Obhusomboorerwa 21 - Iimuuma Iinyaaya

Ekyaro ekiyaaya

¹ Kimwi nindora ekiroro ekindi. Nindora orwire oruyaaya na ekyaro ekiyaaya, kwa okubha orwire rwa okwamba na ekyaro kya okwamba ꞉bhyariga bhyawooye-wo, na iinyanja yoone ꞉yaariga itakyariwo.

² Nindora omusi omutaakatiifu, Yerusareemu omuyaaya, ngwika okusooka mu-rwire ku-Nyamuwanga. Omusi guyo ꞉gwariga guroosiibhwe rwa omwenga unu aamarire okwituura-wo okugabhurwa.

³ Nuungwa esi enene ndisooka ku-kitebhe kya ekikama, ndyaika ati, “Ringira woori! Obhwikaro bhwa Nyamuwanga bhuri amwi na abhaanu. Ariikara amwi na abhaanu, na abhaanu bharibha bhaanu bhaaye, omwene woone aribha Nyamuwanga weebhwe.

⁴ Aryeya amasiga geebhwe goone kutyo. Mu-kabhaga kayo abhaanu bhatarifwa kweki, bhataririra bhuunyarufu, amwi ati okurira okundi, kweki bhataribha na bhwashe, kwa okubha amangʼana ga okwamba gaamarire okutura.”

⁵ Kimwi unu ꞉aariga eekaaye ku-kitebhe kya ekikama ˆnaaika ati, “Ringira woori enikora amangʼana goone kutyo gabhe mayaaya!” ˆNaamara ˆnaambwira ati, “Kaama ganu, kwa okubha mangʼana ganu ageekirisibhwa na ni ga kimari.”

⁶ ˆNaambwira kweki ati, “꞉Gaabheeye-wo! Ni anye Obhwambiro na Obhuteero, ni anye unu enaambisha amangʼana goone kutyo na okugamariisha. Muunu woonewoone unu ari na obhwiro, nirimuyaana amanji anywe bhusa okusooka mu-kijegeje kya amanji ga obhurame.

⁷ Omuunu unu ariyiga, gayo nigo nirimuyaana. Aribha mwana waani, anye noone niribha Nyamuwanga waaye.

⁸ Nawe abhoobha bhoone kutyo, bhanu bhatakwikirisha, bhanu abhakora ebhibhiibhi, abheeti bha abhaanu, abhataasi bha meega, abharosi, bhanu abharamya ebhisusano, na abhabheeyi bhoone kutyo, bharyeswa mw-ibheri rya omuriro gwa ekibhiriiti rinu riri rwa omwaro. Na ruyo nirwo orufu rwa akabhiri.”

Yerusareemu omuyaaya

⁹ Kimwi owumwi wa bhaamaraayika mungati bhanu ꞉bhaariga bhari na amabhakuri mungati aga ebhika bhya obhuteero, ˆnaaja ˆnaambwira ati, “Nuuje enu, nikwereshe omwenga wa Iingʼondi ya Nyamuwanga.”

¹⁰ Niwe, Mwoyo Omutaakatiifu wa Nyamuwanga ˆnnaawunga, maraayika wurya ˆnaansira iiguru ku-kiima ekinene kiri kireera. ˆNaanyereesha omusi omutaakatiifu gwa Yerusareemu, ngwikaga okusooka mu-rwire ku-Nyamuwanga.

¹¹ Omusi guyo ꞉gwariga guri na obhugungyo bhwa Nyamuwanga. Obhweru bhwago ꞉bhwariga bhuri rwa ebhingʼarabhya bhya obhugusi obhunene muno, muna yasipi, nyeru rwa riirore.

¹² ꞉Gwariga guri na orubhago runene, rureera, ruri na miryango ekumi na ebhiri. Emiryango gyone kutyo ꞉gyaangarirwaga na bhaamaraayika ekumi na bhabhiri, na ꞉gyariga gikaamirwe-ko amasiina ga amayito ekumi na gabhiri ga Ijirayeeri.

¹³ Mbaara gyone kutyo ꞉gyariga giri na miryango esatuusatu, ebhuuruka esuubha, ebhurungu, ebhuwanga, na ebhugwa esuubha.

¹⁴ Orubhago rwa omusi guyo ꞉rwariga ruumbakirwe ku-magina ekumi na gabhiri aga omusingi. Amagina goone kutyo rimwirimwi ꞉ryariga rikaamirwe-ko riisiina rya owumwi wa abhatumwa ekumi na bhabhiri bha Iingʼondi ya Nyamuwanga.

¹⁵ Mmbe, maraayika unu ꞉aariga ˆnaaroma na anye, ꞉aariga ari na insimbo ya iijaabhu, ogwa okurengera obhugari bhwa omusi guyo, okurenga emiryango gyagwo na orubhago rwagwo.

¹⁶ Mmbe, ˆnaarenga omusi gwone kutyo, obhureera na obhugari, na obhureera obhwa okuja iiguru ꞉bhwariga bhuriingʼeene. Okurenga kunu ꞉aarengere omusi guyo, ꞉aanyoorere ni kiromiita bhiwumbi bhibhiri na magana gana.

¹⁷ ˆNaamara ˆnaarenga na obhugari bhwa orubhago, ꞉bhwariga bhuri miita makumi gasansabha. Maraayika ꞉aarengere okuriingʼaana na kutyo abhaanu abharenga.

¹⁸ Orubhago ruyo ꞉rwariga ruumbakiiywe amagina amangʼarabhya ga iirangi ya kijaani. Omusi ogwene ꞉gwariga guumbakiiywe jaabhu njomu inu eyingʼarabhya rwa riirore.

¹⁹ Amagina ga omusingi gwa orubhago ruyo ꞉gaariga gatuuywe-ko amagina amangʼarabhya ga obhugusi obhunene bhwa mbaga nyafunyafu. Riigina rya okwamba ꞉ryariga riri yasipi ya kijaani, erya akabhiri ꞉ryariga riri yakuti samawi, erya akasatu ꞉ryariga nditogwa karikeedoni ya kijaani. Riigina ringʼarabhya erya akana ꞉ryariga riri jumaridi ya kijaani,

²⁰ erya akataanu ꞉ryariga nditogwa saridooniki inkangaaru, erya akasansabha riri akiki. Riigina ringʼarabhya erya mungati ꞉ryariga riri kirisorito, erya munaana ꞉ryariga riri jabharajadi. Riigina ringʼarabhya erya kenda ꞉ryariga riri yakuti ya mayaayi, erya ekumi riri kirisopiraso, erya ekumi na yimwi riri iyakinito na erya ekumi na ebhiri riri ametiisito.

²¹ Na giinyigi ekumi na ebhiri girya ꞉gyariga giroosiibhwe na ruuru ekumi na ebhiri. Giinyigi gyone kutyo rumwirumwi ꞉gwariga guroosiibhwe na iiruuru! Riiparapara rya omusi guyo ꞉ryariga riroosiibhwe na jaabhu njomu, ningʼarabhyaga rwa riirore.

²² ꞉Nitaarorere eyekaru mu-musi muyo, kwa okubha Raatabhugenyi Nyamuwanga owa Obhutungi bhwone kutyo, na Iingʼondi waaye, abheene nibho riiyekaru rya omusi guyo.

²³ Omusi guyo gutakukena esuubha amwi ati okwesi, kwa okubha obhugungyo bhwa Nyamuwanga obhugumirikira, na Iingʼondi ya Nyamuwanga niwe intara yaagwo.

²⁴ Abhaanu bha mu-bhyaro bhyone kutyo bhariikara mu-bhweru bhwa omusi guyo, na abhakama bha mu-bhyaro bharireeta mu-musi muyo ebhiinu bhyebhwe, bhinu ebhikora mbagungibhwa.

²⁵ Giinyigi gya omusi guyo gyone kutyo, giribhaga giiguuywe ebhaga ryone, kwa okubha itaribha-wo ngeta.

²⁶ Abhaanu bha mu-bhyaro bhyone kutyo bharireeta obhuniibhi na obhugungyo bhwebhwe mu-musi muyo.

²⁷ Nawe kitaribha-wo kiinu kijabhi, omubheeyi, amwi ati mukosi wa amabhiibhi woonewoone, unu ariingira mu-musi guyo. Tari bhanu bhariingira mu-musi guyo ni bhanu amasiina geebhwe gakaamirwe mu-kitabho kya obhurame ekya Iingʼondi ya Nyamuwanga.