Obhusomboorerwa 1 - Iimuuma Iinyaaya

Ameeresho ga okwambira aga ekitabho kinu

¹ Bhunu nibhwo obhusombooro bhunu Nyamuwanga ꞉aayaaye Yeesu Kiriisitu, insonga atuurire abhweru abhajuuma bhaaye amangʼana ganu gataritaasa okubha-wo, na gari ayeeyi muno okubha-wo. Yeesu woone ˆnaatuma maraayika waaye ˆnaatuurira abhweru omujuuma waaye Yowana.

² Yowana ˆnaaika amangʼana ganu ꞉aarorere goone kutyo. Amangʼana gayo agaaikira, Riingʼana rya Nyamuwanga na amangʼana ganu Yeesu Kiriisitu ꞉aakoraga.

³ Nyakara abhaanu bhanu abhasomera abheejaabho Amangʼana ga obhuragi bhunu, na bhanu abheetegeeresha na okukora ganu gakaamirwe munu, kwa okubha riibhaga rya amangʼana gayo okukuumira riri ayeeyi.

Obhukeesha

⁴ Iinyarubha inu ni anye Yowana eniyikaama. Eniyikaamira Abhakiriisitu bhanu bhari mu-makanisa mungati ganu gari mu-kyaro kya Asiya Intooto. Iinema na omurembe okusooka ku-Nyamuwanga unu ariwo woori, ꞉aariga ariwo bhusimukwa, na niwe ariija kweki, na okusooka ku-myoyo mungati, bhanu bhari ku-bhumbere bhwa ekitebhe kya ekikama ekya Nyamuwanga,

⁵ na okusooka ku-Yeesu Kiriisitu bhibhe kw-imwe. Yeesu uyo niwe omwaiki omwitongeeye wa ganu ꞉aarorere ku-Nyamuwanga. Niwe owa okwamba okusooka nyombe mu-bhafuuye, na omutungi wa abhakama bha mu-kyaro kyone kutyo. Omwene niwe akyendere, na okuturira ku-maanyinga gaaye akyosiishe ebhikayo bhyeswe.

⁶ Akikorere kibhe obhukama bhwa abhashengesi insonga kikorere emirimu Nyamuwanga, esemwene. Obhugungyo na obhuturo bhibhe na Yeesu akajaanende koone kutyo! Amina.

⁷ Mwitegeereshe! Yeesu ariijira mu-meere! Abhaanu bhoone kutyo bharimurora, Na bhanu ꞉bhaamusomere na riitimu bharimurora, na abhaanu bha amayito goone kutyo aga mu-kyaro bharirira mbatogoonya ku-nsonga yaaye. Yee! Nikwo kutyo garibha. Amina.

⁸ Raatabhugenyi Nyamuwanga kaaika ati, “Ni anye Obhwambiro na Obhuteero. Nyamuwanga wa Obhutungi bhwone kutyo, ariwo woori, ꞉aariga ariwo bhusimukwa, na niwe ariija kweki.”

Yowana kaarora Kiriisitu mu-bhiroro

⁹ Ni anye Yowana Omukiriisitu weejaanyu. Unu eniyimbana na emwe okusimbiira giinyanko ku-nsonga ya Yeesu na obhukama bhwaye. ꞉Naariga nibhoyerwe kw-isinga rinu eritogwa Paatimo. ꞉Naabhoyerwe eyo kwa okubha ꞉naaraashaga Riingʼana rya Nyamuwanga na okubhwira abhaanu amangʼana ganu Yeesu ꞉aakoraga.

¹⁰ Rusuku rumwi ruri rusuku rwa okuramya Raatabhugenyi, Mwoyo Omutaakatiifu ˆnnaawunga. Nintaka era nuungwa riisi enene iinyuma waani muna ekombi eribhumwa.

¹¹ Riisi riyo ndimbwira ati, “Nuukaame mu-kitabho amangʼana goone kutyo ganu uraarore. Ukamara ugasire ku-makanisa mungati ganu, Efeso, Simirina, Perugamo, Tiyatira, Saadi, Firadeefiya na Rawodiikiya.”

¹² Mmbe, niinfutata nirore unu aikaga na anye. ꞉Neejire naafutata nindora ebhiinu mungati ebhya iijaabhu ebhya okwikasha-ko gintara.

¹³ Agati wa ebhiinu bhiyo, nindora muna naarora Mwana wa Adaamu. Omuunu uyo ꞉aariga afwaye ngibho ndeera iyikire ku-maguru, na omuchipi mugari ogwa iijaabhu mu-kifubha.

¹⁴ Ginfwiri gyaye ꞉gyariga giri nyeru pee muna mafufi meeru, muna magaafu geerere muno. Na ameeso gaaye gaseekaanire rwa omuriro.

¹⁵ Amaguru gaaye ꞉gaariga ngangʼarabhya muno rwa ekisisira kinu kyokiibhwe mw-ibheri rya omuriro. Riisi ryaye ꞉ryariga ndiyirira rwa amanji mu-ruuji geejuuye.

¹⁶ Omuunu uyo ꞉aariga ari na njota mungati mu-kubhoko kwaye okuryo. Mu-kanwa kaaye nkisookaga-mo ekiraawa kiri na moogi gabhiri. Obhusu bhwaye ꞉bhwariga mbungʼarabhya bhuseekaanire rwa riisuubha rya mu-mwisi.

¹⁷ ꞉Neejire naamurora, ningwa ku-maguru gaaye nimba rwa omufuuye. Nawe omwene ˆnaankuunʼya-ko na okubhoko kwaye okwa ebhuryo ˆnaambwira ati, “Siga okuubhaya! Ni anye owa okwamba na owa obhuteero.

¹⁸ Ni anye, eniisha omwoyo! ꞉Naariga nifuuye nawe woori, eniisha omwoyo akajaanende koone kutyo! Ni anye niri na ginfunguro gya orufu na egya nyombe.

¹⁹ “Woori kaama amangʼana ganu waarora, ganu gariwo woori anu kutya, na ganu garibha-wo.

²⁰ Siga woori nikubhwire imbisike ya ebhiinu bhinu waarora mu-kubhoko kwani okwa ebhuryo. Ginjota mungati ginu waarora mu-kubhoko kwani kwa ebhuryo, ni bhaamaraayika abha amakanisa mungati. Na ebhiinu mungati ebhya iijaabhu ebhya okwikasha-ko gintara bhinu waarora, nigo amakanisa mungati.”