Obhusomboorerwa 12 - Iimuuma Iinyaaya

Omugasi na Riisoro

¹ Niwe nindora kimenyegesho kinene muno ekya okuruguusha ku-rwire, omugasi eeyindirwe na riisuubha, amaguru gaaye gatajirega ku-kwesi. Na ku-mutwe gwaye ꞉aariga afwaye orusuurya ruriko njota ekumi na ebhiri.

² Omugasi uyo ꞉aariga ari na inda, obhusungu mbumurumaga arebhereeye okwibhura, ˆnaariraga muno.

³ Nindora kweki ekimenyegesho ekindi ekya okuruguusha mu-rwire. Ku-kimenyegesho kiyo, nindora esoro enene, ekangaaru, riri na mitwe mungati na mayembe ekumi. Emitwe gyone kutyo ꞉gyariga giriko orusuurya.

⁴ Omukira gwaryo, ngufuta riibhaara erimwi kw-isatu erya ginjota gyone kutyo ku-rwire, ngugyesa mu-kyaro. Riisoro riyo ndiyambaara mu-meeso ga omugasi wurya, insonga akeebhura era, rimire omwana.

⁵ Mmbe omugasi uyo ˆneebhura omwana wa ekimura. Omwana uyo niwe aritunga abhaanu bha mu-bhyaro bhyone kutyo na insimbo ya ekyuma. Omwana uyo, ˆnaasaakurwa, ˆnaasirwa ku-Nyamuwanga, na ku-kitebhe kyaye ekya ekikama.

⁶ Omugasi uyo ˆnaabhirimira ku-kibhara, eyo niyo Nyamuwanga ꞉aariga aamuroosisiishe owa okusikirira insonga amwangarire ebhaga rya nsiku kiwumbi kimwi, magana gabhiri, na makumi gasansabha (1,260).

⁷ Niwe ndibha-wo riiremo mu-rwire. Maraayika omukuru, unu kaatogwa Mikayiri, ari amwi na bhaamaraayika bhaaye, mbarwana na riisoro, ryone riri na bhaamaraayika bhaaryo.

⁸ Nawe riisoro na bhaamaraayika bhaaryo, mbayigwa, mbabhirimibhwa okusooka mu-rwire.

⁹ Riisoro riyo ndyeswa mu-kyaro na bhaamaraayika bhaaryo. Niryo riisoro rya kara rinu eribhirikirwa Sitaani. Omwene niwe kaajimya abhaanu bhoone kutyo mu-kyaro bhakore ebhikayo.

¹⁰ Mmbe, nuungwa riisi enene mu-rwire eyo, ndyaikaga ati, “Woori, Nyamuwanga weeswe eerusha abhaanu bhaaye. Okuturira obhuturo bhwaye, ambisiishe obhukama bhwaye! Kiriisitu woone eeresha obhuturo bhwaye, kwa okubha omusitaakya wa Abhakiriisitu bheejaasu eeserwe ansi, Niwe kaabhasitakya ku-Nyamuwanga ngeta na mwisi.

¹¹ Na abheene ꞉bhaamuyigire okuturira amaanyinga ga Iingʼondi ya Nyamuwanga. Na Amangʼana Amajomu ganu ꞉bhaaikaga. ꞉Bhataarorere ati obhurame bhwebhwe ni kiinu kinene, Mbeekirisha na okufwa ku-nsonga ya Iingʼondi ya Nyamuwanga.

¹² Mmbe woori, mujomerwe, Emwe bhanu mwikaaye mu-rwire! Garibhanyoora emwe bhanu muri mu-kyaro na mu-nyanja, kwa okubha Sitaani, ari agati weemwe. Abhiiyiiywe muno, kwa okubha amenyere ati, ari na kabhaga kafuyi era.”

¹³ Bhunu riisoro riyo ꞉ryarorere ati ryeswa mu-kyaro, ndyamba okwagara omugasi unu ꞉eebhuuye omwana wa ekimura.

¹⁴ Niwe Nyamuwanga ˆnaayaana omugasi uyo mabhabha gabhiri rwa ga ekikoona, insonga abhuruke agende ku-nsi ya orukungu areera na riisoro riyo. Eyo niwe Nyamuwanga ꞉aariga amutuuriiye-wo, aangarirwe ebhaga rya myaka esatu na meesi gasansabha.

¹⁵ Riisoro riyo nditanaka manji maafu rwa oruuji, insonga omugasi uyo agegwe na oruuji ruyo.

¹⁶ Nawe insi niisakira omugasi uyo. Niyatika, niimira amanji goone kutyo ganu riisoro riyo ꞉ryatanakaga.

¹⁷ Mmbe, riisoro riyo ndibhiiyirirwa muno omugasi uyo, ndigenda okukora riiremo na abhaana bha omugasi uyo bhanu ꞉bhaasigaaye. Abhaana bhayo ni bhanu abhoongwa ebhiraagiro bhya Nyamuwanga na okubhwira abhaanu amangʼana ga Yeesu.

¹⁸ Mmbe, riisoro riyo ndiyambaara ku-murambo gwa iinyanja.