Obhusomboorerwa 5 - Iimuuma Iinyaaya

Ekitabho kya Iingʼondi ya Nyamuwanga

¹ Okumara gayo, nindora unu ꞉aariga eekaaye ku-kitebhe kya ekikama ari na ekitabho mu-kubhoko kwaye okuryo. Ekitabho kiyo, ꞉kyariga kikaamirwe enu na enu kibhoyerwe na bhibhoyero mungati.

² Niwe nindora maraayika unu ari na managa maafu ˆnaamura obhuraka, ˆnaabhuusha ati, “Niga unu eesire okusoosha-ko ebhibhoyero bhiyo na okufumbura ekitabho kiyo?”

³ Nawe atabheeye-wo muunu na wumwi, ibhe mu-rwire, ibhe mu-kyaro, amwi ati nyombe, unu ꞉aariga eesire okufumbura, amwi ati okusoma ekitabho kiyo.

⁴ Mmbe, ꞉neejire naarora kutyo nindira muno, kwa okubha atabheeye-wo woonewoone unu ꞉aariga eesire okufumbura, amwi okusoma ekitabho kiyo.

⁵ Niwe owumwi wa abhakaruka bharya ˆnaambwira ati, “Siga okurira! Iitegeeresha! Indwi ya oruganda rwa Yuuda, owa kw-isina rya omukama Dawudi, ayigire. Omwene niwe eesire okusoosha-ko ebhibhoyero mungati na okufumbura ekitabho kiyo.”

⁶ Niwe nindora Iingʼondi ya Nyamuwanga ayambaaye agati anu ekitebhe kya ekikama ꞉kyariga kiri. ꞉Aariga eeyindirwe na ebhibhumbwa ebhina bhinu ebhiisha omwoyo na abhakaruka makumi gabhiri na bhana. Nawe ꞉aariga ari muna eetirwe. ꞉Aariga ari na mayembe mungati na ameeso mungati. Ameeso gayo nigyo emyoyo mungati egya Nyamuwanga ginu ꞉gyariga gitumirwe mu-kyaro kyone kutyo.

⁷ Mmbe Iingʼondi ya Nyamuwanga ˆnaagenda, ˆnaagega ekitabho kirya mu-kubhoko okuryo ku-unu ꞉aariga eekaaye ku-kitebhe kya ekikama.

⁸ ꞉Eejire aagega ekitabho kiyo, ebhibhumbwa ebhina bhinu ebhiisha omwoyo, na abhakaruka makumi gabhiri na bhana mbagwa bhwifumbike, imbere ku-Ngʼondi ya Nyamuwanga. Bhoone kutyo wumwiwumwi ꞉bhaariga bhari na ebhinuubhi na amabhakuri ga iijaabhu geejuuye obhubhaani. Obhubhaani bhuyo nibhwo obhusabhi bhwa abhataakatiifu.

⁹ Ebhibhumbwa na abhakaruka bhayo mbeembira Iingʼondi ya Nyamuwanga orwimbo oruyaaya mbaaikaga ati, “Awe wiisire okugega ekitabho kiyo, na okusoosha-ko ebhibhoyero bhyakyo. Kwa okubha awe ꞉weetirwe, na okuturira ku-maanyinga gaawo nuugurira Nyamuwanga abhaanu bha giinyaaika, ginganda, amayito na abhaanu bha mu-bhyaro bhyone kutyo.

¹⁰ Ni awe ꞉waakorere abhaanu bhabhe obhukama bhwa abhashengesi, bhakorere Nyamuwanga emirimu, bhayo nibho bharitunga mu-kyaro.”

¹¹ Niwe nindingira na okuungwa riisi rya bhaamaraayika bhaafu muno, ebhiwumbi na ebhiwumbi, bhatakuturwa na kubharwa. ꞉Bhaariga bheeyindire mbaara gyone kutyo egya ekitebhe kya ekikama, bhari amwi na ebhibhumbwa ebhina bhinu ebhiisha omwoyo na abhakaruka makumi gabhiri na bhana.

¹² Mbeembiraga iiguru muno, mbaaika ati, “Iingʼondi ya Nyamuwanga unu ꞉eetirwe niwe eesire okuramira obhuturo, obhuniibhi na obhwenge. Eesire okuramira na amanaga, ekibharo, obhugungyo na ginkuma!”

¹³ Niwe nuungwa ebhibhumbwa bhya mu-rwire bhyone kutyo, na ebhya ku-kyaro, bhinu bhiri nyombe, na bhinu bhiri mu-nyanja mbimbira amwi, mbyaikaga ati, “Ginkuma, ekibharo, obhugungyo na obhuturo bhuri ku-unu eekaaye ku-kitebhe kya ekikama, na Iingʼondi ya Nyamuwanga, kajaanende!”

¹⁴ Na ebhibhumbwa ebhina bhinu ebhiisha omwoyo mbiikirisha mbyaika ati, “Amina!” Abhakaruka bharya bhoone kutyo mbagwa bhwifumbike, mbaramya Nyamuwanga na Iingʼondi yaaye.