Mataayo 22 - Iimuuma Iinyaaya

Ekirengekanyo kya obhwenga

¹ Yeesu ˆnaagenderera okubhwira Abhafarisaayo na abhashengesi abhakuru ekirengekanyo ekindi ati,

² “Obhukama bhwa mu-rwire obhurengekanyibhwa na omukama unu ꞉aakoreeye omumura waaye obhwenga.

³ Omukama uyo ˆnaatuma abhagaya bhaaye bhagende okubhirikira bhanu ꞉aariga araarikire okuuja mu-bhwenga, nawe bhoone kutyo mbarema okuuja.

⁴ “Niwe ˆnaatuma abhagaya abhandi, ˆnaabhabhwira ati, ‘Mugende mubhwire abhaanu bhanu ꞉naaraarikire ati, ebhiinu bhyone kutyo ebhya obhwenga bhyabheeye-wo, neetire ingeeni yaani, na giimoori egindi giinure. Mmbe woori, muuje mu-bhwenga!’

⁵ Nawe abhaanu bhanu ꞉bhaariga bharaarikirwe, ꞉bhateeganire. Mbagenda ku-mirimu gyebhwe, owumwi ˆnaagenda mw-isambu ryaye, owundi ˆnaagenda ku-bhusuruji bhwaye.

⁶ Abhandi mbagwata abhagaya bha omukama uyo, mbabhabhuma muno mbabheeta.

⁷ Omukama urya ꞉eejire oongwa ganu abhagaya bhaaye ꞉bhaakoreeywe, ˆnaabhiiyirwa muno. ˆNaatuma abhasirikare bhaaye mbagenda mbeeta abheeti bharya, mbookya na omusi gwebhwe.

⁸ “Niwe omukama uyo ˆnaabhwira abhagaya bhaaye ati, ‘Ebhiinu bhyone kutyo ebhya obhwenga bhyamarire okubha-wo, nawe bhanu bharaarikirwe, bhaabhateesire kuuja.

⁹ Mmbe woori, mugende ku-njira ya amakaaka, abhaanu bhoone kutyo bhanu muranyookane nabho eyo, mubhabhwire bhaaje mu-bhwenga.’

¹⁰ Abhagaya bhayo mbagenda ku-njira ya amakaaka, mbakumanya abhaanu bhoone kutyo bhanu ꞉bhaanyookeene nabho, abhakayi na abharengeresi. Niwe abhagenyi mbeejura mu-bhwenga.

¹¹ “Nawe bhunu omukama omwene ꞉eejire okurora abhagenyi, ˆnaarora-mo omuunu wumwi unu ꞉aariga atafwaye gingibho gya mu-bhwenga.

¹² Kimwi ˆnaamubhuusha ati, ‘Musaani, weengira kutiki munu, enu utafwaye ngibho gya mu-bhwenga?’ Omuunu uyo ˆnaabhurwa erya okusubhya.

¹³ Mmbe, omukama ˆnaabhwira abhagaya bhaaye ati, ‘Mubhoye omuunu unu amaguru na amabhoko mumwese anja eyo, mu-kisuute. Eyo niyo abhaanu bharirira kutyo bhakumye.’”

¹⁴ Okumariisha, Yeesu ˆnaaika ati, “Abhaanu bhanu bhabhirikiiywe ni bhaafu, nawe abhasorwa ni bhatooto era.”

Riibhuusho rya okuteganya Yeesu

¹⁵ Mmbe, Abhafarisaayo mbagenda okwaikana kutyo bharaateganye Yeesu ku-mangʼana gaaye.

¹⁶ Niwe mbatuma abheeyigira bheebhwe na abhasakisi bha omukama Yerode Antipa. Mbabhuusha Yeesu ati, “Ee Mwiyigisha, kimenyere ati awe uri muunu wa ekimari, na owiiyigisha amangʼana ga Nyamuwanga ku-kimari kyago. Kimenyere ati awe utakuubhaya muunu woonewoone, raabhé akabha na kibharo kinene.

¹⁷ Mmbe woori nuukibhwire, awe owurora kutiki? Ebhiraagiro bhya Musa, ebhikiikirisisha okuriya riigooti ku-Kayijaari, amwi ati wuri?”

¹⁸ Nawe Yeesu ˆnaamenya obhwiganiirisha bhwebhwe obhubhiibhi, ˆnaabhasubhya ati, “Emwe bhanu omwaika ganu mutakukora, kubhaki omwenda okunteganya?

¹⁹ Munyereshe iiyera inu omuriya riigooti.” Bhoone mbamuyaana dinaari yimwi.

²⁰ Niwe Yeesu ˆnaabhabhuusha ati, “Orususo runu na riisiina rinu rikaamirwe ku-dinaari inu, ni bhyaga?”

²¹ Abheene mbamusubhya ati, “Ni bhya Kayijaari.” Yeesu ˆnaabhabhwira ati, “Mmbe, ebhya Kayijaari, muyaane Kayijaari. Na ebhya Nyamuwanga, muyaane Nyamuwanga.”

²² Bhunu ꞉bhoonguuywe riisubhyo ryaye, mbaruguura muno. Mmbe, mbamusiga, mbagenda.

Amakaamo Amataakatiifu ageekirisha ati obhusuuki bhwa abhaanu bhuriwo

²³ Orusuku ruyoruyo, Abhasadukaayo mbaaja ku-Yeesu. Abhasadukaayo abheeyigisha ati abhafuuye bhatakutura okusuuka kajaanende. Abhasadukaayo bhayo, mbabhuusha Yeesu ati,

²⁴ “Ee Mwiyigisha, Musa ꞉aakibhwiriiye mu-bhiraagiro bhyaye ati, raabhe omuunu akafwa ˆnaasiga mukaaye ateebhuuye nawe omwana na wumwi, omumura waabho agabhe omugasi uyo, insonga ayambaasishe omufu waabho omusi.

²⁵ Mmbe woori, ꞉bhaariga bhariwo bhamura mungati bhasookere nda yimwi. Owa okwamba ˆnaagabhura omugasi, ˆnaafwa akyari kwibhura nawe. Omumura waabho owa akabhiri ˆnaagabha omugasi uyo.

²⁶ Omumura uyo woone, ˆnaafwa akyari kwibhura nawe. Niibha kutyokutyo ku-bhamura mungati bhoone kutyo, ꞉bhaafuuye bhateebhuuye na omugasi uyo.

²⁷ Ku-bhuteero, omugasi uyo woone ˆnaafwa.

²⁸ Woori nuukibhwire, raabhe obhusuuki bhuriwo, omugasi uyo aribha mugasi waaga? Bhoone kutyo mungati ꞉bhaamugabhuuye!”

²⁹ Yeesu ˆnaabhasubhya ati, “Emwe omubhura, kwa okubha mutakumenya ganu gakaamirwe mu-Makaamo Amataakatiifu, na mutakumenya obhuturo bhwa Nyamuwanga kutyo bhuri.

³⁰ Bhunu abhaanu bharisuuka, bhatarigabhura amwi ati kugabhurwa. Abhaanu bharibha rwa bhaamaraayika bha Nyamuwanga kutyo bhari mu-rwire, abheene bhatakugabhura amwi ati okugabhurwa.

³¹ Nawe iiguru ya okubha-wo obhusuuki bhwa abhafuuye, mukyariga okusoma mu-Makaamo Amataakatiifu kutyo Nyamuwanga ꞉aabhabhwiriiye? ꞉Aaikire ati,

³² ‘Anye niri Nyamuwanga wa Bhurayimu, Isaaka na Yakobho.’” Yeesu ˆnaagenderera okwaika ati, “Nyamuwanga atari Nyamuwanga wa abhafuuye, tari weeki ni wa bhanu abheesha omwoyo!”

³³ Bhunu riisangi rya abhaanu ꞉ryoonguuywe gayo, mbaruguurira muno ameeyigisho gaaye.

Ekiraagiro ekinene okukira bhyone kutyo

³⁴ Abhafarisaayo ꞉bheejire bhoongwa ati Yeesu ꞉aariga ajibhisiishe Abhasadukaayo ku-masubhyo gaaye, bhoone mbeekumanya amwi.

³⁵ Mbagenda ku-Yeesu, na owumwi weebhwe, unu ꞉aariga ari mwiyigisha wa ebhiraagiro bhya Musa, ˆnaasaka okuteganya Yeesu, ˆnaamubhuusha ati,

³⁶ “Mwiyigisha, angu ekiraagiro ekinene okukira ebhiraagiro ebhindi bhyone kutyo ebhya Nyamuwanga ni kiiya?”

³⁷ Yeesu ˆnaamusubhya ati, “‘Yeenda Raatabhugenyi Nyamuwanga waawo ku-mutima gwawo gwone kutyo, ku-mwoyo gwawo gwone kutyo, na ku-bhwiganiirisha bhwawo bhwone kutyo.’

³⁸ Ekiraagiro kinu nikyo ekinene okukira ebhiraagiro ebhindi bhyone kutyo, na nikyo ekya okwamba.

³⁹ Ekiraagiro kya akabhiri ekisusana na kiyo, kyone ekyaika ati, ‘Wende omwikashaanya waawo, rwa kutyo owiiyenda omwene.’

⁴⁰ Ebhiraagiro bhyone kutyo ebhya Musa, na ameeyigisho ga abharagi, gabhoyerwe mu-bhiraagiro ebhibhiri bhiyo.”

Yeesu ni muyiiri Dawudi na niwe Raatabhugenyi

⁴¹ Bhunu Abhafarisaayo bhayo ꞉bhaariga bheekumanyiishe ayo, Yeesu ˆnaabhabhuusha ati, “Omwaikira kutiki Kiriisitu?

⁴² Kaasookerera rugandaki?” Mbamusubhya ati, “Mu-ruganda rwa omukama Dawudi.”

⁴³ Yeesu ˆnaabhabhuusha ati, “Raabhe ni kutyo, kubhaki Dawudi bhunu ꞉aatangasibhwaga na Mwoyo Omutaakatiifu wa Nyamuwanga, ꞉aabhirikiiye Kiriisitu ati esebhugenyi? ꞉Aaikire ati,

⁴⁴ ‘Raatabhugenyi Nyamuwanga ꞉aabhwiriiye Raatabhugenyi waani, iikara orubhaara rwani orwa ebhuryo, okuyikira anu nikatuure abhasoko bhaawo emwaro, awe ubhatunge.’

⁴⁵ “Raabhe Dawudi kaabhirikira Kiriisitu ati, ‘Raatabhugenyi,’ Kiriisitu kaatura kutiki kweki okubha muyiiri Dawudi?”

⁴⁶ ꞉Ataabheeye-wo omuunu unu ꞉aaturire okumusubhya engʼana ryoneryone. Okwambira ayo, ꞉ataabheeye-wo muunu unu ꞉aasakire okubhuusha Yeesu engʼana ryoneryone.