Mataayo 3 - Iimuuma Iinyaaya

Emirimu gwa Yowana Omubhatiisha

¹ Emyaka ngitura-wo myafu, ˆnaabha-wo omuunu wumwi unu ꞉aatogwaga ati Yowana Omubhatiisha. Yowana uyo ꞉aariga ˆnaaraasha arebhe mw-ibhara rya Ebhuyawudi eyo. ꞉Aariga ˆnaaraasha ati,

² “Munuge ebhikayo bhyemwe muyindukire ku-Nyamuwanga, kwa okubha obhukama bhwa mu-rwire bhuri ayeeyi!”

³ Yowana niwe ꞉aaikirwe na omuragi Isaaya ati, “Omuunu kaamura obhuraka mw-ibhara ˆnaaika ati, ‘Muroosishe Raatabhugenyi injira, mwimye anu kaaja okutura.’ ”

⁴ Yowana ꞉aariga ˆnaafwara gingibho ginu giroosiibhwe na obhusinga bhwa gingamiya na ꞉aariga ˆneebhoya omuchipi mu-bhukende. Ebhyokurya bhyaye ꞉bhyariga bhiri ginsige na obhuuki.

⁵ Abhaanu mbasookereraga Yerusareemu, Ebhuyawudi na ebhyaro bhyone kutyo ebhya ku-ngego ya oruuji rwa Yorodaani, mbamuuja-ko

⁶ mbeegambaga ebhikayo bhyebhwe, ˆnaabhabhatiisha mu-ruuji rwa Yorodaani.

⁷ Nawe bhunu Yowana ꞉aarorere Abhafarisaayo na Abhasadukaayo bhaafu mbamuuja-ko insonga abhabhatiishe, ˆnaabhabhwira ati, “Orwibhuro rwa ebhisoro emwe! Ni kimari indamuro okusooka ku-Nyamuwanga iriija, niga abhabhwiriiye muyiikenge?

⁸ Ikabha kimari ati munugire ebhikayo bhyemwe, mmbe ebhikorwa bhyemwe bhisusane na okunuga kwemwe okwa ebhikayo.

⁹ Mwasiga okwiganiirisha mu-mitima gyemwe ati muryaabhirwa kwa okubha muri rwibhuro rwa Bhurayimu. Enibhabhwirira abhweru ati, Nyamuwanga kaatura okuyaana Bhurayimu abhaana okusooka ku-magina ganu!

¹⁰ Nyamuwanga aatuuye imbasa ku-masina ga amati, keenda arore amatwasho amajomu ku-mati kuyo, akarema okugarora-ko kaagatema ˆnaageesa mu-muriro!

¹¹ “Anye enibhabhatiisha mu-manji okweresha ati munugire ebhikayo. Nawe iinyuma waani ariija unu ari amanaga okunkira anye. Noone niteesire na okumugegera ebhikwirya bhyaye. Omwene aribhabhatiisha na Mwoyo Omutaakatiifu na omuriro.

¹² Agwatiriiye orungo rwaye, keenda okweyerera ekibhuga kya okuwurira obhuro. Obhuro obhujomu kaabhutuura mu-kitara kyaye, nawe inkuunyu ariyookya mu-muriro gunu gutakusimá.”

Yowana kaabhatiisha Yeesu

¹³ Mmbe, mw-ibhaga riyo, Yeesu ˆnaasooka Gariraaya, ˆnaagenda ku-Yowana ku-ruuji rwa Yorodaani, insonga abhatiisibhwe na Yowana.

¹⁴ Nawe Yowana ˆneenda okurema, ˆnaamubhwira ati, “Awe owuuja kutiki ku-anye? Ni anye niisire okubhatiisibhwa na awe.”

¹⁵ Yeesu ˆnaamusubhya ati, “Awe iikirisha era woori umbatiishe, kwa okubha nikwo kutyo ekyendwa kikore kutyo Nyamuwanga keenda.” Mmbe, Yowana ˆneekirisha, ˆnaamubhatiisha.

¹⁶ Mmbe, bhunu Yeesu ꞉eebhukire okusooka mu-manji, ayoayo orwire ndwiguka, Yeesu ˆnaarora Mwoyo Omutaakatiifu wa Nyamuwanga ˆnaamwikira ˆnaasusaga rwa inguuti.

¹⁷ Niwe obhuraka mbusooka mu-rwire mbwaika ati, “Unu ni Mwana waani omwende, niwe kaanjomisha.”