Obhusomboorerwa 14 - Iimuuma Iinyaaya

Iingʼondi ya Nyamuwanga na abhaanu bhiwumbi egana rimwi makumi gana na bhana

¹ Kimwi nindingira, nindora Iingʼondi ya Nyamuwanga ayambaaye iiguru ku-kiima kya Sayuuni ari amwi na abhaanu bhiwumbi egana rimwi, makumi gana na bhana (144,000). Abhaanu bhayo ꞉bhaariga bhakaamirwe riisiina rya Iingʼondi ya Nyamuwanga na riisiina rya Esemwene ku-bhisuusu bhyebhwe.

² Nuungwa oruyiriro okusooka mu-rwire muna rwa manji maafu kutyo agayirira mu-ruuji, muna rwa ebharuka enene, muna bhaanu abhabhuma ebhinuubhi bhyebhwe.

³ Abhaanu bhayo bhiwumbi egana rimwi, makumi gana na bhana, ꞉bhaariga mbeemba orwimbo oruyaaya bhari imbere ku-kitebhe kya ekikama kirya, na mu-meeso ga ebhibhumbwa ebhina bhirya, na abhakaruka makumi gabhiri na bhana. ꞉Ataabheeye-wo wundi unu ꞉aaturire okwiyigira orwimbo ruyo, tari ni bhaanu bhayo era. Bhayo nibho ꞉bhaariga bhagombooywe okusooka mu-kyaro.

⁴ Abhaanu bhayo nibho abhaseeta Iingʼondi ya Nyamuwanga woonewoone enu kaaja. Abheene nibho ꞉bhateenaabhiyasiishe ku-bhagasi, kwa okubha abheene ni bhayarajuma. Bhayo nibho ꞉bhaagombooywe okusooka mu-bhaanu abhandi, mbasoosibhwa bhari rwa amatwasho ga okwamba ku-Nyamuwanga na ku-Ngʼondi ya Nyamuwanga.

⁵ Bhakyariga kubheeya, na ꞉bhaariga bhatari na kikayo kyonekyone.

Bhaamaraayika abhasatu abhareeta Iingʼana ya Nyamuwanga

⁶ Kimwi, nindora maraayika owundi ˆnaabhuruka agati wa orwire. Maraayika uyo ꞉aariga ari na Amangʼana Amajomu aga akajaanende koone kutyo. ˆNeenda araasishe abhaanu bhanu bheekaaye mu-kyaro, mu-bhyaro bhyone kutyo, amayito, giinyaaika, na ginganda gyone kutyo.

⁷ Mmbe, maraayika uyo ˆnaamura obhuraka, ˆnaaikaga ati, “Muramye Nyamuwanga, mumugungye, kwa okubha insa yaaye ya okuramurira abhaanu bhoone kutyo mu-kyaro yaayikire. Muramye Nyamuwanga, Omubhumbi wa orwire, ekyaro, iinyanja, na ebhijegeje bhya amanji.”

⁸ Mmbe, maraayika wa akabhiri woone ˆnaaja, ˆnaaikaga ati, “Omusi gwagwa, omusi gwa Bhabheri omunene gurya gwagwa! Omusi guyo nigwo ꞉gwakorere abhaanu bha ebhyaro bhyone kutyo bhanywe iidivaayi yaagwo. Iidivaayi yaagwo ni bhutaasi bhwa ameega bhunu bhutari ku-bhaanu.”

⁹ Mmbe, nindora maraayika owundi owa akasatu, ˆnaaja ku-bhaamaraayika abhandi bharya. Woone ˆnaamura obhuraka ˆnaaikaga ati, “Omuunu woonewoone akaramya intyanyi iyo na ekisusano kyayo, na okutuurirwa-ko orubhano ku-kisuusu kyaye, amwi ati ku-kubhoko kwaye,

¹⁰ omuunu uyo woone kaaja okunywa iidivaayi ya riisungu rya Nyamuwanga. Iidivaayi iyo itasaasiibhwe-mo manji, na Nyamuwanga arisukira omuunu uyo iidivaayi mu-kikombe kya riisungu ryaye, ayinywe. Kweki Nyamuwanga arinyansha omuunu uyo mw-ibheri rya omuriro na ekibhiriiti mu-meeso ga bhaamaraayika abhataakatiifu na Iingʼondi ya Nyamuwanga.

¹¹ Ingesi ya omuriro gunu guribhookya iriituuta niiriinyaga iiguru akajaanende koone kutyo. Abhaanu bhayo bhatarimuunya ebhinyansho mu-ngeta na mu-mwisi, kwa okubha ꞉bhaaramiishe intyanyi na ekisusano kyayo, mbatuurirwa-ko na orubhano rwa riisiina ryayo.”

¹² Woori ayo, niwe abhataakatiifu abheendwa bhasimbiire, bhayo nibho abhaseeta ebhiraagiro bhya Nyamuwanga, na okwikirisha Yeesu.

¹³ Nuungwa riisi okusooka mu-rwire, ndyaika ati, “Kaama ati, okwambira woori kutya, nyakara abhaanu bhanu abhafwa bheekirisiishe Raatabhugenyi Yeesu.” Mwoyo Omutaakatiifu woone ˆnaaika ati, “Yee, bhamuunye okusooka mu-nyanko gyebhwe, kwa okubha bhaririywa okuriingʼaana na ebhikorwa bhyebhwe ebhijomu.”

Ebhigeswa bhya ekyaro

¹⁴ Mmbe, nindingira kweki, nindora eriire eryeru. Ku-riire riyo ꞉aariga eekaaye-ko omuunu rwa Omwana wa Adaamu. Omuunu uyo ꞉aariga afwaye orusuurya rwa ekikama orwa iijaabhu ku-mutwe gwaye. Mu-kubhoko kwaye ꞉aariga agwatiriiye omworo omuugi.

¹⁵ Kimwi maraayika owundi ˆnaasooka mw-iyekaru, ˆnaaragirisha omuunu unu ꞉aariga eekaaye ku-riire ˆnaamubhwira ati, “Gega omworo gwawo ugese, kwa okubha akabhaga ka okugesa kaayikire, na ebhigeswa bhya ekyaro bhyayiiye.”

¹⁶ Niwe omuunu unu ꞉aariga eekaaye ku-riire ˆneesha omworo gwaye mu-kyaro, ˆnaagesa ekyaro kyone kutyo.

¹⁷ Kimwi maraayika owundi ˆnaasooka mw-iyekaru rinu riri mu-rwire, agwatiriiyega omworo omuugi.

¹⁸ Niwe nindora maraayika owundi ˆnaasookaga mw-ishengero. Maraayika uyo niwe ꞉aariga ˆnaayambaarira omuriro. Mmbe maraayika uyo ˆnaamura obhuraka, ˆnaabhwira maraayika wa omworo omuugi ati, “Gega omworo gwawo, ugese ebhyangara bhya giijabhiibhu gya ekyaro, kwa okubha amatwasho gaayiiye.”

¹⁹ Niwe maraayika uyo ˆneesha omworo gwaye, ˆnaagesa giijabhiibhu gya ekyaro, ˆnaagituura mw-imigiro, riimigiro riyo riri na riisungu rya Nyamuwanga.

²⁰ Giijabhiibhu ngimigirwa mw-imigiro rinu riri anja wa omusi. Amaanyinga ngasooka mw-imigiro riyo, ngabha ruuji rureera. Obhureera bhwarwo ꞉bhwariga bhuri kiromiita magana gasatu, na obhusikya bhwarwo bhuri efubha rimwi.