Maariko 4 - Iimuuma Iinyaaya

Ekirengekanyo kya omubhibhi wa gimbibho

¹ Yeesu ˆnaamba okwiyigisha kweki abhaanu ku-ngego ya omwaro. Esangi enene muno erya abhaanu ndimusangira ayo. Niwe Yeesu ˆneengira mu-bhwato, ˆneekara muyo. Abhaanu mbasigara ku-murambo.

² Yeesu ˆnaabheeyigisha mangʼana maafu mu-bhirengekanyo. Mu-meeyigisho gaaye ˆnaaika ati,

³ “Mwitegeereshe! Omubhibhi ꞉aagendere okubhibha gimbibho mw-isambu ryaye.

⁴ Bhunu ꞉aabhibhaga, gimbibho egindi ngigwa ku-njira, giinyonyi ngiija, ngigirya.

⁵ Egindi ngigwa kw-itare anu atari na mayaru maafu. Ngimera bhwangu, kwa okubha amayaru ꞉gaariga gari matooto.

⁶ Nawe bhunu omuumwi ꞉gwabharire ngiwotoka, kwa okubha ꞉gyariga gitasirire emisi.

⁷ Gimbibho egindi ngigwa mu-mawa. Bhunu amawa gayo ꞉gaakurire, ngagiyiganya, ngitaamibhwa okutwasha.

⁸ Nawe, gimbibho egindi ngigwa ku-mayaru amajomu, ngitwasha amatwasho. Eyimwi niitwasha makumi gasatu, eyindi niitwasha makumi gasansabha, eyindi niitwasha egana rimwi!”

⁹ ˆNaamara ˆnaabhabhwira ati, “Omuunu unu ari na amatwi aga okuungwira, noongwe kujomu.”

Insonga ya Yeesu okwiyigisha mu-bhirengekanyo

¹⁰ Bhunu abhaanu ꞉bhaagendere, Yeesu ˆnaasigara na abheeyigira bhaaye ekumi na bhabhiri na abhaanu abhandi bhanu ꞉bhaariga bhamwikirisiishe. Niwe mbamubhuusha insonga ya ebhirengekanyo bhinu ꞉aariga abhabhwiriiye.

¹¹ ˆNaabhasubhya ati, “Emwe Nyamuwanga abhayaaye okumenya imbisike ya obhukama bhwaye. Nawe bhanu bhatakunseeta, goone kutyo enibhabhwirira mu-bhirengekanyo,

¹² insonga amangʼana gabhe rwa kutyo omuragi Isaaya ꞉aakaamire ati, ‘Bhakaringira, bharingire, nawe bhasige okurora. Na bhakoongwa, bhoongwe, nawe bhasige okusombookerwa, insonga bhaasiga okuuyindukira mbansubhira, nimbawonʼya.’”

Yeesu kaasomboora ekirengekanyo kya omubhibhi

¹³ Niwe Yeesu ˆnaabhabhwira ati, “Mutakusombookerwa ekirengekanyo kinu? Woori omuuja okusombookerwa kutiki ku-bhirengekanyo ebhindi?

¹⁴ Omubhibhi ni unu kaaraasisha abhandi Riingʼana rya Nyamuwanga.

¹⁵ Abhaanu abhandi abharengekanyibhwa na gimbibho gya ku-njira. Bhakoongwa era Riingʼana rya Nyamuwanga, Sitaani kaaja, ˆnaasoosha riingʼana riyo mu-mitima gyebhwe.

¹⁶ Gimbibho ginu ꞉gyaguuye kw-itare anu atari na mayaru maafu, egirengekanyibhwa na abhaanu bhanu abhoongwa era Riingʼana rya Nyamuwanga, mbariramira bhajomeewe.

¹⁷ Nawe bhatasirire misi, abhagenderera kabhaga kafuyi era, bhakanyansibhwa ku-nsonga ya riingʼana riyo, abhasiga obhwikirisha.

¹⁸ Gimbibho ginu ꞉gyaguuye mu-mawa, egirengekanyibhwa na abhaanu bhanu abhoongwa Riingʼana rya Nyamuwanga,

¹⁹ nawe mbajimibhwa na obhwiganiirisha iiguru ya obhurame na okwenda obhuniibhi na amangʼana agandi. Amangʼana gayo agayiganya Riingʼana rya Nyamuwanga, mbataamibhwa okugenderera okukora engʼana ryoneryone ejomu.

²⁰ Gimbibho ginu ꞉gyaguuye ku-mayaru amajomu egirengekanyibhwa na abhaanu bhanu abhoongwa Riingʼana rya Nyamuwanga mbariramira. Bhayo nibho abhatwasha owumwi makumi gasatu, owundi makumi gasansabha, owundi woone egana rimwi.”

Ekirengekanyo kya intara

²¹ Yeesu ꞉aabhabhwiriiye ekirengekanyo ekindi kweki ati, “Angu, ariwo omuunu unu kaakongeesha intara ˆnaayituura mw-ifuufu, amwi ati kuyifundikira mw-idebhe? ˆNaasiga okuyituura iiguru ku-kisiri?

²² Nikwo kutyo, ryoneryone rinu ribhisirwe, ribhisirwe insonga riije rituurwe abhweru. Ryoneryone rinu rifundikiiywe, rifundikiiywe insonga rituurwe abhweru.

²³ Omuunu unu ari na amatwi aga okuungwira, noongwe kujomu.”

²⁴ Niwe Yeesu ˆnaagenderera okubhabhwira ati, “Mwitegeereshe kujomu! Indengo inu omurengera abhandi, iyoiyo niyo mwone murirengerwa, na eyeemwe irikira-wo.

²⁵ Omuunu unu ari na ekiinu aryongesibhwa na unu atari na kiinu, na ekitooto kinu ari nakyo ariteesibhwa.”

Ekirengekanyo kya gimbibho ginu egimera

²⁶ Yeesu ˆnaabhabhwira kweki ati, “Obhukama bhwa Nyamuwanga obhurengekanyibhwa kutya, omuunu ꞉aabhibhire gimbibho mw-isambu,

²⁷ ginsiku ngitura, ˆnaawongeraga ˆnaaramuka, atakugenda okurora mw-isambu. Imbibho irya niimera, niikura, nawe omwene atakumenya kutyo ꞉yaakuraga.

²⁸ Insi eyeene niyo eyikora imbibho niimera okuyikira okutwasha. Okwamba eyimera riri enyansi erere, ndifuuka, ku-bhuteero nkibha-ko ekyangara kiriko ngano njomu.

²⁹ Ingano iyo ikakomeera, omurimi kaagega omuworo ˆnaagenda okugesa.”

Ekirengekanyo kya akabhibho akatooto

³⁰ Yeesu ˆnaabhabhwira kweki ati, “Obhukama bhwa Nyamuwanga kibhususanye naki? Kibhurengekanye naki?

³¹ Obhususana na akabhibho ka iiyaradaari. Raabhé kutyo ni katooto okukira gimbibho gyone kutyo ginu egiyambwa,

³² kakamera, akabha eti enene okukira emikubhi gyone kutyo mw-isambu. Akabha eti rya masagi manene na giinyonyi nginyoora imbewo ya okuwooyera-mo.”

³³ Yeesu ꞉aaikaga Riingʼana rya Nyamuwanga okuturira ku-bhirengekanyo bhyafu rwa bhinu, okuriingʼaana na kutyo ꞉bhaaturaga okusombookerwa.

³⁴ ꞉Ataabheeyigisiishe kyonekyone ataaikiiye mu-bhirengekanyo. Nawe, bhunu ꞉aasigaraga omwene na abheeyigira bhaaye era, ꞉aabhasombooreraga ebhirengekanyo bhyone kutyo.

Yeesu kaasiiga omuyaga na amabhooka bhitemekere

³⁵ Orusuku ruyo keegoro, Yeesu ˆnaabhwira abheeyigira bhaaye ati, “Kyambuke, kije ngʼambu.”

³⁶ Mbasiga riisangi rya abhaanu, mbeengira mu-bhwato munu Yeesu ꞉aariga ari, mbeemuka nawe. ꞉Gaariga gariwo na amaato agandi ganu geemukiiye amwi nabho.

³⁷ Mbataka era muyaga mwafu muno ngutiimuka. Amabhooka ngabhuma obhwato, amanji ngamba okwijura mu-bhwato.

³⁸ Akabhaga kayo, Yeesu ꞉aariga awongeeye iinyuma mu-bhwato, eesaguuyega ku-musago. Abheeyigira bhaaye mbamuramusha, mbamubhwira ati, “Mwiyigisha, utakwigana ati kirebhereeye okufwa?”

³⁹ Niwe Yeesu ˆneemuka, ˆnaasiiga omuyaga na amabhooka bhitemekere. Omuyaga ngutemekera, ndibha etore.

⁴⁰ Mmbe Yeesu ˆnaabhuusha abheeyigira bhaaye ati, “Kubhaki mwobhaya? Na woori mutari na bhwikirisha?”

⁴¹ Mboobhaya muno, mbabhuushaanya ati, “Kana unu nniga, ndora omuyaga na amabhooka ebhimuungwa?”