Maariko 14 - Iimuuma Iinyaaya

Ekiina kya okwita Yeesu

¹ ꞉Gyariga gisigaaye nsiku ebhiri era, ibhe insikukuru ya Ipaasaka, na eya emikaate ginu gitatunduuye. Abhashengesi abhakuru na abheeyigisha bha ebhiraagiro bhya Musa ꞉bhaariga mbaagara injira ya okugwata Yeesu bhwiyibhise, insonga bhamwite.

² ꞉Bhaariga mbaaika ati, “Isige okubha mu-kabhaga ka insikukuru, inkungu yaasiga okubha-wo mu-bhaanu.”

Omugasi kaasukira Yeesu amafuta

³ Akabhaga kayo Yeesu ꞉aariga ari mw-igunguri rya Bhetaaniya, mu-nyumba ya Simooni unu kara ꞉aariga ari mugenge. Bhunu ꞉aariga ari kw-igari ˆnaarya, ˆnaaja mugasi wumwi ari na inchupa irimo amafuta amarange ga bhugusi bhunene muno. Omugasi uyo ˆnaafundukura inchupa iyo, ˆnaasukira Yeesu ku-mutwe amafuta gayo okumukorera ekibharo.

⁴ Abhaanu abhandi bhanu ꞉bhaariga bhari mu-nyumba iyo, mbabhiiyirwa mu-mitima gyebhwe. Mbaamba okwaika ati, “Bhamura! Kubhaki omugasi unu kaanyamura amafuta ganu kutyo?

⁵ Amafuta ganu gakagusiibhwe dinaari magana gasatu, ngisakira abhatobhu.” Mbeesigiinyirira muno omugasi uyo.

⁶ Nawe, Yeesu ˆnaaika ati, “Mumusige. Ndora omumunyansha? Omugasi unu aankorera engʼana ejomu.

⁷ Abhatobhu muri nabho nsiku gyone kutyo. Omutura okubhakorera amajomu mu-kabhaga koonekoone mukeenda. Nawe, mutaribha na anye nsiku gyone kutyo.

⁸ Omugasi unu aakora rinu aatura. Aatangata okuyaka omubhiri gwani amafuta ganu insonga gwituure-wo okubhiikwa.

⁹ Kimari enibhabhwira ati, woonewoone anu Amangʼana Amajomu aga Nyamuwanga gariraasibhwa mu-kyaro kyone kutyo, riingʼana rinu aankorera ryone riritogorwaga, okuyiita omugasi unu.”

Yuuda Esikariyooti keekirisha okurya Yeesu injeejemo

¹⁰ Niwe Yuuda Esikariyooti, owumwi wa abheeyigira ekumi na bhabhiri abha Yeesu bharya, ˆnaagenda ku-bhashengesi abhakuru, okwaikana nabho, amugure.

¹¹ Bhunu ꞉bhoonguuywe amangʼana gayo, mbajomerwa muno. Mbamuraga okumuyaana giiyera. Niwe Yuuda ˆnaamba okwagara omwanya omujomu gwa okurya Yeesu injeejemo amugure.

Yeesu kaarya Ipaasaka na abheeyigira bhaaye

¹² Ku-rusuku rwa okwamba orwa insikukuru ya emikaate ginu gitatunduuye, orusuku ruyo nirwo iingʼondi ya Ipaasaka ꞉yeetwaga, abheeyigira mbabhuusha Yeesu ati, “Angu oweenda uriire aaki Ipaasaka, kigende kikukorere-yo ebhyokurya?”

¹³ Niwe Yeesu ˆnaatuma bheeyigira bhabhiri, ˆnaabhabhwira ati, “Mugende mu-musi agati. Omuuja okunyookana na omurume wumwi eetwikirega ekituumo kya amanji, mumuseete enu kaagenda.

¹⁴ Mu-nyumba inu areengire, mugende mubhwire omwene nyumba ati, ‘Omwiyigisha kaabhuusha ati, “Ekyumba kyani ekya abhagenyi kiri aaki? Eneenda okuriira-mo ebhyokurya bhya Ipaasaka na abheeyigira bhaani.” ’

¹⁵ Omuunu uyo kaaja okubheeresha ekyumba ekinene kinu kiroosirisiibhwe mu-nyumba ingerekeene. Mukiroosishe muyo ebhyokurya bhya Ipaasaka.”

¹⁶ Abheeyigira bhayo mbeemuka, mbagenda mu-musi agati. Mbanyoora goone kutyo gari rwa kutyo Yeesu ꞉aariga abhabhwiriiye, mbakora ebhyokurya bhya Ipaasaka.

¹⁷ Bhunu yaayikire keegoro, Yeesu ˆneengira mu-nyumba iyo, na abheeyigira bhaaye bharya ekumi na bhabhiri.

¹⁸ Bhunu ꞉bhaariga mbarya, Yeesu ˆnaabhabhwira ati, “Enibhabhwira ekimari ati, owumwi weemwe unu kaarya na anye anu, kaaja okundya injeejemo.”

¹⁹ Abheeyigira bhaaye mbaamba okusurumbara. Mbabhuusha Yeesu wumwiwumwi ati, “Toga nitari anye?”

²⁰ Yeesu ˆnaabhabhwira ati, “Ni wumwi weemwe, mw-ikumi na bhabhiri, unu kaakosha omukaate amwi na anye mu-rutubha.

²¹ Omwana wa Adaamu kaaja okwitwa, rwa kutyo akaamiiywe mu-Makaamo Amataakatiifu. Nawe, ariko ekiwi omuunu unu araamugure! Nyakara omuunu uyo atakeebhuuywe.”

Riigari rya Raatabhugenyi

²² Bhunu ꞉bhaariga mbarya, Yeesu ˆnaagega omukaate, ˆnaakumya Nyamuwanga, ˆnaagubhuturabhutura, ˆnaayaana abheeyigira bhaaye, ˆnaabhabhwira ati, “Mugege, omukaate gunu nigwo omubhiri gwani.”

²³ Kimwi ˆnaagega ekikombe kya iidivaayi, ˆnaakumya Nyamuwanga, ˆnaabhayaana, mbabhabhushaanya mu-kikombe kiyo bhoone kutyo.

²⁴ ˆNaabhabhwira ati, “Iidivaayi iyo nigo amaanyinga gaani aga iimuuma. Amaanyinga gaani agaaja okwitika ku-nsonga ya abhaanu bhaafu.

²⁵ Kimari enibhabhwira ati, nitarinywa kweki iidivaayi, okuyikira ku-rusuku runu nirinywa iidivaayi iinyaaya mu-bhukama bhwa Nyamuwanga.”

²⁶ Mbamara mbeemba orwimbo rwa okukumangya Nyamuwanga. Bhunu ꞉bhaamarire okwimba, mbeemuka, mbagenda mu-kiima kya Emijeyituuni.

Yeesu kaaraga ati Peetero kaaja okumwigaana

²⁷ Bhunu ꞉bhaariga bhari ku-njira, Yeesu ˆnaabhwira abheeyigira bhaaye ati, “Reero mu-ngeta, emwe mwone kutyo omuuja okunyiiruka. Rwa kutyo ikaamirwe mu-Makaamo Amataakatiifu ati, ‘Niribhuma omureefi, na giingʼondi girinyaragana.’

²⁸ Nawe nikamara okusuuka, eniija okubhatangatira okuja Gariraaya.”

²⁹ Niwe Peetero ˆnaamubhwira ati, “Raabhe bhoone kutyo bhakakwiruka, anye nitakutura okukwiruka.”

³⁰ Yeesu ˆnaamusubhya ati, “Kimari enikubhwira ati, reero, ingeta inu, insarigooko ikyari okukookoroma kabhiri, owubha waanyiigaanire kasatu.”

³¹ Nawe Peetero ˆnaagenderera okukomeeresha ˆnaaika ati, “Raabhe ni kufwa na awe, niikirisiishe okufwa, nitakukwigaana wuri!” Abheeyigira abhandi bhoone mbaaika kutyo.

Yeesu kaasaasaama Nyamuwanga mw-isambu rya Getisemane

³² Mmbe, mbayika mw-isambu rinu eritogwa Getisemane. Yeesu ˆnaabhwira abheeyigira bhaaye ati, “Mwikare anu, mu-kabhaga kanu anye enigenda okusaasaama Nyamuwanga.”

³³ Mbagenda na Peetero, Yakobho na Yowana, ˆnaagenda nabho areera kutooto, ˆnaamba okutitibhara muno, ˆnaanyanka mu-mutima gwaye.

³⁴ ˆNaabhabhwira ati, “Omwoyo gwani gusurumbaaye muno eniiyungwa muna kufwa. Mwikare anu, mukyeshe obhwire.”

³⁵ Yeesu ˆnaafugera-wo imbere kutooto, ˆneefumbika ansi. ˆNaasaasaama ku-Nyamuwanga ati, ikabha kujomu ku-Nyamuwanga, asige okuturira mu-kabhaga ka ebhinyansho kayo.

³⁶ ˆNaaika ati, “Abha,” insonga yeende-ko, Raata, “Amangʼana goone kutyo agaturikana ku-awe. Enikusabha usige okuntusha ku-bhinyansho bhiyo. Nawe itari kutyo anye eneenda, tari ukore kutyo awe omwene oweenda.”

³⁷ Bhunu ꞉aasubhire ku-bheeyigira bhaaye abhasatu bharya, ˆnaabhanyoora bhawongeeye ntiro. ˆNaabhuusha Peetero, “Simooni, uwongeeye? Waataamibhwa okukyesha nsa yimwi era?”

³⁸ Niwe ˆnaabhabhwira ati, “Mukyeshe obhwire musaasaame Nyamuwanga, mwasiga okwingira mu-masakyo. Omwoyo gwikirisiishe, nawe omubhiri gutakutura.”

³⁹ Yeesu ˆneemuka kweki, ˆnaagenda okusaasaama, ˆnaasubhira amangʼana garyagarya.

⁴⁰ Bhunu ꞉aasubhire orwa akabhiri, ˆnaanyoora abheeyigira bhaaye bhawongeeye ntiro, kwa okubha ꞉bhaariga bhari na ntiro nyafu muno. Bhunu ꞉aabharamusiishe, ꞉bhaariga bhatari na rya kumusubhya.

⁴¹ Yeesu ˆnaasooka kweki okusaasaama orwa akasatu, ˆnaabhabhwira ati, “Emwe mukyawongeeye, mukyamuunyire? Mmbe woori amangʼana geesa. Akabhaga ka ebhinyansho bhyani kari ayeeyi. Mwitegeereshe, Omwana wa Adaamu kaatuurwa mu-mabhoko ga abhakosi bha ebhikayo.

⁴² Mwimuke, kigende, kwa okubha omuunu unu kaaja okundya injeejemo angure, ari ayeeyi.”

Yeesu kaagwatwa

⁴³ Bhunu Yeesu ꞉aariga akyaroma gayo, ayoayo Yuuda, owumwi wa abheeyigira ekumi na bhabhiri, ˆnaayika na esangi enene erya abhaanu, bhari na ebhiraawa na gindungu. Abhaanu bhayo ꞉bhaariga bhatumirwe na abhashengesi abhakuru, abheeyigisha bha ebhiraagiro bhya Musa na abhakaruka bha Abhayawudi.

⁴⁴ Yuuda omuri wa injeejemo wurya, ꞉aariga abhayaaye ekimenyegesho, abhabhwiriiye ati, “Omuunu unu niraabhuusu, uyo niwe Yeesu. Mumugwate, mumusire mumwangariiye.”

⁴⁵ Bhunu Yuuda ꞉aayikire, ˆnaagenda ku-Yeesu, ˆnaaika ati, “Mwiyigisha!” Kimwi ˆnaamufumbeera ˆnaamubhuusu.

⁴⁶ Abhaanu bhayo mbagwata Yeesu.

⁴⁷ Niwe, omuunu wumwi mu-bhanu ꞉bhaariga bhari amwi na Yeesu, ˆnaasoosha ekiraawa kyaye mu-ruubhu, ˆnaabhuma omugaya wa omushengesi omukuru, ˆnaamusaawura-ko okutwi.

⁴⁸ Yeesu ˆnaabhwira abhaanu bhayo ati, “Kubhaki omuuja okungwata muri na ebhiraawa na gindungu muna omuuja okugwata mwifi?

⁴⁹ Ndora nsiku gyone kutyo naariga niri amwi na emwe, niiyigisha mw-ibhanja rya riiyekaru rya Nyamuwanga, nawe ꞉mutaangwatire. Nawe ganu goone kutyo agabha kutyo insonga ganu ꞉gaakaamirwe mu-Makaamo Amataakatiifu, gakuumire.”

⁵⁰ Niwe abheeyigira bhaaye bhoone kutyo mbamusiga ayo, mbabhirima.

⁵¹ ꞉Aariga ariwo mumura wumwi eebhoyerega ingibho ya iikitaani ˆnaaseetaga Yeesu. Omumura uyo woone mbamugwata.

⁵² Nawe, ˆnaabhataatika-ko mbasigara bhagwatiriiye ingibho, omwene ˆnaabhirima ari kinaabhi.

Peetero keegaana Yeesu

⁵³ Niwe abhaanu bhayo mbasira Yeesu ku-mushengesi omukuru. Abhashengesi abhakuru, abhakaruka bha Abhayawudi na abheeyigisha bha ebhiraagiro bhya Musa, bhoone kutyo mbasangira ayo.

⁵⁴ Peetero ꞉aariga ariwo areera ˆnaaseetaga Yeesu. ˆNaagenda, ˆneengira mw-ibhanja rya iinyumba ya omushengesi omukuru, ˆneekara muyo amwi na abhariisi, ˆnaabhiraga omuriro.

⁵⁵ Abhashengesi abhakuru na riibharaja rya Abhayawudi ryone kutyo, ꞉bhaariga mbaagara amangʼana ga okubheeyeresha Yeesu, insonga bhanyoore ekya okumwitira, mbabhurwa.

⁵⁶ Abhaanu abhaafu mbamubheeyeresha, nawe amangʼana geebhwe ngataashaanya.

⁵⁷ Abhaanu abharebhe mbayambaara, mbamubheeyeresha. Mbaaika ati,

⁵⁸ “Eswe abheene ꞉kyoonguuywe omuunu unu ˆnaaika ati, ‘Anye eniija okukambura riiyekaru rya Nyamuwanga rinu ryumbakirwe na amabhoko ga abhaanu, nimare niryumbake kweki kw-ibhaga rya nsiku esatu era. Rinu ritaryumbakwa na abhaanu.’”

⁵⁹ Goone kutyo ganu ꞉bhaaikaga, ꞉gaariga ngataashaanya.

⁶⁰ Kimwi omushengesi omukuru ˆnaayambaara agati weebhwe, ˆnaabhuusha Yeesu ati, “Ndora utakusubhya engʼana ryoneryone ku-ganu abhaanu bhanu abhakusitaakya?”

⁶¹ Nawe Yeesu ꞉ataasubhiishe ryoneryone. Omushengesi omukuru ˆnaagenderera okumubhuusha ati, “Angu, ni awe Kiriisitu, Omwana wa Nyamuwanga unu kaakumangibhwa?”

⁶² Yeesu ˆnaamusubhya ati, “Ni anye. Na omuuja okurora Omwana wa Adaamu eekaaye orubhaara rwa ebhuryo orwa Nyamuwanga owa amanaga goone kutyo, ˆnaaja ari ku-meere.”

⁶³ Niwe omushengesi omukuru ˆnaakarura gingibho gyaye, ˆnaaika ati, “Kikyagara kweki abharori abhandi?

⁶⁴ Mwoongwa abheene kutyo keerengekanya na Nyamuwanga! Woori, emwe omwaika kutiki?” Riibharaja ryone kutyo ndiramura ati eetwe.

⁶⁵ Niwe abhandi mbaamba okufubhurira Yeesu, mbamusibha obhusu, mbamubhuma ebhikundi, enu mbamubhwiraga ati, “Bharikisha niga unu aakubhuma!” Abhariisi bhanu ꞉bhaariga bhari ayo, mbamugega, mbamubhuma ebhisaanyi.

Peetero keegaana Yeesu

⁶⁶ Akabhaga kayo koone kutyo, Peetero ꞉aariga ari anja mw-ibhanja, emwaro wa ekyumba kinu Yeesu ꞉aariga ˆnaasitaakibhwa-mo. ˆNaaja mugasi wumwi mu-bhakosi bha emirimu abha omushengesi omukuru.

⁶⁷ ˆNaarora Peetero ˆnaabhiraga omuriro, ˆnaamumogorera ameeso, ˆnaamubhwira ati, “Awe woone waawuri amwi na Omunaajareeti wurya Yeesu.”

⁶⁸ Nawe Peetero ˆneegaana ˆnaaika ati, “Anye nitakumenya na kinu owaaika!” ˆNaasooka ayo ˆnaagenda ku-kishooko kya iinyumba iyo. Ayoayo, insarigooko niikookoroma.

⁶⁹ Omugasi wurya kweki ˆnaarora Peetero, ˆnaamba okubhwira abhaanu bhanu ꞉bhaariga bhayambaaye ayo ati, “Omuunu unu woone ari amwi nabho.”

⁷⁰ Nawe, Peetero ˆneegaana kweki. Nkatura-wo kabhaga kafuyi, abhaanu bhanu ꞉bhaariga bhayambaaye ayo mbabhwira Peetero ati, “Kimari awe woone uri amwi na abhaanu bhayo, kwa okubha awe woone uri Mugariraaya.”

⁷¹ Nawe, Peetero ˆnaamba okwifuma na okurayira, ˆnaaika ati, “Nitakumumenya omuunu unu omwaika!”

⁷² Ayoayo, insarigooko niikookoroma orwa kabhiri. Niwe Peetero ˆnaayiita amangʼana ga Yeesu ganu ꞉aaikire ati, “Insarigooko ikyari okukookoroma kabhiri, owubha waanyiigaanire kasatu.” Bhunu Peetero ꞉eeganiirisiishe amangʼana gayo, ˆnaarira.