Ruuka 1 - Iimuuma Iinyaaya

Insonga ya okukaama ekitabho kinu

¹ Awe Tewofiro owa ekibharo, abhaanu bhaafu bheekomeesiishe okukaama amangʼana ganu ꞉gaakorekere ewaasu enu.

² ꞉Bhaakaamire rwa kutyo ꞉kyatondeeywe na abhaanu bhanu ꞉bheeroreeye amangʼana gayo okusooka ku-bhwambiro bhwa emirimu gya Yeesu mu-kyaro anu, abhaanu bhayo ni bhanu ꞉bhaariga mbaraasha amangʼana ga Yeesu.

³ Anye noone naamarire okubhuusirisha kujomu kutyo ꞉gaakorekere okusooka ku-bhwambiro, kyakora naarora ati, ni kujomu nikukaamire obhwima bhwago,

⁴ insonga ubhe na ekimari kya amangʼana ganu ꞉woonguuywe.

Obhuragi bhwa okwibhurwa kwa Yowana Omubhatiisha

⁵ Bhunu Yerode Omukuru ꞉aariga ari mukama wa Ebhuyawudi, ꞉aariga ariwo omushengesi wumwi, riisiina ryaye ˆnaatogwa Jaakariya, owa mw-ikemba rya omushengesi Abhiya. Mukaaye ꞉aariga ˆnaatogwa Jaabheeti. Bhoone kutyo ꞉bhaariga bhari bha mu-ruganda rwa omushengesi Aruuna.

⁶ Abhabhiri bhayo ꞉bhaariga bhari bharengeresi mu-meeso ga Raatabhugenyi Nyamuwanga, na ꞉bhaariga mbaseeta ebhiraagiro bhyaye bhyone kutyo, na gintungwa gyaye, bhatakugiyabha.

⁷ ꞉Bhaariga bhatari na mwana, kwa okubha Jaabheeti ꞉aariga ari mugumba, na ꞉bhaariga bhakokooye muno.

⁸ Rusuku rumwi, mu-nsiku gya riikemba rya Jaakariya okukora emirimu gya obhushengesi mw-iyekaru rya Nyamuwanga.

⁹ Okuriingʼaana na gintungwa gya abhashengesi Jaakariya ˆnaagwirwa inkuura eengire Ataakatiifu mw-iyekaru rya Nyamuwanga, amutuutire obhubhaani.

¹⁰ Mmbe, bhunu ꞉aatuutaga, abhaanu bhaafu ꞉bhaariga bhasangire mw-ibhanja rya riiyekaru, mbasaasaamaga Nyamuwanga.

¹¹ Kimwi, Jaakariya ari mw-iyekaru muyo, ˆnaataka era maraayika wa Raatabhugenyi Nyamuwanga ˆnaamuuja-ko. Maraayika uyo ꞉aariga ayambaaye orubhaara rwa ebhuryo bhwa riishengero rya okutuutira obhubhaani.

¹² Jaakariya ꞉eejire aamurora, ˆnaatitibhara, ˆnoobhaya muno.

¹³ Nawe maraayika uyo ˆnaamubhwira ati, “Awe Jaakariya, siga okuubhaya! Nyamuwanga oonguuywe obhusaasaami bhwawo. Mukaawo Jaabheeti kaaja okukwibhurira omwana omumura, riisiina urimutoga Yowana.

¹⁴ Okwibhurwa kwa omwana uyo kurikora mujomerwe, na abhaanu abhandi bhaafu bharijomererwa muno okwibhurwa kwaye,

¹⁵ kwa okubha kaaja okubha muunu mukuru mu-meeso ga Raatabhugenyi. Omwana uyo atarinywa bhwarwa bhwonebhwone bhurya kajaanende, na okwambira okwibhurwa kwaye, aribha ˆneejushwa Mwoyo Omutaakatiifu.

¹⁶ Na arisubhya Abhaijirayeeri bhaafu ku-Raatabhugenyi Nyamuwanga weebhwe.

¹⁷ Omwoyo gwaye na obhuturo bhwaye bhuririingʼaana na obhwa omuragi Eriya. Aritangatira Raatabhugenyi insonga amutuurire-wo abhaanu. Omwene arigwatanya abhaana na bheesemwene bhoongwane. Na arikora abhaanu abhakana bhabhe na obhwenge rwa abhaanu abharengeresi mu-meeso ga Nyamuwanga.”

¹⁸ Jaakariya ˆnaabhuusha maraayika uyo ati, “Ni kiinuki kinu kiriinyeeresha ekimari kya amangʼana gayo, kwa okubha anye na mukaani kyakokooye?”

¹⁹ Maraayika uyo ˆnaamusubhya ati, “Ni anye Gaabhuryeri, ni anye omujuuma wa Nyamuwanga. Antumire niije nikubhwire amangʼana amajomu ganu.

²⁰ Nawe kwa okubha utakwikirisha amangʼana gaani, owubha mujibhi, na utaritura okwaika, okuyikira anu amangʼana ganu garikuumira mu-kabhaga kaago, niwe uryaika!”

²¹ Abhaanu bhanu ꞉bhaariga mbarindirira Jaakariya awuruke okusooka Ataakatiifu, mbaruguura kutyo ꞉aakoorere muyo.

²² Mmbe, ꞉eejire okusooka muyo, ꞉ataaturire okubhaaikya, nawe ˆnaamba okubheeresha kijibhi. Kimwi abhaanu mbamenya ati, aarora ebhiroro mw-iyekaru rya Nyamuwanga. ˆNaagenderera okubha mujibhi.

²³ Mmbe bhunu ꞉aamarire ginsiku gyaye egya okukora emirimu mw-iyekaru rya Nyamuwanga, ˆnaagenda iika.

²⁴ Mukaaye Jaabheeti ˆnaagega inda, ˆnaamara meesi gataanu ˆneeyibhisaga, ˆnaaikaga ati,

²⁵ “Raatabhugenyi niwe aankoreeye kutya! Noone aayiitire, na aansoosiishe-ko ginswaro mu-bhaanu.”

Obhuragi bhwa Yeesu okwibhurwa

²⁶ Bhunu inda ya Jaabheeti yaayikiishe meesi gasansabha, Nyamuwanga ˆnaatuma maraayika Gaabhuryeri mu-musi gwa Naajareeti, mu-kyaro kya Gariraaya,

²⁷ ku-muyarajuma wumwi, riisiina ryaye ˆnaatogwa Maryamu. Maryamu uyo ꞉aariga abhusiibhwe obhuko na omurume wumwi, riisiina ryaye ˆnaatogwa Yuusufu, owa mu-ruganda rwa omukama Dawudi.

²⁸ Kimwi maraayika uyo ˆnaagenda ku-Maryamu, ˆnaamubhwira ati, “Enikukeesha, awe unu uyaaywe iinema! Raatabhugenyi ari amwi na awe.”

²⁹ Maryamu ꞉eejire oongwa amangʼana ga maraayika uyo, omwoyo gwaye ngutitibhara muno, ˆneebhuusha ati, “Bhunu ni bhukeeshaki?”

³⁰ Nawe maraayika uyo ˆnaamubhwira ati, “Awe Maryamu, siga okuubhaya! Nyamuwanga akuyaaye iinema.

³¹ Iitegeeresha! Woori owuuja okugega inda, wiibhure omwana omumura, riisiina ryaye urimutoga Yeesu.

³² Aribha muunu mukuru, na aribhirikirwa omwana wa Unu ari iiguru wa bhyone kutyo. Raatabhugenyi Nyamuwanga arimukora abhe mutungi ku-kitebhe kya omukama Dawudi, jaaji waabho.

³³ Aritunga abhaanu bha oruganda rwa Yakobho kajaanende. Obhukama bhwaye bhutariweera.”

³⁴ Maryamu ˆnaabhuusha maraayika uyo ati, “Ganu garibha kutiki, anye nikyari muyarajuma?”

³⁵ Maraayika ˆnaamusubhya ati, “Mwoyo Omutaakatiifu arikwikira, na obhuturo bhwa Nyamuwanga Unu ari iiguru wa bhyone kutyo bhuribha iiguru waawo rwa riirengeesi. Mmbe, omwana uyo uriibhura, aribha mwana omusorwa ku-Nyamuwanga, na aribhirikirwaga ati, Omwana wa Nyamuwanga.

³⁶ Iitegeeresha! Omuyiiri waawo Jaabheeti ari na inda ya meesi gasansabha, nawe ni mukwekuru, na ꞉aariga ˆnaaikwa ati ni mugumba,

³⁷ kwa okubha ku-Nyamuwanga ritariwo engʼana rya kumutama.”

³⁸ Maryamu ˆnaamusubhya ati, “Anye niri mujuuma wa Raatabhugenyi, gabhe ku-anye rwa kutyo waaika.” Kimwi maraayika uyo ˆnaagenda.

Maryamu kaagenda okukeesha Jaabheeti

³⁹ Mu-nsiku giyogiyo, Maryamu ˆnaagenda bhwangubhwangu ku-Jaabheeti, mu-musi gumwi gwa ku-bhiima bhya Ebhuyawudi.

⁴⁰ Bhunu ꞉aayikire eyo, ˆneengira ewa Jaakariya, ˆnaakeesha Jaabheeti.

⁴¹ Jaabheeti ꞉eejire oongwa obhukeesha bhwa Maryamu, omwana unu ꞉aariga ari mu-nda yaaye ˆnaagoma. Ayoayo, Jaabheeti ˆneejushwa Mwoyo Omutaakatiifu,

⁴² kimwi ˆnaamura obhuraka ˆnaaika ati, “Ni awe uyaaywe giinonkwe okukira abhagasi bhoone kutyo! Na omwana unu uriibhura, woone ni muunu wa nonkwe!

⁴³ Anye nniga, nyira Raatabhugenyi weeswe aaje okunkeesha?

⁴⁴ Bhunu noongwa obhukeesha bhwawo era, ayoayo omwana unu ari mu-nda yaani aajomerwa, ˆnaagoma.

⁴⁵ Nyakara awe unu wiikirisiishe ati, gayo Raatabhugenyi akubhwiriiye garikuumira!”

Orwimbo rwa Maryamu

⁴⁶ Maryamu ˆnaaika ati, “Omutima gwani ogukumangya Raatabhugenyi,

⁴⁷ enijomererwa Nyamuwanga, Omwerusi waani,

⁴⁸ kwa okubha, aayiitire anye omujuuma waaye, ku-bhutobhu bhwani. Okwambira woori, abhaanu bha amakura goone kutyo bharibha mbanyaika ati, niri na giinonkwe.

⁴⁹ Nyamuwanga wa obhuturo aankoreeye amangʼana ga okuruguusha. Riisiina ryaye ni iitaakatiifu.

⁵⁰ Ekigongo kyaye kiri ku-bhaanu bha amakura goone kutyo bhanu abhamuungwa.

⁵¹ Nawe, abhaanu bhoone kutyo bhanu ꞉bheekumangyaga mu-mitima gyebhwe, abhanyaraganyiishe na obhuturo bhwa amabhoko gaaye.

⁵² Agwisiishe abhatungi okusooka ku-bhitebhe bhyebhwe bhya obhutungi, ˆneemusha abhatobhu.

⁵³ Eegutiishe bhanu bhari na omweko, amangʼana amajomu, nawe, abhaniibhi, abhabhirimiishe mabhoko ageene.

⁵⁴ Asakiiye omujuuma waaye Ijirayeeri, ˆnaayiita okufwira ekigongo

⁵⁵ Bhurayimu na abhaanu bhoone kutyo abha oruganda rwaye kajaanende, rwa kutyo ꞉aariga amuragire na bhaajaaji bheeswe abhandi.”

⁵⁶ Mmbe, Maryamu ꞉aamarire mukangwa meesi gasatu ari ewa Jaabheeti, ˆnaamara ˆnaasubha ewaaye.

Okwibhurwa kwa Yowana Omubhatiisha

⁵⁷ Bhunu ginsiku gya Jaabheeti egya okwibhura ꞉gyayikire, ˆneebhura omwana omumura.

⁵⁸ Abheekashaanya bhaaye na abhayiiri bhaaye ꞉bheejire bhoongwa kutyo Raatabhugenyi ꞉aamufwiriiye ekigongo, mbajomerwa amwi nawe.

⁵⁹ Bhunu omwana uyo ꞉aayikiishe orusuku rwa munaana, mbaja okumusaara, mbeenda bhatoge omwana uyo ati Jaakariya, riisiina rya esemwene mwana.

⁶⁰ Nawe nyiramwene ˆnaarema, ˆnaaika ati, “Uri! Kaatogwa Yowana.”

⁶¹ Mbamusubhya ati, “Ndora mu-bhayiiri bheemwe atariwo unu kaatogwa riisiina riyo?”

⁶² Kimwi, mbabhuusha esemwene, kijibhi, abhabhwire riisiina rinu keenda okutoga omwana waaye.

⁶³ ˆNaabhasabha akabhaawu, ˆnaakaama-ko ati, “Riisiina ryaye, ni Yowana.” Bhoone kutyo mbaruguura.

⁶⁴ Ayoayo, orurimi rwaye ndugajuka, ˆnaamba okuroma kweki, ˆnaakumyaga Nyamuwanga.

⁶⁵ Abheekashaanya bhaaye bhoone kutyo mbaruguura muno, amangʼana gayo ngaswerana mu-kyaro kyone ekya ku-bhiima bhya Ebhuyawudi.

⁶⁶ Abhaanu bhanu ꞉bhoonguuywe amangʼana gayo, ꞉bheebhuushaga ati, “Omwana unu aribha muunuki?” Kwa okubha ꞉bhaarorere kutyo obhuturo bhwa Raatabhugenyi ꞉bhwariga bhumuriko.

Orwimbo rwa Jaakariya

⁶⁷ Jaakariya, esemwene omwana uyo, ˆneejushwa Mwoyo Omutaakatiifu, ˆnaasoosha obhuragi ati,

⁶⁸ “Agungibhwe Raatabhugenyi Nyamuwanga wa Ijirayeeri! Kwa okubha aaja okutaarira abhaanu bhaaye na okubhatuurya.

⁶⁹ Aakiyaana Omwerusi okusooka mu-ruganda rwa omujuuma waaye Dawudi, Omwerusi unu ari na obhuturo,

⁷⁰ rwa kutyo ꞉aabhwiriiye abharagi bhaaye abhataakatiifu okwambira kara.

⁷¹ ꞉Aakiragire ati, arikyerusha mu-bhasoko bheeswe, na mu-mabhoko ga bhanu abhakibhiiyirirwa.

⁷² ꞉Aaikire ati, aryabhira bhaajaaji, ariyiita iimuuma yaaye iitaakatiifu.

⁷³ Kwa okubha ꞉aarayiriiye jaaji Bhurayimu ati,

⁷⁴ arikyerusha mu-mabhoko ga abhasoko bheeswe, insonga kimukorerega emirimu kitakuubhaya,

⁷⁵ nkikoraga ganu geesire mu-meeso gaaye, kyerere emitima nsiku gyone kutyo.

⁷⁶ Omwana waani awe, uribhirikirwaga ati, omuragi wa Nyamuwanga Unu ari iiguru wa bhyone kutyo. Kwa okubha uritangatira Raatabhugenyi, insonga anyoore umuroosisiishe injira.

⁷⁷ Uribhwira abhaanu bhaaye ati bharyerusibhwa, okuturira okwabhirwa ebhikayo bhyebhwe,

⁷⁸ okuriingʼaana na ekigongo kya Nyamuwanga weeswe. Obhwerusha bhwaye okusooka mu-rwire bhuriija

⁷⁹ okumirikira bhoone kutyo bhanu bhari mu-kisuute, na riirengeesi rya orufu. Arikitangasha ku-njira ya omurembe.”

⁸⁰ Omwana uyo Yowana ˆnaakura, ˆnaakomeera mu-mwoyo gwaye, ˆnaagenda okwikara mw-ibhara, okuyikira anu ꞉aayikiishe-wo ginsiku, ˆnaarobhoka ku-Bhaijirayeeri.