Obhusomboorerwa 22 - Iimuuma Iinyaaya

Oruuji rwa amanji ga obhurame

¹ Kimwi maraayika ˆnaanyereesha oruuji rwa amanji ga obhurame. Oruuji ruyo ꞉rwariga ndungʼarabhya rwa riirore, ndusookaga ku-kitebhe kya ekikama ekya Nyamuwanga, na Iingʼondi waaye.

² Oruuji ruyo ꞉rwariga nduwurura ndutura agati wa riiparapara riinene erya omusi guyo. ꞉Ryariga ririwo riiti rya obhurame ku-mbaara gyone kutyo gya oruuji. Riiti riyo nditwashaga amatwasho mbaga ekumi na ebhiri mwaka mugima, ku-kwesi ryatwashaga rumwi. Amasha ga riiti riyo, ni muti gwa okuwosha abhaanu bha mu-bhyaro.

³ Omusi guyo gutaribha na kiinu kyonekyone kinu kiyiimirwe na Nyamuwanga. Ekitebhe kya ekikama kya Nyamuwanga na Iingʼondi waaye, kiribha mu-musi guyo, na abhajuuma bhaaye bharimuramya.

⁴ Na abhajuuma bha Nyamuwanga bhayo, bharimurora obhusu bhwaye. Na riisiina ryaye ririkaamwa ku-bhisuusu bhyebhwe.

⁵ Itaribha-wo ngeta kweki mu-musi guyo. Abhaanu bhatarikena ntara amwi ati esuubha, kwa okubha Raatabhugenyi Nyamuwanga niwe aribha obhweru bhwebhwe. Na abhaanu bhayo bharitunga akajaanende koone kutyo.

Amangʼana ga okumariisha

⁶ Kimwi maraayika uyo ˆnaambwira ati, “Amangʼana ganu ni ga kwikirisibhwa na ni ga kimari. Raatabhugenyi Nyamuwanga unu kaatunga emyoyo gya abharagi bhaaye, ꞉aatumire maraayika waaye okweresha abhajuuma bhaaye amangʼana ganu garibha-wo, ibhe isige okubha.”

⁷ Yeesu kaaika ati, “Iitegeeresha! Niri ayeeyi okuuja. Nyakara bhanu abhoongwa na okukora amangʼana ga obhuragi bhwa ekitabho kinu.”

⁸ Anye Yowana ni anye ꞉naarorere na okuungwa amangʼana gayo. ꞉Neejire noongwa na okugarora, ningwa bhwifumbike mu-meeso ga maraayika unu ꞉aanyereshaga amangʼana gayo, insonga nimuramye.

⁹ Nawe ˆnaambwira ati, “Siga kukora kutyo! Anye noone niri mujuuma rwa awe na Abhakiriisitu bheejaanyu abharagi, na abhandi bhoone kutyo bhanu abhoongwa na okukora amangʼana ga mu-kitabho kinu. Tari nuuramye Nyamuwanga omwene era!”

¹⁰ Okumara gayo, maraayika uyo ˆnaambwira ati, “Siga amangʼana ga obhuragi bhwa ekitabho kinu gabhe abhweru, kwa okubha goone kutyo ganu gaaikirwe munu, gari ayeeyi muno okubha-wo.

¹¹ Mmbe, omuunu unu kaakora amangʼana amabhiibhi, agenderere okugakora, na unu kaakora aga ekijabhi, agenderere okugakora. Omuunu unu kaakora aga obhurengeresi, woone agenderere okukora, na muunu omutaakatiifu, agenderere okubha mutaakatiifu.”

¹² Yeesu kaaika ati, “Iitegeeresha! Niri ayeeyi okuuja. Eniija okuriya abhaanu bhoone kutyo okuriingʼaana na ebhikorwa bhyebhwe.

¹³ Ni anye Obhwambiro na Obhuteero, ni anye unu enaambisha amangʼana goone kutyo na okugamariisha.”

¹⁴ Nyakara bhanu abhafura gingibho gyebhwe, insonga bheengire mu-musi omuyaaya okuturira mu-miryango gyagwo na okurya amatwasho ga riiti rya obhurame.

¹⁵ Nawe abharosi bhoone kutyo, abhataasi bha meega, abheeti bha abhaanu, bhanu abharamya ebhisusano, na bhanu bheendere okubheeya, bharibha anja wa omusi guyo rwa gimbwa.

¹⁶ “Anye Yeesu, ni owa kw-isina, na owa mu-rwibhuro rwa mukama Dawudi, eningʼarabhya rwa injota ya mu-ruguru. Ni anye nitumire maraayika waani ku-makanisa aaje abhabhwire amangʼana ganu.”

¹⁷ Mwoyo Omutaakatiifu wa Nyamuwanga na omwenga wa Yeesu abhaaika ati, “Nuuje!” Na abhaanu bhoone kutyo bhanu abhoongwa amangʼana gayo bhaaike ati, “Nuuje!” Woonewoone unu ari na obhwiro bhwa amanji aaje, na unu kaageenda, aaje era agege amanji ga obhurame bhusa.

¹⁸ Abhaanu bhoone kutyo bhanu abhoongwa amangʼana ga obhuragi, ganu gari mu-kitabho kinu, enibhabhwira ati, omuunu woonewoone akoongesha kyonekyone ku-mangʼana ganu, Nyamuwanga woone arimwongesisha ebhika bhinu bhikaamirwe mu-kitabho kinu.

¹⁹ Muunu woonewoone akasoosha-ko engʼana ryoneryone ku-mangʼana ga obhuragi bhwa ekitabho kinu, nikwo kutyo Nyamuwanga woone arimusoosisha-ko obhwikaro bhwaye mu-musi omutaakatiifu, na obhuturo bhwa okurya amatwasho ga riiti rya obhurame.

²⁰ Omwaiki wa amangʼana ganu omwene kaaika ati, “Kimari, niri ayeeyi muno okuuja.” Amina. Nuuje Raatabhugenyi Yeesu!

²¹ Iinema ya Raatabhugenyi Yeesu, ibhe amwi na emwe mwone kutyo. Amina.