”

¹² Omwene kaaja okubheeresha ekyumba ekinene kinu kiroosirisiibhwe mu-nyumba ingerekeene. Mukiroosishe muyo ebhyokurya bhya Ipaasaka.

¹³ Abheeyigira bhayo mbagenda, mbanyoora goone kutyo gari rwa kutyo Yeesu aabhabhwira. Mbaamba okuroosha ebhyokurya bhya Ipaasaka.

Riigari rya Raatabhugenyi

¹⁴ Bhunu akabhaga ka okurya ꞉kaayikire, Yeesu ˆneekara amwi na abheeyigira bhaaye okurya ebhyokurya.

¹⁵ ˆNaabhabhwira ati, “Woori eniranga muno okurya ebhyokurya bhya Ipaasaka inu amwi na emwe nikyari kwingira mu-bhinyansho!

¹⁶ Kwa okubha enibhabhwira ati nitarirya kweki ebhyokurya bhya Ipaasaka okuyikira anu insonga yeende-ko irikuumira ku-bhukama bhwa Nyamuwanga.”

¹⁷ Kimwi Yeesu ˆnaagega ekikombe kya iidivaayi, ˆnaakumya Nyamuwanga, ˆnaaika ati, “Mugege mubhabhushaanye!

¹⁸ Kwa okubha enibhabhwira ati nitarinywa kweki iidivaayi, okuyikira anu obhukama bhwa Nyamuwanga bhuriija.”

¹⁹ Yeesu ˆnaagega omukaate, ˆnaakumya Nyamuwanga, ˆnaagubhuturabhutura, ˆnaayaana abheeyigira bhaaye, ˆnaabhabhwira ati, [“Gunu ni mubhiri gwani, ni emwe omukora ngusoosibhwa. Muraakorega kutya, okuuyiita!”

²⁰ Bhunu ꞉bhaamarire okurya, Yeesu ˆnaagega kweki ekikombe kiyo, ˆnaaika ati, “Iidivaayi ya mu-kikombe kinu, ni kibharikisho kya amaanyinga ga iimuuma iinyaaya. Amaanyinga ganu ageetika insonga emwe mwerusibhwe.]

²¹ Nawe mwitegeereshe! Unu kaaja okungura, ekikosha amwi nawe kw-igari kunu.

²² Kwa okubha Omwana wa Adaamu, kaagenda okwitwa, rwa kutyo ꞉yeenderwe. Nawe ariko ekiwi unu araamugure!”

²³ Kimwi mbaamba okubhuushaanya ati, “Niga agati weeswe unu araakore riingʼana riyo?”

Ameeyigisho iiguru ya obhukuru

²⁴ Ngibha-wo giimamba agati wa abheeyigira bha Yeesu, ati ni wuuya kaaikwa ati kaatura okubha omukuru weebhwe.

²⁵ Yeesu ˆnaabhabhwira ati, “Abhakama bha ebhyaro, abhatunga abhaanu bheebhwe managa, nawe abheenda bhabhirikirwe ati ni bhasakisi bha bhaanu.

²⁶ “Nawe emwe, musige kukora kutyo. Unu ari mukuru kw-imwe, niwe abhe rwa mutooto ku-bhoone kutyo, na unu kaatangasha abhe rwa omujuuma.

²⁷ Kwa okubha ni wuuya unu akuriiye abhandi? Ni unu eekaaye okurya kw-igari! Ni unu kaareeta ebhyokurya kw-igari? Atari unu eekaaye kw-igari okurya ebhyokurya? Nawe, noone niri agati weemwe rwa omujuuma.

²⁸ “Emwe, ni emwe musigaaye amwi na anye ku-kabhaga koone kutyo aka iinyanko yaani.

²⁹ Mmbe woori, kutyo Raata aanaaye obhukama, nikwo kutyo noone enibhayaana emwe obhukama.

³⁰ Na ku-bhukama bhwani, kiriryaga na okunywa kiri amwi kw-igari ryani. Na muriikaraga ku-bhitebhe bhya ekikama, muramuraga amayito ekumi na gabhiri aga Abhaijirayeeri.”

Yeesu kaaika ati Simooni Peetero kaaja okumwigaana

³¹ Yeesu ˆnaaika ati, “Awe, awe Simooni Peetero! Iitegeeresha, Sitaani eekirisiibhwe abhawungure rwa omuunu unu kaawungura obhuro.

³² Nawe, naakusabhiiye ku-Nyamuwanga, obhwikirisha bhwawo bhutaaja okusuuwa. Na bhunu urinsubhira, usimbiishe abheejaanyu.”

³³ Simooni ˆnaamusubhya ati, “Raatabhugenyi waani! Nikabha amwi na awe neetuuye-wo okugenda okubhoywa na awe mu-jeera. Bhaakeenda okunyita, bhaanyite!”

³⁴ Yeesu ˆnaamusubhya ati, “Awe Peetero! Enikubhwira ati insarigooko itakukookoroma reero, ukyari kunyiigaana kasatu ati utakuumenya.”

³⁵ Kimwi Yeesu ˆnaabhuusha abheeyigira bhaaye ati, “Bhunu ꞉naabhatumire mutari na bhikapo, mutari na masumi ga giiyera, mutari na ebhikwirya, angu ꞉mwarebherweki?” Mbamusubhya ati, “Wuri.”

³⁶ Yeesu ˆnaabhabhwira ati, “Nawe woori, unu ari na ekikapo naagege, unu ari na riisumi ryaye woone naagege. Na unu atari na ekiraawa, agushe riikooti ryaye agure ekiraawa,

³⁷ kwa okubha ikaamirwe ati, ‘꞉Aabhariiywe amwi na abhakayi.’ Amangʼana gayo ꞉naakaamiiywe anye. Enibhabhwira ekimari ati geesire gaanyoore. Na amangʼana goone kutyo ganu ꞉naakaamiiywe anye geesire gaayikire.”

³⁸ Bheeki mbamubhwira ati, “Raatabhugenyi weeswe! Ringira! Anu bhiriwo bhiraawa bhibhiri.” Woone ˆnaabhabhwira ati, “Musige.”

Yeesu kaasaasaama Nyamuwanga mu-kiima

³⁹ Yeesu ˆnaasooka mu-nyumba muyo, ˆnaagenda mu-kiima kya Emijeyituuni, rwa kutyo ꞉aariga anarire. Na abheeyigira bhaaye mbamuseeta.

⁴⁰ Na bhunu ꞉aayikire mu-kiima muyo, ˆnaabhabhwira ati, “Musaasaame Nyamuwanga, mwasiga okwingira mu-masakyo ga Sitaani.”

⁴¹ Niwe, ˆnaabhasiga ayo, ˆnaabhaawuka-mo ˆnaaja imbere kutooto, obhureera bhwa omuunu okusuukura riigina. ˆNeefukama, ˆnaasaasaama Nyamuwanga ˆnaaika ati,

⁴² “Ee Raata! Ukeenda, unsoosishe-ko ebhinyansho bhinu. Nawe itari kutyo anye eneenda, tari ukore kutyo awe oweenda!” [

⁴³ Ayoayo maraayika okusooka mu-rwire ˆnaamuuja-ko, ˆnaamukomeesha.

⁴⁴ Yeesu akyari na obhururu bhwafu mu-mwoyo, ˆnaagenderera muno okusaasaama ku-Nyamuwanga. Kimwi ˆnaatoyika amooyiro ngatoonya ansi muna maanyinga.]

⁴⁵ Na bhunu ꞉aamarire okusaasaama ku-Nyamuwanga, ˆnaasubha ku-bheeyigira bhaaye, ˆnaabhanyoora bhawongeeye kisurumbaaye.

⁴⁶ ˆNaabhabhuusha ati, “Ndora muwongeeye! Muramuke! Musaasaame Nyamuwanga, mwasiga okwingira mu-masakyo ga Sitaani.”

Yeesu kaagwatwa

⁴⁷ Bhunu Yeesu ꞉aariga akyaika gayo, esangi rya abhaanu bhaafu ndimuuja-ko. Abhaanu bhayo ꞉bhaariga bhatangasiibhwe na Yuuda, owumwi wa abheeyigira bhaaye ekumi na bhabhiri. Yuuda ˆnaafugerera Yeesu okumukeesha ˆnaamufumbeera ˆnaamubhuusu.

⁴⁸ Yeesu ˆnaamubhwira ati, “Awe Yuuda! Angu owugura Omwana wa Adaamu kwa okumubhuusu?”

⁴⁹ Abheeyigira bha Yeesu bhanu ꞉bhaariga bhari ayeeyi nawe ꞉bheejire bhaamenya kutyo agaaja okubha, mbaaika ati, “Raatabhugenyi! Angu kibhasane na ebhiraawa?”

⁵⁰ Owumwi weebhwe ˆnaabhuma omugaya wa omushengesi omukuru, ˆnaamusaawura-ko okutwi okwa ebhuryo.

⁵¹ Yeesu ˆnaabhasubhya ˆnaaika ati, “Musige okukora kutyo!” ˆNaamukuunʼya ku-kutwi, omujuuma uyo ˆnaawora.

⁵² Yeesu ˆnaabhwira abhashengesi abhakuru na abhakuru bha abhariisi bha mw-iyekaru na abhakaruka bha Abhayawudi bhanu ꞉bheejire okumugwata ati, “Ndora mwaaja okungwata muri na ebhiraawa na gindungu muna niri mwifi?

⁵³ Nsiku gyone kutyo ꞉naariga niri amwi na emwe mw-ibhanja rya riiyekaru rya Nyamuwanga okungwata uri, nawe woori kanu niko akabhaga keemwe na aka obhutungi bhwa Sitaani.”

Peetero keegaana Yeesu

⁵⁴ Kimwi, abhaanu bhayo mbasangira Yeesu, mbamugwata, mbamusira ewa omushengesi omukuru. Peetero ˆnaamuseeta ariwo areera.

⁵⁵ Bhunu abhaanu ꞉bhaayikire mw-ibhanja rya mu-musi muyo, mbakooma omuriro, mbeekara amwi. Peetero woone ˆneekara amwi nabho.

⁵⁶ Omukosi wa emirimu wumwi owa ekigasi ꞉eejire aarora Peetero eekaaye ayeeyi na omuriro, ˆnaamwikomya ˆnaaika ati, “Omuunu unu aanaabheeye amwi na Yeesu.”

⁵⁷ Nawe Peetero ˆneegaana, ˆnaaika ati, “Ee, omugasi unu! Anye nitakumumenya!”

⁵⁸ Akyari, omuunu owundi ˆnaaja, ꞉aarorere Peetero era, ˆnaaika ati, “Awe woone uri weejaabho.” Nawe Peetero ˆnaamusubhya ati, “Mura! Atari anye!”

⁵⁹ Akabhaga nkatura-wo muna nsa yimwi kutya, omuunu owundi ˆnaakomeeresha ˆnaaika ati, “Ku-kimari, unu woone aanaari amwi nawe! Kwa okubha omwene woone ni Mugariraaya!”

⁶⁰ Nawe Peetero ˆnaasubhya ati, “Mura! Gayo owaaika, nitakugamenya!” Bhunu ꞉aariga akyaika gayo, insarigooko niikookoroma.

⁶¹ Yeesu ˆnaafutata, ˆnaamuringira. Kimwi, Peetero ˆnaayiita riingʼana rya Raatabhugenyi kutyo aamubhwira ati, “Insarigooko ikyari kukookoroma, owubha wanyiigaanire kasatu.”

⁶² Peetero ˆnaawuruka anja, ˆnaamba okurira muno.

Abhariisi abhasangʼaya Yeesu

⁶³ Abhaanu bhanu ꞉bhaariga bhagwatire Yeesu, ꞉bhaariga mbamusangʼaya, mbamubhuma muno.

⁶⁴ Mbamusibha ameeso, mbamubhwiraga ati, “Bharikisha! Niga unu aakubhuma?”

⁶⁵ Mbagenderera okumusoosisha amangʼana maafu aga okumufuma.

Yeesu kaasitaakibhwa ku-bhakuru

⁶⁶ Anu riisuubha ryawurukire, abhakaruka bha Abhayawudi mbeekara bhari amwi na abhashengesi abhakuru, na abheeyigisha bha ebhiraagiro bhya Musa. Bhunu Yeesu ꞉aareeterwe imbere weebhwe, mbamubhwira ati,

⁶⁷ “Nuukibhwire raabhe ni awe Kiriisitu.” Yeesu ˆnaabhabhwira ati, “Raabhé niraabhabhwire mutakutura okwikirisha.

⁶⁸ Na nikabhabhuusha mutakutura okunsubhya.

⁶⁹ Nawe okwambira woori, Omwana wa Adaamu kaabha eekaaye orubhaara rwa ebhuryo orwa Nyamuwanga owa Obhutungi bhwone kutyo.”

⁷⁰ Bhoone kutyo mbamubhwira ati, “Nikwo okwaika ati, ni kimari awe uri Mwana wa Nyamuwanga!” Yeesu ˆnaabhasubhya ati, “Ndora emwe abheene mwaikire ati, ni anye!”

⁷¹ Kimwi, abhakuru bhayo mbaaika ati, “Mmbe! Kiri na bhukeneki obhwa okwagara abharori abhandi? Kwa okubha eswe abheene kyoonguuywe amangʼana ga akanwa kaaye!”