Mataayo 18 - Iimuuma Iinyaaya

Omukuru mu-bhukama bhwa mu-rwire

¹ Okumara gayo, abheeyigira bha Yeesu mbamugenda-ko, mbamubhuusha ati,

² “Angu ni wuuya omukuru okukira abhandi bhoone kutyo mu-bhukama bhwa mu-rwire?” Yeesu ˆnaabhirikira omwana omutooto, ˆnaamuyambaasha agati weebhwe.

³ ˆNaabhabhwira ati, “Kimari enibhabhwira ati, raabhe mutakuyindura emitima gyemwe mubhe rwa abhaana abhatooto, mutariingira mu-bhukama bhwa mu-rwire.

⁴ Mmbe, omuunu woonewoone unu keetuura emwaro rwa omwana omutooto unu, uyo niwe omukuru mu-bhukama bhwa mu-rwire.

⁵ Kweki, omuunu akaramira omwana omutooto rwa unu kw-isiina ryani, kaabha andamiiye anye.”

Yeesu kaagonya bhanu abhayabhya abheejaabho

⁶ “Nawe omuunu woonewoone akayabhya owumwi mu-bhatooto bhanu, bhanu abhanyiikirisha, nyakara omuunu uyo abhoyerwe orubhuyi mu-bhikya bhamusikye ebhusibha.

⁷ Garibhanyoora emwe abhaanu bha mu-kyaro kinu, kwa okubha amangʼana ganu agayabhya abhaanu, garibha-wo! Nawe garimunyoora omuunu unu arigareeta!

⁸ Raabhe okubhoko kwawo amwi ati okuguru kwawo kukakuyabhya, kubhuture ukwese eyo. Nyakara wingire mu-bhurame bhunu bhutakuweera utari na kuguru amwi kubhoko, kukira okubha na amabhoko gabhiri amwi ati maguru gabhiri goone kutyo, kimwi nuweeswa mu-muriro gunu gutakusimá.

⁹ Raabhe eriiso ryawo erikukora uyabhe, urisooshe-mo uryese eyo! Nyakara wingire mu-bhurame bhunu bhutakuweera uri na insongo, okukira okubha na ameeso goone kutyo, nawe nuweeswa mu-muriro gunu gutakusimá.”

Ekirengekanyo kya iingʼondi inu ꞉yaabhurire

¹⁰ Yeesu ˆnaagenderera okubhabhwira ati, “Mwangarire, mwasiga okujeera owumwi ku-bhatooto bhanu! Enibhabhwira kutyo, kwa okubha bhaamaraayika bheebhwe mu-rwire eyo, kabhaga koone kutyo bhari mu-meeso ga Raata wa mu-rwire. [

¹¹ Omwana wa Adaamu, eejire mu-kyaro anu okwerusha abhaanu bhanu bhabhurire.]

¹² Angu emwe omurora kutiki? Raabhe omuunu ari na ngʼondi egana, eyimwi niibhura-ko, kaakora kutiki? Angu atakusiga giingʼondi makumi kenda na kenda (99) mu-bhiima, ˆnaagenda okwagara eyimwi inu yaabhura?

¹³ Kimari enibhabhwira, akayinyoora, kaayijomererwa muno, okukira giingʼondi makumi kenda na kenda ginu gyagitabhurire.

¹⁴ Nikwo kutyo, Esomwana unu ari mu-rwire, atakwenda na wumwi ku-bhatooto bhanu abhure.”

Okugonya unu abhurire

¹⁵ “Raabhe oweejaanyu akakukayira, genda okwamba uri omwene era okumubhwira kutyo akukayiiye. Akakwitegeeresha umenye ati waanyoora kweki oweejaanyu.

¹⁶ Nawe akarema, genda na omuunu owundi wumwi amwi ati bhabhiri, obhwaiki bhwa abhaanu bhabhiri amwi ati bhasatu bhanu bharorere, iingʼana iyo eyibha iri ya kimari.

¹⁷ Akarema okwitegeeresha na bhayo, genda ubhwire riikanisa. Raabhe akarema okwitegeeresha na riikanisa, ku-awe abhe rwa omuunu unu atakwikirisha Nyamuwanga, amwi ati mutobhesha wa riigooti.

¹⁸ “Naabhabhwira ekimari ati, amangʼana goonegoone ganu muriigarira mu-kyaro anu, Nyamuwanga woone kaabha ageegariiye okusooka mu-rwire eyo. Na ganu muriigurira mu-kyaro anu, Nyamuwanga woone kaabha ageeguriiye okusooka mu-rwire eyo.

¹⁹ Enibhabhwira kweki ati, mukeekirishaanya abhabhiri kw-ingʼana ryoneryone rinu omusabha mu-kyaro anu, omukorerwa riingʼana riyo na Raata unu ari mu-rwire.

²⁰ Anu bheekumanyiishe abhaanu bhabhe bhabhiri amwi ati bhasatu ku-nsonga ya riisiina ryani, anye noone enibha niriwo amwi nabho.”

Ekirengekanyo kya omuunu unu atakwabhira

²¹ Niwe Peetero ˆnaaja ku-Yeesu, ˆnaamubhuusha ati, “Ee Raatabhugenyi, raabhe oweejaasu akankayira, eneendwa nimwabhire karinga? Nimwabhire okuyikira mara mungati?”

²² Yeesu ˆnaamusubhya ati, “Itari mara mungati era, eyeendwa umwabhire, utakubhara ati waamwabhiiye karinga.

²³ “Enibhabhwira kutyo, kwa okubha obhukama bhwa mu-rwire obhurengekanyibhwa na omukama wumwi unu ꞉eendere okubhara giiyera gyaye ginu ꞉aariga ˆnaatonga abhagaya bhaaye.

²⁴ Bhunu omukama ꞉aambire okubhara, ˆnaareeterwa omugaya unu ꞉aariga ˆnaatongwa yera nyafu muno, obhukumi bhwagyo taranta bhiwumbi ekumi.

²⁵ Omugaya uyo ꞉ataaturire okuriya riisiiri riyo. Niwe omukama ˆnaaragirira ati bhagushe omugaya uyo omwene, mukaaye, abhaana bhaaye, na ebhiinu bhyone kutyo bhinu ꞉aariga ari nabhyo, insonga ariywe riisiiri ryaye.

²⁶ “Mmbe, omugaya uyo ˆneefukamira omukama, ˆnaamwisaasaama ati, ‘Enisabha undindirire-wo, nirikuriya riisiiri rinu owuntoga ryone kutyo!’

²⁷ Niwe, omukama uyo ˆnaamufwira ekigongo, ˆnaamwabhira riisiiri ryaye ryone kutyo, ˆnaamusiga asubhe ewaaye.

²⁸ “Bhunu omugaya uyo ꞉aasookere ayo, ˆnaanyookana na omugaya weejaabho unu ꞉aariga ˆnaamutonga dinaari egana rimwi era. ˆNaamugwata ˆnaamunyiga mu-bhyika, ˆnaamubhwira ati, ‘Ndiya riisiiri ryani ryone kutyo rinu enikutonga.’

²⁹ Omugaya weejaabho ˆnaamwifukamira, ˆnaamwisaasaama ati, ‘Enisabha undindirire-wo, nirikuriya riisiiri rinu owuntoga!’

³⁰ Weeki ˆnaarema, ˆnaamusira mu-jeera abhoywe okuyikira anu aririyira riisiiri ryaye.

³¹ “Abhagaya bheejaabho ꞉bheejire bhaarora amangʼana gayo, ngabharuma muno. Niwe mbagenda ku-mukama weebhwe mbamutondera amangʼana gayo, kutyo ꞉gaabheeye.

³² Niwe omukama ˆnaabhirikira omugaya wa okwamba wurya, ˆnaamubhwira ati, ‘Awe uri mugaya mubhiibhi muno! Bhunu ꞉waanyiisaasaamire ati nikwabhire riisiiri ryawo, anye ꞉naakwabhiiye ryone kutyo!

³³ Woori, awe woone oweendwa ufwire ekigongo omugaya weejaanyu, rwa kutyo anye ꞉naakufwiriiye ekigongo.’

³⁴ “Mmbe, omukama ˆnaabhiiyirwa muno, ˆnaaragirira abhasirikare bhaaye ati bhamugwate, na bhamutuure mu-jeera, bhamuyaane ebhirusho, okuyikira anu aririyira riisiiri ryone kutyo.”

³⁵ Niwe Yeesu ˆnaabhabhwira ati, “Nikwo kutyo Raata unu ari mu-rwire, kaaja okubhakorera emwe mwone, mukarema okwabhira abheejaanyu mu-mitima gyemwe gyone kutyo.”