Mataayo 9 - Iimuuma Iinyaaya

Yeesu ari na obhuturo bhwa okwabhira ebhikayo

¹ Mmbe, Yeesu ˆnaariinya mu-bhwato, ˆnaambuka kweki omwaro gwa Gariraaya, ˆnaasubha Kaperinawumu, enu ꞉aariga eekaaye.

² Niwe abhaanu mbamureetera omuunu unu ꞉aariga afuuye omubhiri, bhamuyangiiyega kw-iraro. Yeesu ꞉eejire aarora obhwikirisha bhwa abhaanu bhayo, ˆnaabhwira omurwaye uyo ati, “Mwana waani, iikomeesha! Waabhirwa ebhikayo bhyawo.”

³ Niwe abheeyigisha abhandi abha ebhiraagiro bhya Musa bhanu ꞉bhaariga bhari ayo, mbeeyaaikira mu-mitima ati, “Omuunu unu keerengekanya na Nyamuwanga!”

⁴ Nawe Yeesu ˆnaamenya goone kutyo ganu ꞉bhaariga mbeeganiirisha, ˆnaabhabhuusha ati, “Kubhaki omwiganiirisha amabhiibhi mu-mitima gyemwe?

⁵ Riiwuuwu kw-imwe ni riiya? Okwaika ati, ‘Waabhirwa ebhikayo bhyawo,’ na okwaika ati, ‘Iimuka, ugende’?

⁶ Eneenda mumenye kujomu ati, Omwana wa Adaamu ari na obhuturo bhwa okwabhira abhaanu ebhikayo mu-kyaro anu.” Niwe Yeesu ˆnaabhwira omuunu unu ꞉aariga afuuye omubhiri ati, “Iimuka! Gega riiraro ryawo ugende ewaawo.”

⁷ Ayoayo ˆneemuka, ˆnaagenda ewaaye.

⁸ Bhunu abhaanu ꞉bhaarorere amangʼana gayo, mbaruguura, mbayaya muno. Mbagungya Nyamuwanga unu ꞉aayaaye abhaanu obhuturo rwa bhuyo.

Yeesu eejire okwerusha abhakosi bha ebhikayo

⁹ Bhunu Yeesu ꞉aasookaga ayo, ˆnaarora omutobhesha wumwi owa riigooti unu ꞉aatogwaga Mataayo, eekaaye mu-kiwuuna kyaye ekya okutobhesisha riigooti. Yeesu ˆnaamubhwira ati, “Nseeta.” Mataayo ˆneemuka ˆnaamuseeta.

¹⁰ Mmbe, Mataayo ˆnaagega Yeesu na abheeyigira bhaaye mbagenda ewaaye okurya. Abhatobhesha bha riigooti bhaafu na abhakosi bha ebhikayo, bhoone ꞉bheejire, mbeekara egari rimwi okurya.

¹¹ Abhafarisaayo okurora kutyo, mbabhwira abheeyigira bha Yeesu ati, “Ndora, omwiyigisha weemwe kaarya na abhatobhesha bha riigooti na abhakosi bha ebhikayo?”

¹² Yeesu ˆnoongwa amangʼana geebhwe, ˆnaabhabhwira ati, “Abhaanu abhaworu bhatakukena muragusi, tari abharwaye nibho abhamukena!

¹³ Mmbe, mwiyigire insonga ya amangʼana ga Nyamuwanga mu-Makaamo Amataakatiifu ganu agaaika ati, ‘Eneenda abhaanu bhafwiranire ekigongo okukira okusoosha ekimweso.’ Mmbe, anye niteejire okubhirikira bhanu abheerora ati ni bharengeresi mu-meeso ga Nyamuwanga, tari niijire ku-nsonga ya abhakosi bha ebhikayo.”

Yeesu kaariingʼaanya ameeyigisho ga kara na amayaaya

¹⁴ Niwe abheeyigira bha Yowana Omubhatiisha mbaaja ku-Yeesu, mbamubhuusha ati, “Eswe na Abhafarisaayo ekiiyimaga ebhyokurya. Kubhaki abheeyigira bhaawo bheeki bhatakwiyima ebhyokurya?”

¹⁵ Yeesu ˆnaabhasubhya ati, “Abhaanu bhanu bharaarikirwe mu-bhwenga, abhatura kutiki okusurumbara bhari amwi na omugabhusi? Nawe ginsiku egiija ginu bharisoosibhwa-wo omugabhusi, ayo niwe bhariiyima ebhyokurya.

¹⁶ “Atariwo omuunu unu kaatuura ekirapa ekiyaaya ku-ngibho inkokoro. Akakora kutyo, ekirapa ekiyaaya ekitamura ingibho iyo na obhutamuke bhwayo mbubha bhunene okukira kutyo ꞉bhwariga bhuri.

¹⁷ Na omuunu atakutuura iidivaayi iinyaaya mu-bhituumo ebhikokoro, kwa okubha aakakora kutyo, iidivaayi iinyaaya eyaata ebhituumo bhiyo, iidivaayi niyiitika, ebhituumo bhyone mbinyamuka. Tari, kaatuura iidivaayi iinyaaya mu-bhituumo ebhiyaaya insonga bhyone kutyo, bhigenderere okubha-wo!”

Yeesu kaawosha omugasi wumwi na okusuura omuyara

¹⁸ Bhunu Yeesu ꞉aariga akyaroma gayo, ˆnaaja omutangasha wumwi wa riisunagoogi, ˆnaamwifukamira, ˆnaamubhwira ati, “Omuyara waani aafwa, kaamara kufwa woori kutya! Nawe, kigende umutuurire-ko okubhoko kwawo kaaja okutuuma-yo.”

¹⁹ Niwe, Yeesu na abheeyigira bhaaye mbeemuka, mbagenda na omutangasha uyo.

²⁰ Mmbe, kabhaga kayokayo omugasi wumwi unu ꞉aariga arwaye obhureegu gyaturire myaka ekumi na ebhiri, ˆnaaja iinyuma wa Yeesu, ˆnaakuunʼya ku-bhisumi bhya emwaro ebhya ingibho ya Yeesu.

²¹ ꞉Aakorere kutyo, kwa okubha ꞉aariga ˆneeyaikira mu-mutima ati, “Nikakuunʼya ku-ngibho yaaye era, eniwora.”

²² Bhunu ꞉aakuuniishe-ko era, Yeesu ˆnaafutata, ˆnaamurora, ˆnaamubhwira ati, “Muyara waani, iikomeesha! Obhwikirisha bhwawo bhwakuwosha!” Ayoayo, omugasi uyo ˆnaawora.

²³ Bhunu Yeesu ꞉aayikire ewa omutangasha wa riisunagoogi, ˆnaanyoora bhaanu bhaafu bhasangire mu-rufu ayo mbariraga, abhandi mbabhumaga ebhironge bhya mu-rufu.

²⁴ Yeesu ˆnaabhabhwira ati, “Musooke anu! Omuyara unu atafuuye, awongeeye era.” Bhunu abhaanu ꞉bhoonguuywe kutyo, mbamuseka.

²⁵ Kimwi abhaanu mbawurushwa anja bhoone kutyo, Yeesu ˆneengira mu-nyumba, ˆnaagwata omuyara uyo okubhoko, omwoyo ngusubha-mo, ˆnaayambaara!

²⁶ Amangʼana gayo ngaswerana mbaara gyone kutyo egya ekyaro kiyo.

Yeesu kaawosha abhawofu bhabhiri

²⁷ Yeesu ˆneemuka okusooka ayo, bhawofu bhabhiri mbamuseeta, bhaamuuyega obhuraka bhwebhwe mbaaika ati, “Omuyiiri Dawudi, nuukifwire ekigongo!”

²⁸ Yeesu ˆneengira mu-nyumba, abhawofu bhayo bhoone mbamuseeta-mo. Mmbe, Yeesu ˆnaabhabhuusha ati, “Angu, omwikirisha ati enitura okukora murore?” Mbamusubhya ati, “Yee, Raatabhugenyi!”

²⁹ Niwe Yeesu ˆnaakuunʼya ku-meeso geebhwe, ˆnaabhabhwira ati, “Nyamuwanga abhakorere rwa kutyo omwikirisha.”

³⁰ Ayoayo, ameeso geebhwe ngeera, mbarora. Yeesu ˆnaabhakomeeresha ati, “Mwasiga kubhwira muunu woonewoone amangʼana ganu!”

³¹ Nawe, bheeki mbagenda mbagaraasha mbaara gyone kutyo egya mu-kyaro kiyo.

Yeesu kaawosha omujibhi

³² Bhunu abhawofu bhayo ꞉bheemukire okugenda, abhaanu abhandi mbareetera Yeesu muunu wumwi unu ꞉aariga awungirwe ekiwi kimuyaaye obhujibhi.

³³ Yeesu ˆnaabhirimya ekiwi kiyo, ayoayo omuunu uyo ˆnaamba okuroma. Abhaanu bhanu ꞉bhaariga bhasangire ayo mbaruguura muno, mbaaikaga ati, “Riibhaga, gakyariga kubha-wo amangʼana rwa ganu Ijirayeeri anu!”

³⁴ Nawe Abhafarisaayo mbaaika ati, “Kaabhirimya ebhiwi okuturira ku-bhuturo bhwa omukuru wa ebhiwi!”

Yeesu kaafwira ekigongo abhaanu

³⁵ Mmbe, Yeesu ꞉aariga ˆneeyinda mu-misi gyone kutyo agati na mu-magunguri. Anu ꞉aaturaga, ꞉aariga ˆneengira mu-masunagoogi geebhwe okwiyigisha abhaanu. Na ꞉aariga ˆnaaraasha Amangʼana Amajomu aga obhukama bhwa mu-rwire, ˆnaawosha na amarwara ku-mbaga.

³⁶ Na bhunu Yeesu ꞉aaroraga amasangi ga abhaanu, ꞉aabhafwiraga ekigongo, kwa okubha ꞉bhaariga mbanyanka, bhatari na muunu wa okubhasakira. ꞉Bhaariga bhari rwa giingʼondi ginu gitari na mureefi.

³⁷ Niwe Yeesu ˆnaabhwira abheeyigira bhaaye ati, “Ebhigeswa ni bhyafu, nawe abhagesi ni bhatooto.

³⁸ Woori, musabhe Raatabhugenyi Nyamuwanga, niwe omwene esambu, insonga atume abhagesi mw-isambu ryaye, bhagese.”