Mataayo 11 - Iimuuma Iinyaaya

¹ Bhunu Yeesu ꞉aamarire okuragirira abheeyigira bhaaye ekumi na bhabhiri, ˆneemuka, ˆnaagenda mu-misi egindi egya Gariraaya okwiyigisha na okuraasisha abhaanu.

Yowana Omubhatiisha kaatuma abheeyigira bhaaye ku-Yeesu

² Mu-kabhaga kayo, Yowana Omubhatiisha ꞉aariga abhoyerwe mu-jeera. Mu-jeera muyo, ˆnoongwa amangʼana ganu Kiriisitu ꞉aariga ˆnaakora. Niwe ˆnaatuma abheeyigira bhaaye abhandi ku-Yeesu, bhamubhuushe ati,

³ “Angu ni awe unu ꞉aakaamiiywe ati ariija, amwi ati kirindirire owundi?”

⁴ Yeesu ˆnaabhasubhya ati, “Mugende mubhwire Yowana ganu omurora, na ganu omuungwa.

⁵ Abhawofu abharora, abharema abharibhata bhuyambaaye, abhagenge abhawosibhwa, abha amatwi abhoongwa, abhafuuye abhasuurwa, na abhatobhu abharaasibhwa Amangʼana Amajomu.

⁶ Nyakara, omuunu unu atakunyiitimaata.”

⁷ Bhunu abheeyigira bha Yowana ꞉bhaariga mbeemuka, Yeesu ˆnaamba okwaikira Yowana ˆnaabhwira abhaanu ati, “꞉Mwariga mugenda okuringiraki mw-ibhara? Sii, ꞉mwariga mugenda kuringira bhunyansi mbuyembwaga na omuyaga? Wuri!

⁸ Mmbe, ꞉mwariga mugenda okuringiraki? Omuunu afwaye ngibho njomu? Wuri! Mwitegeereshe! Abhaanu bhanu abhafwara gingibho ginjomu, bhari mu-nyumba gya ekikama.

⁹ Mmbe woori, ꞉mwariga mugenda okuringiraki? ꞉Mwariga mugenda okuringira omuragi? Yee! Enibhabhwira ati, ni muragi, okukira abharagi.

¹⁰ Uyo niwe omuunu unu Amakaamo Amataakatiifu agaaikira ati, ‘Iitegeeresha, enituma omureeti wa iingʼana yaani imbere waawo, akutangatire akuroosishe injira.’

¹¹ Kimari enibhabhwira ati, mu-bhaanu bhoone kutyo bhanu bheebhuuywe mu-kyaro anu, atariwo na wumwi unu kaakira Yowana Omubhatiisha. Nawe, omuunu omutooto okukira bhoone kutyo mu-bhukama bhwa mu-rwire, ni mukuru okukira Yowana Omubhatiisha.

¹² Okwambira mu-nsiku ginu Yowana Omubhatiisha ꞉aaraashaga okuyikira reero, obhukama bhwa mu-rwire obhunyoorerwa managa, na abha amanaga nibho abhabha nabhwo.

¹³ Abharagi bhoone kutyo, na Musa ku-bhiraagiro bhyaye, ꞉bhaasoosiishe obhuragi bhwa obhukama bhuyo, okuyikira mu-kabhaga ka Yowana Omubhatiisha.

¹⁴ Mmbe, raabhe omwenda okwikirisha, Yowana niwe Eriya unu ꞉aaikirwe ati ariija.

¹⁵ Unu ari na amatwi, noongwe!

¹⁶ “Nisusanye naki abhaanu bha orwibhuro runu? Abhasusana na abhaana bhanu bheekaaye mw-igusisho mbaragirisha abheejaabho ati,

¹⁷ ‘꞉Kyabhabhumiiye ebhironge, nawe mutaabhinire! Kweki ꞉kyabheembiiye ameembo ga okubhasurumbasha, nawe mutaaririre!’

¹⁸ “Nikwo kutyo Yowana Omubhatiisha ꞉eejire, atakurya bhyakurya bhinu abhandi ꞉bhaaryaga, atakunywa iidivaayi, abhaanu mbaaika ati, ‘Unu awungirwe ebhiwi!’

¹⁹ Woori Omwana wa Adaamu eejire, ˆnaarya bhinu abhandi abharya na ˆnaanywa iidivaayi, abhaanu mbamwaika ati, ni muwubhaaru na ni mukorwa, ati ni musaani wa abhatobhesha bha riigooti na abhakosi bha ebhikayo! Nawe, obhwenge bhwa Nyamuwanga obhumenyekana ati ni bhwenge ku-mangʼana amajomu ganu agasooka ku-bhwenge bhuyo.”

Yeesu kaagonya abhaanu mu-misi ginu ꞉bhaamuremere

²⁰ Niwe Yeesu ˆnaamba okugonya emisi ginu ꞉aakorere-mo ebhigwa bhyaye ebhyafu, kwa okubha abhaanu bheende-mo ꞉bhataanugire ebhikayo bhyebhwe, ˆnaaika ati,

²¹ “Garibhanyoora emwe, abhaanu bha Korajiini na abhaanu bha Bheetisayida! Kwa okubha, ebhigwa bhinu ꞉naakorere mu-meeso geemwe, nikabhikoreeye Tiiro na Sidooni, abhaanu mu-misi giyo bhatakakoorere okunuga ebhikayo bhyebhwe. Na bhakafwaye gingibho gya amagunira na okwiyaka riifu, okweresha obhunugi bhwebhwe obhwa ebhikayo.

²² Nawe, orusuku runu Nyamuwanga ariramura abhaanu mu-kyaro anu, aribharamurira emwe makomeeye kukira kutyo ariramurira abhaanu abhakosi bha amabhiibhi abha Tiiro na Sidooni.

²³ Emwe, abhaanu bha Kaperinawumu emwe, omutoga ati muririinywa muyike mu-rwire? Wuri, mutarikorerwa kutyo! Nawe, muriisibhwa emwaro mw-itoko rya nyombe. Raabhe ebhigwa bhinu ꞉naakorere kw-imwe nikabhikorere mu-musi gwa Sodoma, omusi guyo gukabheeye-wo na reero.

²⁴ Nawe, orusuku runu Nyamuwanga ariramura abhaanu mu-kyaro anu, aribharamurira emwe makomeeye kukira kutyo ariramurira abhaanu abhakosi bha amabhiibhi abha Sodoma.”

Yeesu kaabhirikira bhanu abhanyanka

²⁵ Niwe Yeesu ˆnaaika ati, “Ee Raata, enikukumya, awe Raatabhugenyi wa mu-rwire na mu-kyaro, kwa okubha amangʼana ganu ꞉waabhisire abheenge na abhasomi, nuutuurira abhweru abhaana abhatooto.

²⁶ Yee Raata, kwa okubha ni kutyo ꞉gaakujomeeye awe.”

²⁷ Kimwi Yeesu ˆnaabhwira abhaanu ati, “Raata anaaye ebhiinu bhyone kutyo. Ni esemwene mwana era, niwe amenyere Omwana. Na Omwana era, niwe amenyere esemwene, na Omwana akeenda okweresha esemwene ku-muunu, kaamweresha.

²⁸ “Muuje ku-anye mwone kutyo, emwe bhanu omunyanka, bhanu mukubhwirwe na emijigo, anye eniija okubhamuunya.

²⁹ Mwibhoye mw-ijooku ryani, mwiyigire ku-anye, kwa okubha anye niri mufura, na mu-mutima gwani anye niituuye emwaro. Mukanyiyigira-ko omuuja okunyoora omurembe mu-mitima gyemwe.

³⁰ Riijooku ryani ni nyoowu na omujigo gwani ni muwuwu.”