Mataayo 5 - Iimuuma Iinyaaya

Ameeyigisho ga Yeesu ku-kiima ( 5:1–7:29 ) Giinonkwe na giinyanko

¹ Mmbe, bhunu Yeesu ꞉aarorere abhaanu mbabha bhaafu, ˆnaariinya ku-kiima, ˆneekara. Niwe abheeyigira bhaaye mbamugenda-ko.

² ˆNaamba okubhabhwira ati,

³ “Nyakara abha emyoyo emitobhu, kwa okubha obhukama bhwa mu-rwire ni bhwebhwe.

⁴ Nyakara bhanu bhasurumbaaye, kwa okubha Nyamuwanga kaaja okubhawooyeresha.

⁵ Nyakara abhafura, kwa okubha bhayo nibho bharigabha ekyaro.

⁶ Nyakara bhanu bhari na omweko na obhwiro bhwa obhurengeresi, kwa okubha Nyamuwanga aribheegutya.

⁷ Nyakara bhanu abhafwira abhandi ekigongo, kwa okubha Nyamuwanga aribhafwira ekigongo.

⁸ Nyakara bhanu bhari na emitima emyeru, kwa okubha bharirora Nyamuwanga.

⁹ Nyakara abhagwatanya bha bhanu bhasokeene, kwa okubha bhayo bharibhirikirwa bhaana bha Nyamuwanga.

¹⁰ Nyakara bhanu abhanyansibhwa ku-nsonga ya okukora amarengeresi, kwa okubha obhukama bhwa mu-rwire ni bhwebhwe.

¹¹ “Nyakara emwe raabhe abhaanu bhakabhafuma, mbabhanyansha na okubhabheeyeresha amabhiibhi goone kutyo, ku-nsonga yaani.

¹² Mujomerwe, mubhe na orugirigiri, kwa okubha Nyamuwanga abhatuuriiye-wo ekiyaanwa kinene mu-rwire. Mwasiga okuruguura kwa okubha nikwo kutyo ꞉bhaanyansiishe na abharagi bha kara.”

Ekirengekanyo kya omuunyu na obhweru

¹³ “Emwe muri rwa omuunyu mu-kyaro. Omuunyu gukabhusha omuta gwago, kitariwo kiinu kya kugusambaarusha kweki, ogweswa iibhara ngutajwa na abhaanu.

¹⁴ “Muri rwa obhweru ku-kyaro. Omusi gunu guumbakirwe iiguru ku-kiima, gutakutura okwiyibhisa.

¹⁵ Na abhaanu bhatakukongeesha intara mbayifundikira mw-idebhe. Tari abhayituura ku-kisiri insonga imirikire abhaanu bhoone kutyo mu-nyumba.

¹⁶ Nikwo kutyo eyeendwa obhweru bhwemwe bhumirikire abhaanu, insonga bhagungye Esomwana unu ari mu-rwire, bhakarora ebhikorwa bhyemwe ebhijomu.”

Ebhiraagiro bhya Musa na abharagi

¹⁷ “Mwasiga kutoga ati niijire okusoosha-wo ebhiraagiro bhya Musa, amwi ati ameeyigisho ga abharagi. Wuri, niteejire kugasoosha-wo, tari nikuumishe ganu ebhiraagiro na abharagi ꞉bhaaragiriraga.

¹⁸ Enibhabhwira ekimari ati, okuyikira anu orwire na ekyaro bhiriteera, ritariwo engʼana amwi ati nyuguta yimwi eya ebhiraagiro inu irisooka-ko, okuyikira anu goone kutyo garikuumira.

¹⁹ Mmbe, omuunu woonewoone akasiga okukora kutyo ekiraagiro ekimwi ekitooto ekyenda akore, ˆneeyigisha na abhandi bhoone bhasige, uyo aribha na ekibharo kitooto okukira bhoone kutyo mu-bhukama bhwa mu-rwire. Tari woonewoone unu kaakora kutyo ebhiraagiro ebhiiyigisha, ˆneeyigisha na abhandi insonga bhoone bhakore kutyo, uyo aribha na kibharo kinene muno mu-bhukama bhwa mu-rwire.

²⁰ Mmbe, enibhabhwira ati, obhurengeresi bhwemwe bhutakirire obhwa Abhafarisaayo na obhwa abheeyigisha bha ebhiraagiro bhya Musa, mutariingira mu-bhukama bhwa mu-rwire kimwi.”

Ameeyigisho iiguru ya riisungu

²¹ Yeesu ˆnaagenderera okubhabhwira ati, “Mwoonguuywe ekiraagiro kinu, abhaanu bha kara ꞉bhaabhwiriiywe ati, ‘Waasiga okwita omuunu! Omuunu woonewoone unu keeta oweejaabho, woone eyeendwa aramurirwe.’

²² Nawe anye enibhabhwira ati, omuunu woonewoone unu kaasoka oweejaabho, eyeendwa aramurirwe. Na woonewoone unu kaafuma oweejaabho, omwene woone eyeendwa aramurirwe mw-ibharaja. Na, woonewoone unu kaafuma weejaabho ati ‘Mutengʼo unu,’ eyeendwa eeswe mu-muriro gunu gutakusimá.

²³ “Mmbe, ukaaja na omugabho gwawo okusoosha kw-ishengero, kimwi nuuyiita ati ukayiiye oweejaanyu,

²⁴ siga okwamba omugabho gwawo kw-ishengero ayo, ugende umwagare mwikirishaanye okwamba. Ukamara okwikirishaanya nawe, niwe usubhe usooshe omugabho gwawo.

²⁵ “Iikirishaanya na unu kaakusitaakya bhwangu, mukyari ku-njira, aasiga okukuyikya ku-muramusi, omuramusi woone ˆnaakuyikya ku-bhasirikare insonga bhakubhoye mu-jeera.

²⁶ Enikubhwira ekimari ati, utarisooka-mo okuyikira anu urimara okuriya riisiiri ryone kutyo!”

Obhutaasi bhwa ameega

²⁷ Yeesu ˆnaabhabhwira kweki ati, “Mwoonguuywe ekiraagiro kinu ekyaika ati, ‘Waasiga okutaara ameega!’

²⁸ Nawe anye enibhabhwira ati, woonewoone unu kaaringira omugasi, mu-mutima gwaye ˆnaamwenda, kaabha aamarire okutaara ameega nawe mu-mutima gwaye.

²⁹ Mmbe, raabhe eriiso ryawo erya ebhuryo erikuyabhya, urisooshe-mo uryese areera eyo. Nyakara ubhurwe ekigwatanya ekimwi ekya omubhiri, nawe uwonʼye omubhiri gwawo, gwasiga kweswa mu-muriro gunu gutakusimá.

³⁰ Na okubhoko kwawo okwa ebhuryo kukakuyabhya, kubhuture-ko, ukwese areera eyo. Nyakara ubhurwe ekigwatanya ekimwi ekya omubhiri, nawe uwonʼye omubhiri gwawo, gwasiga kweswa mu-muriro gunu gutakusimá.”

Obhutaani bhwa omurume na omugasi

³¹ Yeesu ˆnaabhabhwira kweki ati, “Amakaamo agaaika ati, ‘Omurume akataana na mukaaye, amukaamire intaraaka.’

³² Nawe anye enibhabhwira ati, omuunu woonewoone unu kaataana na omugasi waaye, itari ati amugwatire ekiroogi, kaakora omugasi waaye uyo abhe mutaasi wa meega. Na omuunu unu kaamugabhura woone kaabha ˆnaataara ameega.”

Okurayira

³³ Yeesu ˆnaagenderera, ˆnaabhabhwira ati, “Mwoonguuywe kutyo abhaanu bha kara ꞉bhaabhwiriiywe ati, ‘Mwasiga okutamwa okukora amangʼana ganu ꞉mwarayiiye okukora mu-meeso ga Raatabhugenyi Nyamuwanga, tari mugakore goone kutyo.’

³⁴ Nawe anye enibhabhwira ati, mwasiga okurayira ku-kiinu kyonekyone, mwasiga okurayirira ku-rwire, kwa okubha orwire nikyo ekitebhe kya ekikama ekya Nyamuwanga.

³⁵ Na mwasiga okurayirira ku-kyaro, kwa okubha ku-kyaro nikwo Nyamuwanga atuuyega amaguru gaaye. Na mwasiga okurayirira ku-Yerusareemu, kwa okubha guyo nigwo omusi gwa Nyamuwanga, Omukama Omukuru.

³⁶ Mwasiga okurayirira ku-mitwe gyemwe, kwa okubha mutakutura okuyindura orufwiri na rumwi rubhe rweru amwi ati rwirafuru.

³⁷ Tari ekimari kyemwe kibhe ‘kimari,’ na rinu ritari kimari mwaike ati ‘itari kimari.’ Amangʼana ga okwongesha-ko goone kutyo, agasooka ku-Sitaani.”

Okuriya ekisiyomba

³⁸ Yeesu ˆnaagenderera okubhabhwira ati, “Mwoonguuywe amangʼana ganu agaaika ati, ‘Eriiso na eriiso, eriino na eriino.’

³⁹ Nawe anye enibhabhwira ati, mwasiga okuriya amabhiibhi ku-muunu unu abhakoreeye amabhiibhi. Tari, raabhe omuunu akakubhuma ku-kisaya ebhuryo, muyindurire abhume na ebhumosi.

⁴⁰ Na raabhe omuunu akusitaakiishe insonga akuteeshe insaadi yaawo, awe musigire agege na riikabhuuti.

⁴¹ Na raabhe omuunu kaakusingʼiirisha umwitwikire omujigo gwaye ugende nawe kiromiita yimwi, awe genda nawe kiromiita ebhiri.

⁴² Unu kaakusabha ekiinu, muyaane. Omuunu akaaja okurya riisiiri ku-awe, waasiga okumwima.”

Okwenda abhasoko

⁴³ ˆNaabhabhwira kweki ati, “Mwoonguuywe amangʼana ganu ꞉gaaikirwe ati, ‘Wende omwikashaanya waawo, nawe siga okwenda omusoko waawo.’

⁴⁴ Nawe anye enibhabhwira ati, mwende abhasoko bheemwe, bhanu abhabhanyansha mubhasabhire ku-Nyamuwanga.

⁴⁵ Mukakora kutyo, eyeeresha kimari ati muri bhaana bha Raata unu ari mu-rwire. Omwene niwe kaabhasisha abhakosi bha amajomu na abhakayi riisuubha. Kweki, kaagwisisha ingubha abharengeresi na bhanu bhatari bharengeresi.

⁴⁶ Mukeenda bhanu bhabheendere era, omunyoora muyeeroki ku-Nyamuwanga? Na abhatobhesha bha riigooti bhoone abheenda bhanu bhabheendere era.

⁴⁷ Na, raabhe omukeesha abhaanyu era, omubha mukora ejomuki okukira abhandi? Na abhaanu bhanu bhatakwikirisha Nyamuwanga, bhoone abhakeeshaanya abheene na abheene era.

⁴⁸ Mmbe, mubhe na ntungwa njomu rwa Esomwana wa mu-rwire kutyo ari.”