Obhusomboorerwa 9 - Iimuuma Iinyaaya

Maraayika wa akataanu kaabhuma riikombi ryaye

¹ Mmbe, gayo ꞉geejire gaawa, maraayika wa akataanu woone ˆnaabhuma riikombi ryaye. Nindora injota inu ꞉yasookere ku-rwire iguuye mu-kyaro. Injota iyo niiyaanwa orufunguro rwa riitoko rya nyombe.

² Niigura riitoko riyo, ingesi nyafu muno muna ya ebheri enene erya omuriro niisooka-mo. Riisuubha na orwire mbisibhiirisibhwa na ingesi iyo.

³ Mu-ngesi muyo ngisooka-mo ginsige, ngiswerana mu-kyaro. Ngiyaanwa obhuturo bhwa okuruma rwa ebhitoromooni.

⁴ Ginsige giyo ngisiigwa gisige okunyamura amanyansi, ebhiimesha, na amati goone kutyo anu gateereeye. Nawe girume era abhaanu, bhanu ꞉bhaariga bhatari na orubhano rwa Nyamuwanga ku-bhisuusu bhyebhwe.

⁵ Ginsige giyo ngibhwirwa ati gyasiga okwita abhaanu, tari gibharume era, ebhaga rya meesi gataanu. Na obhusungu bhwagyo ꞉bhwariga bhuri rwa obhusungu bhwa okurumwa na ekitoromooni.

⁶ Mu-nsiku giyo abhaanu bharyagara orufu, nawe bhatarifwa. Bhariigomba okufwa, nawe orufu rwone ruribheeruka.

⁷ Ginsige giyo ꞉gyariga ngisusa rwa giifwaraasi ginu gyayikire-wo okugenda mw-iremo. Ku-mitwe gyebhwe ꞉gyariga gifwaye ebhiinu muna orusuurya rwa ekikama runu ruroosiibhwe na iijaabhu. Na orususo rwagyo ꞉rwariga ndususana na obhusu bhwa omuunu.

⁸ ꞉Gyariga giri na nfwiri ndeera rwa egya abhagasi. Ameeno gaagyo gari rwa aga indwi.

⁹ ꞉Gyariga giri muna gifwaye gingibho gya riiremo egya ekyuma ku-bhifubha. Omuyiriro gwa amabhabha gaagyo, ꞉gwariga guri muna omuyiriro gwa amabhirigiti maafu aga giifwaraasi, ginu egibhirima okuja mw-iremo.

¹⁰ Emikira gyagyo ꞉gyariga ngiruma rwa ebhitoromooni, na obhusungu bhwagyo ꞉bhwariga bhuri na obhuturo bhwa okumara meesi gataanu bhuri mu-mubhiri.

¹¹ Ginsige giyo ꞉gyariga giri na omukama. Omukama waagyo uyo, ꞉aariga ari maraayika omukuru owa riitoko rya nyombe. Maraayika uyo mu-nyaaika ya Ekiebhuraaniya kaatogwa Abhadooni na mu-Kiyunaani kaatogwa Aporiyooni, insonga ya amasiina gayo, ni, “Omusikya.”

¹² Mmbe, ekika kya okwamba kyaturire, nawe mumenye ati bhikyariyo bhika bhibhiri bhinu bhikyaja.

Maraayika wa akasansabha kaabhuma riikombi ryaye

¹³ Kimwi, maraayika wa kasansabha woone ˆnaabhuma riikombi ryaye. Nuungwa riisi ndyaika okusooka ku-mbaara ena egya kw-ishengero rya iijaabhu rinu riri imbere ku-Nyamuwanga.

¹⁴ Riisi riyo ndibhwira maraayika wa akasansabha unu ꞉aariga ari na riikombi ati, “Iigurira bhaamaraayika abhana bhanu bhabhoyerwe mu-ruuji rwa Furaati.”

¹⁵ Mmbe, bhaamaraayika abhana bhayo mbeegurirwa insonga bheete orubhaara orumwi ku-gasatu aga abhaanu bhoone kutyo mu-kyaro, kwa okubha ꞉bhaariga bhatuuywe-wo ku-nsonga ya insa iyo, orusuku ruyo, na omwaka guyo.

¹⁶ Nduuja ruyijo rwa abhariinyi bha giifwaraasi bhagiriinyirega-ko. Nuungwa ati abhariinyi bhayo ꞉bhaariga miriyooni magana gabhiri.

¹⁷ Mu-bhiroro bhyani, ꞉naarorere giifwaraasi na bhanu ꞉bhaariga bhagiriinyire-ko ꞉bhaariga bhafwaye gingibho gya ekyuma ku-bhifubha gikangaarire muna muriro, egya obhururu, giriko na bhumayaayi muna bhuruti. Nindora emitwe gya giifwaraasi giyo, giri muna mitwe gya gindwi. Mu-kanwa waagyo ngusookaga-mo omuriro, ingesi na obhuruti.

¹⁸ Kimwi mbeeta riibhaara erimwi ku-gasatu aga abhaanu okuturira ku-bhika ebhisatu bhiyo, omuriro, ingesi na obhuruti. Na ebhika bhiyo ꞉bhyasookaga mu-minwa gyebhwe.

¹⁹ Obhuturo bhwa giifwaraasi giyo ꞉bhwariga bhuri mu-kanwa na ku-mikira gyebhwe. Emikira gyebhwe, ꞉gyariga giriko emitwe giri rwa ebhisoro, ngirumaga abhaanu.

²⁰ Abhaanu bhanu ꞉bhaawonere okufwa ku-bhika bhiyo ꞉bhataanugire ebhikayo bhyebhwe, ꞉bhaagendereeye okuramya ebhiinu bhinu ꞉bhaarooshaga na amabhoko geebhwe. ꞉Bhaariga mbaramya ebhiwi, ebhisusano bhya iijaabhu, ebhya giiyera, ebhya ebhisisira, ebhya amagina na ebhibhaajwa bhya amati, enu ebhiinu bhiyo bhitaarora, bhitoongwa na bhitakuribhata.

²¹ ꞉Bhataanugire ebhikayo, ebhya okwitana, okutaara ameega, obhurosi na obhwifi.