Ruuka 20 - Iimuuma Iinyaaya

Riibhuusho iiguru ya obhuturo bhwa Yeesu

¹ Orusuku rumwi bhunu Yeesu ꞉aariga ari mw-ibhanja rya riiyekaru rya Nyamuwanga ˆneeyigishaga abhaanu, na okubharaasisha Amangʼana ga Nyamuwanga, abhashengesi abhakuru, abheeyigisha bha ebhiraagiro bhya Musa, na abhakaruka bha Abhayawudi mbamuuja-ko.

² Mbamubhuusha ati, “Nuukibhwire! Owukora amangʼana ganu ku-bhuturoki? Nniga ꞉aakuyaaye obhuturo bhunu?”

³ Yeesu ˆnaabhabhwira ati, “Okwamba anye noone nibhabhuushe engʼana rimwi. Mumbwire,

⁴ obhuturo bhwa Yowana obhwa okubhatiisha abhaanu, ꞉bhwasookere aaki? ꞉Bhwasookere ku-Nyamuwangaa ꞉bhwasookere ku-bhaanu?”

⁵ Kimwi mbaamba okubhuushaanya mbaaikaga ati, “Kikaaika ati ꞉bhwasookere ku-Nyamuwanga, kaaja okukibhuusha ati, ‘Ndora mutaamwikirisiishe?’

⁶ Abhaanu bhanu bhoone kutyo abheekirisha ati Yowana ni muragi. Raabhe kyaika ati obhuturo bhwaye ꞉bhwariga bhusookere ku-bhaanu era, abhaanu abhaaja okukibhuma na amagina.”

⁷ Okubha kutyo mbabhwira Yeesu ati, “Kitakumenya obhuturo bhwaye ati ꞉bhwasookereeye aaki.”

⁸ Yeesu woone ˆnaabhabhwira ati, “Anye noone nitakubhabhwira ati enikora gayo ku-bhuturoki.”

Yeesu kaarengekanya abhatangasha na abharimi abhakosi bha mabhiibhi

⁹ Kimwi Yeesu ˆnaagenderera okubhwira abhaanu ekirengekanyo kinu, ˆnaaika ati, “꞉Aariga ariwo omuunu wumwi unu ꞉aariga ari na riisambu. Mw-isambu ryaye muyo, ꞉aariga ayambire-mo emijabhiibhu. Riisambu riyo ˆnaariyaana abharimi bharirimega, omwene ˆnaakora orugendo ˆnaagenda mu-kyaro kya areera, ˆnaamara-yo nsiku nyafu.

¹⁰ Bhunu ginsiku gya okugesa ꞉gyayikire, ˆnaatuma omugaya waaye ku-bharimi bhayo, ˆneenda bhamuyaane-ko omugabho gwaye ogwa ebhigeswa. Nawe, bhunu omugaya uyo ꞉aayikire, abharimi bhayo mbamubhuma muno, mbamubhirimya mabhoko ageene.

¹¹ “Omwene esambu, ˆnaatuma kweki omugaya owundi. Nawe omwene woone mbamubhuma mbamukorera amangʼana amabhiibhi muno, kimwi mbamubhirimya ˆnaasubha-yo kutyo.

¹² Omwene esambu ˆnaatuma omugaya owundi owa akasatu. Uyo woone mbamuwutaasha, mbamubhirimya.

¹³ “Ku-bhuteero, omwene esambu ꞉aaikire ati, ‘Woori, nikore kutiki? Woori, eniija okutuma omwana waani omwende unu! Amwi, omwene abhaaja okumwiswara.’

¹⁴ Nawe bhunu abharimi bhayo ꞉bhaamurorere, mbabhwirana ati, ‘Unu niwe omugabhi wa ebhiinu bhya esemwene. Kimwite, omugabho gwaye gubhe gweswe.’

¹⁵ Mmbe, mbamusoosha mw-isambu, kimwi mbamwita.” Yeesu ˆnaabhabhuusha ati, “Angu, omwene esambu kaaja okukora kutiki abharimi bhayo?

¹⁶ Enibhabhwira ati ariija ˆnaabheeta, na riisambu riyo, ˆnaariyaana abhandi!” Abhaanu ꞉bheejire okuungwa amangʼana gayo, mbaaika ati, “Iingʼana iyo isige okubha-wo kajaanende!”

¹⁷ Yeesu ˆnaaringira abhaanu bhayo, ˆnaabhabhuusha ati, “Mmbe, amakaamo ganu gari na nsongaki? ‘Abhoombaki ꞉bhaaremere riigina rinu. Nawe, riigina rinu niryo ribheeye riigina riinene erya mu-rufuka.’

¹⁸ “Omuunu akagwa kw-igina kuyo, kaabhutukabhutuka, na riigina riyo rikagwira omuunu, erimusanjagasanjaga kubhiibhi.”

¹⁹ Abheeyigisha bha ebhiraagiro bhya Musa na abhashengesi abhakuru ꞉bheejire okuungwa gayo, mbamenya ati ekirengekanyo kiyo ꞉kyariga nkyaikira abheene. Amangʼana gayo ngakora mbeenda okugwata Yeesu ayoayo, nawe mboobhaya abhaanu.

Riibhuusho rya okuteganya Yeesu

²⁰ Okwambira ayo abhakuru bha Abhayawudi, mbaamba okufwima Yeesu muno, mbatuma abhaanu ku-Yeesu. Abhaanu bhayo ꞉bheekorere ati ni bhaanu bharengeresi. Insonga ya okubhatuma, ꞉bhaariga mbeenda bhagwatire Yeesu ku-mangʼana gaaye, bhamugwate bhamusitaakye ku-mutungi.

²¹ Abhaanu bhayo mbaaja ku-Yeesu mbamubhuusha ati, “Omwiyigisha, kimenyere ati owaaika na okwiyigisha amangʼana ga obhurengeresi kweki awe utakwigana kibharo kya muunu. Na utakuubhaya muunu woonewoone, tari owiiyigisha amangʼana ga Nyamuwanga ku-kimari kyago.

²² Angu, ku-bhiraagiro, eswe ekyendwa kitobhe riigooti ku-Kayijaari, kisige okutobha?”

²³ Kimwi Yeesu ˆnaamenya obhwenge bhwebhwe, ˆnaabhabhwira ati,

²⁴ “Munyereshe iidinaari. Orususo runu na riisiina rinu rikaamirwe ku-dinaari inu, ni bhyaga?” Mbamusubhya ati, “Ni bhya Kayijaari.”

²⁵ Yeesu ˆnaabhabhwira ati, “Mmbe, ebhya Kayijaari, muyaane Kayijaari. Na ebhya Nyamuwanga, muyaane Nyamuwanga.”

²⁶ Riisubhyo rya Yeesu riyo, ndiruguusha muno abhaanu bhayo, mbajibhira. Mmbe, mbataamibhwa okumugwatira ku-mangʼana gaaye.

Amakaamo Amataakatiifu ageekirisha ati obhusuuki bhwa abhaanu bhuriwo

²⁷ Kimwi Abhasadukaayo abhandi mbaaja ku-Yeesu. Abhasadukaayo ꞉bhaariga mbeeyigisha ati abhafuuye bhatakutura okusuuka kajaanende. Mbabhuusha Yeesu ati,

²⁸ “Omwiyigisha, ku-bhiraagiro Musa ꞉aakikaamiiye ati, raabhe omuunu akafwa, ˆnaasiga mukaaye ateebhuuye nawe omwana na wumwi, omumura waabho agabhe omugasi uyo, insonga ayambaasishe omufu waabho omusi.

²⁹ Mmbe kyaike ati, ꞉bhaariga bhariwo bhamura mungati bhari bha nda yimwi. Omumura wa okwamba ˆnaagabhura omugasi. Kimwi omumura uyo ˆnaafwa ˆnaasiga omugasi atari na abhaana.

³⁰ Oruuse rwaye, [ndugabha omugasi uyo. Oruuse rwone ndufwa akyari kwibhura na omugasi uyo.]

³¹ Owa akasatu, woone ˆnaamugabhura, ˆnaafwa. Niibha kutyokutyo ku-bhamura bhoone kutyo mungati, unu ꞉aagabhuraga omugasi uyo ˆnaafwa ateebhuuye nawe omwana.

³² Ku-bhuteero, omugasi uyo woone ˆnaafwa.

³³ Mmbe! Bhunu obhusuuki bhwa abhaanu bhuriyika, omugasi uyo aribha mugasi waaga? Bhoone kutyo mungati ꞉bhaamugabhuuye!”

³⁴ Yeesu ˆnaabhasubhya ati, “Ku-bhurame bhwa abhaanu ku-nsi kunu, abharume abhagabhura na abhagasi bhoone abhagabhurwa.

³⁵ Nawe, abhaanu bhanu Nyamuwanga arirora ati bheesire okusuurwa okusooka mu-bhafuuye, bhakayika mu-kyaro kirya, abhaanu bhatarigabhura na okugabhurwa.

³⁶ Abhaanu mu-kyaro kiyo bhatakutura okufwa kweki, kwa okubha bharibha rwa bhaamaraayika. Abhaanu bhayo ni bhaana bha Nyamuwanga, kwa okubha bhasuurirwe okusooka mu-bhafuuye.

³⁷ “Nawe okwaika ati abhafuuye bharisuuka, Musa woone ꞉eeresiishe ati abhafuuye abhasuukaga. Mu-Makaamo bhunu ꞉aakaamire ˆnaaikiraga mu-kasaka karya, ꞉aaikire ati ‘Raatabhugenyi Nyamuwanga, niwe Nyamuwanga wa Bhurayimu, na owa Isaaka, na owa Yakobho.’

³⁸ Nyamuwanga weeki atari Nyamuwanga wa abhafuuye, tari omwene ni wa bhanu abheesha omwoyo. Kwa okubha mu-meeso ga Nyamuwanga bhoone kutyo bhakyeesha omwoyo.”

³⁹ Kimwi abheeyigisha abhandi abha ebhiraagiro bhya Musa mbaaika ati, “Mwiyigisha, waaika kujomu!”

⁴⁰ Okwambira mu-kabhaga kayo mboobhaya okubhuusha Yeesu amabhuusho agandi.

Yeesu ni Muyiiri Dawudi na niwe Raatabhugenyi

⁴¹ Nawe, Yeesu ˆnaabhuusha abheeyigisha bhayo ati, “Kubhaki abhaanu abhaaika ati, Kiriisitu ni muyiiri omukama Dawudi?

⁴² Dawudi omwene, mu-kitabho kya Ijabhuri, aaikire ati, ‘Raatabhugenyi Nyamuwanga ꞉aabhwiriiye Raatabhugenyi waani, iikara orubhaara rwani orwa ebhuryo,

⁴³ okuyikira anu nikatuure abhasoko bhaawo emwaro, awe ubhatunge.’

⁴⁴ “Raabhe Dawudi kaabhirikira Kiriisitu ati, ‘Raatabhugenyi.’ Kiriisitu kaatura kutiki kweki okubha muyiiri Dawudi?”

Yeesu kaagonya Abhafarisaayo na abheeyigisha bha ebhiraagiro

⁴⁵ Bhunu abhaanu ꞉bhaariga bhasangire mbeetegeereshaga, Yeesu ˆnaabhwira abheeyigira bhaaye ati,

⁴⁶ “Mwikenge na abheeyigisha bha ebhiraagiro bhya Musa! Abheeyigisha bhayo bheendere okufwara giikanju gyebhwe ndeera, mbakeesibhwa na okuyaanwa ekibharo mu-maguriro. Bheendere okwikara ku-bhitebhe bhya ekibharo mu-masunagoogi, na mu-bhugenyi.

⁴⁷ Abhateesha abhakimari bha ekigasi ebhiinu bhyebhwe, abhasabha nsaara ndeera insonga abhaanu bhabharore ati ni bharengeresi. Abhaanu bhanu Nyamuwanga aribharamurira makomeeye muno!”