Mataayo 13 - Iimuuma Iinyaaya

Ekirengekanyo kya omubhibhi wa gimbibho

¹ Orusuku ruyoruyo, Yeesu ˆnaawuruka mu-nyumba iyo, ˆnaagenda ku-mwaro ˆneekara ku-murambo.

² Esangi enene erya abhaanu ndisangira anu Yeesu ꞉aariga ari. Yeesu okurora kutyo, ˆnaariinya mu-bhwato, ˆneekara, abhaanu mbasigara bhayambaaye ku-murambo.

³ Mmbe, Yeesu ˆnaabheeyigisha mangʼana maafu ku-bhirengekanyo, ˆnaaikaga ati, “Muunu wumwi ꞉aagendere mw-isambu ryaye okubhibha gimbibho.

⁴ Bhunu ꞉aabhibhaga, egindi ngigwa ku-njira, giinyonyi ngiija, ngigirya.

⁵ Gimbibho egindi ngigwa kw-itare anu atari na mayaru maafu. Gimbibho giyo ngimera bhwangu, kwa okubha amayaru gayo ꞉gaariga gari matooto era.

⁶ Nawe bhunu omuumwi ꞉gwabharire, ngiwotoka ngyuma, kwa okubha ꞉gyariga gitasirire emisi.

⁷ Gimbibho egindi ngigwa mu-mawa. Bhunu amawa gayo ꞉gaakurire, ngagiyiganya.

⁸ Gimbibho egindi ngigwa ku-mayaru amajomu. Bhunu ꞉gyakurire ngyamba okutwasha. Egindi ngitwasha matwasho egana rimwi, egindi ngitwasha makumi gasansabha, egindi ngitwasha makumi gasatu.

⁹ Unu ari na amatwi, noongwe!”

Insonga ya Yeesu okwiyigisha mu-bhirengekanyo

¹⁰ Abheeyigira bha Yeesu mbamugenda-ko mbamubhuusha ati, “Kubhaki ukaaika na abhaanu owaaikira ku-bhirengekanyo?”

¹¹ Yeesu ˆnaabhasubhya ati, “Emwe Nyamuwanga abhayaaye okumenya gimbisike gya obhukama bhwaye, nawe abheene bhatayaaywe.

¹² Omuunu woonewoone unu ari na ekiinu, aryongesibhwa. Nawe omuunu woonewoone unu atari na kiinu, na ekitooto kinu ari nakyo ariteesibhwa.

¹³ Tari abhandi enibhabhwirira ku-bhirengekanyo kwa okubha, ‘Raabhé bharaaringire bhaasiga kurora. Raabhé bharoongwe, bhaasiga okusombookerwa.’

¹⁴ Na gayo agakuumisha ganu omuragi Isaaya ꞉aaikire ati, ‘Okuungwa muryungwa, nawe mutarisombookerwa. Okuringira muriringira, nawe mutarirora.

¹⁵ Abhaanu bhanu bhakomeeye emitima, bhari na insibhiirira, bhawuunirisiishe ameeso. Itaakabheeye kutyo, bhakarorere na ameeso geebhwe, mboongwa na amatwi geebhwe, na okusombookerwa mu-mitima gyebhwe, kimwi mbayinduka, mbansubhira, insonga nibhawonʼye.’”

¹⁶ Niwe Yeesu ˆnaabhwira abheeyigira bhaaye ati, “Nawe nyakara emwe, kwa okubha ameeso geemwe agarora, na amatwi geemwe agoongwa.

¹⁷ Kimari enibhabhwira ati, kara eyo, bharagi bhaafu na abharengeresi abhandi bhaafu, ꞉bheegombere okurora amangʼana ganu emwe omurora, nawe ꞉bhataagarorere. Na ꞉bheegombere okuungwa ganu emwe omuungwa, nawe ꞉bhataagoonguuywe.”

Insonga ya ekirengekanyo kya omubhibhi wa gimbibho

¹⁸ “Mmbe woori, mwitegeereshe insonga ya ekirengekanyo kya omubhibhi wa gimbibho.

¹⁹ Omuunu woonewoone unu koongwa riingʼana rya obhukama bhwa Nyamuwanga, ˆnaarema okurisombookerwa, omuunu uyo kaarengekanyibhwa na gimbibho ginu ꞉gyaguuye ku-njira. Omukayi wurya ˆnaaja, ˆnaasaakura ganu Nyamuwanga kaabha ayambire mu-mutima gwa omuunu uyo.

²⁰ Gimbibho ginu ꞉gyaguuye kw-itare anu atari na mayaru maafu, egirengekanyibhwa na omuunu unu koongwa Riingʼana rya Nyamuwanga, ˆnaariramira ajomeeywe.

²¹ Nawe keekirisha riingʼana riyo ku-kabhaga kafuyi era, kwa okubha obhwikirisha bhwaye bhutasirire emisi. Akanyansibhwa ku-nsonga ya riingʼana riyo, kaasiga obhwikirisha.

²² Gimbibho ginu ꞉gyaguuye mu-mawa, egirengekanyibhwa na omuunu unu koongwa Riingʼana rya Nyamuwanga, nawe ˆnaajimibhwa na obhwiganiirisha iiguru ya obhurame na okwenda obhuniibhi. ˆNaataamibhwa okugenderera okukora engʼana ryoneryone ejomu.

²³ Nawe gimbibho ginu ꞉gyaguuye ku-mayaru amajomu, egirengekanyibhwa na omuunu unu koongwa Riingʼana rya Nyamuwanga ˆnaarisombookerwa. Uyo niwe kaatwasha, egana rimwi, makumi gasansabha ayandi makumi gasatu.”

Ekirengekanyo kya amanyansi mu-ngano

²⁴ Yeesu ˆnaabhabhwira ekirengekanyo ekindi ati, “Obhukama bhwa mu-rwire obhurengekanyibhwa na omuunu unu ꞉aayambire gimbibho ginjomu mw-isambu ryaye.

²⁵ Nawe bhunu abhaanu ꞉bhaawongeeye, omusoko weebhwe ˆnaaja, ˆnaayamba amanyansi mu-ngano, ˆnaamara ˆnaagenda.

²⁶ Bhunu ingano ꞉yaamerere, niyamba okutarika, amanyansi goone ngabha-mo.

²⁷ Abhagaya bha omwene esambu mbagenda kw-isebhugenyi, mbamubhuusha ati, ‘Ee raatabhugenyi, kimenyere ati ꞉waayambire mbibho njomu mw-isambu ryawo. Woori amanyansi ganu gasookereeye aaki?’

²⁸ Omwene ˆnaabhasubhya ati, ‘Omusoko niwe ꞉aagayambire.’ Abhagaya mbamubhuusha ati, ‘Kigende kiiye amanyansi gayo?’

²⁹ Omwene ˆnaabhasubhya ati, ‘Wuri, mwasiga okugeeya, kwa okubha mukageeya, omutura okwiyira-mo na ingano.

³⁰ Musige bhyone kutyo bhikurire amwi, bhiyikire okugeswa. Mw-igesa niwe niribhwira abhagesi bhakumanye okwamba amanyansi bhagabhoye mbagakumaga insonga bhagookye. Bhakamara okugookya, bhagese ingano bhayibhiike mu-kitara kyani.’”

Ekirengekanyo bha akabhibho akatooto

³¹ ˆNaamara ˆnaabhabhwira ekirengekanyo ekindi ati, “Obhukama bhwa mu-rwire obhususana na akabhibho ka iiyaradaari, kanu omuunu ꞉aagegere ˆnaakayamba mw-isambu ryaye.

³² Akabhibho kayo ni katooto muno okuriingʼaanya na gimbibho egindi gyone kutyo, nawe kakamera akakura nkakira ebhiimesha bhyone kutyo bhinu bhiri mw-isambu. Nkabha eti enene rinu giinyonyi egiija ngiikara ku-masagi gaaryo.”

Ekirengekanyo kya ekimera

³³ Niwe Yeesu ˆnaabhabhwira ekirengekanyo ekindi ati, “Obhukama bhwa mu-rwire obhususana na omugasi unu ꞉aasaasiishe ekimera mu-madebhe gasatu aga ginfu, kimwi ginfu gyone kutyo egya mu-madebhe muyo ngitundura.”

Kubhaki Yeesu kaaikira mu-bhirengekanyo

³⁴ Yeesu ꞉aariga ˆneeyigisha amasangi ga abhaanu amangʼana gayo goone kutyo, okuturira ku-bhirengekanyo. ꞉Ataabheeyigisiishe kyonekyone ataaikiiye mu-bhirengekanyo.

³⁵ ꞉Aakorere kutyo, insonga riingʼana rinu Nyamuwanga ꞉aaikire okuturira ku-muragi Isaaya rikuumire ati, “Niriroma na abhaanu okuturira ku-bhirengekanyo. Niryaika amangʼana ganu gakyariga kwaikwa abhweru okwambira bhunu ekyaro ꞉kyabhumbirwe.”

Insonga ya ekirengekanyo kya amanyansi mu-ngano

³⁶ Mmbe, Yeesu ˆnaaraga amasangi ga abhaanu, ˆneengira mu-nyumba. Abheeyigira bhaaye mbamuseeta, mbamubhwira ati, “Kisomboorere insonga ya ekirengekanyo kya amanyansi mu-ngano.”

³⁷ Yeesu ˆnaabhasubhya ati, “Omuyambi wa gimbibho ginjomu, ni Omwana wa Adaamu.

³⁸ Riisambu ni kyaro, gimbibho ginjomu ni bhaana bha obhukama, na amanyansi ni abhaanu bha omukayi wurya.

³⁹ Omusoko unu ꞉eejire okuyamba amanyansi ni Sitaani. Akabhaga ka okugesa ni ku-bhuteero bhwa ekyaro, na abhagesi ni bhaamaraayika bha Nyamuwanga.

⁴⁰ “Mmbe, rwa kutyo amanyansi gariiywa ngeeswa mu-muriro, nikwo kutyo amangʼana garibha ku-bhuteero bhwa ekyaro kinu.

⁴¹ Omwana wa Adaamu, arituma bhaamaraayika bhaaye, bhakumanye abhaanu bhanu ꞉bhaayabhiishe abheejaabho, na abhajeemi bhoone kutyo, bhasooke mu-bhukama bhwaye.

⁴² Bhaamaraayika bhayo bharyesa abhakosi ebhikayo bhayo bhoone kutyo mw-ibheri rya omuriro. Muyo nimwo bharirira kutyo bhakumye.

⁴³ Ayo niwe abharengeresi bharingʼarabhyaga rwa riisuubha mu-bhukama bhwa Nyamuwanga. Unu ari na amatwi, noongwe!”

Ebhirengekanyo ebhindi ebhya obhukama bhwa mu-rwire

⁴⁴ Yeesu ˆnaagenderera okwiyigisha, ˆnaaika ati, “Obhukama bhwa mu-rwire obhurengekanyibhwa na ekiinu kya obhugusi obhunene ꞉kyariga kibhisirwe mw-isambu. Muunu wumwi ꞉eejire aakirora, ˆnaakibhisa kweki. Mmbe ˆnaagenda ajomeeywe muno, ˆnaagusha ebhiinu bhyaye bhyone kutyo bhinu ꞉aariga ari nabhyo, ˆnaagenda ˆnaagura riisambu riyo.

⁴⁵ “Kweki, obhukama bhwa mu-rwire obhususana na omusuruja wumwi unu ꞉aagendere okwagara giiruuru.

⁴⁶ Bhunu ꞉aanyoorere iiruuru yimwi ya bhugusi bhunene, ˆnaagenda ˆnaagusha ebhiinu bhyone kutyo bhinu ꞉aariga ari nabhyo, ˆnaagura iiruuru iyo.

⁴⁷ “Kweki, obhukama bhwa mu-rwire obhususana na riikokooro rinu ꞉ryeeserwe mu-nyanja. Riikokooro riyo ndikumanya nswi gya mbaga nyafu.

⁴⁸ Bhunu ginswi ꞉gyeejuuye-mo, abhategi mbarifutira ku-murambo. Kimwi mbakumanya ginswi ginjomu, mbatuura mu-makanga geebhwe. Nawe ginswi ginu ꞉gitaariibhwaga, mbagyesa.

⁴⁹ Nikwo kutyo iribha ku-bhuteero bhwa ekyaro. Bhaamaraayika bhariija mbaawura abhakayi enu, na abharengeresi mu-meeso ga Nyamuwanga enu.

⁵⁰ Kimwi bhakamara mbeesa abhakosi bha ebhikayo mw-ibheri rya omuriro. Muyo nimwo bharirira kutyo bhakumye.”

Meeyigisho amayaaya na aga kara

⁵¹ Yeesu ˆnaabhuusha abheeyigira bhaaye ati, “Angu, mwasombookerwa goone kutyo ganu naabhabhwira?” Bhoone mbamusubhya ati, “Yee, kyasombookerwa.”

⁵² ˆNaabhabhwira ati, “Mwiyigisha woonewoone wa ebhiraagiro bhya Musa unu eeyigiiye amangʼana ga mu-bhukama bhwa mu-rwire, kaasusana na omwene musi unu kaasoosha mu-bhiinu bhyaye ebhiinu ebhiyaaya na ebhya kara.”

Abhaanu bha Naajareeti abharema Yeesu

⁵³ Yeesu ꞉eejire aamara okubhabhwira ebhirengekanyo bhiyo, ˆneemuka ˆnaasooka-wo,

⁵⁴ ˆnaagenda Naajareeti ewaabho. Bhunu ꞉aayikire eyo, ˆnaamba okwiyigisha abhaanu mw-isunagoogi ryebhwe. Abhaanu mbaruguura muno, mbabhuushaanya ati, “Omuunu unu anyoorere aaki obhwenge bhunu, na obhuturo bhwa okukora ebhigwa bhinu?

⁵⁵ Unu atari mumura wa omubhaaji wa ebhiinu? Na nyiramwene atari omugasi unu kaatogwa Maryamu? Abhamura bhaabho bhatari Yakobho, Yuusufu, Simooni na Yuuda?

⁵⁶ Na abhasubhaati bhaaye bhatari bhanu kiikaaye nabho anu? Mmbe, amangʼana ganu goone kutyo unu aganyoorere aaki?”

⁵⁷ Abhaanu bhayo mbabhiiyirwa, mbarema okumwikirisha. Niwe Yeesu ˆnaabhabhwira ati, “Omuragi atakubhurwa ekibharo woonewoone, tari kaabhurwa ekibharo mu-kyaro kya ewaabho na iika ewaabho.”

⁵⁸ Yeesu ꞉ataakorere bhigwa bhyafu eyo, kwa okubha abhaanu bhayo bhatamwikirisiishe.