Mataayo 6 - Iimuuma Iinyaaya

Okusakira bhatobhu

¹ “Mwangarire! Mwasiga okukora amangʼana amajomu mu-meeso ga abhaanu, insonga bhabharore, kwa okubha mukakora kutyo, mutakunyoora muyeero okusooka kw-Isomwana unu ari mu-rwire.

² “Mmbe, awe ukasoosha omugabho, okusakira abhatobhu, waasiga okubhuma ekombi nuuraashaga kinu waakora, rwa kutyo bhanu abhaaika ganu bhatakukora, abhakora mu-masunagoogi, na ku-njira, insonga abhaanu bhabhakumangye.

³ Kimari enibhabhwira ati, bhaamarire okunyoora omuyeero gwebhwe ku-bhaanu. Nawe awe ukasakira omutobhu, okubhoko kwawo kwa ebhumosi kwasiga okumenya kinu okubhoko okuryo okusoosha,

⁴ insonga obhusakisi bhwawo ubhumenye awe era. Ukakora kutyo, Esomwana unu kaarora ganu geeyibhisire kaakwongesisha.”

Okusaasaama Nyamuwanga

⁵ “Na mwasiga okusaasaama Nyamuwanga rwa abhaanu bhanu abhakora ku-nsonga ya abhaanu era. Abheene bheendere okusaasaama bhayambaaye mu-masunagoogi na ku-njira gya amakaaka insonga abhaanu bhabharore na bhabhakumangye. Kimari enibhabhwira ati, bhaamarire okunyoora omuyeero gwebhwe.

⁶ Tari awe ukeenda okusaasaama, ingira mu-kyumba kyawo wiigare orwigi, ukamara okwigara orwigi rwawo, usaasaame kw-Isomwana unu atakurorwa. Ukakora kutyo, Esomwana unu kaarora ganu geeyibhisire kaakwongesisha.

⁷ “Mwasiga okusaasaama mwaikaga kinu mutakumenya musubhiirishaga gayogayo era, rwa abhaanu bhanu bhatakwikirisha Nyamuwanga, kwa okubha abheene abhatoga ati abhaaja okunyoora kinu abhasabha okuturira ku-bhwafu bhwa amangʼana geebhwe.

⁸ Mwasiga okusaasaama rwa bhayo, kwa okubha Esomwana amenyere ganu omukena, mukyari na kumusabha.

⁹ Mmbe woori, mukabha musaasaama, museetega ekirengekanyo kinu ati, ‘Raata unu uri mu-rwire, riisiina ryawo rigungibhwe. Na obhukama bhwawo bhuuje.

¹⁰ Ganu oweenda, gakuumishwe mu-kyaro anu, rwa kutyo agakuumira mu-rwire.

¹¹ Ukiyaane ebhyokurya bhyeswe ku-nsiku.

¹² Ukyabhire ebhikayo bhyeswe, rwa kutyo eswe kyone ekyabhira bhanu abhakikayira.

¹³ Kweki Raata, waasiga okukingisha mu-masakyo. Nawe ukyerushe okusooka ku-mukayi. [Kwa okubha, obhukama, amanaga na obhugungyo ni bhyawo, akajaanende koone kutyo. Amina!]’”

¹⁴ Yeesu ˆnaagenderera okwaika ati, “Raabhe mukaabhira abhaanu ebhikayo bhwebhwe, Esomwana unu ari mu-rwire, kaaja okubhaabhira emwe mwone.

¹⁵ Nawe raabhe omurema okwabhira abhaanu ebhikayo bhyebhwe, Esomwana unu ari mu-rwire woone ataribhaabhira ebhyemwe.”

Okwiyima ebhyokurya

¹⁶ “Na mukeeyima ebhyokurya, mwasiga okusurumbara rwa abhaanu bhanu abheeyima ebhyokurya, ku-nsonga ya abhaanu era. Abheene abhasurumbara kutyo insonga abhaanu bhabharore ati bheeyimire ebhyokurya. Kimari enibhabhwira ati, bhaamarire okunyoora omuyeero gwebhwe.

¹⁷ Nawe awe ukeeyima ebhyokurya, iiyosha obhusu bhwawo kujomu, wiiyake na amafuta mu-mutwe,

¹⁸ insonga abhaanu bhaasiga kumenya ati wiiyimire ebhyokurya. Tari Esomwana unu atakurorwa, niwe amenye era. Esomwana uyo kaarora ganu abhaanu abhakora bhwiyibhise, uyo niwe kaaja okukwongesisha.”

Obhuniibhi

¹⁹ “Mwasiga okwibhiikira ebhiinu mu-kyaro anu, anu amasiribhi na obhukerebheeye obhubhinyamura, na bheefi abheengira mu-nyumba anu bhituuywe, insonga bhabhiibhe.

²⁰ Tari mwibhiikire ebhiinu bhyemwe mu-rwire enu amasiribhi na obhukerebheeye bhitakubhinyamura na abheefi bhatakwingira-yo okubhiibha.

²¹ Mukore kutyo, kwa okubha anu owubhiika ebhiinu bhyawo, niwe na omutima gwawo guribha.

²² “Eriiso niryo intara ya omubhiri. Raabhe eriiso ryawo erirora kujomu, omubhiri gwawo gwone kutyo ogubha na obhweru.

²³ Nawe, ameeso gaawo gakabha mawofu, omubhiri gwawo gwone ogubha guweereeye mu-kisuute. Mmbe raabhe omubhiri gwawo gukabha kisuute, ekisuute kiyo ni kinene muno!

²⁴ “Atariwo muunu unu kaatura okukorera bheesebhugenyi bhabhiri emirimu kw-ibhaga rimwi. Akakora kutyo, kaatura okubhiiyirirwa owumwi ˆneenda owundi, amwi ati kaagwatana na owumwi ˆnaajeera owundi. Mutakutura okukorera Nyamuwanga emirimu, muringiiyega na ebhiinu bhyemwe kw-ibhaga rimwi riyoriyo!”

Mwasiga okunyankirira obhwagasi bhwa ebhiinu

²⁵ “Mmbe woori, enibhabhwira ati, mwasiga okunyankirira obhurame bhwemwe ati omuuja okuryaki, amwi ati omuuja okunywaki. Na emibhiri gyemwe ati omuuja okufwaraki. Angu obhurame bhutakukira ebhyokurya, na omubhiri gutakukira gingibho?

²⁶ Muringire giinyonyi. Gitakuyamba, gitakugesa, na gitari na kitara ati egibhiika-mo ebhyokurya. Nawe, Esomwana wa mu-rwire, kaagigabhisha. Angu emwe, mutari na kibharo kinene kukira giinyonyi giyo?

²⁷ Kw-imwe ni wuuya kaatura okwinyankirira ˆneeyongesha nsa yimwi era, eya okurama kwaye mu-kyaro anu?

²⁸ “Kubhaki omunyankirira obhufwafi bhwa gingibho? Muringire kutyo amawuuwa ga iibhara agamera. Gatakukora mirimu gyonegyone, na gatakwibhariirira.

²⁹ Enibhabhwira ati, omukama Seremaani ku-bhugungyo bhwaye bhwone kutyo, ꞉ataafwaye kujomu rwa amawuuwa gayo!

³⁰ Mmbe, raabhe Nyamuwanga kaafwafya kutya amanyansi ga iibhara, ganu gariwo reero era, katondo ngeeswa mu-muriro, angu, atakutura okubhafwafya, emwe abhaanu bha obhwikirisha obhutooto?

³¹ “Mmbe woori, mwasiga okunyankirira ati omuryaki, omunywaki amwi ati omufwaraki.

³² Amangʼana gayo, nigo aganyansha abhaanu bhanu bhatakwikirisha Nyamuwanga. Mwasiga okuganyankirira kwa okubha Esomwana unu ari mu-rwire amenyere ati omugakena.

³³ Tari mwagare okwamba obhukama bhwa Nyamuwanga na okukora amarengeresi rwa kutyo omwene keenda. Agandi gayo goone kutyo, omwene aribhoongesisha.

³⁴ Mwasiga okunyankirira aga katondo, kwa okubha giinyanko gya katondo ni gya katondo eyeene. Ginsiku gyone kutyo giisirwe na iinyanko yaagyo eya orusuku.”