Maariko 16 - Iimuuma Iinyaaya

Okusuuka kwa Yeesu

¹ Bhunu Insabhaato ꞉yaawooye, Maryamu Magidarena, Maryamu nyiramwene Yakobho, na Sarome, mbagura ebhirange, bhagende okuyaka omubhiri gwa Yeesu.

² Ekya obhwoyo mu-ruguru, bhunu riisuubha ꞉ryariga ndyamba okuwuruka, mbagenda mu-mbiiyira ya Yeesu.

³ Bhunu ꞉bhaariga bhari mu-njira, mbaamba okubhuushaanya ati, “Niga unu kaaja okukisoosisha-wo riigina rirya ku-muryango gwa imbiiyira?”

⁴ Nawe bhunu ꞉bhaayikire, mbarora riigina riyo risiringisiibhwe, riri ku-mbarika, na ꞉ryariga riri enene muno.

⁵ Bhunu ꞉bheengiiye mu-mbiiyira, mbarora omumura wumwi eekaaye ebhuryo mu-mbiiyira, afwayega ngibho nyeru, mboobhaya.

⁶ Omumura uyo ˆnaabhabhwira ati, “Musige okuubhaya. Nimenyere ati omwagara Yeesu Omunaajareeti, unu ꞉aasungirwe ku-musarabha. Aasuukire, atariwo anu! Muringire anu bhaariga bhamumaamiishe.

⁷ Mmbe, mugende mubhwire abheeyigira bhaaye, munomuuno Peetero, ati ‘Yeesu aabhatangatira okugenda Gariraaya. Eyo niyo muraamurore rwa kutyo ꞉aariga abhabhwiriiye.’”

⁸ Niwe mbaruguura mbaamba okuyarara. Mbawuruka mu-mbiiyira, mbabhirima. ꞉Bhataabhwiriiye muunu woonewoone, kwa okubha ꞉bhaariga bhoobhayire muno. [

Yeesu keeyeresha ku-Maryamu Magidarena

⁹ Bhunu Yeesu ꞉aasuukire mu-ruguru Ekya obhwoyo, ˆneebhuura ku-Maryamu Magidarena, unu ꞉aariga amusoosiishe-ko bhiwi mungati.

¹⁰ Maryamu Magidarena ˆnaagenda, ˆnaabhwira abheeyigira bha Yeesu amangʼana, abheene ꞉bhaariga bhakyamuririra.

¹¹ Nawe bhunu ꞉bhoonguuywe ati Yeesu ariwo ni muworu, ati Maryamu aamurora, ꞉bhateekirisiishe.

Yeesu keeyeresha ku-bheeyigira abhandi

¹² Orusuku ruyoruyo, Yeesu ˆneeyeresha ku-bheeyigira bhaaye abhabhiri. Abheeyigira bhayo ꞉bhaariga bhari mu-njira, mbagenda mu-masambu. ꞉Bhataamumenyere, kwa okubha ꞉aariga ˆnaasusaga kundi.

¹³ Bhunu ꞉bhaamumenyere, mbasubha okubhwira abheejaabho, nawe abheene ꞉bhateekirisiishe.

Yeesu keeyeresha ku-bheeyigira ekumi na wumwi

¹⁴ Yeesu ˆnaamara ˆneeyeresha ku-bheeyigira bhaaye ekumi na wumwi. Bhunu ꞉bhaariga mbarya, ˆnaabhagonya ku-nsonga ya obhukomeeye bhwa emitima gyebhwe, kwa okubha ꞉bhaaremere okwikirisha amangʼana ga abheejaabho bhanu ꞉bhaamurorere bhunu ꞉aasuukire mu-bhafuuye.

¹⁵ Niwe ˆnaabhabhwira ati, “Mugende mu-bhyaro bhyone kutyo, muraasishe abhaanu bhoone kutyo Amangʼana Amajomu.

¹⁶ Omuunu woonewoone unu keekirisha ˆnaabhatiisibhwa, keerusibhwa. Nawe, unu atakwikirisha, ariramurirwa.

¹⁷ Bhanu bheekirisiishe, bharikora ebhimenyegesho bhinu kutya, Kw-isiina ryani bharibhirimya ebhiwi mu-bhaanu, bhariromera mu-nyaaika iinyaaya,

¹⁸ bharigwata ebhisoro, bharinywa kyonekyone kinu ekiita, kitaribheeta. Bharituura amabhoko geebhwe ku-bharwaye, abharwaye mbawora.”

Yeesu keemusibhwa okugenda mu-rwire

¹⁹ Bhunu Raatabhugenyi Yeesu ꞉aamarire okubhabhwira gayo, ˆneemusibhwa okugenda mu-rwire, ˆneekara ebhuryo ku-Nyamuwanga.

²⁰ Abheeyigira bhaaye mbeemuka ayo. Mbagenda okuraasha Amangʼana Amajomu woonewoone enu ꞉bhaagendaga. Raatabhugenyi Yeesu ˆnaakoraga emirimu amwi nabho, ˆnaabhayaana amanaga ga okukora ebhimenyegesho, okweresha ati amangʼana ganu abharaasha ni kimari.]