Mataayo 1 - Iimuuma Iinyaaya

Oruganda rwa Yeesu Kiriisitu

¹ Gunu nigwo omuroobhekano gwa amasiina ga oruganda rwa Yeesu Kiriisitu. Yeesu Kiriisitu ꞉aasookereeye mu-ruganda rwa omukama Dawudi na Bhurayimu.

² Bhurayimu ꞉eebhuuye Isaaka, Isaaka ˆneebhura Yakobho, Yakobho ˆneebhura Yuuda na abhamura bhaabho.

³ Yuuda ˆneebhura Peereesi na Jeera ku-Tamaari, Peereesi ˆneebhura Yejirooni, Yejirooni ˆneebhura Raamu,

⁴ Raamu ˆneebhura Aminadaabhu, Aminadaabhu ˆneebhura Naashoni, Naashoni ˆneebhura Sarumooni,

⁵ Sarumooni ˆneebhura Bhowaaji ku-Rayabhu, Bhowaaji ˆneebhura Obheedi ku-Ruutu, Obheedi ˆneebhura Yese,

⁶ Yese ˆneebhura omukama Dawudi. Dawudi ˆneebhura Seremaani ku-mugasi unu ꞉aariga ari muka Uriya,

⁷ Seremaani ˆneebhura Rewobhowaamu, Rewobhowaamu ˆneebhura Abhiya, Abhiya ˆneebhura Asa,

⁸ Asa ˆneebhura Yewoshafwati, Yewoshafwati ˆneebhura Yooramu, Yooramu ˆneebhura Ujia,

⁹ Ujia ˆneebhura Yootamu, Yootamu ˆneebhura Aaji, Aaji ˆneebhura Ejekiya,

¹⁰ Ejekiya ˆneebhura Manaase, Manaase ˆneebhura Amooni, Amooni ˆneebhura Yoosia,

¹¹ Yoosia ˆneebhura Yekoniya na abhamura bhaabho, mu-kabhaga kanu Abhaijirayeeri ꞉bhaagegerwe mbabha bhagaya mu-kyaro kya Bhabheri.

¹² Bhunu Abhaijirayeeri ꞉bhaariga bhasirirwe eyo, Yekoniya ˆneebhura Sherateeri, Sherateeri ˆneebhura Jerubhabheri,

¹³ Jerubhabheri ˆneebhura Abhiwudi, Abhiwudi ˆneebhura Eriyakimu, Eriyakimu ˆneebhura Ajoori,

¹⁴ Ajoori ˆneebhura Saadooki, Saadooki ˆneebhura Akimu, Akimu ˆneebhura Eriwuudi,

¹⁵ Eriwuudi ˆneebhura Eriyajari, Eriyajari ˆneebhura Matani, Matani ˆneebhura Yakobho,

¹⁶ Yakobho ˆneebhura Yuusufu, omurume wa Maryamu, na Maryamu ˆneebhura Yeesu unu ꞉aariga ari Kiriisitu.

¹⁷ Mmbe, okusooka ku-Bhurayimu okuyikira okwibhurwa kwa omukama Dawudi ꞉bhaariga bhaaturire-wo bhaajaaji ekumi na bhana. Okusooka ku-Dawudi okuyikira ku-kabhaga kanu Abhaijirayeeri ꞉bhaagegerwe mbabha bhagaya mu-kyaro kya Bhabheri, ꞉bhaariga bhaaturire-wo bhaajaaji abhandi ekumi na bhana. Na, okusooka mu-kabhaga kanu ꞉bhaagegerwe eyo okuyika okwibhurwa kwa Kiriisitu, ꞉bhaariga bhaaturire-wo bhaajaaji abhandi ekumi na bhana.

Okwibhurwa kwa Yeesu Kiriisitu

¹⁸ Okwibhurwa kwa Yeesu Kiriisitu ꞉kwariga kuri kutya. Maryamu nyira Yeesu, ꞉aariga asandirwe obhuko na Yuusufu. Nawe bhunu Yuusufu ꞉aariga akyari kumaama nawe, Maryamu ˆnaagega inda ku-bhuturo bhwa Mwoyo Omutaakatiifu.

¹⁹ Yuusufu ꞉aariga ari murengeresi mu-meeso ga Nyamuwanga, ꞉ateendere okuswasha Maryamu, ˆnaaramura ati amusige bhujibhiiye.

²⁰ Bhunu Yuusufu ꞉aariga akyeeganiirisha kutyo araakore, maraayika wa Raatabhugenyi Nyamuwanga ˆnaamwijira mu-kirooto, ˆnaamubhwira ati, “Yuusufu, omuyiiri Dawudi, siga okuubhaya okugabhura Maryamu, kwa okubha inda iyo ayinyoorere ku-bhuturo bhwa Mwoyo Omutaakatiifu.

²¹ Kaaja okwibhura omwana mumura, riisiina ryaye urimutoga Yeesu, kwa okubha uyo niwe aryerusha abhaanu bhaaye okusooka mu-bhikayo bhyebhwe.”

²² Gayo ꞉gaabheeye kutyo, insonga riingʼana rinu Raatabhugenyi Nyamuwanga ꞉aaikire okuturira ku-muragi Isaaya rikuumire ati,

²³ “Ringira, omuyarajuma arigega inda, ariibhura omwana mumura. Riisiina ryaye bharimutoga Manweri.” Insonga ya riisiina riyo ni inu ati, “Nyamuwanga ari amwi na eswe.”

²⁴ Bhunu Yuusufu ꞉aaramukire, ˆnaakora kutyo maraayika wa Raatabhugenyi Nyamuwanga ꞉aamubhwiriiye. ˆNaagega Maryamu,

²⁵ nawe ꞉ataamaamire nawe okuyikira anu Maryamu ꞉eebhuriiye. Yuusufu ˆnaatoga omwana unu ꞉eebhuuywe, riisiina ati, Yeesu.