Mataayo 12 - Iimuuma Iinyaaya

Yeesu niwe omukuru wa orusuku rwa Insabhaato

¹ Rusuku rumwi iri Nsabhaato, Yeesu ꞉aariga ˆnaatura mu-masambu ga ingano, ari amwi na abheeyigira bhaaye. Abheeyigira bhaaye mboongwa omweko, mbaamba okubhutura ebhyangara bhya ingano, mbarya obhweke.

² Bhunu Abhafarisaayo ꞉bhaarorere gayo, mbabhwira Yeesu ati, “Ringira, abheeyigira bhaawo abhakora ganu gateesire okukorwa ku-rusuku rwa Insabhaato!”

³ Yeesu ˆnaabhasubhya ati, “Mukyariga okusoma mu-Makaamo Amataakatiifu kutyo Dawudi ꞉aakorere bhunu omweko ꞉gwamurumire ari na abheejaabho?

⁴ Dawudi ꞉eengiiye mu-nyumba ya Nyamuwanga. Mu-nyumba muyo ꞉gyariga girimo emikaate ginu ꞉gyasoosibhwaga ku-Nyamuwanga. Mmbe, Dawudi ˆnaagigega, ˆnaarya! ˆNaayaana na abheejaabho, bhoone kutyo ꞉bhaariga bhateesire okugirya okuriingʼaana na ebhiraagiro bhya Musa, tari ꞉gyaribhwaga na bhashengesi era.

⁵ Na mukyari okusoma mu-bhiraagiro bhya Musa bhinu ebhyaikira abhashengesi bhanu abhakoraga emirimu mw-iyekaru rya Nyamuwanga ku-rusuku rwa Insabhaato? Bhatakugwatira ebhiraagiro bhya okusiga okukora emirimu ku-rusuku ruyo, nawe Nyamuwanga atakubhabharira ati ni bhakayi.

⁶ Woori, enibhabhwira ati, anu kiri anu, ariwo omuunu unu kaakira riiyekaru rya Nyamuwanga.

⁷ Nawe raabhe mukamenyere insonga ya amangʼana ganu ati, ‘Eneenda abhaanu bhafwiranire ekigongo okukira okusoosha ekimweso,’ mutaakaramuriiye abhaanu bhanu bhatari na kikayo.

⁸ Omwana wa Adaamu, niwe omukuru wa Insabhaato.”

Okukora amajomu ku-rusuku rwa Insabhaato

⁹ Yeesu ˆnaasooka ayo, ˆneengira mw-isunagoogi ryebhwe.

¹⁰ Mw-isunagoogi muyo, ꞉aariga arimo omuunu afuuyega okubhoko kwaye okumwi. Na Abhafarisaayo bhanu ꞉bhaariga mbeenda okusakya Yeesu insonga bhamusitaakye bhoone ꞉bhaariga bharimo. Mmbe mbamubhuusha ati, “Angu, okuriingʼaana na ebhiraagiro bhya Musa, iisire okuwosha omuunu ku-rusuku rwa Insabhaato?”

¹¹ Yeesu ˆnaabhasubhya ati, “Ni niga agati weemwe unu ari na ngʼondi yaaye yimwi, iingʼondi iyo ikagwa mw-itoko ruri rusuku rwa Insabhaato, atakuyikurura ayisooshe-mo?

¹² Nawe, Nyamuwanga keegana omuunu muno okukira iingʼondi! Mmbe woori, iisire muno okukora amajomu ku-rusuku rwa Insabhaato.”

¹³ Kimwi Yeesu ˆnaabhwira omuunu unu ꞉aariga afuuye okubhoko ati, “Iimusha okubhoko kwawo.” Omwene woone ˆnaakwimusha, ayoayo nkuwora, nkubha rwa okubhoko kwaye okundi.

¹⁴ Mmbe, Abhafarisaayo mbawuruka anja, mbaaikana kutyo bhareete Yeesu.

Yeesu niwe omujuuma unu asorerwe na Nyamuwanga

¹⁵ Bhunu Yeesu ꞉aamenyere ganu Abhafarisaayo bhayo ꞉bhaariga mbaaikana okukora, ˆnaasooka-wo. Abhaanu bhaafu muno mbamuseeta ˆnaawosha bhanu ꞉bhaariga bharwaye bhoone kutyo.

¹⁶ Nawe, ˆnaabhagaanya ati bhaasiga okubhwira abhaanu ati omwene ni niga,

¹⁷ insonga riingʼana rinu Nyamuwanga ꞉aaikire okuturira ku-muragi Isaaya rikuumire ati,

¹⁸ “Unu niwe omujuuma waani unu nisorere. Unu niwe omwende waani, niwe omutima gwani ogujomererwa. Eniija okumutuurira-mo Omwoyo gwani, insonga araashe amangʼana ga obhwerusha ku-bhaanu bha mu-bhyaro bhyone kutyo.

¹⁹ Ataribhambashaanya na muunu amwi ati kumwayira bhaanu. Na muunu woonewoone ataryungwa bhuraka bhwaye ku-njira.

²⁰ Atarimariisha omuunu unu ayigirwe rwa omuyere gunu gubhondooywe, kweki, atarisimya orutambi runu orwituuta ingesi okuyikira anu arireeta obhurengeresi bhutunge mu-bhaanu.

²¹ Abhaanu bha mu-bhyaro ebhindi bharimwisiga.”

Obhuturo bhwa Yeesu obhukira obhwa omukuru wa ebhiwi

²² Mmbe, abhaanu mbareetera Yeesu omuunu wumwi unu ꞉aariga awungirwe ebhiwi. Omuunu uyo ꞉aariga ari muwofu, na ari mujibhi. Yeesu ˆnaamuwosha, kimwi ˆnaarora, ˆnaamba na okwaika.

²³ Abhaanu bhoone kutyo bhanu ꞉bhaariga bhari ayo mbaruguura muno, mbaaika ati, “Angu, unu kaatura okubha niwe Omuyiiri Dawudi?”

²⁴ Bhunu Abhafarisaayo ꞉bhoonguuywe amangʼana gayo, mbaaika ati, “Omuunu unu kaabhirimya ebhiwi ku-bhuturo bhwa Bherijebhuri, omukuru wa ebhiwi bhyone kutyo.”

²⁵ Enu Yeesu amenyere ganu ꞉bhaariga mbeeganiirisha, ˆnaabhabhwira ati, “Abhaanu mu-bhukama obhumwi bhakarema okuungwana, obhukama bhuyo obhugwa. Na, abhaanu bha mu-musi ogumwi amwi nyumba eyimwi bhakarema okuungwana, abhaanu bhayo abhataana.

²⁶ Nikwo kutyo, raabhe Sitaani kaabhirimya Sitaani, obhukama bhwaye obhubha bhwatikire, bhutakutura kugenderera okubha-wo.

²⁷ Raabhe anye enibhirimya ebhiwi ku-bhuturo bhwa Bherijebhuri, abhaanu bheemwe abhabhibhirimya ku-bhuturo bhwaga? Ku-nsonga iyo, abhaanu bheemwe nibho bharyeresha ati muyabhire.

²⁸ Nawe, raabhe anye enibhirimya ebhiwi ku-bhuturo bhwa Mwoyo Omutaakatiifu wa Nyamuwanga, mmbe mumenye ati, obhukama bhwa Nyamuwanga bhwabhayikiriiye.

²⁹ Angu, omuunu kaatura kutiki okwingira mu-nyumba ya omuunu unu ari na amanaga okumuteesha ebhiinu bhyaye, akyari okumubhoya okwamba? Akamara okumubhoya kujomu, niwe woori kaatura okumuteesha ebhiinu bhyaye bhyone kutyo.

³⁰ “Omuunu woonewoone unu atari ku-rubhaara rwani, uyo niwe omusoko waani. Na woonewoone unu atakukumanya amwi na anye, uyo kaanyaraganya.

³¹ Ku-nsonga iyo enibhabhwira ati, Nyamuwanga kaatura okwabhira ebhikayo bhyone kutyo, na amangʼana ganu abhamujabhura. Nawe abhaanu bhakajabhura Mwoyo Omutaakatiifu bhataryabhirwa.

³² Kweki, omuunu woonewoone akaaika amangʼana amabhiibhi aga okurema Omwana wa Adaamu, aryabhirwa. Nawe, omuunu akaaika amangʼana amabhiibhi aga injabhuro ku-Mwoyo Omutaakatiifu, uyo ataryabhirwa. Ibhe ku-kyaro kinu, amwi ati ku-kinu kiriija.”

Abhaanu abhamenyekanira ku-bhikorwa bhyebhwe

³³ “Riiti riijomu eritwasha amatwasho amajomu, riiti riibhiibhi ryone eritwasha amatwasho amabhiibhi. Obhujomu bhwa riiti obhumenyekana okuriingʼaana na amatwasho gaaryo.

³⁴ Orwibhuro rwa ebhisoro emwe! Omutura kutiki okwaika amangʼana amajomu enu emwe muri bhakayi? Omuunu kaaroma ganu geejuuye mu-mutima gwaye.

³⁵ Omuunu omurengeresi kaaika amajomu okuriingʼaana na amajomu ganu geejuuye mu-mutima gwaye, nawe omuunu omukayi kaaika amabhiibhi okuriingʼaana na amabhiibhi ganu geejuuye mu-mutima gwaye.

³⁶ Mmbe, enibhabhwira ati, ku-rusuku rwa indamuro, abhaanu bharibharirwa amangʼana geebhwe goone kutyo aga obhuyagayaga ganu ꞉bhaaikire.

³⁷ Nyamuwanga kaakubhara ati uri murengeresi okuriingʼaana na amangʼana gaawo, na okuturira ku-mangʼana gaawo uriramurirwa.”

Abhafarisaayo abheenda ebhigwa okusooka ku-Yeesu

³⁸ Mmbe, abheeyigisha bha ebhiraagiro bhya Musa abhandi na Abhafarisaayo mbabhwira Yeesu ati, “Ee Mwiyigisha, ekyenda ukore ekimenyegesho kikirore, niwe kimenye ati usookere ku-Nyamuwanga.”

³⁹ Yeesu ˆnaabhasubhya ati, “Orwibhuro rwa abhakosi bha amabhiibhi, na rutari rwitongeeye mu-meeso ga Nyamuwanga, nsiku gyone kutyo abheenda ekimenyegesho. Nitakubheeresha kimenyegesho kyonekyone. Nawe abhaaja okurora ekimenyegesho kimwi era, rwa kinu Nyamuwanga ꞉aakorere ku-muragi Yoona.

⁴⁰ Rwa kutyo Yoona ꞉eekaaye mu-nda ya riiswi riinene nsiku esatu ngeta na mwisi, nikwo kutyo Omwana wa Adaamu, ariikara mu-mbiiyira nsiku esatu mu-ngeta na mu-mwisi.

⁴¹ “Ku-rusuku rwa indamuro, abhaanu bha mu-musi gwa Ninawi bhariyambaara na emwe mu-meeso ga Nyamuwanga, mbabharamurira ati muri bhakayi. Kwa okubha abheene bhunu ꞉bhoonguuywe omuragi Yoona ˆnaaraasha iingʼana ya Nyamuwanga ꞉bhaanugire ebhikayo bhyebhwe. Woori enibhabhwira ati, anu kiri, ariwo omuunu omukuru okukira Yoona, nawe mutakwenda okumwikirisha.

⁴² Kweki, ku-rusuku rwa indamuro, omugore wa ebhurimbe ariyambaara na abhaanu bha orwibhuro runu, na aribharamurira ati muri bhakayi. Iribha kutyo kwa okubha omwene ꞉aasookere mu-kyaro kya areera insonga aaje eetegeereshe amangʼana ga obhwenge aga omukama Seremaani. Woori enibhabhwira ati, anu kiri, ariwo omukuru okukira Seremaani.”

Yeesu kaagonya abhaanu bhanu bhatakuungwa Nyamuwanga

⁴³ Yeesu ˆnaagenderera okwaika ati, “Ekiwi kikasooka mu-muunu, ekiiyindayinda anu atari na manji, nkyagara owa okumuunyira, nkibhurwa.

⁴⁴ Nkyaika ati, ‘Enisubha mu-muunu unu ꞉naasookere-mo.’ Ekiwi kiyo kikasubha nkinyoora omuunu uyo ari rwa iinyumba inu itarimo muunu, yeyereeywe, yirooseresiibhwe kujomu,

⁴⁵ ekigenda okwagara ebhiwi ebhindi mungati ebhibhiibhi muno kukira ekyene. Mbiija mbiingira bhyone kutyo mu-muunu uyo. Mmbe omuunu uyo, obhuteero bhwaye obhubha bhubhiibhi muno kukira kutyo ꞉aariga ari ku-bhwambiro. Nikwo kutyo eyiija okubha kw-imwe, emwe abhaanu abhakayi.”

Nyiramwene Yeesu na bhaawaamuwaabho

⁴⁶ Yeesu ꞉aariga akyaroma na riisangi rya abhaanu bhayo, bhaawaamuwaabho, na nyiramwene mbaaja, mbayambaara anja, mbeenda okuroma nawe.

⁴⁷ Omuunu owumwi ˆnaabhwira Yeesu ati, “Ringira, nyakumwana na bhaawaamuwaanyu bhayambaaye anja, abheenda okuroma na awe.”

⁴⁸ Yeesu ˆnaamusubhya ati, “Maayi ni niga, na bhaawaamuwaasu ni bhaaga?”

⁴⁹ ˆNaasomeeresha abheeyigira bhaaye, ˆnaaika ati, “Ringira, bhanu nibho bhaamaayi na bhaawaamuwaasu!

⁵⁰ Omuunu woonewoone unu kaakora ganu Raata Nyamuwanga wa mu-rwire keenda, uyo niwe omumura waasu, maayi, na omusubhaati waani.”