Biblia Todo Logo
Bìoball air-loidhne

- Sanasan -

Obhusomboorerwa 18 - Iimuuma Iinyaaya


Okugwa kwa omusi gwa Bhabheri

1 Bhunu gayo ꞉gaaturire, nindora maraayika owundi ˆneekaga okusooka mu-rwire. Maraayika uyo ꞉aariga ari na obhuturo bhunene na obhugungyo bhwaye mbungʼarabhya ekyaro.

2 Maraayika uyo ˆnaamura obhuraka, ˆnaaikaga ati, “Omusi gwagwa! Omusi gwa Bhabheri omunene gurya gwagwa! Woori gwabha bhisaka bhya ebhiwi na mbaga nyafu egya amasambwa, okwiyibhisa-mo. Niwe ayo amanyonyi na amatyanyi amanaabhi, ageekara.

3 Gwagwa kwa okubha abhaanu bha ebhyaro bhyone kutyo bhanyweye iidivaayi yaagwo. Iidivaayi yaagwo ni bhutaasi bhwa ameega bhunu bhutari ku-bhaanu. Na abhakama bha ekyaro ꞉bhaataarire ameega nawe. Abhasuruja bha ku-kyaro bhaniibhire okuturira amajomerwa gaaye ganu gatari na bhuteero.”

4 Niwe nuungwa riisi erindi okusooka mu-rwire, ndyaikaga ati, “Emwe abhaanu bhaani, mumwikenge, mwasiga okuyimbana nawe okukora ebhikayo bhyaye insonga mwone mwasiga okunyoora ebhika rwa bhinu arinyoora.

5 Kwa okubha bhikayo bhyaye bhibheeye bhyafu muno, bhiyikire mu-rwire, na Nyamuwanga ayiitire ebhikayo bhyaye.

6 Mumukorere rwa kutyo omwene ꞉aakoreeye abhandi, Ganu ꞉aakorere mwone mumukorere gayogayo kabhiri. Mugege ekikombe kyaye, mumusaasishe-mo kabhiri obhururu bhunu ꞉aasasisiishe abhandi.

7 Mumuyaane ebhirusho na mumunyanshe okuriingʼaana na kutyo ꞉aakorere, ˆnaaniibha ˆnaakumangibhwa. Omwene keeyeema ˆnaaika mu-mutima ati, ‘Niikaaye rwa omugore, anye nitari mukimari, na nitarisurumbara!’

8 Ku-nsonga iyo, ebhika bhyone kutyo bhirimunyoora ku-rusuku rumwi era, ekika kya orufu, ekya ekisurumbaro na ekya injara. Na aryokiibhwa mu-muriro aweerere, kwa okubha Raatabhugenyi Nyamuwanga unu kaaramurira, niwe ari na obhuturo.”

9 Abhakama bha ekyaro bhanu ꞉bhaataarire nawe ameega na okuyimbana nawe okurya obhurame, bharirira mbatogoonya ku-nsonga ya omusi guyo bhunu bharirora ingesi ya okwokiibhwa kwagwo.

10 Abhakama bhayo bhariyambaara areera na omusi guyo mboobhayaga ebhinyansho bhinu bhirinyoora omusi guyo. Bharirira mbaaikaga ati, “Woori gari aaki, woori gari aaki, omusi omukuru Bhabheri, omusi gwa amanaga! Kwa okubha ku-nsa yimwi era, indamuro yaawo yaakuyikiira.”

11 Abhasuruja bha mu-kyaro bharimuririra mbatogoonya, kwa okubha bhataribha-wo bhagusi bha okugura ebhiinu bhyebhwe.

12 Atariwo muunu kweki wa kugura ebhiinu bhyebhwe ebhya iijaabhu, ebhya giiyera, giiruuru na amagina amangʼarabhya ga obhugusi obhunene. Atariwo muunu wa kugura iikitaani injomu, gingibho ginjomu gya jambarawu, egya iiyariri na gingibho ginkangaaru. Na atariwo muunu wa kugura ebhiinu bhyone kutyo bhinu bhiroosiibhwe na gimbaawu gya amati amarange. Na ebhiinu bhinu bhiroosiibhwe na amayembe ga ginjofu, ebhya gimbaawu gya obhugusi obhunene, ebhisisira, ekyuma, na giimarumaru.

13 Atariwo muunu wa kugura emidarasiini, giiyiriki, obhubhaani, giimanemane, na iidivaayi, amafuta ga emijeyituuni, ginfu giinyeru, na ingano. Na atariwo mugusi wa kugura giingʼombe, giingʼondi, giifwaraasi, gimbirigiti gya okukururwa na giifwaraasi, na abhagaya na obhurame bhwa abhaanu.

14 Mmbe, abhasuruja bharyaika ati, “Ebhiinu bhinu ꞉waariga wendere muno bhiwooye-wo pee. Na obhuniibhi bhwawo bhwone kutyo na ebhiinu bhyone kutyo ebhijomu, utaribhinyoora kweki.”

15 Abhasuruja bhanu ꞉bhaamuniibhiiye-ko, bhariyambaara areera mboobhaya ebhinyansho bhiyo, mbariraga bhasurumbaaye.

16 Bharyaikaga ati, “Gaakunyoora, gaakunyoora omusi omunene. ꞉Waariga nuufwara ngibho njomu muno egya iikitaani, gya jambarawu, na ginkangaaru. ꞉Waariga nuwijomya na iijaabhu, ebhingʼarabhya bhya obhugusi obhunene na giiruuru.

17 Nawe obhuniibhi bhuyo bhwone kutyo bhwaweerera ku-nsa yimwi era.” Bhaanyewoja bha giimeeri bhoone kutyo, abhagendi bhoone kutyo, abhakosi bha mu-meeri, bhariyambaara areera.

18 Bhunu bharirora ingesi ya okwokiibhwa kwagwo, bharyamura obhuku mbarira mbaaikaga ati, “Gukyariga kubha-wo musi gundi rwa omusi gunu!”

19 Abhaanu bhayo bhariituutumurira oruteeri ku-mitwe gyebhwe, okweresha ati bhasurumbaaye. Bharirira mbaaikaga ati, “Gaakunyoora, gaakunyoora omusi omunene. Omusi gunu nigwo ꞉gwakorere eswe abha giimeeri kiniibhe, nawe woori omusi gwone kutyo, gwaweerera ku-nsa yimwi era.”

20 Mujomerwe emwe bhanu mwikaaye mu-rwire. Abhataakatiifu, abhatumwa na abharagi mwone mujomerwe, kwa okubha Nyamuwanga aaramurira omusi gunu, ku-ganu ꞉gwabhakoreeye emwe.

21 Mmbe, maraayika wumwi unu ꞉aariga ari na managa maafu, ˆneemusha riigina riri muna rubhuyi, ˆnaaryesa mu-nyanja, ˆnaaika ati, “Rwa kutyo neesa riigina rinu mu-manji, nikwo kutyo omusi gwa Bhabheri guryeswa ngusika kimwi.

22 Mu-musi muyo bhataribha-mo bhaanu bhanu abheemba, amwi ati bhabhumi bha kinuubhi, ekironge na riikombi. Ataribha-mo mufundi wa mbaga yooneyoone, ataribha-mo muunu woonewoone unu kaasha ku-rubhuyi!

23 Intara itaryoka kweki mu-musi muyo. Na bhwenga bhwone bhutaribha-mo. Omusi gwa Bhabheri gurikorwa kutyo kwa okubha abhasuruja bhaagwo ꞉bhaariga bhakumukire mu-kyaro. Na ebhyaro bhyone kutyo ꞉bhyariga bhijimiibhwe na obhurosi bhwa omusi guyo.

24 Mu-musi muyo ꞉gaariga garimo amaanyinga ga abharagi na aga abhataakatiifu, na aga abhaanu bhoone kutyo bhanu bheetirwe mu-kyaro anu.”

© 2023, Wycliffe Bible Translators, Inc. All rights reserved

Wycliffe Bible Translators, Inc.
Lean sinn:



Sanasan