Ruuka 2 - Iimuuma Iinyaaya

Okwibhurwa kwa Yeesu

¹ Ku-nsiku giyo egya okwibhurwa Yowana, Kayijaari Aguusito ꞉aaragiriiye ati, abhaanu bhoone kutyo abha mu-bhutungi bhwaye bhagende okubharwa.

² Okubharwa kunu ꞉kwariga kuri kwa okwamba, na ꞉kwabheeye-wo bhunu Kureeniyo ꞉aariga ari mutungi wa Siiriya.

³ Mmbe, abhaanu bhoone kutyo mbagenda okubharwa mu-misi gyebhwe.

⁴ Yuusufu woone ˆnaasooka mu-musi gwa Naajareeti mu-kyaro kya Gariraaya, ˆnaariinya okugenda Ebhuyawudi mu-musi gwa Bhetereemu, kwa okubha Bhetereemu nigwo omusi gwa omukama Dawudi, na Yuusufu ꞉aariga ari wa mu-ruganda rwa Dawudi.

⁵ Bhunu Yuusufu ꞉aagendaga okubharwa, ꞉aariga ari amwi na Maryamu. Yuusufu ꞉aariga amubhusisiishe obhuko. Na Maryamu ꞉aariga ari na inda.

⁶ Bhunu ꞉bhaariga bhari Bhetereemu ayo, Maryamu ˆnaayikya okwibhura,

⁷ ˆneebhura omwana mumura owa obhubhere, ˆnaamufundikira mu-ngibho, ˆnaamumaamya mw-iriisisho rya giingʼombe, kwa okubha ꞉bhataanyoorere owa okumaama mu-nyumba gya abhagenyi.

Abhareefi abhataka era maraayika ˆnaabhaaja-ko

⁸ Abhareefi ꞉bhaariga mbaangarira giingʼondi gyebhwe mw-itete ayeeyi na Bhetereemu, iri mu-ngeta.

⁹ Kimwi mbataka era maraayika wa Raatabhugenyi Nyamuwanga ˆnaabhaaja-ko. Na obhugungyo bhwa Raatabhugenyi Nyamuwanga mbubhamirikira mbaara gyone kutyo, mboobhaya muno.

¹⁰ Nawe maraayika uyo ˆnaabhabhwira ati, “Musige okuubhaya! Naabhareetera amangʼana amajomu ganu agaaja okujomisha muno abhaanu bhoone kutyo.

¹¹ Kwa okubha, reero inu mu-musi gwa Dawudi, eebhurwa Omwerusi weemwe. Na Omwerusi uyo niwe Kiriisitu Raatabhugenyi.

¹² Na ekimenyegesho kya gayo nikyo kinu, omuuja okunyoora omwana omujaare amaamiibhwe mw-iriisisho rya giingʼombe, afundikiiywe gingibho.”

¹³ Ayoayo mbibha-wo ebhiwumbi bhya maraayika bheejaabho okusooka mu-rwire mbabha amwi nawe mbaamba okukumangya Nyamuwanga ati,

¹⁴ “Agungibhwe Nyamuwanga iiguru mu-rwire. Na omurembe gubhe mu-kyaro ku-bhaanu bhanu abhajomisha Nyamuwanga!”

¹⁵ Bhaamaraayika bhayo ꞉bheejire bhaasubha mu-rwire, abhareefi mbaaikana ati, “Kigende Bhetereemu, kirore gayo Raatabhugenyi aakibhwira.”

¹⁶ Mmbe, mbagenda bheewutire, mbayika ku-Maryamu na Yuusufu, mbarora omwana omujaare amaamirega mw-iriisisho rya giingʼombe.

¹⁷ ꞉Bheejire bhaamara okurora omwana uyo, mbabhwira abhaanu amangʼana goone kutyo aga omwana uyo ganu maraayika ꞉aabhabhwiriiye.

¹⁸ Na bhunu abhaanu ꞉bhoonguuywe gayo ꞉bhaabhwiriiywe na abhareefi bhayo, mbaruguura muno.

¹⁹ Nawe, Maryamu ˆnaagabhiika goone kutyo mu-mutima gwaye, ˆnaageeganiirishaga.

²⁰ Kimwi, abhareefi bhayo mbasubha enu mbakumangyaga Nyamuwanga na okumugungya ku-goone kutyo ganu ꞉bhoonguuywe na okurora, kwa okubha, amangʼana goone kutyo ꞉gaabheeye rwa kutyo ꞉bhaabhwiriiywe na maraayika.

²¹ Bhunu omwana uyo ꞉aayikiishe orusuku rwa munaana, mbamusaara, mbamutoga riisiina Yeesu. Niryo riisiina rinu maraayika urya ꞉aariga amutogere, bhunu nyiramwene ꞉aariga akyari okugega inda.

Yeesu kaasirwa mw-iyekaru

²² Kimwi, orusuku nduyika runu Maryamu ꞉aariga ayikiishe akabhaga ka okwiyesha kwaye rwa kutyo ebhiraagiro bhya Musa ꞉bhyeendaga akore, ˆnaagenda na Yuusufu, mbasira Yeesu Yerusareemu mw-iyekaru, bhamutuure mu-mabhoko ga Raatabhugenyi Nyamuwanga.

²³ Kwa okubha, ꞉gaakaamirwe ku-bhiraagiro bhya Raatabhugenyi ati, “Omwana wa obhubhere owa ekimura eesire aawurwe atuurwe mu-mabhoko ga Raatabhugenyi Nyamuwanga.”

²⁴ Amwi na gayo, ꞉bhaariga bheendere bhasooshe ekimweso kinu ekyaikwa ku-bhiraagiro bhya Raatabhugenyi ati, “Musooshe ekimweso kya nguuti ebhiri, amwi ati, mureete amaana gabhiri aga ginguuti gya iibhara.”

²⁵ Na Yerusareemu ayo ꞉aariga ariwo omuunu wumwi, riisiina ryaye ˆnaatogwa Siimiyooni. Siimiyooni uyo ꞉aariga ari murengeresi, na ꞉aariga ari muungwa ku-Nyamuwanga, enu ˆnaarindiriraga okurora obhwerusi bhwa Nyamuwanga ku-Bhaijirayeeri. Mwoyo Omutaakatiifu ꞉aariga ari amwi nawe,

²⁶ na ꞉aariga amubhwiriiye ati, atarifwa akyari okurora Kiriisitu wa Raatabhugenyi Nyamuwanga.

²⁷ Na bhunu abheebhusi bha Yeesu ꞉bhaamusirire mw-ibhanja rya riiyekaru, insonga bhakore kutyo ebhiraagiro ebhiragirira, Siimiyooni woone ˆnaatangasibhwa na Mwoyo Omutaakatiifu eengire muyo.

²⁸ Kimwi ˆnaaramira omwana Yeesu, enu ˆnaakumyaga Nyamuwanga ati,

²⁹ “Awe Raatabhugenyi, Omukuru wa bhyone kutyo, woori ukanyiikirisiishe anye omujuuma waawo, nifwe na omurembe, kwa okubha gayo ꞉waambwiriiye nigo naarora.

³⁰ Woori neerorera obhwerusha bhwawo,

³¹ bhunu ꞉waatuuye-wo mu-meeso ga abhaanu bha ebhyaro bhyone kutyo.

³² Obhwerusha bhuyo ni bhweru bhwa okweresha injira yaawo ku-bhanu bhatari Bhayawudi, na okuyaana abhaanu bhaawo Abhaijirayeeri obhugungyo.”

³³ Amangʼana gayo Siimiyooni ꞉aaikiraga omwana uyo, ngaruguusha esemwene na nyiramwene.

³⁴ Kimwi Siimiyooni ˆnaabheendera iinonkwe, ˆnaabhwira Maryamu nyira mwana, ˆnaaika ati, “Iitegeeresha! Omwana unu arengerwe ati arigwisha Abhaijirayeeri bhaafu, na ariimusha Abhaijirayeeri abhandi bhaafu. Na atuuywe-wo okubha ekibharikisho kinu kiriremwa na abhaanu,

³⁵ okuyikira anu ganu ꞉gaariga ngeeyibhisa mu-myoyo gyebhwe garituurwa ku-bhweru. Woone uriwutaasibhwa muno mu-mwoyo gwawo muna usomerwe na ekiraawa.”

³⁶ Yerusareemu ayo ꞉aariga ariwo omuragi wumwi, mukwekuru muno, riisiina ryaye ˆnaatogwa Ana, omuyara wa Faanweri, owa riiyito rya Asheeri. Ana ꞉aamarire myaka mungati era na omurume waaye, kimwi omurume waaye ˆnaafwa.

³⁷ ꞉Aasigaaye ari mukimari, ˆnaayikya ekura rya myaka makumi munaana na ena. ꞉Aariga eekaaye mw-iyekaru atakusooka-mo ˆnaasaasaamaga mu-mwisi na mu-ngeta na okwiyima ebhyokurya.

³⁸ Bhunu Ana ꞉aayikire ku-mwana uyo, ˆnaamba okukumya Nyamuwanga, ˆnaaika amangʼana ga omwana uyo ku-bhaanu bhoone kutyo bhanu ꞉bheesigaga ati Nyamuwanga arituurya Yerusareemu.

³⁹ Bhunu Yuusufu na Maryamu ꞉bhaariga bhaamarire okukuumisha goone kutyo ganu ebhiraagiro bhya Raatabhugenyi ꞉bhyeendaga, mbasubha eweebhwe mu-musi gwa Naajareeti, mu-kyaro kya Gariraaya.

⁴⁰ Omwana ˆnaakura, ˆnaakomeera, ˆnaabha na obhwenge, na ꞉aariga ˆnaayaanwa iinema na Nyamuwanga.

Yeesu ari mw-iyekaru

⁴¹ Abheebhusi bha Yeesu ꞉bhaariinyagishaga okuja Yerusareemu ku-nsikukuru gya Ipaasaka myaka gyone.

⁴² Bhunu Yeesu ꞉aariga ari mwana wa myaka ekumi na ebhiri, mbagenda nawe okuriingʼaana na gintungwa gyebhwe.

⁴³ Bhunu insikukuru ꞉yaariga yaawooye, abheebhusi bha Yeesu mbasubha iika, nawe omwene ˆnaasigara Yerusareemu ayo. Abheebhusi ꞉bhataamenyere ati ꞉aariga asigaaye,

⁴⁴ ꞉bhaatogaga ati ꞉aariga ari amwi na abheejaabho bhunu ꞉bhaasubhaga iika. Bhunu ꞉bhaagwisiishe riisuubha bhabheeye ku-njira, mbaamba okumwagara agati wa abhasaani na abhayiiri bheebhwe.

⁴⁵ Bhunu ꞉aabhabhurire, mbasubha Yerusareemu enu mbamwagaraga.

⁴⁶ Orusuku rwa akasatu mbamunyoora mw-ibhanja rya riiyekaru, eekaayega agati wa abheeyigisha abha ebhiraagiro, ꞉aariga ˆnaabheetegeeresha, ˆnaabhabhuushaga amabhuusho.

⁴⁷ Abhaanu bhoone kutyo bhanu ꞉bhoonguuywe kutyo ꞉aariga ˆnaaika, mbaruguurira muno obhwenge bhwaye na amasubhyo gaaye.

⁴⁸ Bhunu abheebhusi bhaaye ꞉bhaamurorere, bhoone mbaruguura muno. Nyiramwene ˆnaamubhwira ati, “Omwana waani unu, kubhaki waakikorera kutya? Anye na esomwana kyariga kyayayire, nkikwagaraga muno!”

⁴⁹ Yeesu ˆnaamusubhya ati, “Kubhaki mwariga muunyaagara? Mutakumenya ati niisire okubha mu-nyumba ya Raata?”

⁵⁰ Abheebhusi bhaaye ꞉bhataasombookeeywe riisubhyo riyo.

⁵¹ Gayo ꞉geejire gaawa, mbagenda bhoone kutyo iika Naajareeti, Yeesu ˆnaabhoongwaga. Gayo goone kutyo ꞉gaakorekere, nyiramwene ꞉aagabhiikaga mu-mutima gwaye.

⁵² Yeesu ˆnaagenderera okukura omubhiri na obhwenge, na okujomisha Nyamuwanga na abhaanu.