Mataayo 7 - Iimuuma Iinyaaya

Mwasiga okuramurira abhandi

¹ “Mwasiga kuramurira abhandi, mwone mwasiga kuramurirwa.

² Enaaika kutyo kwa okubha kutyo omuramurira abhandi, nikwo kutyo Nyamuwanga aribharamurira. Na indengo inu omurengera abhandi, niyo mwone murirengerwa na Nyamuwanga.

³ “Ndora owuringira akati kanu kari mu-riiso rya oweejaanyu, enu utakuringira riibhaawu rinu riri mu-riiso ryawo?

⁴ Owutura kutiki okubhwira oweejaanyu ati, ‘Siga nikusoosishe akati kanu kari mu-riiso ryawo,’ enu awe omwene uri na riibhaawu mu-riiso ryawo?

⁵ Mubheeyi awe! Nuusooshe okwamba riibhaawu rinu riri mu-riiso ryawo, niwe owuuja okurora kujomu, nuusoosha akati kanu kari mu-riiso rya oweejaanyu.

⁶ “Mwasiga okuyaana gimbwa ebhiinu bhinu ebhisooka ku-Nyamuwanga, gyasiga okubhayindukira ngibhakaraabhura. Na mwasiga okuyaana gingurubhe giiruuru gyemwe, gyasiga okugitajataja.”

Okusabha ku-Nyamuwanga

⁷ “Musabhe Nyamuwanga, kaaja okubhayaana kinu omusabha. Mwagare ku-Nyamuwanga, omwene kaaja okubhayaana kinu omwagara. Mukonoone orwigi, Nyamuwanga kaaja okubheegurira.

⁸ Kwa okubha abhasabhi, nibho abhayaanwa. Na abhaagasi nibho abhanyoora. Na abhakonooni bha orwigi nibho abheegurirwa.

⁹ “Angu, niga agati weemwe, unu omwana waaye akamusabha omukaate, weeki kaamuyaana riigina?

¹⁰ Amwi ati amusabhe inswi, weeki ˆnaamuyaana ekisoro?

¹¹ Mmbe ikabha ati emwe abhakayi mwone, mumenyere okuyaana abhaana bheemwe emisanga emijomu, angu, Esomwana unu ari mu-rwire atakutura okukorera amajomu abhaanu bhoone kutyo bhanu abhamusabha?

¹² “Mmbe ganu omwenda mukorerwe na abhaanu, emwe mwone mubhakorere kutyokutyo, kwa okubha okukora kutyo, ni niyo insonga ya ebhiraagiro bhya Musa na ameeyigisho ga abharagi.”

Okwingira mu-bhukama bhwa Nyamuwanga

¹³ “Mwingire okuturira mu-muryango omutooto, kwa okubha omuryango na injira inu eyibhusha abhaanu ni ngari, na abhaanu abhaafu abheengira okuturira ku-muryango guyo.

¹⁴ Nawe omuryango gunu ogusira abhaanu mu-bhurame ni mutooto, na injira inu eyigenda-yo iyigeene. Na abhaanu bhanu abharora injira iyo, ni bhatooto.”

Okumenya abharagi abhabheeyi

¹⁵ “Mwiyangarire na abharagi abhabheeyi, bhanu abhabhaaja-ko bhari rwa giingʼondi, nawe kimari ni nsunji nduru.

¹⁶ Emwe muribhamenya okuriingʼaana na ebhikorwa bhyebhwe. Abhaanu bhatakunoga giijabhiibhu amwi ati giitiini ku-mati ga amawa.

¹⁷ Riiti riijomu eritwasha amatwasho amajomu, na riiti riibhiibhi ryone eritwasha amatwasho amabhiibhi.

¹⁸ Riiti riijomu ritakutura okutwasha amatwasho amabhiibhi, na riiti riibhiibhi ritakutura okutwasha amatwasho amajomu.

¹⁹ Amati goone kutyo ganu gatakutwasha amatwasho amajomu, agatemwaga ngeeswa mu-muriro.

²⁰ Nikwo kutyo muribhamenya okuriingʼaana na ebhikorwa bhyebhwe.”

Abheeyigira abha ekimari na abhabheeyi

²¹ “Bhatari bhoone kutyo bhanu abhambirikira ati, ‘Raatabhugenyi, Raatabhugenyi,’ ati bhariingira mu-bhukama bhwa mu-rwire. Tari, unu kaakora ganu Raata wa mu-rwire keenda, uyo niwe ariingira-mo.

²² Bhaanu bhaafu bharimbwira ku-rusuku rwa indamuro ati, ‘Ee Raatabhugenyi, owuyiita ati ꞉kyasoosiishe obhuragi okuturira kw-isiina ryawo, na ꞉kyabhirimyaga ebhiwi nkikora na bhigwa bhyafu kw-isiina ryawo?’

²³ Anye noone niribhabhwirira abhweru ati, ‘Nitakubhamenya emwe wuri! Musooke ku-anye anu, abhakosi bha amabhiibhi emwe!’”

Ekirengekanyo kya abhoombaki abhabhiri

²⁴ “Mmbe, omuunu woonewoone unu koongwa amangʼana gaani, na okugakora, kaarengekanywa na omuunu omwenge unu oombakire iinyumba yaaye kw-itare.

²⁵ Bhunu ingubha ꞉yaaguuye, giinyuji ngituumura, riiyaga nditiimuka ryafu ndibhuma iinyumba iyo, nawe nyumba iyo ꞉itaaguuye ansi, kwa okubha obhwambiro bhwayo ꞉bhwariga bhuumbakirwe kw-itare.

²⁶ Nawe muunu woonewoone unu koongwa amangʼana gaani ˆnaasiga okugakora, kaarengekanywa na omuunu omutengʼo unu oombakire iinyumba yaaye ku-nsenyi.

²⁷ Anu ingubha ꞉yaambire okugwa, giinyuji ngituumura, na riiyaga nditiimuka ryafu, ndibhuma iinyumba iyo, niigwa ansi niinyaragana yoone kutyo.”

²⁸ Bhunu Yeesu ꞉aamarire okwaika amangʼana gayo, abhaanu bhanu ꞉bhaariga bhasangire ayo, mbaruguurira muno ameeyigisho gaaye.

²⁹ ꞉Bhaaruguurire kwa okubha, amangʼana gaaye ꞉gaariga gari muna ga muunu unu ari na obhuturo, gatari rwa aga abheeyigisha bheebhwe abha ebhiraagiro bhya Musa.