Mataayo 17 - Iimuuma Iinyaaya

Yeesu kaayinduka obhusu

¹ Bhunu ꞉gyaturire nsiku sansabha, Yeesu ˆnaagega Peetero, Yakobho na Yowana omumura waabho Yakobho. ˆNaariinya nabho ku-kiima ekireera, enu abhaanu bhatari.

² Bhakyari ku-kiima eyo, Yeesu ˆnaayinduka, ˆnaangʼarabhya. Obhusu bhwaye mbungʼarabhya rwa riisuubha na gingibho gyaye ngibha nyeru pee.

³ Mbataka era mbarora Musa na Eriya mbaromaga na Yeesu.

⁴ Niwe Peetero ˆnaabhwira Yeesu ati, “Ee Raatabhugenyi, ni kujomu ati kiri anu. Raabhe owiikirisha, numbake anu bhiwuuna bhitooto bhisatu. Ekimwi kibhe kyawo, ekindi kibhe kya Musa, na ekindi kibhe kya Eriya.”

⁵ Bhunu Peetero ꞉aariga akyaroma, ku-rwire ndibha-wo eriire ryeru ndibhasibhiirisha ndibhatuura agati. Kimwi mboongwa obhuraka mbusooka mu-riire riyo mbwaika ati, “Unu ni Mwana waani omwende, niwe kaanjomisha. Mumwitegeereshe!”

⁶ Abheeyigira bhaaye ꞉bheejire bhoongwa kutyo, mboobhaya muno, mbeefumbika ansi.

⁷ Yeesu ˆnaabhafugerera, ˆnaabhakuunʼya-ko, ˆnaabhabhwira ati, “Mwimuke, musige okuubhaya!”

⁸ Anu ꞉bheemusiishe emitwe gyebhwe, mbarora Yeesu aasigaaye omwene.

⁹ Bhunu ꞉bheekaga okusooka ku-kiima kiyo, Yeesu ˆnaabhagaanya ati, “Mwasiga okubhwira muunu woonewoone ganu mwarora okuyikira anu Omwana wa Adaamu, aribha asuukire okusooka mu-bhafuuye.”

¹⁰ Abheeyigira bhayo mbamubhuusha ati, “Kubhaki abheeyigisha bha ebhiraagiro bhya Musa abhaaika ati, Nyamuwanga keenda Eriya aaje okwamba, Kiriisitu akyari kuuja?”

¹¹ Yeesu ˆnaabhasubhya ati, “Nikwo kutyo iri, Eriya niwe kaaja okwamba insonga arooshe kujomu amangʼana goone kutyo.

¹² Nawe enibhabhwira ati, Eriya aramarire okuuja, nawe abhaanu ꞉bhataamumenyere, mbamukorera amabhiibhi kutyo ꞉bheendaga. Nikwo kutyo Omwana wa Adaamu woone, bharimunyansha.”

¹³ Niwe abheeyigira bhaaye mbamenya ati Yeesu ꞉aariga ˆnaaikira Yowana Omubhatiisha.

Yeesu kaawosha omwana ekitwe

¹⁴ Bhunu ꞉bhaasubhaga, mbayika anu riisangi rya abhaanu ꞉ryariga riri, muunu wumwi ˆnaaja ku-Yeesu, ˆnaamwifukamira ˆnaamubhwira ati,

¹⁵ “Ee Raatabhugenyi, enisabha ufwire-ko ekigongo omumura waani unu! Kaagwa ekitwe, obhurwaye bhuyo obhumunyansha muno. Akaafu kaagwa mu-muriro, nsiku egindi mu-manji.

¹⁶ ꞉Naamusirire ku-bheeyigira bhaawo insonga bhamuwoshe, nawe, ꞉bhaataamiibhwe.”

¹⁷ Yeesu ˆnaabhabhwira ati, “Emwe orwibhuro runu rutari na bhwikirisha, bhanu muyabhire mu-mitima gyemwe, niriikara na emwe okuyikira rusukuki? Niribharindirira kuyikira rusukuki? Mureete omwana uyo anu!”

¹⁸ Mbamusira, Yeesu ˆnaasiiga ekiwi kiyo kimusooke-mo, kyone nkimusooka-mo. Ayoayo, omwana uyo ˆnaawora.

¹⁹ Kimwi abheeyigira bhaaye mbamuuja-ko, bhari abheene era na Yeesu, mbamubhuusha ati, “Kubhaki eswe kyataamibhwa okubhirimya ekiwi kirya?”

²⁰ Weeki ˆnaabhasubhya ati, “Obhwikirisha bhwemwe ni bhusuwu, kyakora mwataamibhwa. Enibhabhwira ekimari ati, mukabheeye muri na bhwikirisha bhutooto rwa akabhibho ka iiyaradaari, mukaturire okubhwira ekiima kinu ati, ‘Sooka anu, ugende erya,’ ekiima kyone kikasookere-wo. Ritaakabheeye-wo engʼana ryoneryone ekomeeye kw-imwe. [

²¹ Amwi na gayo, ekiwi rwa kiyo mutakutura kukibhirimya mutasabhire ku-Nyamuwanga na okwiyima ebhyokurya.]”

Yeesu kaaikira orwa akabhiri okufwa na okusuuka kwaye

²² Bhunu Yeesu ꞉aariga ari Gariraaya na abheeyigira bhaaye ˆnaabhabhwira ati, “Omwana wa Adaamu kaaja okugurwa, ˆnaatuurwa mu-mabhoko aga abhaanu, mbamwita. Nawe orusuku rwa akasatu, Nyamuwanga kaaja okumusuura.”

²³ Abheeyigira bhaaye ꞉bheejire bhoongwa kutyo, mbasurumbara muno.

Yeesu kaariya riigooti rya riiyekaru

²⁴ Bhunu Yeesu na abheeyigira bhaaye ꞉bhaayikire Kaperinawumu, abhaanu abharebhe bhanu ꞉bhaariga mbatobhesha riigooti ku-nsonga ya riiyekaru rya Nyamuwanga, mbaaja ku-Peetero. Mbamubhuusha ati, “Angu, omwiyigisha weemwe woone kaatobha riigooti rya riiyekaru rya Nyamuwanga?”

²⁵ Peetero ˆnaabhasubhya ati, “Yee, kaatobha.” Bhunu Peetero ꞉eengiiye mu-nyumba, akyari kuroma engʼana ryoneryone, Yeesu ˆnaamubhuusha ati, “Simooni awe, ku-bhwawo awe owurora kutiki? Abhakama bha mu-kyaro kinu abhatobhesha riigooti ku-bhaana bheebhwee ku-bhandi?”

²⁶ Peetero ˆnaamusubhya ati, “Abhatobhesha ku-bhandi.” Yeesu ˆnaamubhwira ati, “Raabhe nikwo kutyo gari, mmbe abhaana bheebhwe bhatakutobha egooti.

²⁷ Nawe kyasiga kujimya abhaanu bhanu, awe genda ku-mwaro, urobhe. Inswi inu ireekome okwamba uyaasamye, owuuja okurora iiyera iri mu-kanwa waayo. Uyigege-mo ugende uriye riigooti, eryani na eryawo.”