Mataayo 23 - Iimuuma Iinyaaya

Yeesu kaaikira Abhafarisaayo

¹ Mmbe, Yeesu ˆnaabhwira riisangi rya abhaanu na abheeyigira bhaaye ati,

² “Abheeyigisha bha ebhiraagiro bhya Musa na Abhafarisaayo nibho abhasomboosi bha ebhiraagiro bhya Musa mu-masunagoogi.

³ Woori, mugwate kujomu ganu abhabheeyigisha, na mukore goone kutyo rwa kutyo eyeendwa. Nawe mwasiga kukora ganu abheene abhakora, kwa okubha abheene abhaaika, nawe bhatakukora ganu abhaaika.

⁴ Abheene abhabhoya mijigo misito, mbatwikya abhaanu ku-mabhega, nawe abheene bhatakwenda na kugikuunʼya-ko okubhasakira.

⁵ Goone kutyo ganu abhakora, abhakora insonga bharorwe na abhaanu. Abheebhoya ku-bhisuusu na ku-mabhoko geebhwe ebhibhaara ebhigari ebhya orwayi okukira ebhya abhandi. Na abhoongesha ebhisumi bhya emwaro ebhya gingibho gyebhwe egya iimisa gibhe ndeera okukira egya abhandi.

⁶ Mu-nsikukuru, bheendere muno okwikara ku-bhitebhe bhya ekibharo. Na bheendere okwikara ku-bhitebhe bhya ekibharo mu-masunagoogi.

⁷ Kweki, bheendere muno okukeesibhwa mu-maguriro na abhaanu, mbabhirikirwaga ati, ‘Mwiyigisha.’

⁸ “Nawe emwe, mwasiga okwikirisha okubhirikirwa ati, ‘mwiyigisha,’ kwa okubha muri na Mwiyigisha wumwi era, emwe mwone kutyo muriingʼeene.

⁹ Na mwasiga okubhirikira omuunu woonewoone mu-kyaro anu ati, ‘raata,’ kwa okubha Esomwana ni wumwi era, owa mu-rwire.

¹⁰ Kweki, mwasiga okwikirisha okubhirikirwa ati, ‘mutangasha,’ kwa okubha Omutangasha weemwe ni wumwi era, ni Kiriisitu.

¹¹ Omuunu woonewoone unu aribha omukuru kw-imwe, niwe abhe omujuuma weemwe.

¹² Omuunu woonewoone akeegega, Nyamuwanga kaamutuura emwaro. Na omuunu akeetuura emwaro, Nyamuwanga kaamutuura iiguru.

¹³ “Garibhanyoora, emwe abheeyigisha bha ebhiraagiro bhya Musa, na Abhafarisaayo! Bhabheeyi emwe, kwa okubha omwigarira abhaanu bhasige okwingira mu-bhukama bhwa mu-rwire, emwe abheene mutakwingira, na bhanu abheenda okwingira omubhayinga. [

¹⁴ “Garibhanyoora, emwe abheeyigisha bha ebhiraagiro bhya Musa na Abhafarisaayo! Bhabheeyi emwe, kwa okubha omusabha Nyamuwanga nsaara ndeera insonga mwiyereshe ku-bhaanu, enu muteeshaga abhakimari ebhiinu bhyebhwe. Mmbe mumenye ati ku-rusuku rwa indamuro, Nyamuwanga aribhayaana bhirusho bhinene.]

¹⁵ “Garibhanyoora, emwe abheeyigisha bha ebhiraagiro bhya Musa na Abhafarisaayo! Bhabheeyi emwe, kwa okubha omwiyinda mu-nyanja na ku-kyaro, insonga mukongye omuunu wumwi unu atari Muyawudi eengire mu-diini yeemwe. Akamara okwingira, mumukora abhe muunu wa mu-muriro gunu gutakusimá kabhiri okubhakira emwe abheene.

¹⁶ “Garibhanyoora, emwe abhatangasha abhawofu, emwe bhanu omwaika ati, ‘Omuunu akarayirira kw-iyekaru rya Nyamuwanga, okurayira kuyo kutari kiinu. Tari omuunu akarayira ku-jaabhu inu isoosiibhwe okubha jaaka mw-iyekaru rya Nyamuwanga, omuunu uyo eyeendwa akore rwa kutyo arayiiye.’

¹⁷ Muri bhatengʼo, kweki muri bhawofu! Ekinene okukira ekindi ni kiiya, ni jaabhu inu isoosiibhwe okubha jaaka mw-iyekaru rya Nyamuwangaa, ni yekaru rya Nyamuwanga rinu eryesha iijaabhu?

¹⁸ Kweki omwiyigisha abhaanu ati, ‘Omuunu akarayirira kw-ishengero rya mw-iyekaru rya Nyamuwanga, okurayira kwaye kutari kiinu. Nawe akarayira ku-mugabho gunu guri kw-ishengero, muunu uyo eyeendwa akore rwa kutyo arayiiye.’

¹⁹ Abhawofu emwe! Ekinene ni kiiya, ni mugabhoo, ni ishengero rinu eryesha omugabho?

²⁰ Mmbe, omuunu akarayira kw-ishengero, kaabha arayiiye ku-ryene na ku-mugabho gunu guriko.

²¹ Na omuunu akarayira kw-iyekaru, kaabha arayiiye kw-iyekaru, na ku-Nyamuwanga unu eekaaye-mo.

²² Na omuunu akarayira ku-rwire, kaabha arayiiye ku-kitebhe kya ekikama kya Nyamuwanga, na ku-Nyamuwanga omwene unu eekaaye-ko.

²³ “Garibhanyoora, emwe abheeyigisha bha ebhiraagiro bhya Musa na Abhafarisaayo! Bhabheeyi emwe, kwa okubha omusoosisha Nyamuwanga na iijaaka ya ebhiinu ebhitooto rwa ebhirungo bhya ebhyokurya, na ebhinjaari. Nawe omusiga amangʼana amanene aga ebhiraagiro bhya Musa. Omusiga okukora obhurengeresi, okufwira abhaanu ekigongo, na obhwikirisha. Omwendwa mukore gayo goone kutyo, na agandi garya mwasiga okugasiga.

²⁴ Muri bhatangasha abhawofu, kwa okubha omufubhura gimbu, enu mumira gingamiya!

²⁵ “Garibhanyoora, emwe abheeyigisha bha ebhiraagiro bhya Musa na Abhafarisaayo. Bhabheeyi emwe, kwa okubha omwosha anja wa ekikombe na orutubha, nawe omusiga okwosha bhinu bhirimo, bhinu munyoorere okuturira obhwifi, na okurema okwiyiinya kwemwe.

²⁶ Emwe Abhafarisaayo muri bhawofu! Mwoshe okwamba mu-kikombe insonga iiguru ku-kikombe woone eere.

²⁷ “Garibhanyoora, emwe abheeyigisha bha ebhiraagiro bhya Musa na Abhafarisaayo! Bhabheeyi emwe, kwa okubha muri rwa gimbiiyira ginu giyakirwe inchokaa. Iiguru ku-mbiiyira gijomere, nawe munsi giijuuye amawa ga abhafuuye na obhukoote bhwa mbaga nyafu.

²⁸ Emwe mwone nikwo kutyo muri, ku-kuringira, abhaanu abhabharora ati muri bharengeresi ku-Nyamuwanga, nawe ekimari ni ati mu-mitima gyemwe muri bhabheeyi, na muri bhajeemi.”

Yeesu kaakira abheeyigira bhaaye okunyansibhwa

²⁹ “Garibhanyoora, emwe abheeyigisha bha ebhiraagiro bhya Musa na Abhafarisaayo! Bhabheeyi emwe, kwa okubha omuumbaka gimbiiyira gya abharagi bha Nyamuwanga, omuroosha kujomu gimbiiyira gya abhaanu abhandi bhanu ꞉bhaariga bhari bharengeresi ku-Nyamuwanga.

³⁰ Omwaika ati, ‘Eswe ꞉kyakabheeye-wo ku-kabhaga ka bhaajaaji, kitakayimbeene nabho okwita abharagi bha Nyamuwanga.’

³¹ Okwaika kutyo era omweresha ati muri bheechukuru bha abhakaruka bhanu ꞉bheetire abharagi bha Nyamuwanga!

³² Mmbe woori, mukuumishe ganu bhaajaaji bheemwe ꞉bhaambisiishe!

³³ Emwe muri bhisoro, orwibhuro rwa ebhisoro! Omuuja okwiruka kutiki indamuro ya mu-muriro gunu gutakusimá?

Nyamuwanga ariramurira Abhaijirayeeri

³⁴ “Ku-nsonga iyo, mwitegeereshe, eniija okubhareetera abharagi, abhaanu abheenge, na abhaanu bha okubheeyigisha. Abhandi muribheeta, mubhasunga ku-musarabha. Abhandi muribhabhuma ebhibhooko mu-masunagoogi geemwe, abhandi muribhaseetaga mu-misi gyone kutyo mubhanyanshe.

³⁵ Nyamuwanga aribharamurira emwe na bhaajaaji waanyu, ku-nsonga ya obhwiti bhwa abharengeresi. Obhwiti bhuyo ꞉bhwakorerwe okwambira ku-kabhaga kanu Kaayini ꞉aakomeeye Abheeri, enu Abheeri atakayire kikayo kyonekyone, okuyikira bhunu Jaakariya omumura wa Bharakiya ꞉aakomeeywe mw-iyekaru, agati wa riishengero na orubhaara orweru orwa Nyamuwanga.

³⁶ Kimari enibhabhwira ati, Nyamuwanga kaaja okuramurira abhaanu bha orwibhuro runu ku-nsonga ya ebhikayo bhiyo bhyone kutyo.”

Yeesu kaasurumbarira Yerusareemu

³⁷ Niwe Yeesu ˆnaaika ati, “Awe Yerusareemu, Yerusareemu! Awe owiita abharagi, na abhaanu abhandi bhaakatumwa ku-awe, owubhabhuma na amagina. Neendere kaafu okukumanya amwi abhaana bhaawo, rwa iingʼoko kutyo eyikumanya ebhijuuju bhyayo mu-mabhabha, nawe emwe mutakwenda!

³⁸ Woori, omusi gwemwe oguuja okusigara etongo.

³⁹ Enibhabhwira ekimari ati mutakyandora kweki, okuyikira anu muryaika ati, ‘Ayaaywe giinonkwe unu kaaja kw-isiina rya Raatabhugenyi!’”