Ruuka 12 - Iimuuma Iinyaaya

Ameeyigisho iiguru ya obhubheeyi

¹ Ku-kabhaga kayo, abhaanu ebhiwumbi na ebhiwumbi ꞉bhaariga bhasangire ayo. ꞉Bhaariga bhari bhaafu mbatajana. Yeesu ˆnaamba okwamba okubhwira abheeyigira bhaaye ati, “Mwiyangarire na ameeyigisho amabhiibhi aga Abhafarisaayo gataaja okuswerana kw-imwe, kwa okubha intungwa yeebhwe, abhaaika iingʼana inu, kaana abheene mbakora mangʼana agandi.

² Orusuku rumwi ameeyibhise goone kutyo garituurwa ku-bhweru, amafundikiiywe goone garimenyekanira ku-bhweru.

³ Ganu ꞉mwaaikiiye mu-kisuute abhaanu bharigoongwira ku-bhweru. Raabhe mukawewetanira mu-matwi muri esiiko, amangʼana gayo gariraasibhwa okusookerera ku-nsara gya giinyumba gyemwe.”

Owa okuubhaywa ni Nyamuwanga era

⁴ “Enibhabhwira emwe abhasaani bhaani ati, mwasiga okuubhaya abhaanu bhanu abheeta emibhiri. Bhaakamara okubheeta, bhatakutura okukora engʼana erindi okukira riyo.

⁵ Nawe, siga nibheereshe owa okuubhaya, muubhaye Nyamuwanga omwene era! Omwene akamara okwita omuunu, ari na obhuturo bhwa okumwesa mu-muriro gunu gutakusimá.

⁶ “Toga ebhiitamba bhitaanu, abhigusibhwa bhugusi bhutooto muno? Nawe, Nyamuwanga atakurabhirwa na kimwi.

⁷ Mumenye ati Nyamuwanga amenyere na obhukumi bhwa ginfwiri gyemwe. Mmbe woori, mwasiga okuubhaya, kwa okubha emwe muri na kibharo kinene okukira ebhiitamba raabhé bhiraabhe bhyafu.”

Mwikirishe Yeesu mukabha mu-bhaanu

⁸ “Enibhabhwira ati, omuunu akanyiikirisha anye mu-meeso ga abhaanu, Omwana wa Adaamu woone arimwikirisha mu-meeso ga bhaamaraayika bha Nyamuwanga.

⁹ Nawe, omuunu akanyiigaana mu-meeso ga abhaanu, noone nirimwigaana mu-meeso ga bhaamaraayika bha Nyamuwanga ati atari waani.

¹⁰ Omuunu woonewoone akaaika amangʼana amabhiibhi aga okurema Omwana wa Adaamu, aryabhirwa. Nawe, omuunu akaaika amangʼana amabhiibhi aga injabhuro ku-Mwoyo Omutaakatiifu, uyo ataryabhirwa.

¹¹ “Bhunu bharibhasira mu-masunagoogi, na ku-bhatungi, na ku-bheenangwa, mwasiga okutitibhara. Mwasiga okwiganiirisha ati omuuja okwaika mangʼanaki mukabha mwibhagira,

¹² kwa okubha, mu-kabhaga kayokayo, Mwoyo Omutaakatiifu aribheeyigisha amangʼana ga okwaika.”

Ekirengekanyo kya omuniibhi omutengʼo

¹³ Mw-isangi rya abhaanu ayo, omuunu wumwi ˆnaabhwira Yeesu ati, “Omwiyigisha, raata ꞉aakisigiiye omugabho, woori nuubhwire waamuwaasu, angabhire-ko omugabho gwani.”

¹⁴ Yeesu ˆnaamusubhya ati, “Awe! Niga ꞉aantuuye anye okubha muramusi weemwe owa okubhagabhira omugabho gwemwe?”

¹⁵ Kimwi Yeesu ˆnaabhwira abhaanu bhayo ati, “Muringire! Mwikenge na iinambá ya ebhiinu, kwa okubha, obhuworu bhwa omuunu, bhutakusooka ku-bhwafu bhwa ebhiinu bhyaye.”

¹⁶ Kweki Yeesu ˆnaabhabhwira ekirengekanyo, ˆnaaikaga ati, “꞉Aariga ariwo omuniibhi wumwi, omuniibhi uyo ꞉aariga ari na riisambu ryaye, na riisambu riyo ꞉ryariga riyiisiishe muno.

¹⁷ Omuniibhi uyo ˆneebhuusha mu-mutima gwaye ati, ‘Nikore kutiki woori? Ndora nitari na owa okutuura ebhigeswa bhyani bhinu!’

¹⁸ Kimwi ˆnaaika ati, ‘Woori nikore kutya. Nikambure ebhitara bhyani, numbake ebhindi ebhinene muno. Mu-bhitara ebhinene muyo, enitura okubhiikira-mo ebhigeswa bhyani bhyone kutyo, na ebhiinu bhyani ebhindi.

¹⁹ Na eniija okwibhwira omutima gwani ati, “Woori neetuuriiye-wo bhiinu bhyafu bhijomu. Ebhiinu bhinu ebhiwa emyaka gyagendere. Siga woori niikare nirye ebhiinu, ninywe, nijomerwe!” ’

²⁰ Nawe, Nyamuwanga ˆnaamubhwira ati, ‘Awe uri mutengʼo! Ingeta inuinu, owufwa! Waakumanyiishe bhiinu bhyafu. Woori ebhiija okubha bhyaga?’ ”

²¹ Yeesu, ˆnaamariisha okwaika ˆnaabhabhwira ati, “Eyiija okubha kutyokutyo, ku-muunu unu keekumanyisha ebhiinu, akamara okwikumanyisha ebhiinu ˆnaarema okukora amangʼana ga Nyamuwanga.”

Mwasiga okunyanka

²² Kimwi, Yeesu ˆnaabhwira abheeyigira bhaaye ati, “Ku-nsonga iyo, musige okunyankirira obhurame bhwemwe, ati omuuja okuryaki, musige okunyankirira ati omuuja okufwaraki.

²³ Obhurame obhukira ebhyokurya, na omubhiri ogukira gingibho.

²⁴ “Mugwate ekirengekanyo kya nyamunkoro. Nyamunkoro atakuyamba, nyamunkoro atakugesa. Nyamunkoro atari na kitara, nawe Nyamuwanga kaamugabhisha. Nawe emwe muri na ekibharo kinene muno ku-Nyamuwanga okukira giinyonyi!

²⁵ Kw-imwe ni wuuya kaatura okwinyankirira ˆneeyongesha nsa yimwi era, eya okurama kwaye mu-kyaro anu?

²⁶ Mmbe! Raabhe mutakutura okukora engʼana etooto riyo, kubhaki munyankirire amangʼana agandi gayo?

²⁷ “Muringire kutyo amawuuwa ga iibhara agamera. Amawuuwa gayo gatakukora emirimu na gatakwibhariirira ngibho. Nawe enibhabhwira ati, omukama Seremaani ku-bhugungyo bhwaye bhwone kutyo, ꞉ataafwaye kujomu rwa amawuuwa gayo!

²⁸ Raabhe Nyamuwanga kaafwafya kutya amanyansi ga iibhara, ganu gariwo reero era, katondo ngeeswa mu-muriro. Angu atakutura okubhafwafya emwe, abhaanu bha obhwikirisha obhutooto!

²⁹ “Raabhe ni kutyo, musige okunyankirira ati omuuja okurya na okunywaki. Gayo gakabha-wo musige okuyaya.

³⁰ Amangʼana gayo, nigo aganyansha abhaanu bhanu bhatakwikirisha Nyamuwanga. Mwasiga okuganyankirira kwa okubha Esomwana amenyere ati omugakena.

³¹ Mmbe, emwe mwagare obhukama bhwa Nyamuwanga, na agandi gayo Nyamuwanga aribhoongesisha.”

Obhuniibhi bhwa mu-rwire

³² “Emwe muri bhatooto, musige okuubhaya, kwa okubha Esomwana owa mu-rwire eendere okubhayaana obhukama bhwaye.

³³ Mugushe ebhiinu bhyemwe muyaane abhatobhu giiyera. Mukakora kutyo omwituurira ebhitara mu-rwire. Eyo niwe ebhitara bhitakukokora, na bhiinu bhitakuwa mu-bhitara muyo. Eyo, atariwo mwifi, gatariyo na masiribhi ga okubhinyamura.

³⁴ Kwa okubha anu omubhiika ebhiinu bhyemwe, niwe emitima gyemwe gyone giribha.”

Abhaanu bhaasiga okuyigwa okurindirira Raatabhugenyi

³⁵ “Muyambane okwibhoya mukoreraga Nyamuwanga emirimu mu-ngeta na mu-mwisi, gintara gya mu-mitima gyemwe gisige okusimá.

³⁶ Mubhe rwa abhajuuma bhakabha mbarinda esebhugenyi, akasubha okusooka mu-bhwenga mu-ngeta ˆnaakongʼoona orwigi, mbamwigurira.

³⁷ Nyakara abhajuuma bhayo raabhe esebhugenyi akaaja ˆnaanyoora bhakyari okuwongera mbamurindaga. Enibhabhwira ekimari ati ariibhoya ˆnaabharaarika okurya ebhyokurya, enu omwene niwe ˆnaabhasabhuriraga!

³⁸ Abhajuuma bhayo bharijomerwa muno esebhugenyi aribhanyoora bheeroosiishe, esebhugenyi aaje mu-bhwire agati, aaje mu-ruguru kaabhanyoora mbarora!

³⁹ Mumenye kujomu riingʼana rinu. Omwene nyumba, akamenyere akabhaga ka omwifi okwingira, atakawongeeye, na atakasigire omwifi amwibhire mu-nyumba yaaye.

⁴⁰ Ikabha kutyo, emwe mwone mwituurega-wo akabhaga koone kutyo, kwa okubha, anu muryaikaga ati akabhaga kakyari, ku-kabhaga kayo niko Omwana wa Adaamu ariijira-ko.”

Omujuuma omwitongeeye na unu atari mwitongeeye

⁴¹ Kweki, Peetero ˆnaabhuusha Yeesu ati, “Raatabhugenyi, ekirengekanyo kiyo, waanuubhwira eswe eraa, waanuubhwira na abhandi bhoone?”

⁴² Raatabhugenyi ˆnaamusubhya ati, “Omujuuma omwitongeeye na owa obhwenge ni wuuya? Ni unu esebhugenyi kaatura okumuyaana obhutungi bhwaye bhwone kutyo, insonga omujuuma uyo niwe ayaane abhajuuma bheejaabho emiyeero mu-kabhaga ka okubhayaana.

⁴³ Nyakara omujuuma uyo, esebhugenyi akaaja ˆnaamunyoora ˆnaakoraga kutyo.

⁴⁴ Enibhabhwira ekimari ati esebhugenyi kaamutuura iiguru ayambaarire ebhiinu bhyaye bhyone kutyo!

⁴⁵ Nawe, omujuuma uyo akeeganiirisha mu-mutima gwaye ati, ‘Raatabhugenyi aakoora okusubha,’ kimwi ˆnaamba okubhuma abhajuuma bheejaabho abharume na abhagasi, enu ˆnaaryaga ebhiinu, ˆnaanywa obhwarwa ˆnaakorwa,

⁴⁶ esebhugenyi arisubha okusooka mu-rugendo rwaye ku-rusuku na ebhaga rinu omujuuma uyo atakumenya. Na esebhugenyi akamara okuuja arimubhutura masinja gabhiri, ˆnaamutuura amwi na abhaanu bhanu bhatakwikirisha.

⁴⁷ “Omujuuma akabha amenyere okukora gayo esebhugenyi keenda, nawe omwene atakugakora, omujuuma uyo kaaja okubhumwa muno.

⁴⁸ Nawe, omujuuma unu atamenyere gayo esebhugenyi keenda, kimwi weeki ˆnaakora amangʼana amabhiibhi kw-isebhugenyi, aribhumwa kutooto era. Omuunu akayaanwa bhyafu, aritongwa bhyafu. Raatabhugenyi akayaana omuunu bhyafu muno, okutonga kwone arimutonga bhyafu muno.”

Waasiga kuubhaya okuremwa na abhaanu ku-nsonga ya Kiriisitu

⁴⁹ “Anye, ꞉neejire mu-kyaro munu, okukongeesha omuriro. Na nikenere muno okurora omuriro guyo gwokere!

⁵⁰ Nawe anye noone eniija okubhatiisibhwa kweki. Obhubhatiisibhwa bhunu niisire okubhuramira, nawe iinyanko yaani iinene ni kutyo niraayike ku-bhubhatiisibhwa bhuyo.

⁵¹ Angu, omutoga ati ꞉neejire mu-kyaro okureeta omurembe? Uri! Enibhabhwira ati, ꞉neejire okwawukanya abhaanu.

⁵² Okwambira woori, mu-nyumba ya abhaanu abhataanu, abhasatu abhaaja okwawukana na bhabhiri. Bhabhiri bhoone, abhaaja okwawukana na abhasatu.

⁵³ Omuunu, aryawukana na omwana waaye, na omwana woone, aryawukana na esemwene. Omugasi, aryawukana na omuyara waaye, omuyara woone ˆneekirisha okwawukana na nyiramwene. Nyaabhuko, arirema aga omukaamwana, na omukaamwana woone, arirema aga nyaabhuko.”

Okumenyegesha amabhaga

⁵⁴ Yeesu ˆnaabhwira riisangi rya abhaanu ati, “Mukarora eriire ndiyinga ebhugwa esuubha, emwe omwaika ati, ‘Ingubha iri ayeeyi okugwa,’ na ingubha niigwa.

⁵⁵ Na mukoongwa omuyaga nguyemba, ngusookerera ebhuwanga, emwe mwaika ati, ‘Imbiita eyiija okubha nyafu,’ na nikwo kutyo eyibha.

⁵⁶ Abhabheeyi emwe! Mumenyere muno okumenyegesha emiyaga gya ku-kyaro! Ndora woori omutaamibhwa okumenya insonga ya amangʼana ganu agakoreka mu-nsiku ginu?”

Iikomeesha okuungwana na omusitaakya waawo

⁵⁷ “Ndora emwe abheene mutakutura okuringira ati iingʼana indebhe ni ya bhurengeresi, amwi ati itari ya bhurengeresi!

⁵⁸ Omusitaakya waawo akabha ˆnaakusira mw-ibharaja, iikomeesha okuungwana nawe mukyari mu-njira. Ukarema okuungwana nawe, kaakuyikya ku-muramusi. Na omuramusi uyo, arikusira ku-bhasirikare, bhakwingishe mu-jeera managa.

⁵⁹ Enikubhwira ekimari ati, utarisooka-mo okuyikira anu urimara okuriya riisiiri ryone kutyo!”