Obhusomboorerwa 3 - Iimuuma Iinyaaya

Iinyarubha ku-bhaanu bha riikanisa rya Saadi

¹ Omuunu uyo ˆnaagenderera okumbwira ati, “Ku-maraayika wa riikanisa rinu riri Saadi mukaamire ati, Ni anye enitunga emyoyo mungati gya Nyamuwanga, kweki ni anye niri na ginjota mungati girya. Mwitegeereshe ganu enibhabhwira! Nimenyere ebhikorwa bhyemwe, ati muri na ginkuma gya abhaanu abharore, nawe emwe abheene mwafuuye.

² Mwangarire muno! Mugwatirire amangʼana amajomu ganu gakyari kufwa, kwa okubha goone gari ayeeyi okufwa. Enirora ati ebhikorwa bhyemwe bhikyari kuyikira kutyo Nyamuwanga waani keenda mukore.

³ Muyiite ganu ꞉mweeyigisiibhwe, mugagwatira na okugeekirisha. Mugwatirire gayo, munuge ebhikayo. Nawe mukarema okwangarira, niriija rwa omwifi, na mutarimenya ebhaga rinu niriija.

⁴ Nawe bhariwo bhaanu bhatooto Saadi ayo, bhanu bhatakwikootya mu-bhikayo. Bhayo nibho bhariribhata na anye bhafwayega gingibho giinyeru, kwa okubha abhaanu bhayo bheesire okukorerwa kutyo.

⁵ Omuunu unu ariyiga, nirimufwafya ingibho iinyeru rwa bhayo. Nitarisoosha riisiina ryaye mu-kitabho kya obhurame, tari nirimwikirisha mu-meeso ga Raata, na mu-meeso ga bhaamaraayika bhaaye, ati unu ni waani.

⁶ Unu ari na amatwi ˆnoongwe amangʼana ganu Mwoyo Omutaakatiifu kaabhwira amakanisa.”

Iinyarubha ku-bhaanu bha riikanisa rya Firadeefiya

⁷ “Ku-maraayika wa riikanisa rinu riri Firadeefiya, mukaamire ati, Ni anye Omutaakatiifu, owa ekimari, unu niri na orufunguro rwa Dawudi, unu nikeegura atariwo unu kaatura okwigara, unu nikeegara atariwo unu kaatura okwigura. Mwitegeereshe ganu enibhabhwira!

⁸ Nimenyere ebhikorwa bhyemwe bhyone kutyo. Mwitegeereshe! Nibheeguriiye orwigi, na atariwo muunu unu kaatura okurwigara. Nimenyere ati raabhé kutyo amanaga geemwe ni matooto, nawe mugwatiriiye ameeyigisho gaani, na muteegaanire riisiina ryani ati mutari bheeyigira bhaani.

⁹ Woori mwitegeereshe! Eniija okureeta abha mw-isunagoogi rya Sitaani, abhabheeyi bhanu abhaaika ati, ni Bhayawudi enu bhataabha Bhayawudi, bhabheefukamire mbakuunʼyaga ansi ebhisuusu. Niwe bharimenya ati anye nibheendere emwe.

¹⁰ Riribha-wo riibhaga rya iinyanko kyaro kigima, okusakya abhaanu bha mu-kyaro. Nawe riibhaga riyo niribhaangarira, kwa okubha ꞉mwasimbiirire ku-bhinyansho rwa kutyo ꞉naabharagiriiye.

¹¹ Niri ayeeyi muno okusubha! Mugwatirire muno kinu muri nakyo, muunu woonewoone aasiga okubhateesha orusuurya rwemwe.

¹² Omuunu unu ariyiga, nirimukora abhe ntimu mw-iyekaru rya Nyamuwanga waani, atarisooka-mo kweki. Nirimukaama-ko riisiina rya Nyamuwanga waani na riisiina rya omusi gwaye. Omusi guyo ni Yerusareemu omuyaaya, gunu guriika okusooka mu-rwire ku-Nyamuwanga waani. Na nirimukaama-ko riisiina ryani riiyaaya.

¹³ Unu ari na amatwi ˆnoongwe amangʼana ganu Mwoyo Omutaakatiifu kaabhwira amakanisa.”

Iinyarubha ku-bhaanu bha riikanisa rya Rawodiikiya

¹⁴ “Ku-maraayika wa riikanisa rinu riri Rawodiikiya, mukaamire ati, Anye ni anye enitogwa Amina, omwaiki omwitongeeye na owa ekimari wa ganu ꞉naarorere ku-Nyamuwanga. Anye ni anye obhwambiro bhwa ebhibhumbwa bhyone kutyo bhinu ꞉bhyabhumbirwe na Nyamuwanga. Mwitegeereshe ganu enibhabhwira!

¹⁵ Anye nimenyere ebhikorwa bhyemwe. Nimenyere ati muri na ebhiriira era. Nyakara mukabheeye bhabhira amwi ati bhanyiriiye!

¹⁶ Nawe kwa okubha muri na ebhiriira era, mutari bhabhira na mutanyiriiye, eniija okubhatanaka musooke mu-kanwa kaani.

¹⁷ Omwaika ati, ‘Muri bhaniibhi. Mwaniibhire muno, na mutari na bhukene bhwa kiinu kyonekyone!’ Nawe mutakwimenya era ati emwe muri bhaanu bha bhandi, muri bhaanu bha kufwirwa ekigongo, muri bhatobhu, muri bhawofu, na muri kinaabhi.

¹⁸ Okubha kutyo enibhatongera mugure ku-anye iijaabhu inu yookiibhwe na omuriro insonga mubhe bhaniibhi. Mugure na gingibho giinyeru, mufware mubhise ekinaabhi kyemwe musige okwiswara. Mugure na omuti gwa okuyaka ameeso geemwe insonga murore.

¹⁹ Abhaanu bhanu anye neendere, enibhagonya na okubhayaana ebhirusho. Mmbe, mwikomeeshe munuge ebhikayo.

²⁰ Mwitegeereshe! Niri ku-rwigi anu, enibhirikira. Omuunu akoongwa riisi ryani ˆnaanyiigurira orwigi, eniingira ewaaye anye na omwene nkiriira amwi.

²¹ Omuunu unu ariyiga, niriikara nawe ku-kitebhe kyani kya ekikama, rwa kutyo anye ꞉naayigire, niikara na Raata ku-kitebhe kyaye kya ekikama.

²² Unu ari na amatwi ˆnoongwe amangʼana ganu Mwoyo Omutaakatiifu kaabhwira amakanisa.”