Obhusomboorerwa 13 - Iimuuma Iinyaaya

Intyanyi ya okwamba

¹ Kimwi nindora intyanyi nene niisooka mu-nyanja. Intyanyi iyo ꞉yaariga iri na mitwe mungati na mayembe ekumi, na ku-mayembe gaayo ꞉gyariga giriko ginsuurya. Na emitwe gyone kutyo ꞉gyariga gikaamirwe-ko amasiina ga okujabhura Nyamuwanga.

² Intyanyi inu ꞉naarorere ꞉yaasusanaga na ingo, nawe amaguru gaayo ꞉gaariga gari rwa aga iidubhu na mu-kanwa ꞉yaasusanaga rwa indwi. Riisoro rirya ndiyaana intyanyi iyo amanaga gaaryo, ekitebhe kyaryo kya ekikama, na bhuturo bhunene.

³ Omutwe ogumwi gwa intyanyi iyo, ꞉gwariga guri muna ririko ewuta enene riinyarufu. Nawe riiwuta riyo ndiwora! Abhaanu bhoone kutyo mu-kyaro mbaruguurira intyanyi iyo mbaamba okuyiseeta.

⁴ Mbaramya riisoro, kwa okubha ati ꞉ryariga riyaaye intyanyi iyo obhuturo bhwaryo obhwa okutunga, mbaramya na intyanyi iyo mbaaikaga ati, “Niga unu ari rwa intyanyi inu? Niga kaatura okurwana na intyanyi inu?”

⁵ Mmbe, intyanyi iyo niiyaanwa obhuturo bhwa okwikumangya na okujabhura Nyamuwanga. Kweki niiyaanwa obhuturo bhwa okutunga ebhaga rya meesi makumi gana na ebhiri.

⁶ Intyanyi iyo niyamba okujabhura Nyamuwanga, riisiina ryaye, na obhwikaro bhwaye, niijabhura na bhoone kutyo bhanu bheekaaye mu-rwire.

⁷ Niiyaanwa na obhuturo bhwa okukora riiremo na abhataakatiifu niibhayiga. Niiyaanwa obhuturo bhwa okutunga abhaanu bha amayito goone kutyo, ginganda, giinyaaika, na ebhyaro bhyone kutyo.

⁸ Abhaanu bhoone kutyo kyaro kigima mbaramya intyanyi iyo, tari bhanu amasiina geebhwe gakaamirwe mu-Kitabho kya Obhurame. Ekitabho kiyo nikyo ekya Iingʼondi ya Nyamuwanga unu ꞉eetirwe kara ekyaro kikyari okubhumbwa, bhayo nibho bhatariyiramya.

⁹ Mmbe woori, unu ari na amatwi, ˆnoongwe ganu.

¹⁰ Omuunu wa okugegwa amateeka, arigegwa. Omuunu wa okukomerwa, arikomerwa. Woori ayo, niwe abhataakatiifu abheendwa bhasimbiire, na okubha na obhwikirisha.

Intyanyi ya akabhiri

¹¹ Kimwi, nindora intyanyi eyindi niiriinyaga okusooka munsi. Intyanyi iyo ꞉yaariga iri na mayembe gabhiri matooto rwa aga iingʼondi, nawe riisi ryayo ꞉ryariga riri rwa erya riisoro.

¹² Intyanyi iyo niikora amangʼana ku-bhuturo bhwa intyanyi ya okwamba irya. Intyanyi ya akabhiri iyo, niisiiga abhaanu bhoone kutyo bha mu-kyaro bharamye intyanyi ya okwamba irya ꞉yaaworerega riiwuta riinene riinyarufu.

¹³ Intyanyi ya akabhiri iyo, ꞉yaakorere mangʼana manene ga okuruguusha, niikora na omuriro gwike okusooka mu-rwire guragare mu-kyaro, abhaanu mbaroraga na ameeso geebhwe.

¹⁴ Ku-bhigwa bhinu ꞉yaayaaywe obhuturo bhwa okukora mu-meeso ga intyanyi ya okwamba irya, ꞉yaajimiishe abhaanu bhanu bhatakwikirisha mu-kyaro. Niisingʼiirisha abhaanu bhabhaaje ekisusano kya okuyaana ekibharo intyanyi ya okwamba irya, inu ꞉yaawutaasiibhwe na ekiraawa, nawe niigenderera okubha-mo omwoyo.

¹⁵ Kimwi intyanyi ya akabhiri niiyaanwa obhuturo bhwa okutuura obhuworu ku-kisusano kiyo, insonga kirome na okukora bhanu ꞉bhaaremere okuramya ekisusano kiyo bheetwe.

¹⁶ Intyanyi ya akabhiri ꞉yaasingʼiirisiishe abhaanu bhoone kutyo, abha ekibharo na bhanu bhatari na ekibharo, abhaniibhi na abhatobhu, abhagaya na bhanu bhatari bhagaya, bhatuurirwe-ko orubhano ku-kubhoko okuryo, rukarema okubha ku-kubhoko rubhe ku-kisuusu.

¹⁷ Na omuunu unu atatuuywe-ko orubhano ruyo, atakutura kugura amwi ati kugusha. Orubhano ruyo ni esiina rya intyanyi ya okwamba irya, rikarema okubha riisiina riyo, gibhe giinyuguta gya riisiina ryayo.

¹⁸ Riingʼana riyo eryenda obhwenge okurimenya. Unu ari na obhwenge, naabhare giinyuguta gya riisiina rya intyanyi iyo, kwa okubha giyo ni nyuguta ginu insonga yaagyo ni esiina rya omuunu omurebhe. Na obhukumi bhwagyo ni magana gasansabha makumi gasansabha na sansabha (666).