Ruuka 10 - Iimuuma Iinyaaya

Yeesu kaatuma abheeyigira abhandi makumi mungati na bhabhiri

¹ Gayo ꞉geejire gaawa, Yeesu ꞉aariga akenere okuja mu-misi egindi. ˆNaasora abheeyigira abhandi makumi mungati, ˆnaabhatuma bhabhiriibhiri, bhamutangatire okuja mu-misi giyo gyone kutyo.

² Yeesu ˆnaabhabhwira ati, “Ebhigeswa ni bhyafu, nawe abhagesi ni bhatooto. Woori, musabhe Raatabhugenyi Nyamuwanga, niwe omwene esambu, insonga atume abhagesi mw-isambu ryaye, bhagese.

³ Mmbe, emwe mugende. Nawe, mumenye ati enibhatuma rwa giingʼondi ginu egiribhata agati wa ginsunji!

⁴ Musige okugega ekikapo kya giiyera, ekisengo, ebhikwirya bhya okubharanya. Na musige okubhusha omwanya mukeeshaga abhaanu ku-njira.

⁵ “Mukeengira nyumba yooneyoone, mukeeshe abhaanu bheende-mo ati, ‘Omurembe gubhe na emwe.’

⁶ Na akabha arimo omuunu wa omurembe mu-nyumba muyo, omurembe gunu mwamwendera ogusigara nawe. Nawe, omuunu wa omurembe akabha atarimo mu-nyumba muyo, omurembe gwemwe gusubhe kw-imwe.

⁷ Mukeengira mu-musi mwikare musi gumwi era, bhaakabhayaana ebhyokurya murye, kwa okubha omukosi wa emirimu eesire okuyaanwa indiyo yaaye.

⁸ “Mukeengira omusi gwonegwone, abheekasi bhaakabharamira, bhaakabhayaana ebhyokurya bhyonebhyone murye.

⁹ Na muwoshe abharwaye mu-misi giyo. Mubhwire abheekasi bhayo ati, obhukama bhwa Nyamuwanga bhuri ayeeyi!

¹⁰ Nawe, mukeengira mu-musi gwonegwone, na abheekasi bhaakarema okubharamira, muture mu-bhiseera bhyebhwe mwaikaga ati,

¹¹ ‘Oruteeri rwa ku-maguru geeswe ni rwa mu-musi gwemwe. Ekirukuukumurira anu, kibhe kibharikisho kw-imwe mumenye kimari ati, obhukama bhwa Nyamuwanga bhuri ayeeyi!’

¹² Enibhabhwira ati, orusuku runu Nyamuwanga ariramura abhaanu bha mu-musi guyo, aribharamurira makomeeye, okukira kutyo ariramurira abhakosi bha amabhiibhi abha Sodoma!”

Yeesu kaagonya abhaanu mu-misi ginu ꞉bhaamuremere

¹³ “Garibhanyoora emwe, abhaanu bha Korajiini na abhaanu bha Bheetisayida! Kwa okubha, ebhigwa bhinu ꞉naakorere mu-meeso geemwe, nikabhikoreeye Tiiro na Sidooni, abhaanu mu-misi giyo bhatakakoorere okunuga ebhikayo bhyebhwe. Na bhakafwaye gingibho gya amagunira na okwiyaka riifu, okweresha obhunugi bhwebhwe obhwa ebhikayo.

¹⁴ Nawe, orusuku runu Nyamuwanga ariramurira abhaanu mu-kyaro anu, aribharamurira emwe makomeeye okukira kutyo ariramurira abhaanu abhakosi bha amabhiibhi abha Tiiro na Sidooni!

¹⁵ Emwe, abhaanu bha Kaperinawumu emwe, omutoga ati muririinywa muyike mu-rwire? Wuri, mutarikorerwa kutyo! Nawe, muriisibhwa emwaro mw-itoko rya nyombe!”

¹⁶ Kimwi, Yeesu ˆnaabhabhwira abheeyigira bhaaye ati, “Unu aribheetegeereesha emwe, kaabha anyiitegeeresiishe anye. Na unu aribharema emwe, noone kaabha andemere. Na omuunu akandema anye, kaabha aremere Nyamuwanga, unu antumire.”

Abheeyigira bhaasubha ku-Yeesu

¹⁷ Okumara gayo, niwe abheeyigira bharya makumi mungati mbasubha bhajomeeywega. Mbabhwira Yeesu ati, “Ee Raatabhugenyi, kw-isiina ryawo kyone ekibhirimya ebhiwi mu-bhaanu, mbikyungwa!”

¹⁸ Yeesu ˆnaabhasubhya ati, “Nirorere Sitaani ˆnaataatika muna rumesho okusooka mu-rwire.

¹⁹ Emwe mumenye ati, naabhayaaye obhuturo bhwa okuyiga amanaga goone kutyo aga Sitaani. Ku-bhuturo bhuyo, muritaja ebhisoro na ebhitoromooni, mutariwutasibhwa na kiinu kyonekyone.

²⁰ Nawe, musige kujomererwa kutyo ebhiwi ebhibhoongwa. Tari, mujomererwe riingʼana rinu, ati amasiina geemwe gakaamirwe mu-rwire.”

Yeesu kaajomerwa

²¹ Mu-kabhaga kayokayo, Mwoyo Omutaakatiifu ˆnaakora Yeesu ˆnaajomerwa muno, Yeesu ˆnaaika ati, “Ee Raata, enikukumya, awe Raatabhugenyi wa mu-rwire na mu-kyaro! Kwa okubha amangʼana ganu, ꞉waabhisire abheenge na abhasomi, nuutuurira abhweru abhaana abhatooto. Yee Raata, kwa okubha ni kutyo ꞉gaakujomeeye awe.”

²² Kimwi Yeesu ˆnaabhwira abhaanu ati, “Raata anaaye ebhiinu bhyone kutyo. Ni esemwene mwana era, niwe amenyere Omwana. Na Omwana era, niwe amenyere esemwene, na Omwana akeenda okweresha esemwene ku-muunu, kaamweresha.”

²³ Kimwi, Yeesu ˆnaaringira abheeyigira bhaaye, ˆnaabhabhwirira ku-mbarika bhari abheene ati, “Nyakara emwe, kwa okubha omurora amangʼana ganu na ameeso geemwe!

²⁴ Kwa okubha enibhabhwira ati, abharagi bhaafu, na abhakama, ꞉bheegombere okurora amangʼana ganu emwe omurora, nawe ꞉bhataagarorere. Na ꞉bheegombere okuungwa ganu emwe omuungwa, nawe ꞉bhataagoonguuywe.”

Ekirengekanyo kya Omusamaariya owa omutima omujomu

²⁵ Orusuku rumwi, omwiyigisha wumwi owa ebhiraagiro bhya Musa ꞉aayambaaye, ˆnaabhuusha Yeesu riibhuusho okumusakya, ˆnaamubhwira ati, “Ee Omwiyigisha, nikore kutiki, niije ninyoore obhurame bhunu bhutakuweera?”

²⁶ Yeesu ˆnaamusubhya ati, “Ku-bhiraagiro gakaamirwe kutiki? Owubhisombookerwa kutiki?”

²⁷ ˆNaamusubhya ati, “Gakaamirwe kutya, ‘Yeenda Raatabhugenyi Nyamuwanga waawo ku-mutima gwawo gwone kutyo, ku-managa gaawo goone kutyo, na ku-bhwiganiirisha bhwawo bhwone kutyo.’ Na ‘Wende omwikashaanya waawo, rwa kutyo owiiyenda omwene.’ ”

²⁸ Yeesu ˆnaamubhwira ati, “Waasubhya kujomu! Ukakora kutyo gakaamirwe, urirama.”

²⁹ Nawe, omwiyigisha uyo, ˆneenda okweresha ati ni murengeresi ku-Nyamuwanga, ˆnaabhuusha Yeesu ati, “Woori omwikashaanya waani, ni wuuya?”

³⁰ Yeesu ˆnaamusubhya ati, “꞉Aariga ariwo omuunu wumwi, ˆnaasookaga Yerusareemu, ari maguru ˆnaagenda Yeriko. Ku-njiragati, ˆnaanyookana na abheefi mbamubhuma muno. Mbamufuura gingibho, mbamusiga asingire arebhereeye okufwa.

³¹ Ebhando ejomu ku-njira ayo, ˆnaatura omushengesi wumwi. Nawe omushengesi uyo ꞉eejire aamurora, ꞉aaturire ku-mbarika.

³² Omuraawi woone, ˆnaatura ku-njira kuyo, ꞉eejire aarora omuunu uyo, ˆnaatura ku-mbarika.

³³ Nawe ˆnaaja Omusamaariya wumwi, ˆnaagendaga rugendo rwaye. Bhunu ꞉aarorere omuunu uyo, ˆnaamufwira ekigongo.

³⁴ ˆNaamuuja-ko, ˆnaamuragura amawuta gaaye ˆnaagayaka iidivaayi na amafuta, ˆnaamubhoya amawuta gayo kujomu. Kimwi ˆnaamuriinya ku-nsikiri yaaye, ˆnaamugega ˆnaamusira mu-nyumba ya abhagenyi, ˆnaamusiga muyo amuunye.

³⁵ Mwejo, ˆnaasoosha mu-mufuko dinaari ebhiri, ˆnaayaana omwene nyumba ˆnaamubhwira ati, ‘Ringirira omuunu unu. Ukamusoosisha giiyera egindi okukira ginu, nirisubha nirikuriya.’ ”

³⁶ Niwe, Yeesu ˆnaabhuusha omwiyigisha uyo ati, “Mmbe! Ku-kurora kwawo, ku-bhaanu abhasatu bhayo ni wuuya ꞉aariga ari mwikashaanya owa omuunu uyo?”

³⁷ Omwiyigisha uyo ˆnaamusubhya ati, “Ni muunu wa akasatu urya niwe ꞉aamufwiriiye ekigongo. Uyo niwe ꞉aariga ari omwikashaanya waaye.” Yeesu ˆnaamubhwira ati, “Genda, woone ukore kutyokutyo!”

Yeesu ari ewa Marita na Maryamu

³⁸ Yeesu na abheeyigira bhaaye mbagenda, mbayika kw-igunguri rimwi. Na omugasi wumwi, riisiina ryaye ˆnaatogwa Marita, ˆnaabharamira ˆnaabhasira ewaaye.

³⁹ Marita uyo, ꞉aariga ari na omuyara waabho, riisiina ryaye ˆnaatogwa Maryamu. Mu-kabhaga kayo, Maryamu ꞉aariga eekaaye ansi asijeene na Yeesu, ˆnaamwitegeereshaga.

⁴⁰ Marita, ꞉aariga ˆnaafurufuutira abhagenyi ebhyokurya ari omwene era. Kimwi Marita ˆnaaja ku-Yeesu, ˆnaamubhwira ati, “Ee Raatabhugenyi, awe utakurora ati omuyara waasu unu aansigira emirimu gyone kutyo? Mmbe, nuumubhwire aansakire emirimu!”

⁴¹ Nawe Yeesu ˆnaamusubhya ati, “Awe Marita, Marita! Owunyakirira mangʼana maafu.

⁴² Nawe, ririwo engʼana rimwi era ejomu okukira goone kutyo ku-bhaanu. Maryamu niwe asorere riingʼana riijomu okukira goone kutyo. Riingʼana riyo omuunu atakutura kumusoosisha-ko.”