Obhusomboorerwa 7 - Iimuuma Iinyaaya

Abhaanu bha Nyamuwanga bhanu bhatuuywe-ko orubhano

¹ Bhunu gayo ꞉gaaturire, nindora ekiroro ekindi. ꞉Naarorere bhaamaraayika bhana, bhayambaaye wumwiwumwi ku-mbaara ena egya ekyaro. Na ꞉bhaariga mbayinga emiyaga okusooka ku-mbarika gyebhwe, insonga gyasiga okuyemba ku-kyaro, mu-nyanja amwi ati kw-iti ryoneryone.

² Niwe nindora maraayika owundi ˆnaariinya okusooka ebhuwuruka esuubha, ari na ekibhano kya Nyamuwanga unu keesha omwoyo. Maraayika uyo ˆnaamura obhuraka, ˆnaabhwira bhaamaraayika abhana bhanu ꞉bhaariga bhayaaywe obhuturo bhwa okunyamura ekyaro na iinyanja

³ ati, “Murinde okwamba! Musige okunyamura ekyaro, iinyanja na amati, murinde kimare okubhana abhajuuma bha Nyamuwanga weeswe ku-bhisuusu bhyebhwe.”

⁴ Okumara gayo, nimbwirwa obhukumi bhwa abhaanu bhanu ꞉bhaariga bhabhanirwe orubhano rwa Nyamuwanga ku-bhisuusu bhyebhwe. Bhoone kutyo ꞉bhaariga bhari bhiwumbi egana rimwi, makumi gana na bhana (144,000) okusooka ku-mayito ekumi na gabhiri aga Abhaijirayeeri goone kutyo.

⁵ Mayito goone kutyo rimwirimwi ꞉bhaariga bhabhanirwe-mo bhaanu bhiwumbi ekumi na bhibhiri. Abhaanu bhayo ꞉bhaariga bhari bha mu-mayito ga Yuuda, Ruubheni, na Gaadi.

⁶ Abhandi ꞉bhaariga bhari bha mu-mayito ga Asheeri, Naafutaari na Manaase,

⁷ Mu-mayito ga Siimiyooni, Raawi, na Isakaari bhoone ꞉bhaariga bhari bhiwumbi ekumi na bhibhiriibhiri.

⁸ Mu-mayito ga Jabhurooni, Yuusufu, na Bhenjamiini bhoone ꞉bhaariga bhabhanirwe-mo bhiwumbi ekumi na bhibhiriibhiri.

Abhaanu abhandi bhaafu okusooka mu-bhyaro

⁹ Bhunu gayo ꞉gaaturire, nindora ekiroro ekindi. ꞉Naarorere riisangi enene erya abhaanu. Abhaanu bhayo ꞉bhaariga bhatakubharwa. ꞉Bhaariga bhasookere mu-bhyaro bhyone kutyo, na amayito goone kutyo, bhaanu bha nganda na nyaaika gyone kutyo. Abhaanu bhayo ꞉bhaariga bhayambaaye imbere ku-kitebhe kya ekikama na mu-meeso ga Iingʼondi ya Nyamuwanga. Bhafwayega ngibho ndeera nyeru, na ꞉bhaariga bhagwatiriiye amatabhi ga emitende.

¹⁰ Abhaanu bhayo mbaamura obhuku mbaaika ati, “Obhwerusha obhusooka ku-Nyamuwanga weeswe, unu eekaaye ku-kitebhe kya ekikama, obhusooka na ku-Ngʼondi ya Nyamuwanga.”

¹¹ Bhaamaraayika bhoone kutyo, abhakaruka na ebhibhumbwa ebhina bhinu ebhiisha omwoyo, ꞉bhaariga bhayambaaye bheeyindire ekitebhe kya ekikama. Mbagwa bhwifumbike imbere wa ekitebhe kiyo, mbaramya Nyamuwanga,

¹² mbaaikaga ati, “Amina! Ginkuma na obhugungyo, obhwenge, ginkumyo na ekibharo, amanaga na obhuturo, bhiri ku-Nyamuwanga weeswe kajaanende. Amina!”

¹³ Niwe owumwi wa abhakaruka bharya ˆnambuusha ati, “Abhaanu bhayo bhafwaye gingibho gindeera giinyeru ni bhaaga? Umenyere enu abhasooka?”

¹⁴ Niimusubhya ati, “Ee raatabhugenyi waani, awe ni awe umenyere.” ˆNaambwira ati, “Bhayo ni bhanu abhasooka mu-nyanko iinene irya. Abheene bhafurire gingibho gyebhwe mu-maanyinga ga Iingʼondi ya Nyamuwanga gyerere pee.

¹⁵ Kyakora bhari imbere ku-kitebhe kya ekikama ekya Nyamuwanga, abhamukorera emirimu mu-ngeta na mu-mwisi mw-iyekaru ryaye. Nyamuwanga omwene niwe eekaaye ku-kitebhe kiyo, na niwe aribha amwi nabho na okubhaangarira.

¹⁶ Bhataryungwa omweko na amanji goone gataribhakabhya kweki. Na bhataribharirwa muumwi, amwi ati ebhiriira ryoneryone.

¹⁷ Kwa okubha, Iingʼondi ya Nyamuwanga unu ari agati ayeeyi na ekitebhe kya ekikama niwe aribha omureefi weebhwe. Aribhatangasha bhoone kutyo okugenda ku-kijegeje kya amanji ga obhurame. Na Nyamuwanga aribheeya amasiga geebhwe.”