Obhusomboorerwa 8 - Iimuuma Iinyaaya

Iingʼondi ya Nyamuwanga kaasurumura ekibhoyero kya mungati

¹ Bhunu Iingʼondi ya Nyamuwanga ꞉aasurumuuye ekibhoyero kya mungati, nkabha-wo akajibhijibhi mu-rwire. Nawe akajibhijibhi kayo ꞉kataamarire nsa yimwi.

² Kimwi nindora bhaamaraayika mungati bhanu abhayambaaraga imbere ku-kitebhe kya Nyamuwanga, mbayaanwa amakombi mungati.

³ Maraayika owundi ˆnaaja, ˆnaayambaara imbere wa riishengero. Maraayika uyo ꞉aariga agwatiriiye riibhakuri rya iijaabhu erya okutuutira obhubhaani. ˆNaayaanwa obhubhaani bhwafu, insonga abhusaashe na amasaasaamo ga abhataakatiifu bhoone kutyo, abhutuure kw-ishengero rya iijaabhu rinu riri imbere wa ekitebhe kya ekikama.

⁴ Ingesi ya obhubhaani na amasaasaamo ga abhataakatiifu, ngariinya iiguru ku-Nyamuwanga okusooka mu-kubhoko kwa maraayika uyo.

⁵ Kimwi, maraayika uyo ˆnaagega amakara ga omuriro kw-ishengero ˆneejusha riibhakuri ryaye, ˆnaageesa mu-kyaro. Ekyaro nkibha na amabharuka, nkibha na giimesho, na riinyamutikima nditura.

Bhaamaraayika bhana abhabhuma amakombi geebhwe

⁶ Kimwi bhaamaraayika mungati bhanu ꞉bhaariga bhari na amakombi mungati, mbeerooseresha okubhuma amakombi geebhwe.

⁷ Maraayika wa okwamba ˆnaabhuma riikombi ryaye. Ingubha ya amagina, na omuriro bhisaasiibhwe na amaanyinga, mbyeswa mu-kyaro. Orubhaara orumwi ku-mbaara esatu gya ekyaro, ndurungura nduwa-wo, amati na amanyansi gende-mo goone ngarungura ngawa-mo.

⁸ Maraayika wa akabhiri woone ˆnaabhuma riikombi ryaye. Niwe ekiinu muna kiima kinene muno nkibhugumaga omuriro, nkyeswa mu-nyanja. Orubhaara orumwi ku-mbaara esatu gya amanji ga iinyanja, ngayinduka ngabha maanyinga.

⁹ Riibhaara erimwi ku-gasatu aga ebhibhumbwa bhya mu-nyanja bhyone kutyo ku-rubharika ruyo mbifwa, na riibhaara erimwi ku-gasatu aga giimeeri gyone nginyamurwa.

¹⁰ Maraayika wa akasatu woone ˆnaabhuma riikombi ryaye. Niwe injota iinene muno niigwa okusooka mu-rwire. Injota iyo ꞉yaariga yookerega muna ntara nene, niigwira riibhaara erimwi ku-gasatu aga giinyuji na ebhaara rimwi ku-gasatu aga ebhijegeje bhya amanji.

¹¹ Riisiina rya injota iyo ꞉yaariga niitogwa ati Obhururu. Mmbe, niyindura riibhaara erimwi ku-gasatu aga amanji ngabha maruru. Abhaanu bhaafu bhanu ꞉bhaanyweye amanji gayo ꞉bhaafuuye, kwa okubha amanji ꞉gaariga gari maruru.

¹² Maraayika wa akana woone ˆnaabhuma riikombi ryaye. Niwe riibhaara erimwi ku-gasatu erya riisuubha, na erya okwesi na erya ginjota ndibhumwa, nkibha kisuute. Riibhaara erimwi ku-gasatu aga mu-mwisi ndibha kisuute, na riibhaara erimwi ku-gasatu aga ingeta ryone ndibha kisuute.

¹³ Okumara gayo, nindora ekikoona kinene nkibhurukaga ku-rwire. Nuungwa ekikoona kiyo nkyamura obhuku nkyaikaga ati, “Garibhanyoora! Garibhanyoora! Garibhanyoora! Emwe bhanu mwikaaye mu-kyaro, kwa okubha bhaamaraayika abhasatu bhanu bhaasigara, bhakabhuma amakombi geebhwe amangʼana agakomeera, na woori bhari ayeeyi okugabhuma!”