Maariko 9 - Iimuuma Iinyaaya

¹ Yeesu ˆnaagenderera okubhabhwira ati, “Kimari enibhabhwira ati, mu-bhanu bhayambaaye anu, bhariwo abhandi bhanu bhatarifwa, bhakyari kurora obhukama bhwa Nyamuwanga mbuuja na amanaga.”

Yeesu kaayinduka obhusu

² Bhunu ꞉gyaturire nsiku sansabha, Yeesu ˆnaagega Peetero, Yakobho na Yowana, ˆnaariinya nabho ku-kiima ekireera enu abhaanu bhatari. Bhakyari ku-kiima eyo, Yeesu ˆnaayinduka obhusu mbamuroraga.

³ Gingibho gyaye ngingʼarabhya muno. Ngibha nyeru pee okukira kutyo omufusi woonewoone mu-kyaro anu kutyo kaatura okugyesha.

⁴ Mbataka era mbarora Musa na Eriya mbaromaga na Yeesu.

⁵ Peetero ˆnaabhwira Yeesu ati, “Ee Mwiyigisha, ni kujomu ati kiri anu. Kyumbake bhiwuuna bhitooto bhisatu, ekimwi kibhe kyawo, ekimwi kibhe kya Musa na ekindi kibhe kya Eriya.”

⁶ ꞉Aaikire kutyo, kwa okubha ꞉aariga atakumenya erya okwaika, kwa okubha omwene na abheejaabho ꞉bhaariga bhayayire muno.

⁷ Niwe eriire ndiija, ndibhasibhiirisha ndibhatuura agati. Obhuraka mbusooka mu-riire riyo, mbwaika ati, “Unu ni mwana waani omwende. Mumwitegeereshe.”

⁸ Abheeyigira mbataka era Yeesu aasigaaye omwene, mbaringira enu na enu, nawe ꞉bhataarorere muunu wundi.

⁹ Bhunu ꞉bheekaga okusooka ku-kiima kiyo, Yeesu ˆnaabhagaanya ati bhaasiga okubhwira omuunu woonewoone ganu ꞉bhaariga bharorere, tari bharinde okwamba, okuyikira anu Omwana wa Adaamu aribha asuukire okusooka mu-bhafuuye.

¹⁰ Abheeyigira bhayo mbagwatira riingʼana riyo, mbabhuushaanya abheene na abheene ati, “Insonga ya okwaika ati, ‘Okusuuka okusooka mu-bhafuuye’ ni kiinuki?”

¹¹ Mbabhuusha Yeesu ati, “Kubhaki woori abheeyigisha bha ebhiraagiro bhya Musa abhaaika ati, Nyamuwanga keenda Eriya aaje okwamba Kiriisitu akyari kuuja?”

¹² Omwene woone ˆnaabhasubhya ati, “Nikwo kutyo iri, Eriya niwe kaaja okwamba insonga arooshe kujomu amangʼana goone kutyo. Ukasiga gayo, kubhaki Omwana wa Adaamu akaamiiywe mu-Makaamo Amataakatiifu ati arinyansibhwa muno na okujeerwa?

¹³ Nawe enibhabhwira ekimari ati, Eriya aramarire okuuja, mbamukorera amabhiibhi goone kutyo ganu bheendaga, rwa kutyo ꞉aakaamiiywe mu-Makaamo Amataakatiifu.”

Yeesu kaawosha omwana unu ari na ekiwi

¹⁴ Bhunu Yeesu na abheeyigira abhasatu bharya ꞉bhaayikire ku-bheeyigira abhandi, mbarora riisangi rya abhaanu ribheeyindire. Abheeyigisha bha ebhiraagiro bhya Musa ꞉bhaariga mbabhambashaanya nabho.

¹⁵ Bhunu abhaanu ꞉bhaarorere Yeesu, bhoone kutyo mbaruguura muno. Ayoayo mbamubhirimira, mbamukeesha.

¹⁶ Yeesu ˆnaabhuusha abhaanu ati, “Omubhambashaanyaki nabho?”

¹⁷ Omuunu owumwi mw-isangi rya abhaanu ˆnaasubhya ati, “Mwiyigisha, naareeta omwana waani ku-awe, awungirwe ekiwi, kimuyaaye obhujibhi.

¹⁸ Akaafu kikamuwunga, ekimugwisha ansi, ˆnaasooka riifiro mu-kanwa, ˆnaaruma gimba ˆnaayangarara. Naabhwira abheeyigira bhaawo ati bhakisooshe-ko, nawe bhaatamwa.”

¹⁹ Yeesu ˆnaaika ati, “Emwe orwibhuro runu rutari na bhwikirisha, niriikara na emwe okuyikira rusukuki? Niribharindirira kuyikira rusukuki? Mumureete anu.”

²⁰ Mbareeta omwana uyo ku-Yeesu. Nawe bhunu ekiwi ꞉kyarorere Yeesu, ayoayo nkigwisha omwana uyo ansi. ˆNaasarabhana, enu ˆnaasookaga riifiro mu-kanwa.

²¹ Yeesu ˆnaabhuusha esemwene mwana ati, “Obhurwaye bhunu ꞉bhwamwambireri?” ˆNaamusubhya ati, “꞉Bhwamwambire akyari mwana.

²² Akaafu ekiwi kiyo ekimugwisha mu-muriro na mu-manji insonga kimwite. Woori raabhe owutura okukora ryoneryone, nuukifwire ekigongo, ukisakire.”

²³ Yeesu ˆnaamusubhya ati, “Kubhaki owaaika ati, ‘Raabhe owutura’? Goone kutyo agatura okubha-wo, ku-muunu unu keekirisha.”

²⁴ Ayoayo esemwene omwana uyo ˆnaamura obhuraka ˆnaaika ati, “Eniikirisha! Nawe obhwikirisha bhwani ni bhutooto, nsakira nibhe nabhwo bhwafu.”

²⁵ Bhunu Yeesu ꞉aarorere ati esangi enene rya abhaanu ryamusangira, ˆnaagonya ekiwi kiyo, ˆnaakibhwira ati, “Awe! Ekiwi kya obhujibhi na obhusibhya bhwa amatwi, enikusiiga ati, sooka ku-mwana unu, na waasiga okumusubha-ko kweki.”

²⁶ Niwe ekiwi kiyo nkirira, nkigwisha omwana uyo ekitwe, nkigenda. Omwana uyo ˆnaasigara ayangaraaye rwa omufuuye. Abhaanu abhaafu mbaaika ati, “Aafwa!”

²⁷ Nawe, Yeesu ˆnaagwata omwana uyo okubhoko, ˆnaamwimusha, omwana uyo ˆnaayambaara.

²⁸ Bhunu Yeesu ꞉eengiiye mu-nyumba, abheeyigira bhaaye mbamubhuusha bhari abheene era ati, “Kubhaki eswe kyataamibhwa okubhirimya ekiwi kirya?”

²⁹ Yeesu ˆnaabhasubhya ati, “Ekiwi mbaga inu, kitakubhirimibhwa mangʼana ageene era, tari ubhe usabhire ku-Nyamuwanga.”

Yeesu kaaikira orwa akabhiri okufwa na okusuuka kwaye

³⁰ Yeesu na abheeyigira bhaaye mbeemuka okusooka eyo, mbatura Gariraaya agati. Nawe ꞉aariga atakwenda abhaanu bhamenye ati ari eyo,

³¹ kwa okubha ꞉aariga ˆneeyigisha abheeyigira bhaaye. ˆNaabhabhwiraga ati, Omwana wa Adaamu, kaaja okugurwa, ˆnaatuurwa mu-mabhoko ga abhaanu bhamwite, nawe bhakamara okumwita, arisuuka orusuku rwa akasatu.

³² Abheeyigira bhaaye ꞉bhataasombookeeywe ryoneryone rinu ꞉aariga ˆnaaika, nawe mboobhaya okumubhuusha.

Omukuru mu-bhukama bhwa mu-rwire

³³ Yeesu na abheeyigira bhaaye mbayika mu-musi gwa Kaperinawumu. Bhunu ꞉bheengiiye mu-nyumba, Yeesu ˆnaabhabhuusha ati, “Mwamubhambashaanyaki mu-njira?”

³⁴ Abheene mbajibhira, kwa okubha ꞉bhaariga mbabhambashaanya ati ni wuuya agati weebhwe unu aribha omukuru ku-bheejaabho.

³⁵ Yeesu ˆneekara, ˆnaabhirikira abheeyigira bhaaye ekumi na bhabhiri. ˆNaabhabhwira ati, “Omuunu unu keenda atangate ku-bhandi, niwe abhe omusiiti, na abhe omujuuma wa abheejaabho bhoone kutyo.”

³⁶ ˆNaagega omwana omutooto, ˆnaamuyambaasha agati weebhwe. ˆNaamufumbeera, ˆnaabhabhwira ati,

³⁷ “Omuunu woonewoone unu kaaramira omwana rwa unu kw-isiina ryani, kaabha andamiiye anye. Na unu kaandamira anye, atakubha andamiiye anye era, tari kaabha aramiiye Nyamuwanga, unu antumire.”

Omuunu unu atakurema Yeesu ari amwi nawe

³⁸ Yowana ˆnaabhwira Yeesu ati, “Mwiyigisha, kyarora omuunu ˆnaabhirimya ebhiwi mu-bhaanu kw-isiina ryawo. Eswe nkimugaanya, kwa okubha omwene atari mwiyigira weejaasu.”

³⁹ Nawe Yeesu ˆnaabhasubhya ati, “Musige kumugaanya kweki. Atariwo omuunu unu kaakora ebhiruguusho kw-isiina ryani, ˆnaamara kweki ˆnaanyaaika kubhiibhi.

⁴⁰ Omuunu akabha atakurema amangʼana geeswe, uyo ari ku-rubhaara rweswe.

⁴¹ Omuunu woonewoone unu kaabhayaana ekikombe kya amanji ga okunywa kwa okubha muri bhaanu bha Kiriisitu, enibhabhwira ekimari ati, Nyamuwanga arimuyaana ekiyaanwa kyaye.”

Yeesu kaagonya bhanu abhayabhya abheejaabho

⁴² Yeesu ˆnaagenderera okwaika ati, “Woonewoone unu kaayabhya owumwi mu-bhatooto bhanu abhanyiikirisha, nyakara omuunu uyo abhoyerwe orubhuyi mu-bhikya bhamusikye ebhusibha.

⁴³ Okubhoko kwawo kukakuyabhya, kubhuture-ko. Nyakara wingire mu-bhurame bhunu bhutakuweera uri na kubhoko kumwi, okukira okubha nago gabhiri, nuugenda nago mu-muriro gunu gutakusimá. [

⁴⁴ Giinyende ginu giri eyo, gitakufwa, na omuriro gwenda eyo gutakusimá.]

⁴⁵ Okuguru kwawo kukakuyabhya, ukubhuture-ko. Nyakara wingire mu-bhurame bhunu bhutakuweera uri na kuguru kumwi, okukira okubha nago gabhiri, nuweeswa nago mu-muriro gunu gutakusimá. [

⁴⁶ Giinyende ginu giri eyo, gitakufwa, na omuriro gwenda eyo gutakusimá.]

⁴⁷ Na eriiso ryawo rikakuyabhya, urisooshe-mo uryese areera eyo. Nyakara wingire mu-bhukama bhwa Nyamuwanga uri na insongo, okukira okubha na meeso gabhiri, kimwi nuweeswa mu-muriro gunu gutakusimá.

⁴⁸ Giinyende ginu giri eyo, gitakufwa, na omuriro gwenda eyo gutakusimá.

⁴⁹ “Nyamuwanga kaaja okutusha abhaanu bhoone kutyo mu-bhinyansho bhinu ebhisusanywa na omuriro, rwa kutyo abhaanu abhayaka omuunyu ku-nyama ya ekimweso.

⁵⁰ Omuunyu ni mujomu, nawe gukabhusha omuta gwago, omutuuramoki gubhe muunyu kweki? Mmbe, mubhe rwa omuunyu gunu gwikongeerere, mwikare muri na omurembe emwe abheene na abheene.”