Obhusomboorerwa 2 - Iimuuma Iinyaaya

Iinyarubha ku-bhaanu bha riikanisa rya Efeso

¹ Omuunu uyo ˆnaagenderera okwaika ati, “Ku-maraayika wa riikanisa rinu riri Efeso mukaamire ati, Anye unu niri na ginjota mungati mu-kubhoko kwani okwa ebhuryo, ni anye eniribhata agati wa ebhiinu mungati ebhya iijaabhu ebhya okwikasha-ko gintara. Mwitegeereshe ganu enibhabhwira!

² Nimenyere ebhikorwa bhyemwe, ekituunyo kyemwe na obhusimbiiru bhwemwe. Na nimenyere ati mutayimbeene na abhakosi bha amabhiibhi bhanu abheebhirikira ati bhatumwa bha Yeesu enu bhataabha bhatumwa. ꞉Mwabharengekanyiishe, mubhamenya ati ni bhabheeyi.

³ Na nimenyere ati, mwanyankire muno ku-nsonga ya riisiina ryani, nawe musimbiirire na woori mukyari kuyigwa.

⁴ Nawe, muri na engʼana rimwi rinu ritakunjomera. Musigire obhwendi bhwemwe obhwa okwamba bhurya.

⁵ Muyiite ganu ꞉mwakoraga bhunu ꞉mwaambire okunyiikirisha. Mukamara, munuge ebhikayo bhyemwe, mukore ganu ꞉mwakoraga ku-bhwambiro. Mukarema okunuga ebhikayo, enibhaaja-ko nimbateesha ebhiinu bhyemwe ebhya okwikasha-ko gintara.

⁶ Nawe ririwo engʼana rimwi rinu omukora kujomu. Omubhiiyirirwa amangʼana amabhiibhi ganu Abhanikorayi abhakora. Amangʼana gayo anye noone nitakugenda.

⁷ Unu ari na amatwi ˆnoongwe amangʼana ganu Mwoyo Omutaakatiifu kaabhwira amakanisa. Omuunu unu ariyiga, nirimwikirisisha okurya amatwasho ga riiti ganu owurya nuunyoora obhurame. Riiti riyo riri mu-rwire mw-isambu rya Nyamuwanga.”

Iinyarubha ku-bhaanu bha riikanisa rya Simirina

⁸ “Ku-maraayika wa riikanisa rinu riri Simirina mukaamire ati, Ni anye owa okwamba na owa obhuteero. ꞉Naariga nifuuye, niinsuuka na woori eniisha omwoyo! Mwitegeereshe ganu enibhabhwira!

⁹ Nimenyere iinyanko yeemwe, na obhutobhu bhwemwe. Nawe ekimari mutari bhatobhu, muri bhaniibhi! Kweki nimenyere kutyo omufumwa na abhaanu bhanu abheebhirikira ati Bhayawudi, enu bhataabha Bhayawudi, tari ni bha mw-isunagoogi rya Sitaani.

¹⁰ Omuuja okunyansibhwa nawe mwasiga okuubhaya. Sitaani kaaja okubhasakya, na arituura abheejaanyu abhandi mu-jeera. Murinyanka nsiku ekumi. Nawe mubhe bheetongeeye ku-anye, raabhe ni kufwa nyakara mufwe. Mukabha bheetongeeye, niribhayaana orusuurya rwa obhurame bhunu bhutakuweera.

¹¹ Unu ari na amatwi ˆnoongwe amangʼana ganu Mwoyo Omutaakatiifu kaabhwira amakanisa. Omuunu unu ariyiga, atarikuunibhwa-ko na omuriro gunu gutakusimá. Omuriro guyo nigwo orufu rwa akabhiri.”

Iinyarubha ku-bhaanu bha riikanisa rya Perugamo

¹² “Ku-maraayika wa riikanisa rinu riri Perugamo mukaamire ati, Niri na ekiraawa ekyugi, kiri na moogi gabhiri. Mwitegeereshe ganu enibhabhwira!

¹³ Anye nimenyere anu mwikaaye, ati ni anu ekitebhe kya obhutungi ekya Sitaani kiri. Nawe, omugenderera okwikirisha riisiina ryani. Na bhunu Antipa omwaiki waani omwitongeeye ꞉eetirwe mu-musi gwemwe guyo, anu Sitaani eekaaye, muteegaanire obhwikirisha bhwemwe ku-anye.

¹⁴ Nawe muri na mangʼana matooto era ganu gatakunjomera. Agati weemwe bharimo bhanu bhagwatire ameeyigisho ga Bhaaramu. Bhaaramu uyo niwe ꞉eeyigisiishe Bharaki, ˆnaakora Abhaijirayeeri mbakaya ku-Nyamuwanga, mbarya ebhyokurya bhinu ꞉bhyasoosibhwaga ku-bhisusano, na okutaara ameega.

¹⁵ Na bharimo na abhandi bhanu bhagwatire ameeyigisho ga Abhanikorayi.

¹⁶ Mmbe woori munuge ebhikayo! Mukarema, enibhaaja-ko bhwangu. Nikaaja eyo eniija okurwana abhaanu bhayo na ekiraawa kyani kinu ekisooka mu-kanwa kaani.

¹⁷ Unu ari na amatwi ˆnoongwe amangʼana ganu Mwoyo Omutaakatiifu kaabhwira amakanisa. Muunu unu ariyiga, nirimuyaana-ko iimanu inu ibhisirwe, inu Nyamuwanga ꞉aayaanaga Abhaijirayeeri ku-nsi ya orukungu. Kweki nirimuyaana riigina eryeru rinu rikaamirwe-ko riisiina riiyaaya rinu ritakumenywa na muunu, tari erimenywa na unu ariramiiye era.”

Iinyarubha ku-bhaanu bha riikanisa rya Tiyatira

¹⁸ “Ku-maraayika wa riikanisa rinu riri Tiyatira mukaamire ati, Iingʼana inu ni yaani Omwana wa Nyamuwanga, unu ameeso gaani gaseekaanire rwa omuriro. Na amaguru gaani agangʼarabhya rwa ekisisira kinu kyookiibhwe mu-muriro. Mwitegeereshe ganu enibhabhwira!

¹⁹ Nimenyere ebhikorwa bhyemwe, obhwendi bhwemwe, obhwikirisha bhwemwe, kutyo omukora emirimu gyemwe, na obhusimbiiru bhwemwe. Na woori omukora kujomu muno okukira kutyo ꞉mwakoraga okwamba.

²⁰ Nawe muri na engʼana rimwi rinu ritakunjomera. Emwe omwikirisha amangʼana ga Yejebheeri. Omugasi uyo, keebhirikira ati muragi enu ataabha muragi. Mumusigire ajimye abhajuuma bhaani, kaabheeyigisha ati bhataarega ameega, na okurya ebhyokurya bhinu bhisoosiibhwe bhiri mugabho ku-bhisusano.

²¹ Anye noone nimuyaaye riibhaga anuge ebhikayo bhyaye, nawe atakwenda okusiga obhutaasi bhwaye obhwa ameega.

²² Mwitegeereshe! Ku-nsonga iyo, nirimurwasha obhurwaye bhunu bhurimutuura ku-bhuriri. Na abhaanu bhoone kutyo bhanu abhataara nawe ameega, bhakarema okunuga ebhikayo bhyebhwe, niribhanyansha muno.

²³ Kweki, niriita bhanu bhagwatire ameeyigisho gaaye. Ayo niwe abhaanu bha mu-makanisa goone kutyo bharimenya ati ni anye nimenyere emitima na obhwiganiirisha bhwa abhaanu bhoone kutyo. Na niririya abhaanu bhoone kutyo okuriingʼaana na ebhikorwa bhyebhwe.

²⁴ Nawe muriwo abhaanu Tiyatira ayo, bhanu mutakwikirisha ameeyigisho ga Yejebheeri, na ꞉muteeyigiiye ganu abhandi abhabhirikira ati ni mangʼana ameeyibhise aga Sitaani. Enibhabhwira ati anye nitakubhoongesisha amangʼana agandi amasito.

²⁵ Nawe mugwatirire muno kinu muri nakyo okuyikira anu nirisubha.

²⁶ Omuunu unu ariyiga na okugenderera okukora kutyo eneenda, okuyikira ku-bhuteero, nirimuyaana obhuturo bhwa okutunga abhaanu bha mu-bhyaro ebhindi.

²⁷ Aribhatunga na insimbo ya ekyuma. Aribhaata mubhe bhibhaara, rwa ebhiyamba bhya gimbiga. Omuunu woonewoone unu ariyiga, arinyoora obhuturo rwa bhunu anye ꞉naayaaywe na Raata.

²⁸ Kweki nirimuyaana iinyamananga.

²⁹ Unu ari na amatwi ˆnoongwe amangʼana ganu Mwoyo Omutaakatiifu kaabhwira amakanisa.”