Mataayo 16 - Iimuuma Iinyaaya

Yeesu keendwa akore ebhigwa

¹ Niwe Abhafarisaayo na Abhasadukaayo mbaaja ku-Yeesu okumusakya. Mbamusabha akore ekimenyegesho niwe bhamenye ati asookere ku-Nyamuwanga.

² Yeesu ˆnaabhasubhya ati, [“Keegoro ikayika omuringira emiyaga mwaika ati, ‘Emiyaga gya katondo ni mijomu kwa okubha orwire ni rukangaaru.’

³ Nikwo kutyo na mu-ruguru omwaika ati, ‘Reero ingubha eyigwa nyafu kwa okubha ameere geerabhusiishe ku-rwire.’ Bhabheeyi emwe, ndora mumenyere okumenyegesha ebhya ku-rwire, nawe mutakutura okumenyegesha aga mw-ibhaga rinu?]

⁴ Orwibhuro rwa abhakosi bha amabhiibhi, na rutari rwitongeeye mu-meeso ga Nyamuwanga, nsiku gyone kutyo abheenda ekimenyegesho. Nitakubheeresha kimenyegesho kyonekyone. Nawe abhaaja okurora ekimenyegesho kimwi era, rwa kinu Nyamuwanga ꞉aakorere ku-muragi Yoona.” Niwe Yeesu ˆneemuka ˆnaabhasiga ayo.

Insaangʼarasha ya Abhafarisaayo na Abhasadukaayo

⁵ Mmbe, abheeyigira bha Yeesu mbaambuka omwaro, nawe ꞉bhaariga bharabhiiywe okugega emikaate.

⁶ Yeesu ˆnaabhabhwira ati, “Mwiyangarire na insaangʼarasha ya Abhafarisaayo na Abhasadukaayo.”

⁷ Abheeyigira bhaaye mbaamba okwaikana abheene na abheene ati, “Kaaika kutyo, kwa okubha kitaagega mikaate.”

⁸ Yeesu ˆnaamenya ganu ꞉bhaariga mbaaikana, ˆnaabhabhwira ati, “Emwe abha obhwikirisha obhutooto! Kubhaki omwaikana emwe abheene na abheene ati mutari na mikaate?

⁹ Mukyari okumenya na woori? Mutakuyiita kutyo abhaanu bhiwumbi bhitaanu ꞉bhaariiye mikaate etaanu era mbeeguta? Mweejusiishe bhikapo bhiringa ebhya ebhisaaga?

¹⁰ Na mutakuyiita emikaate mungati girya ku-bhaanu bhiwumbi bhina? Mweejusiishe bhikapo bhiringa ebhya ebhisaaga?

¹¹ Eyibha kutiki ati mutakumenya ati nitakwaikira emikaate? Mmbe, anye kinu enaaikira ni emwe okwiyangarira na insaangʼarasha ya Abhafarisaayo na Abhasadukaayo.”

¹² Niwe, abheeyigira mbasombookerwa ati ꞉aariga atakwaikira insaangʼarasha ya okufimbya emikaate, tari ꞉aaikiraga ameeyigisho amabhiibhi aga Abhafarisaayo na Abhasadukaayo.

Peetero kaaika ati Yeesu niwe Kiriisitu

¹³ Bhunu Yeesu ꞉aayikire Kayijaariya-Firipi, ˆnaabhuusha abheeyigira bhaaye ati, “Angu abhaanu abhaaika ati Omwana wa Adaamu ni niga?”

¹⁴ Mbamusubhya ati, “Abhandi abhaaika ati ni awe Yowana Omubhatiisha, abhandi abhaaika ati ni awe omuragi Eriya, abhandi abhaaika owutura okubha uri Yeremiya, abhandi ati uri wumwi wa abharagi bha Nyamuwanga.”

¹⁵ Yeesu ˆnaabhabhuusha ati, “Woori emwe omwaika ati ni anye niga?”

¹⁶ Simooni Peetero ˆnaamusubhya ati, “Ni awe Kiriisitu, Omwana wa Nyamuwanga unu keesha omwoyo.”

¹⁷ Yeesu ˆnaabhwira Peetero ati, “Nyakara awe Simooni omumura wa Yoona, kwa okubha atariwo muunu unu aakutuurira abhweru ekimari kiyo, tari ni Raata wa mu-rwire.

¹⁸ Anye enikubhwira ati, awe, ni awe Peetero, na kw-itare kunu, nikwo niryumbaka riikanisa ryani, na amanaga ga orufu gataririyiga.

¹⁹ Anye eniija okukuyaana ginfunguro gya obhukama bhwa mu-rwire. Amangʼana goonegoone ganu uriigarira mu-kyaro anu, Nyamuwanga woone, kaabha ageegariiye okusooka mu-rwire. Na ganu uriigurira mu-kyaro anu, Nyamuwanga woone, kaabha ageeguriiye okusooka mu-rwire.”

²⁰ Yeesu ˆnaamara ˆnaagaanya abheeyigira bhaaye ati, bhaasiga okubhwira omuunu woonewoone ati omwene niwe Kiriisitu.

Yeesu kaaikira orwa okwamba okufwa na okusuuka kwaye

²¹ Okwambira akabhaga kayo, Yeesu ˆnaamba okubhwirira abheeyigira bhaaye abhweru ati, eyeendwa agende Yerusareemu, eyo niyo arinyansibhwa muno na abhakaruka bha Abhayawudi, abhashengesi abhakuru na abheeyigisha bha ebhiraagiro bhya Musa, bhakamara mbamwita, nawe orusuku rwa akasatu Nyamuwanga arimusuura.

²² Niwe, Peetero ˆnaagega Yeesu ku-mbarika, ˆnaamba okumugaanya ˆnaamubhwira ati, “Ee Raatabhugenyi, gayo gature areera gaasiga okukunyoora!”

²³ Nawe Yeesu ˆnaamwikebhuukira, ˆnaamubhwira ati, “Subha iinyuma Sitaani! Owuyinga nisige okukora ganu Nyamuwanga keenda! Awe utakwiganiirisha aga Nyamuwanga, tari obhwiganiirisha bhwawo ni bhwa abhaanu era.”

²⁴ Mmbe, Yeesu ˆnaabhwira abheeyigira bhaaye ati, “Omuunu woonewoone akeenda okubha mwiyigira waani, asige okwiyenda omwene eetwike omusarabha gwaye, anseete.

²⁵ Omuunu unu keenda okuwonʼya obhurame bhwaye omwene, aribhubhusha. Na omuunu akabhusha obhurame bhwaye ku-nsonga yaani, uyo niwe aribha nabhwo.

²⁶ Angu ogubha-wo muyeeroki omuunu akanyoora ebhiinu bhyone kutyo ebhya ku-kyaro kunu, akamara okubhinyoora kimwi omuunu uyo ˆnaafwa? Omuunu kaatura okusooshaki kiyambaarire obhurame bhwaye? Kitariwo kyonekyone!

²⁷ Omwana wa Adaamu, ariija amwi na bhaamaraayika bhaaye mu-bhugungyo bhwa esemwene. Ayo niwe aririya abhaanu wumwiwumwi okuriingʼaana na ebhikorwa bhyebhwe.

²⁸ Kimari enibhabhwira ati, mu-bhanu bhayambaaye anu, bhariwo abhandi bhanu bhatarifwa, bhatarorere Omwana wa Adaamu naaja ari ku-bhukama bhwaye.”