Obhusomboorerwa 16 - Iimuuma Iinyaaya

Amabhakuri ga riisungu rya Nyamuwanga

¹ Kimwi, nuungwa esi enene ndisookaga mw-iyekaru, ndibhwira bhaamaraayika mungati bharya ati, “Mugende mwitire riisungu rya Nyamuwanga rinu riri mu-mabhakuri mungati gayo, mu-kyaro.”

² Mmbe, maraayika wa okwamba ˆnaagenda, ˆnaasuka riibhakuri ryaye rya riisungu rya Nyamuwanga mu-kyaro. Mmbe, abhaanu bhanu ꞉bhaariga bhari na orubhano rwa intyanyi na bhanu ꞉bhaaramiishe ekisusano kyayo bhoone kutyo, mbabha na amawute amabhiibhi ngabhanyansha muno.

³ Maraayika wa akabhiri woone, ˆnaasuka riibhakuri ryaye mu-nyanja. Amanji ngayinduka ngabha rwa insururumba, na ebhibhumbwa bhyone kutyo mu-nyanja, mbifwa.

⁴ Maraayika wa akasatu woone, ˆnaasuka riibhakuri ryaye mu-nyuji na ebhijegeje bhya amanji, na amanji gaabhyo goone, ngayinduka ngabha maanyinga.

⁵ Niwe nuungwa maraayika omuyambaasi wa amanji ˆnaaika ati, “Ee Nyamuwanga, ni awe omurengeresi, unu ꞉waariga uriwo kara, na woori uriwo, Omutaakatiifu, ni awe owuramura urengeresiishe.

⁶ Abheene ꞉bheetiiye amaanyinga ga abhataakatiifu, na abharagi bhaawo, awe woone waabhayaana amaanyinga bhaganywe. Yee, ꞉bhaariga bheesire okunyoora ebhirusho bhiyo!”

⁷ Niwe nuungwa riisi ndisooka kw-ishengero ndisubhya ati, “Yee, Raatabhugenyi Nyamuwanga owa Obhutungi bhwone kutyo, gindamuro gyawo ni gya kimari na owuramura urengeresiishe.”

⁸ Maraayika wa akana woone, ˆnaasuka riibhakuri ryaye kw-isuubha. Riisuubha ndiyaanwa obhuturo bhwa okwokya abhaanu na omuumwi gwaryo.

⁹ Omuumwi ngwokya abhaanu kubhiibhi muno. Abhaanu mbajabhura Nyamuwanga, bhamenyere ati, niwe ꞉aariga aragiriiye ebhika bhiyo, na ꞉bhataanugire ebhikayo bhyebhwe, amwi ati okugungya Nyamuwanga.

¹⁰ Maraayika wa akataanu woone, ˆnaasuka riibhakuri ryaye ku-kitebhe kya ekikama ekya intyanyi irya. Kimwi obhukama bhwayo mbubha kisuute abhaanu mbaamba okwitakunya gindimi gyebhwe ku-nsonga ya obhururu.

¹¹ Mbafuma Nyamuwanga wa mu-rwire ku-nsonga ya obhururu na amawute geebhwe. Nawe ꞉bhataanugire ebhikorwa bhyebhwe ebhibhiibhi.

¹² Kimwi maraayika wa akasansabha woone, ˆnaasuka riibhakuri ryaye mu-ruuji orunene orwa Furaati. Amanji gende-mo ngooma, niibha-wo injira inu bharitura-ko abhakama bha okusookerera ebhuwuruka esuubha.

¹³ Mmbe, nindora bhiwi bhisatu bhinu ꞉bhyasusanaga na ebhikerwe. Ekimwi nkisooka mu-kanwa ka riisoro rirya, ekindi mu-kanwa ka intyanyi irya, na ekindi mu-kanwa ka omuragi omubheeyi urya.

¹⁴ Ebhiwi bhiyo ꞉bhyariga bhiri na obhuturo bhwa okukora ebhiruguusho, na emirimu gyabhyo ni okugenda okukumanya abhakama bha mu-kyaro bhoone kutyo insonga bhaaje bhakore riiremo ku-rusuku orukuru orwa Nyamuwanga owa Obhutungi.

¹⁵ Raatabhugenyi Yeesu kaaika ati, “Mwitegeereshe! Niriija rwa omwifi, kutyo abhaanu abhataka era eejire. Nyakara omuunu unu keekara eeyangariiye, afwaye kimwi gingibho gyaye aasiga kuribhata kinaabhi abhaanu mbamurora ˆneeswara.”

¹⁶ Mmbe ebhiwi bhiyo mbikumanya abhakama bhoone kutyo na abhasirikare bheebhwe mbibhasira ansi anu kaabhirikirwa mu-nyaaika ya Ekiebhuraaniya ati Arimagidoni.

¹⁷ Niwe maraayika wa mungati ˆnaasuka riibhakuri ryaye mu-ruyaga. Nuungwa kweki esi enene ndisooka ku-kitebhe kya ekikama ekya mw-iyekaru, ndyaikaga ati, “Mmbe, woori goone kutyo gaabheeye-wo!”

¹⁸ Ngibha-wo giimesho, amabharuka na riinyamutikima enene muno nditura. Riinyamutikima riyo ꞉ryariga riri enene okukira goone kutyo ganu garaturire okwambira abhaanu bheejiiye ku-nsi.

¹⁹ Niwe omusi omukuru gwa Bhabheri ngwatika-mo mabhaara gasatu, na emisi emikuru egya ebhyaro ebhindi gyone kutyo ngiweera ansi. Nyamuwanga ˆnaayiita ebhikayo bhya omusi gwa Bhabheri. ˆNaagusiiga gunywe iidivaayi ya riisungu ryaye.

²⁰ Riinyamutikima riyo ndisikya amasinga goone kutyo, na ebhiima bhyone kutyo mbiwa-wo.

²¹ Ngubha nyafu muno eya amagina niigwa. Amagina ga ingubha iyo, ꞉gaariga gari masito. Obhusito bhwago, erimwi ꞉ryarebhereraga nkiro makumi gataanu. Amagina gayo ngaragarira abhaanu okusooka mu-rwire. Abhaanu bhoone mbaamba okufuma Nyamuwanga ku-nsonga ya ekika kya ingubha kiyo, kwa okubha ꞉kyariga kiri kika kinene muno.