Mataayo 10 - Iimuuma Iinyaaya

Yeesu kaatuma abheeyigira bhaaye ekumi na bhabhiri

¹ Kimwi Yeesu ˆnaabhirikira abheeyigira bhaaye ekumi na bhabhiri, ˆnaabhayaana obhuturo bhwa okubhirimya ebhiwi mu-bhaanu, na obhwa okuwosha amarwara ku-mbaga.

² Amasiina ga abhatumwa bhayo ni Simooni unu kaatogwa Peetero, na Ndereya omumura waabho, Yakobho na Yowana abhamura bha Jebhedaayo,

³ Firipo, Bhatoromayo, Tomaaso, Mataayo unu ꞉aariga ari mutobhesha wa riigooti, Yakobho omumura wa Arufwayo, Tadaayo,

⁴ Simooni owumwi wa mu-bhaanu bha ekyama kya Abhajeroti na Yuuda Esikariyooti unu ꞉aariiye Yeesu injeejemo.

⁵ Mmbe, Yeesu ˆnaatuma abheeyigira bhaaye bhayo, bhagende okuraasha Amangʼana Amajomu aga obhukama bhwa mu-rwire, ˆnaabhabhwira ati, “Mwasiga okugenda ku-bhaanu bhanu bhatari Bhayawudi, na mu-misi gya Samaariya mwasiga okwingira-mo.

⁶ Tari mugende ku-Bhaijirayeeri, bhayo nibho bhari rwa giingʼondi ginu gibhurire.

⁷ Mugendega muraasha, mubhabhwira ati, ‘Obhukama bhwa mu-rwire bhuri ayeeyi!’

⁸ Muwoshe abharwaye, musuure abhafuuye, muwoshe abhagenge na mubhirimye ebhiwi mu-bhaanu. Muyaaywe obhuturo bhuyo bhusa, emwe mwone mubhusooshe bhusa.

⁹ Mwasiga okugenda na yera yooneyoone,

¹⁰ esandiko rya ngibho, ngibho gya okubharanywa, ebhikwirya, amwi ati nsimbo, kwa okubha omukosi wa emirimu eesire okuyaanwa indiyo yaaye.

¹¹ “Omusi amwi ati egunguri ryoneryone rinu mukeengire-mo, mwagare omuunu omwitongeeye unu keenda mwikare ewaaye. Mwikare ewa omuunu uyo ebhaga ryone kutyo okuyikira anu murisooka mu-musi guyo.

¹² Mukeengira ewa omuunu uyo, mubheendere omurembe.

¹³ Raabhe abhaanu bha mu-nyumba iyo bheesire inkeesha iyo, omurembe gwemwe gubhayikiire, nawe raabhe bhateesire okuyiramira, omurembe gwemwe gusubhe kw-imwe.

¹⁴ Mukeengira mu-nyumba amwi ati musi gwonegwone, abhaanu bheende-mo bhaakarema okubharamira na okubheetegeeresha, musooke-wo mukuukumuraga oruteeri rwa ku-maguru geemwe.

¹⁵ Kimari enibhabhwira ati, orusuku runu Nyamuwanga ariramura abhaanu bha mu-musi guyo, aribharamurira makomeeye, okukira kutyo ariramurira abhakosi bha amabhiibhi abha mu-kyaro kya Sodoma na Gomora!”

Ebhinyansho bhinu bhiriija

¹⁶ “Mwitegeereshe, enibhatuma rwa giingʼondi agati wa ginsunji. Mmbe, mubhe na obhwenge rwa ekisoro, na mubhe bhafura rwa inguuti.

¹⁷ Nawe mwiyangarire na abhaanu, kwa okubha bharibhasira mu-mabharaja, na bharibhabhuma ebhibhooko mu-masunagoogi geebhwe.

¹⁸ Bharibhasira ku-bhatungi na ku-bhakama, kwa okubha ati emwe muri bheeyigira bhaani. Mu-kabhaga kayo niwe murinyoora omwanya gwa okubhwira Abhayawudi na bhanu bhatari Bhayawudi amangʼana gaani.

¹⁹ Nawe, bhunu bharibhagwata, mwasiga okuubhaya mwibhuusha kutyo mukaaike mw-ibharaja. Nyamuwanga kaaja okubhayaana amangʼana ga okwaika.

²⁰ Mutari emwe bhanu muryaikaga, tari ni Mwoyo Omutaakatiifu wa Esomwana Nyamuwanga niwe aryaikaga mw-imwe.

²¹ “Na mu-kabhaga kayo, omuunu arirya waamuwaabho injeejemo ˆnaamugura bhamwite. Omwibhusi wa ekirume arirya omwana waaye injeejemo ˆnaamugura insonga eetwe. Nikwo kutyo na abhaana bhoone bharikora ku-bheebhusi bheebhwe insonga bheetwe.

²² Abhaanu mbarika gyone kutyo bharibhasoka ku-nsonga yaani. Nawe, woonewoone unu arisimbiira okuyikira ku-bhuteero, uyo niwe aryerusibhwa.

²³ Abhaanu bhakabhakorera kubhiibhi mu-musi omurebhe, mubhirimire mu-musi ogundi. Enibhabhwira ekimari ati, mutakumara emirimu gyemwe mu-misi gyone kutyo egya Ijirayeeri, Omwana wa Adaamu nikyari okuuja.

²⁴ “Omwiyigira atakutura okumenya okukira omwiyigisha waaye, na omugaya atakutura okubha mukuru okukira esebhugenyi.

²⁵ Omwiyigira keendwa abhe rwa omwiyigisha waaye, na omugaya woone abhe rwa esebhugenyi. Anye niri mukuru weemwe na abhambirikira ati Bherijebhuri. Kandi emwe mutakuuja kubhirikirwa masiina mabhiibhi muno?”

Muubhaye Nyamuwanga era

²⁶ “Mmbe, mwasiga okubhoobhaya, kwa okubha ameeyibhise goone kutyo garituurwa ku-bhweru, amafundikiiywe goone garimenyekanira ku-bhweru.

²⁷ Ganu enibhabhwira kiri abheene, emwe mugaaike ku-bhaanu woonewoone anu muri. Kweki, goone kutyo ganu enibhaweweetera, mugaraashe muri ku-nsara gya giinyumba gyemwe.

²⁸ Mwasiga okuubhaya abhaanu bhanu abheeta omubhiri, bhaakamara okubheeta, bhatakutura okwita omwoyo. Nyakara muubhaye Nyamuwanga, kwa okubha omwene niwe kaatura okusikya omubhiri na omwoyo mu-muriro gunu gutakusimá.

²⁹ “Ebhiitamba bhibhiri bhitakugusibhwa yera ntooto era? Nawe, katariwo na kamwi kanu akafwa Raata Nyamuwanga atamenyere.

³⁰ Nawe emwe, Nyamuwanga amenyere na obhukumi bhwa ginfwiri gyemwe gyone kutyo.

³¹ Mmbe woori, mwasiga okuubhaya, kwa okubha emwe muri na kibharo kinene okukira ebhiitamba raabhé bhiraabhe bhyafu.

³² “Omuunu akanyiikirisha mu-meeso ga abhaanu, anye noone nirimwikirisha mu-meeso ga Raata wa mu-rwire.

³³ Nawe, omuunu akanyiigaana mu-meeso ga abhaanu, anye noone nirimwigaana mu-meeso ga Raata wa mu-rwire.”

Yeesu atareetere omurembe era

³⁴ “Mwasiga kutoga ati niijire okukora abhaanu bha mu-kyaro anu bhabhe na omurembe. Itari kutyo. Nitareetere omurembe tari nireetere obhurwani.

³⁵ Niijire okusokanya omuunu na esemwene, omuyara na nyiramwene, na omugasi na nyaabhuko.

³⁶ Na abhasoko bha omuunu ni bhanu bhari iika ewaaye.

³⁷ Omuunu unu eendere esemwene amwi ati nyiramwene okunkira anye, uyo ateesire okubha mwiyigira waani. Na unu eendere omumura waaye amwi ati omuyara waaye okunkira anye, uyo woone ateesire okubha mwiyigira waani.

³⁸ Omuunu unu atakugega omusarabha gwaye aanseete, ateesire kubha mwiyigira waani.

³⁹ Omuunu unu keenda okwangarira obhurame bhwaye omwene, aribhubhusha. Na omuunu akabhusha obhurame bhwaye ku-nsonga yaani, uyo niwe aribha nabhwo.”

Ekiyaanwa kya bhanu bhariramira abheeyigira bha Yeesu

⁴⁰ “Omuunu woonewoone unu kaabharamira, andamiiye anye. Na unu andamiiye anye, aramiiye Nyamuwanga, unu antumire.

⁴¹ Unu kaaramira omuragi, kwa okubha ni muragi, ariyaanwa ekiyaanwa rwa ekya omuragi uyo. Na omuunu unu kaaramira omurengeresi, kwa okubha ni murengeresi, woone ariyaanwa ekiyaanwa rwa ekya omurengeresi uyo.

⁴² Unu kaayaana owumwi wa abheeyigira bhaani ekikombe kya amanji amanyiriiye era, kwa okubha ni mwiyigira waani, enibhabhwira ekimari ati, Nyamuwanga arimuyaana ekiyaanwa kyaye.”